Chin Miphun Lakih B.A Ngah Hmaisabik Pahnih ih Zuklem An Tuah

Chin miphun lakih B.A ngah hmaisabik Pu Siah Luai le Pi Hlawn Kip Thluai ih zuk lem an tuah rero tiah thuthang kan ngah.

Himi zuklem hi Global Falam Youth Organization(GFYO) ih hohanak thawn tuahmi a si ih an theh le Falam B.E.H.S(1) ah an phun ding.

Pu Siah Luai hi 1938 kum Yangon phunsang tlawng in B.A a ngah ih 1940 ah B.Ed a ngah bet. Anih hi Chin pa raltha Pu Con Bik ih tu a si ih 1916 kum ah Taisun khua ah a suak. Cun ramkulh fimzirnak bawi tiang a tuan hi a kum (57) kim 1973 ah a thi.

Pi Hlawn Kip Thluai hi 1960 kum ah Yangon phunsang tlawng ah B.A a ngah. Cun Australia ram ih Teaching of English as a Foreign Language tla a ngah. Falam, Hakha, Mindat Sagaing le Pathein pawl ah kum (30) lenglo Cozah tlawngah Mirang ca a zirh. Tua ahcun US le Australia ram ih a fa le hnenah hlehka in a um. Pi Hlawn Kip Thluai hi Zahau le Hualngo miuk Pu Thang Tin Lian ih fanu a si.

“Mino pawl hrang zohthim tlak ro a lingmi an pahnih zuk kan tuah thei cu ka lungawi tuk” tiah GFYO sungtuan Salai Van Bawi Lian in Chin World hnenah a sim.

Himi zuk lem pahnih hi Falam puaipi hlan ah theh thei an beisei.

Pi Hlawn Kip Thluai in “Kan san lai ah nunau pawl tlawng kai in siang lo. Ka pa rori in tha in pe lo. Ka u le thal tlawng pit an ra tlun le Lai ca ngandan mal tete ka zir. 1947 ka pa a thih hnu ka u le pawl in tlawngkai in forh ih cutin tlawng ka kai thei” tiah Chin World ah a sim.

Laknak hram- Za Len

Comments

comments

Comments

%d bloggers like this: