Chin Mi Pawl Ih Kan Ngai Poimawh Mi ṬONGFANG Pa (5)

Van Bawi Lian

Chin mi hi mi malte, ba rawh zat lo te kan si tiin kan pupa pawl in an rak ti ringring. Cumi pawl cu thisen peh unau kan si titla in kan rel aw culci ṭheu.

Kan umnak ram pi ih fellonak le ṭhatlonak zar rak co ban vein kan ni Chin mi khalin huat mi le ngai thei remrem lo mi TONGFANG mallai cu kan nei. Tamzet cu a um ko ding nan cumi lak ihsin TONGFANG (5) te tiih keimai ka hmuh ton mi te hi tarlang ka duh.

Hi ṬONGFANG a um veten daite ih um thei lo, Ui meikang an rel bangih suup theilo Chin upa, mino tampi pawl an um. An ngai poimawhnak khal a ruang cu a um rori ti a fiang.

1) NO THAN KAP

64444_453712494710811_204422640_n-580x435

Pu No Than Kap

Pu No Than Kap ti vete in, Chin mi pawl ukthluh tu tivek ih rak ruat tu khal an rak um. CNF/A ti siatsuahtu, mi bum hmang, thuphan per, fala duh, hrokhawl tivek in a se zawng ih rak ruattu Chin mi tamzet khal an um ti cu a thuhla ngannak ih comment mi pawl ihsin a hmuh theih.

Pu No Than Kap hi ziang a va si khalle Chin mi hruaitu upa, kan ARSi rori a siih a tling ruangah Chin mi upa pawl le mino pawl ih thlarua a tham ban ticu a fiang rori a si.

A feh rero laimi Chin santhuanthu ih malh theihlo ding mi Ro, Dohthlengnak thisen, Chin mi pawl hnen ih tuhluttu lole, sulsutu PA pakhat cu asilo tiin kan ti thei hrimhrim lo ding. Curuangah a hmin hi kan ngai poimawh bik mi pakhat cu a si.

2) CNF/A

10322766_731943560182842_4581927052781120172_n

Pengṭhen hrek khat pawl in himi TONGFANG lole cafang an hmuh le veten, zuunphir thawn poksuak ih mi kap man tla an um ding ti khawp in rak tuarna tla an um lai ti, an thuhla pawl comment ihsi a lang fiang zet.

An thuanthu a thim le sen karlak ah a rang mal tete khal a um ko ding. An mah ruangah thisen a suak, kan neih rosiah kan cemral.. riahsiatnak burh cawk lo le caam riam cawk lo an parih burh ciamco duhtu khal an um ko ding.

CNF/A pawl hi ziangvek a va si khalle kan Chin mi, kan hmel hmang in khaitu pawlkom pakhat cu a silo tiin kan el theilo a si. An rim dangdang pawl lakah an par sun ih rim thaw khi theihthiam pi ding hi mipi pawl ih mawhphurhnak a si ve. Curuangah kan ngai poimawh mi pakhat cu an si rori ti a fiang a si.

3) REFUGEE

Zuk hi zoti theihlo mi Australia ram ih thleng mi zuk a si.  zuk ; abc

Zuk hi zoti theihlo mi Australia ram ih thleng mi zuk a si.
zuk ; abc

Deuhsawhnak menmen, ram dang fehtu pawl, thuphan lawnglawng rel, mi fel ngaingai khal um lo..tvp ih, mipi titi mi pawl theilo tu cu Chin mi ah an um nawn lo ding, ti khawp in kan Chin santhuanthu a luah neh. A poi ti ding maw, lungawi um ti ding khal relthiam harsa khawp in a um.

REFUGEE ti ruangah mi hel pawl le mi zuva, sabah, thuphan hlir relih um ding vek ih rak ruattu pawl khalin diknak tampi an nei.

Chin mi pawl Pathian ih thlawsuah in peknak zawn a si tiih rak pom rem thiamtu kal an um. REFUGEE timi um lo sehla tui dinhmun khal kan thleng lo ding tiih rak thlirthiamtu pawl an tam.

REFUGEE ruag ih ramleng suak pawl in Ramhrang an ṭuannak pawl zoh tikah REFUGEE timi ṬONGFANG hin Chin mi santhuanthu a thlenglo tiih el theitu an um pei maw!!!. Hitluk kan ngai thupi mi ṭongfang hi aw!!

4) RAM DANG (USA, AUST, DEN, CAN…)

6500524-Making-home-in-a-foreign-country-0

Ram dang thleng hmuahhmuah milian, mifim, cathiam, thil tithei le a ziang kim titheitu ih rak ruattu an va tamtak em!!tiih au ruangro caktu Chin mi upa le lungfim an tam zet ding a zum um. Chin mi pawl ih titi titam tertu bik le kan nunphung, kan ṭong, kan nunzia thleng danglam tu a si ve ta mio si!!

RAM DANG thleng ta poh men ruangah Chin ram khawpi, Falam lole Hakha, Thantlang ih um mi pawl tluklotu ziang maw tizat an um ti hi hngilh lo hram a tha. Ram dang ah um in nitin suntin zantin leitlun hi ziang ngai cekci ha maw a si! tiih a mumal theilo hi an tam.

Sumpai hawl rero nan a hman dan thiamlo khal an tam. Khawpi sungah um ve nan khawpi sungih thil um mi hmang thiam lo khal siar cawk lo Chin mi an um.

Cu mi rualrual in RAM DANG ruangah fimnak phun zakim, thiamnak phunphun, nunphung dang tiang in kan Chin mino, ṭhangthar pawl in an lak rero. Thlengdanglamnak in tuahtu, hi RAM DANG hi hmang thiam lotu hrang ah thihnak a si laiah nunnak zalam tluan in ti tleutu ih hmang khal an tam.

RAM DANG ti sal veten mitthli thawn, famdai cangtu, duhlai ṭang then tu pawl khal in an mitthli le zuun ngai thawn caan an hmang ve. Chin mi hnathlam ahcun RAM DANG timi in hmun ram a rak co ve hrimhrim cu a si.

5) PATHIAN THU

 

10991408_876334682431148_6869509354241999143_n

Santiluan ih a luan pi mi tu lai Social network, FB, Viber, WhatsApp …tvp ih lairil kaituk pakhat cu Pathian thu hi a si. Chin mi pawl in Pathian kan duh hleice cuang ah ruat sehla, a lungawi um lam cu a si ko!

Asinan Pathian thu ti men ih rak thlarau lehluan tuk mi pawl hi Chin mi pawl ah kan tam. PATHIAN THU tive ten, a ziang vek rau khal sisehla rak luangliam hluahhlo mai tla kan tam. A raang maw a dum tikhal hliah theilo khawp ih rau hi kan rak tam zet.

Chin mi lakih Pathian thu zirhtu le Pathian thu zirsang pawlih an zirh mi le an theih mi pawl, mai tappi kawm le mai inn pi tual hman lan thei fangfang, rongbawltu pawl in a diklo, nan rau lo tivek ih rak rel tu an tam. Chin mi ahcun a lar ce maw si ti ding khawp a si.

Rau ta pohpoh kan uar ih Pathian thu hmuahhmuah hi rau thluh cu a rak si lemlo a si hmang, tu nitiang Chin mi pawl Pathian kan duhtuk ruangah kan ṭhenaw darh thluh cu a si hi!!!! Curuangah Pathian thu cu Chin mi pawl ih ngaipoimawh bik mi pakhatnak a si.

 

 

(Visited 754 times, 1 visits today)

Comments

comments

Comments

%d bloggers like this: