Chin Kum Thar Singapore Ah Tluangten Hmangsuak

Feisen

Thuammawi hmuhlai

(Mai Daidim)
Kum tinten Chin Kum Thar tuah theu a si vekin tui’kum khal Singapore ih um Chinmi pawl cun October 5, 2014 colhni ah hlunghlai zetin an tuahsuak thu theih a si.

Pawlkom in hall tumpi an sangih Bus tumpi pathum khal an san bet hlei ah mipi a ra suaktu zaten suncaw Danpauh an do. Rinlopiin Khuallian pathum Salai Cung Aung , Salai James Run Cia Mang le Salai Hre Luai ti pawl in in ra telpi. Cun, Laisang khal ei cekco a si. Zingah Biakkhawmnak in caan hman a siih Tufang FCFS Pastor a simi Rev. Evan. Lal Eng Lian in thuthangtha simnak a nei. Pa Nung Lian Sum in Fanger thutawi simnak a nei ih Mai Dim Dim in Thangthatnak hla a sak.

Registre

Registration tuahtu pawl

Suncaw ei khawh thluh hnu ah Salai Rih Lian le Salai Bawi Uk ih hruainak in mipi zaten dingin kut le ke cangvaihnak thawn hlasaknak laam le herkual ciamco a sii. Cun Programme B a siih FCFS ih aw tha pawl hmangin Concert, thiamnak hleice nei pawlin thiamthil hmuhnak (Talent Show) le Chin thuam mawi hmuhnak (Traditional Costume Show) tiin caan hman a si.

A hmaisabik ah FCFS fala pawlin “Pualva Le Laimi” timi laam an laam. Cuthluh in Concert Part I a si. Concert hi thenhnih ah an then. Salai Sum Tluang in “Hring Dildel Lairam” timi hla thawn mipi awihnak a nei. Mipi lam au thawm cu a khawkin a khawk hrumhro. Cun, Mai Zo Nun Mawi in “Lai Nun Mawi” timi hla a sak. Sunzom in Mai Parte in “Nitlaknak Lamzin, Salai Philip in “Boihte” timi saknak le Mai Tenu hnen in “Hninghno Sal Seh” timi hla pawl thawn awihnak neih a si.

Cun, Chin thuammawi hmuhnak (Traditional Costume Show) a si. Thuam pawl cu ;
1. Zahau (Salai Liante & Mai Shalom),
2. Sim (Salai Sum Tluang & Mai Ni Te),
3. Laizo (Salai Philip & Mai Thluaite),
4. Hualngo (Salai Aa Pu & Mai Mawi Kuk),
5. HlawnCeu (Salai Henry & Mai Engte),
6. Hlawn Mual (Salai Lalte & Mai Hlute)
7. Zanniat (Salai Cung San & Mai Ni Ni)
8. Lente (Salai Tluanga & Mai Zo nun)
9. Hnem Rang (Salai Tlang Din & Mai Jun Moe)
10. Khualsim (Salai Ceute & Mai Tluangte) tiin hmuhnak neih a si.

Online vote peknak khal zarhkhat sung tuah a siih Cumi ih vote ngah tambik Popularity Award ngahtu Cu Salai Tlangdin & Mai Jun Moe an si. Himi Vote ngahtu hrang lawmman sponsored tu tu Chin Hill Company neitu Salai Van Thawng Lian tei’ nupa an si. Cun, thuammawi hmuhnak ih lawmman ngahtu pawl cu;
1st lawmman ngahtu Laizo thuam a siih (Salai Philip & Mai Thluaite)
2nd lawmman ngahtu Khualsim Thuam a siih (Salai Ceute & Tluangte)
3rd lawmman ngahtu Hnem Rang thuam a siih (Salai Tlangdin & Mai Jun Moe) ti pawl an si. An thiam in an zei hai nasa. Zoh an mawi lawlaw. Mipi au thawm khal a dai thei hrimhrim lo.

CyC

CyC pawl laam lai

Cun, Thiamthil hmuhnak in caan hman a siih a hmaisabik ah FCFS usher pawlin Sialkiringcin laam an lam. Cun, Sunday School nauhak pawlin “Lungthlitum” timi an laam. Zuamawknak a si vekin a pehpeh in feh vivo a siih, Mai Madin in santhar laam, hla fingkhat si loih hla fingli kom in 3minute
tlukih suahmi laam a laam. Dunglam mipi pawl an rak khir ve ciamco. Cun, Salai Pa Thawng in thuphuannak a nei. Thu tla mi a sut phah. Mipi cu hnih rero si ko. Cun, Sui Sui le Thian Thian in Aerobic hmuhnak an nei, Haikhawl Girl Generation pawlin Tulai Korea hla lar tak laam an hmuh ih Salai Ma Hum in hnihsuah sainak a nei. Mipi cu pum dom in, kur thlohthloh phah na, tawkhai tiangih hni na an si ruri. Hnihsuah sai a thiam lawlaw. Cun, CyC pawlin laam mawi zet hmuhnak an nei ih Haikhawl Sister pawlin tulai Korea hla lar laam an hmuh ve.

Jacob & Khuppi

Jacob & Khuppi

Himi thiamthil hmuhnak ih lawmman ngahtu pawl cu;
1st lawmman CyC
2nd lawmman Sunday School nauhak pawl le
3rd lawmman ah Salai Mahum ti pawl an si.

Concert II ah Mai Aa Hnem in “Tikhing Awnmawi” timi thawn mipi a awih, Himi fangah hla ngai phahin Laisang ei a si. Salai Liante in “Laimi Ka Si” timi a sakih mipi an rak turpakak ciamco ve nasa. Salai Croos Aung in “Thazang Ka Lo Pe Ding” timi a sakih Mai Van Helen in “A Hmui In Zoh Hlah” timi thawn mipi a awih hnu ah Salai Khuppi in “Na Um Cun” timi a sak. Salai Jacob in aw thuum nawn in a va sak bawm cun Mipi au thawm cu Singapore khawsung khuh thluh thei ding khopin a thang. A Netabik ah Salai Jacob in Lairam Ngainak hla a sakih cu khalah Khuppi in a bawm thotho. An pahnih an aw an hon suah tlang taktak cu Hall innpi a hnin thluh thei ti tluk a si. An tawkaw nasa mai. Parthi orhtu khal an ngah hnethnet. Khuallian a simi Salai Cung Aung le Salai James Run Cia Mang, Salai Hre Luai ti pawl khalin lungkim hmel pu zetin an zoh.

Cutin caan pawl hman a si hnu ah zuamawknak ih lawmman pawl peknak le thuthannak mal lai neih a si ih Pastor ih thlacamnak in caan tawp a si. Siang lo cingin Pawlkom ih san mi Bus Sungah ciapciap niapniap phahin Tlun zin panih feh a si.

Comments

comments

Comments

%d bloggers like this: