Chin Missionary Pegu Khawpi Ah Thah tum

Chinland Today
24 January 2013

Pegu: Kan ram Pegu khawpi ih um Timothy Sui Lian Mang le thawi ṭuantlang, Chin mi missionary Lai Bawi le a innsang cun an khua ih Pathian thu an sim ruangah an khua misualpawl hmangin rampi acozah cun thah an tum tiin Chinland Today cun thu kan dawng.

IMG_5092

An Cennak Inn An Phom Siat Mi.

Pathian thu Thuthangṭha simnak a nei ih, mi piangthar an um cu phungki biapawl in an ngaih lo ih, a innhnen ih um misual pa hmangin a inn cu vei ziang maw tizat suasam in amah rori khal thah an tum rero tiin a hmun ih thuhla theifiangtu le hmutu cun Chianland Today hnenah a sim.

Lai Bawi tei umnak ding hrang inn hmun khal leisak a si zo nan, hi a innhnen misualpawl cun mi dang dang sawmkhawmaw in an inn dawlnak dingih an khawl cia mi leirawhcanpawl cem ko rori in an inn dennak ah an hmansak.

December 23, 2012 ah nasa ten an inn an phom ciamco ih anmah ngai cu an ngah lo. Cuvek ṭhiamṭhiam in January 14 zan le 17 zan ah an phom ciamco lala. ‘Ka ṭih tuk ih ka itthat ngam lo, kan pa thawn thla kan cam rero ih kanmah ngaingai cu in deng ngah lo’ tiin Lai Bawi nupi cun a sim.

Hi tiih an inn an phomsaknak khal hi an inn hmun lei mi ah Pathian biakkhawmnak nei dingih an ruahmannak ruangah le hi inn ihsin Pathian thu Thuthangṭha simnak an neih ding an phan ruangih an siatsuahnak san a si tiin thu kan dawng bet. Veng bawipawl le veng hnen upapawl khal an bum ih inn sak siang nawn lo ding roriin an tuahsak ti khal cun thu kan dawng bet.

An Cennak Inn An Phom Siat Mi.

An Cennak Inn An Phom Siat Mi.

‘Chin missionary hmangin Pathian in Kawl thlarau a rundam rero hi Setan a thin a heng tuk ti cu a fiang. Hmuntin ramtin ih um zumtu in missionary Lai Bawi le a sungkua hrangah thla cam cio uhsi.

‘Inn sak ngah rori ding cun Central lam ihsi thupeksaktu um lo ah cun tingaihnak um nawn lo ding dinhmun a si’ tiin hmin tarlang duh lo cun, Leitlun hmun tin ih um, Chin mi zumtupawl hnenah thlacampi dingin ngennak a nei. 

Lai Bawi hi 2005 June 6 ihsin Pegu khawpi ah missionary hnaṭuan a thok ih a thusimnak ruangah phungki biapawl khal Pathian zumnak ah an lut ih, mi 42 lenglo tui ni tiangah mipiangthar an um zo. Hi a thusimnak ruangih mipiangthar ah Pegu Division ih sihni khal a tel ih Pathian hminih tipil innak khal a pe.

Comments

comments

One Comment

  1. Thla kan lo cam sak.
    Pathian in na tuarnak a lo thei pi a lo um pi ringring.
    Nan nunnak hmang in Pathian sunlawinak lang vingvo hram seh!
    Thlarau hlo kai tu ah Pathian in lo hmang vingvo hram seh law….
    Na tuarnak a lak men a si lo ding.
    Thla ka lo cam sak.

Comments

%d bloggers like this: