Chin Mipum Ziangzat Tluk Kan Si Pei?

Chin ramkulhSalai V Bawi Lian

Leitlun hmun zakip ah Chin mi pawl kan thleng vivo ih Chin ramkulh sungih umtu mipi hrangah umhar za le lunglen za ngaingai a si. Cumi rualrual in kan Chin ramkulh hrangah thathnemnak le thansohnak tampi khal a suahpi. Netabik ih Chin mipum cazin zohdan vek a si ahcun Chin mipum leitlun ramtin ih thleng mi zat le laihlum, laitlang ih um hi zahret zik zuakzo kan si ding a zum um.

Burmese American Community Institute pawl in kum 2015, August thla ah America thleng Myanmar ram mipi hmin cazin laknak an nei. A hminsin dan ahcun kum 2000 hnu lam ih USA luttu hi mi 146026 an si tiah an rak hminsin. A hleice in 2014 hnu lam ih a luttu hi mi 13795 an si tiin an tarlang.

USA ih Myanmar mi um tambiknak hmun cu California le Indiana ah an siih mi 80, 000 le 20, 000 tluk an um tiah an hminsin. Cumi lak ihsi 14, 000 hi Chin mi pawl an si. 2009 kum Malaysia ka rak tlawng laiah, Chin Refugee Committee pawl thawn kan titi tlang ih cumi ah Chin mi zaten 40,000 lenglo kan um ding tiah in rak sim dah. An rel porh tla a si thei. Ziang khal va sisehla 30, 000 tluk cu kan um hrimhrim ko ding tiah ka zum.

Tu ih ka umnak Australia ah tla Chin mi hi nasa ngai te in kan pung ve ciamco ih tuhi mipum 12000 zik tluk an um ding tiah zum a um. Melbourne hi Chin mi um tambiknak a siih nisuahnak lam ah mi 5000 zik le nitlaknak ah 5000 kiangkap an um ding tiah zum a si. Khaw dangdang zate kom in 2000 tluk cu an um ding tiah zum a um.

Leitlun hmun zakip Canada, Denmark, Norway, Switzerland, Singapore, Korea le a dangdang khua pawl khalah Chin mi thahnem tawk zet fimzirnak, hnatuannak le a dangdang ih um khal an um cio ding.

Chin ram sungih mipum umzat hi 104628 kan si tiin Myanmar rampi mipum siarnak ihsin an tarlang. Institute of Chin Affairs pawl in Myanmar Census ih an tar mi vek ih an tar dan ahcun, Chin ramkulh ih mipi um tambik hrihnak cu Hakha a siih, tu-ah mipum 24926 an um ih a mah sangtu hi Mindat, 17042 le Tedim 13, 452, Falam 9092, Matupi 8,622, Thantlang 7,587, Paletwa 6,374, Kanpetlet 4,159, Tonzang 3,777, Rihkhawdar 3,604, Sami 3,032, Rezua 2,229, Cikha 732 pawl an si. Kalaymyo leh Tahan ah 130,506 an um tiin an tarlang.#

Comments

comments

2 Comments

  1. Chinland Harald ih sim mi Feb 12.16 post VCTH.NET sung ta thawn a bang aw lo. OR Na sim duh mi le na theih mi a Keith awlo ca ngan tu……..run research bet aw……

  2. Na source or research hman Lo si ding star sal aw…..

Comments

%d bloggers like this: