Chin Mino Pawlin Central Chin Pawlpi Hnuaiih Department Um Ding Ngen

 Salai C Lian Tahan:

July 27, 2014 simlam nazi 2:00 ah Central Chin Pawlpi le Chin Mino pawl cu kan miphun hrang ziangvek in ke kan kar a sile kan cak thei ding timi ruahsannak thawn Tahan, Immanuel Biak inn ah tonawk thurel tlangan an nei tiah thu kan dong. Hi thurel tonkhawmawknak ah Kalay Kabaw kiangkap ih um Chin mino 30 lenglo suak khawm in thurelnak an neiih Dr. Than Bil Luai le Sayakyi Dor Ro Thang (Aakhuai) pawl khalin an tel pi.

Tui tum ih lairelnak hi a liamcia kan dung ih, Lairawn Chin mino pawl Youth Center ih tonawk khawmnak ihsin thusuak mi; Central Chin Pawlpi hnenih Department pakhat vek ih din sak dingih ngennak an neih mi thuthawi pehpar mi a si. A suak khawmtu Lairawn Chin Mino pawl lak ihsin Salai Sen Ro Sang cun “hih kalay kabaw ih um mi kan Chin mino pawl pehtlaih awknak a mal tik ah thanso ding zat kan thang so thei lo tiah” thuhmaihruai simnak a nei.

Salai Van Thawng Thang (FPTP Hotu & LZP Central Secretary) khal cun “Kan Chin mino pawl pakhat le pakhat thinlung hmuh awknak, Miphun ai awh in mipakhat ding uh tivek ih in ti caan khal ah zo kan hril ding timi ah kan vaivuan thu le, kan Chin Mino in Organization pakhat kan tul thu” a sim. Salai Lal Sawi Ceu khal in “Chin pawlpi cu hmuntin ah kan ding vek nan, khawkhat le khawkhat kan theih awk lo tik ah kan Chin miphun thansonak ding karbak in phit” a si a ti. Cun Salai Cyrus khal cun “Pengdang pawl kan zoh vivo sehla Mino Organize tu pakhat cio an nei theh zo ih, ram khelhnak thuthawn siseh international level rori ih cangvang theitu Pawlkom pakhat kan tul thu” a sim.

Salai C.Lian khal in “Chin Pawlpi a ding ko nan siat ni that ni ah duhthusam ih kan hawlawk thei lo thu le, Nu le Pa pawl ih kan fa le kan tlah siang lo thu, cun ziangkim ah mino rori ih cangvaih a tul thu pawl” simrelnak a nei. Central Chin pawlpi lam ihsi khalin mino pawl hnenah thusuhnak le thuruah ronnak tampi a neiih mino pawl department khat vekih din ding lam hoi in thuhla a fehpi tuk in a lang lo. Asinan hi thutluknak pawl cu Chin Pawlpi EC lairelnak ah relsal a si ding ih cumi ih thutluknak vekin feh a si ding tiah Central Chin Pawlpi Vice President Pa Fung Nei Zam cun a sim.

Thuron upa lak ihsin Dr. Than Bill Luai cun, Mizoram Y.M.A pawl ih tuahtuannak pawl tahthimnak ah la in le, Central Chin Pawlpi hnuaiih Mino Department lawng silo in, Women Department tiang a tul thu, Organize thiamtu, kaihruaiawknak zirhtu kan tlaksam thu pawl relfiahnak a nei. Sayakyi Dar Ro Thang khal in, Yangon Falam pawlpi le Mino din thu ih a ton mi, an rak buai dan le lehhnu ih Falam Pawlpi Yangon pawl ih an siarawknak pawl cu tahthimnak lak in Mino Department kan tlaksam thu le, Chin Pawlpi hin Siatni that ni lawng siloin Register tuah mi hmang tangkai ih ram le miphun hrang hna a tuan vivo theinak ding a duhthusam paw simrelnak a nei.

maxresdefault

Comments

comments

Comments

%d bloggers like this: