Chin Mino Raltha Salai Tin Maung Oo

 

Chin Mino Raltha

Salai Tin Maung Oo

________________________________________________

Salai-Tin-Maung-Oo

Chin pa raltha Salai Tin  Maung Oo cu Asho Chin miphun Pu Mya Din le Pi Hnin Myaing tei’ an fapa a si. Unau rual pa 8 lakah fapa upabik a si. 1951 kum ah Taung Ngu khawpi ah a rak suak. Salai Tin Maung Oo cu a nauhak lai ihsin nu le pa ih rinsan mi a rak siih culawng si loin a nau le hrang rinsantlak fapa fel a rak si. A thluak a ha, a ruahnak a kauhhlei ah, leknaklam, artist le ramkhel lam ah tla a tha a tho zet. Nu le pa a unau a duhdawt ih miphun le ram dawtnak thinlung a nei. Khristian innsang an siih biaknak lam khalah peaw theizetmi innsang an si. Ca siar le zir a paihzet ih cumi sung ihsin a duh bikmi cu ramthu/ukawknak lam hi a si.

Salai Tin Maung Oo cu 1969 kum avoi 5 nak South East Asia Peninsula leh zuamnak ah Kawlram ai-awh in a rak tel. 1972, Phunhra a ong ih Yangon Phunsang Tlawng ah Zoology major in kumkhatnak a kai lai ah ramkhelnak lam a cangvaihnak ruangah 5 December 1972 ah ralkap in Innsein thawnginn ah an rak hren. Kum khat hnu, thawnginn in a suah ni 3 January 1974 hi Constitution of Burma Socialist Programme Party an thanh ni a si. Thawng a chuah hnu in a rak zirmi Zoology cu a kum thumnak in a peh saal.

1974 kum ah Chin Literature and Culture Committee, Yangon ah Secretary tuan dingin hril a rak si. Tusun ni tiang ah Chinmi ih kan uarzet ih kan miphun min keng dingih kan hmanmi “Salai’’ le “Mai” cu Chin pa raltha Salai Tin Maung Oo in CLCC Secretary a rak tuanlai ah a rak suahpi mi a si.

6 July 1974, The Socialist Constitution’s Article 9 ah thla 6 hnu ah buainak a suahpimi (General Workers’ Strike) A-luhtama Ta-paih ah Salai Tin Maung Oo, a rualpa Ko Aung Htoo le a tlawngkaipi rualpi hrekkhat pawl thawn University Campus ih a rak um mi tlawngta pawl le Inn Sein lamzin kiang ih a ummi Garment Cetzung, Biscuit Cetzung, Oah Gyin Cetzung tvk.. le acozah cetzung zate ih hnatuan pawl an kaihruai ih SC Article 9 do in hnatuantu (Labour) zate ih canvo (right) an rak hmuh theinak dingah zinzawh in Newin acozah hnenah ralthazet in an duhlonak an langhter.

Chin pa raltha Salai Tin Maung Oo cu, December 5, 1974, U Thant ruakvuinak thu ah duhlonak an rak langter lai ah ralthabik in cangvai ngamtu Tlawngta hruaitu (student leader) a rak si. Cuih buainak ruangah Ne Win ih ralkap pawlin kaih dingin an hawl ruangah ramhnaui ah caan mallai a rak thupaw hnu March 1975 ah Thailand ramri ah ram buainak ruangah a zammi ram duhdawttu hrekkhat hnenah a thupten a va lut ih ramsung ih Tlawngta nauhak pawl cangvaihnak ah thazaang an suah theihnak dingah lungrualnak (unity) a va tuah. Cuhnu ah Tlawngta nauhak pawl cangvaihnak cangter deuh dingin a ram sungah a kir saal. June 6, 1975 ih a suakmi (Second General Workers’ Strike) A-luk-ta-ma Ta-paih ah ralthazet in a va telpi saal. Culai ah kawl ralkap in “Wanted Lists” kaih ding hmin cazin an suahmi ah Salai Tin Maung Oo cu a tel ve ruangah July 1975 Thailand ramri ah a veihnihnak a tlan saal.

Thailand ramri ih a um lai ah ram buainak ruangah a tlan mi tlawngta nauhak pawl thawn The Underground Student Union an din ih Salai Tin Maung Oo cu lubik (president) ah an hril. The Underground Student Union in a tumbikmi cu ralkap cozah doh kha a rak si. Salai Tin Maung Oo le a rualpi  hrekkhat pawl cu ramsung ah kaih dingin hawl mi (wanted) an si. Anmah kaih ding ti heih cingin nunnak pek ngam in ramsung um tlawngta nauhak pawl hnenah ralkap uknak do tlang dingin November 1975 ah an kir saal.

1976, Salai Tin Maung Oo cu Thakhin Kodaw Hmaing Centenary tuahnak hrangah timhtuahnak an neih laifang ah March 22, (Hmaing Centenary nikhat hlan) ah Pu Ne Win ralkap nih a netabik an rak kaih hi a si. Thla 3 sung thawng an thlak hnu 26 June 1976 zinglam nazi 4:00 ah hri in an thlai that. Hritlai thih daan hi cuhlan ah a um dah kel lo mi tla a si. Culawng si lo Kawlram constitution ah tla a tel lamlam lo mi a si. Salai Tin Maung Oo cu kum 25 a si lai ah a ram hrangah nunnak a liampi hi a si. A thihlai ah ralkap hnen ih a cah tami tongkam cu “Nanmah ralkap kuttang hrimhrim ahhin ziangtik hmanah ka khuk ka bil dah lo ding”, “Ka mipum cu nan that thei ko ding, asinan ka miphun le ka ram hrangah ka lungput le ka ruahnak cu ziangtikhman ah nan that thei cuang lo ding”.

NB: (Chin Students’ Union, Delhi) pawl ih rak suah mi a si..

Sirhsan: angelfire.com, abfsu.net, Salai Tin Maung Oo Chunkhar ih nganmi ta lakmi a si.

Zaangfah dilnak: hi ca na siar theh hnu ah nangmah le na kiang ih um mi pa/nu hnenah siaherhnak thawn himi Ni hrangah  na sianzat te lawng si loin, a thu na theihmi hi a thei hrih lo pawl hnenah sim sawng vivo dingin zaangfah kan lo dil a si.8

(Visited 579 times, 1 visits today)

Comments

comments

2 Comments

  1. David TK Thang says:

    casiar unau pawl,

    salai tin maung oo cu ka upat zet.

    (theih lo thu ah) kanmah laimi (falam)mi sungah teh, hiti vekih zumnak ruangah thahtuar lole nunnak liamtu upat tlaak hi kan um ve lo maw? falam ttong ih Laimi ttongdang neitu pawl ih thuanthu siar hi, ka sia a rem tuk lemlo ih laklawh ka ti zet.

  2. Japan Thaihliak says:

    Falam milesa sungin tampi an um ko, pakhatte…ka lo sim dg…William Sa Lian Zam a si. Na thei duh ngaingai le nangmah ten zingzoi awla CT hmangin a thei hrihlo pawl hlawm ve aw mw..

    Jp

Comments

%d bloggers like this: