Chin MP Pu Nah Thang Vuinak Ah Tlangbawipi Hung Ngai In Telpi: A Thuanthu tawi

Van Bawi Lian

Falam peng aiawh Chin Ramkulh MP Pu Nah Thang, 75, pumpi natnak ruang ih April 23, 2014 zanlam sml 7:25 ih mual in liam san tu thlahnak cu April 24, 2014 sml 2:00 – 3:30 ah caanserh hman a siih, Falam khawtaw Canbari veng ih Thlanmual ah FBC Senior Pastor Rev. Deniel Vai Lian Zul in a vuiliam a si.

Chin ramkulh MP Pu Nah Thang vuinak ah Chin ramkulh acozah Vuankyi Chuk Pu Hung Ngai, Chin ramkulh Hluttaw president Pu Hau Khen Kham, Chin ramkulh acozah Tuuthing lam le ramri tthansonak lam Vuankyi Pu Nang Za Mung, Chin ramkulh Taryartuukyi Chuk Pu Kap Tial, Ramkulh Palik Bawi le Falam peng ukawnaklam hotu pawl tla an tel tiah Falam laihlum Bingbipar Laisak cun a facebook cahmai ah a tarlang.

A Thuanthu Tawi

MP Nah Thang zuk: CW

MP Nah Thang
zuk: CW

Pu Nah Thang hi Pu Hrang Lui (Falam Peng, Khup Leng) le Pi Leeng Leng (Falam Peng, Khua Val) te ih fapa nautabik a si. 11 October, 1939 ah a suak. Suahpi mipa 2 le nu 5 a nei. Dawt Hlei Men (Hakha peng – Sur Khua) thawn 1973 January thla ah an nei aw ih fapa pali (4) le fanu (4) an neiih tu 18, pa (6) le nu (12) a nei.

An fale pawl tla cu

–       Pa Cung Chin Thang & Soe Soe Htwe (US)
–       Pa Cung Za Mang & Lian Ri Khum (US)
–       Pa Cung Uk Peng & Horm Hlaing Phone (Lashio)
–       Nu Sui Ngun Tial & Kyaw Kyaw (Tonzang)
–       Nu Sui Hlei Tial & Ram Lian Sang (Falam)
–       Nu Than Sui & Vum Hrang (tleicia) (Bangkok)
–       Pa Thawng Lian Thang & Sui Par (Falam Peng, Tlortang)
–       Nu Than Za Cing & Rev Phun Zung (Kalay, Angteng) pawl tla an si.

Maymyo Phunsang tlawng in phun 10 a ong. 1961 ah Falam Co-orperative (Tamah) zung ah (LDC) cazi a rak ṭuan. Thlakhat fang a ṭuan hnu ah Health Assistant Training, Yangon ah a kaiih cutin 1964-1995 tiang Health Assistant cu Falam, Tedim, Tonzaang, Mindat, Kanpetlet le Thantlang peng pawl ah a ṭuan.

Ram le miphun duhdawt zettu le humhim duh zettu a si. A hnaṭuannak ih rinsan a tlaknak le zumtlak asinak pawl ruangah mipi khalin an duh zet fawn. 2010 Myanmar rampi hrilawknak ah CPP party hminin Falam peng aiawh -Myanmar rampi rorel innpi palai, Member of Parliament ah hril tlin a rak si.

Mindat peng ih Kannan Baptist Church Deacon khal term hnih a rak ṭuan. Mindat peng ih Pathian thu sim a ṭulzia pawl theiih rak ausuah pi tu a si ih a mai hmalaknak ihsin Methodist kawhhran thuthangṭha simtu pawl thawn thlanglam laitlang ah Pathian hna khal a rak ṭuan dahtu a si.

2013, January 15 ah sunglam damlonak ruangah Falam Sizung ah a um ih ṭuanvo neitu pawl ih ruahnak pek vekin yangon sizung lam pan in sibawi thiamsang sawn hnenah zohawknak an nei. March 6, 2014 ah Falam khua dam ten a thleng sal. Falam khua a thlen hnu thlakhat, April 15 ah a fa le pawl in nu le pa upat pek sunloihnak le thlawsuah dilnak le Pathian hnen lungawi thusimnak an nei.

Ruahlo piin April 16, 2014 ah a natnak a suaksal ih Falam sibawi-piin Inn ah a tuam hlawm. April 19, 2014 ah Kalay Myo Chian – Myeih Clinic ah tuamhlawm dingin Falam ihsin an suk. A natnak in damlam pan loin a rauh sinsin. Sibawi pawlih ruahnak pek vekin Kalay Chain – Myeih Clinic ihsin April 23, 2014 ah Falam khua lam an pan piih Falam khua a thlen tawkfang a cawlhdam hnu, tlailam sml 7:25 cekci Pathian hnen ah in cawlh san a si.

NB: A thuanthu tawi hi a ruak vuinak caanserh an hmannak ih an ngan mi cafang mallai rem ih ngansal mi a si.

(Visited 1,192 times, 1 visits today)

Comments

comments

Comments

%d bloggers like this: