Chin National Day (Chin Phunpi Ni ) Ka Hmuh dan

67th CND
Chin National Day hi Chin Mi hrang ahcun kan Ni sunglawi bik le Ni Hleice a si. Ziangruangah tilen Chinmi  zapi huap ton khawmnak hmaisa bik a rak si. Khat lam zawng ih kan rel a si ahcun Vau thla (20th Feb) kan pi le pu pawl ih hlan reipi ihsin an rak hruai kaih awknak dan thleng ih daan thar tuah ni a si. Senpi pawl ih an rak duh lo mi daan pawl tla cu;

  • Senpi pawl ih miuk siah an pek dan
  • Kum khat sungah innsang tin in Ni thum sung Mi-Uk anlo thlawhsak.
  • Ram an tawih ih sa an kah len A cawntit a sa trhatnak pek tengteng a ding.
  •  Mi uk te sin fa pawl in pehzom in Lal sinak peh vivo theinak daan pawl.
  • Lungawi thusim le Sa-aih tik ih Caw le Sia an thah tik ah Sa cawn pek..adt.

    Khuahlan sanmureng ihsin kan pi le pu ukawknak dan Lal dan pawl le an tlin lonak zahpi ih an ti trhat lo mi lawng cinken ringring cu a fuh thluh lo ding tiah an ci thlah tesinfahiang Cangan tui ka hmuh dan a si.Kaninnhnen India, Araka, Kawl Miuk bawi le Lal pawl khal hin ti fuh lo mi tampi an nei ve ko. San ziangmaw tizat kan pile pu pawl in an rak hman zomi ukawknak dan pawl lak ihsin Kan Christian Daan (Baibal) thawn milawmi pawl kha kan zir sin sin ding a thupi zet a si.Kan pi le pu pawl parah lungawinak  nei teng teng ding kan si.Ziangah tilen Mi an Uk daan a trha lo tuk kan ti trheu nan annih cun Khua Le Ram himdamten an rak kilkhawi thei asi. Tuisan ih Chin mi teh ziang kan bang?

    1948 Vau 20, ih Falam khua ah Chin miphun huap tong khawmaw in lairelnak an rak nei. Senpi 5000 an suak khawm miuk san cemter duhnak le duh lonak Vote an thla ih mipum 5000 lenglo sungah mi uk cemter lungkim lo mi (17) lawng an si.Cuih senpi pumkhawm lairel cat vekin mi uk can hruai awknak daan cu an rak hlon ih daan thar an tuahhnuah himi Ni cu, (1) Special Day, (2) Chin Union Day le (3) Chin National Day tiah ko sehla timi thu an suahpi ih zapi lungkimnak in Chin National Day ti asi. Cangan tui ka hmuh dan ahcun Chin National Day timi cu ka lung a kim lo deuh; ziangah tilen trhimnak ah Singapore in Singapore National Day timi an nei; cuih ni cu Talauk Ukmi sinak le miphun sinak in an luatnak ni a si. Kannih Chin Miphun cu zo sal hman kan rak si dah lo ruangah luatnak kan trul lo; Kanmah miphun Mi-Uk daan rem Ni sawn asi ruangahChin Union Day tiin ko sehla ka duh sawn.

    Chin miphun Zirnak Cawisang Pawlkom din ni 1918 Vau 20. Mirang kumpi uk duh lo dodal dingih an tonkhawmawk ni 1928 Vau 20. Mirang uk lungkim lonak langter ni 1938 Vau 20. Chin hotu le Mirang hotu pawl Chin Miphun le Ram hrang thu an rel  tlan ni 1940 Vau 20  le Pipu ukawnak daan hlon ni 1948 Vau 20 cu Chin Miphun Ni “ Chin National Day” ti in an ko lanta ih kum tin tuah dingin Chin Affairs Council Lairelnak in Oct. 9, 1950, Ni cu Fang-er puai  ahan nemhnget. Mirang pawl hrekkhat cun Chin National day hi an rak lungkim pi lo nasa.Ziangruangah tilen a tlun ih Singapore si dan ka relmi vek lawngah National Day timi cu hman dan a si.1956 ah Chin Affairs Minister Pu Za Hre Lian in Chin National day hi December 4 ah rak thleng a tum dah; a san bik le ziangruang bikah ticu theih fiangnak aum lo. Cule, cangan tui hmuh dan khal ah Chin National day ti hnak in Chin Union Day tin ko sehla san a nei deuh pei maw ka ti…Mirang ih National Day sullam (Meaning) le kan hman dan hi ziang a bang…ruat tlang dingah ka lo sawm duh a si. 

    Hminsin: HENRY SUITHANHRANG “KA LUNGKHAM CHIN” (pg. 50)

(Visited 606 times, 1 visits today)

Comments

comments

Comments

%d bloggers like this: