Chin Kum Thar [ Faang-er] Puai

By Rev. Run Cung Mang rcmang@gmail.com

Thuhmaihruai:

A hmaisabik le a saangbik ah caan ttha sunglawi in petu Pathian hmin ka thangtthat a si. Cule hi bangtuk in Laimi (Chinmi) kan nunphung (culture) kilkhawi in Chin Kum Thar Puai (Chin Harvest Festival) Faang-er Puai tuah thei dingih khuakhangtu le tawlreltu FPM-FRO hruaitu pawl parah lungawithu ka sim. Ahleice in thu tawi simnak caan in pekmi parah ka lungawizet. Chin Kum Thar (Faang-er) Puai thawn pehpar aw in tuni ih hruaitu le mipi pawl, thaisun ih kan miphun hruaitu ding tthang thar nonawn mino pawl in thuzet le nasazet ih kan ruah ding le hmailam ah sullam neizet le manneizet ih kan fehpi vingvo theinak dingah thu pathum in ka tarlang duh a si.

1. Lai Nunphung ih Muril (The Essence of Chin Culture)

Leitlun ah atu ahhin mipum trillion 7 (million thawng sarih) kan um ti’n an simthan. Cutluk ih a tammi leitlun minung lakah ting 10 (million 1) hman a kim ve lomi kannih Laimi (Chin) tla Pathian in a hnakkar ah in ten, in hminsin ih in kilkhawi ih tlunah mahte nunphung (culture): ttong (language), calai (literature) le nunphung thuamhnaw (cultural dress) nei thei miphun asilole hrinhnam pakhat ih in humhimmi hi lungawiza ngaingai a si. Cuihhlei ah mai’ nunphung hngilh lo ding le tesin fapar, thangthar nonawn san khat hnu san khat kilhim le pehzom ih sunsak thiam vingvo dingin nunphung sunloihnak faang-er puai tuah thei dingin lam in hruaitu Pathian ka thangthat ih atu vekin miphun zate huap ih puai tuah thei ding tawlreltu upa pawl parah lungawina tumpi ka nei a si.

Nunphung (culture) ih muril (essence) hi Ttong (language) le Calai (literature) hi an si. Tuni ah leitlun pumpi ih ngai le theih dingin Kawlram Radio awsuahnak ah Chin Program ih hman dingmi ah Mirang acozah ih kan ram in uklai ihsin a mawibik, a fiangbik, a tthabik tiih an rak hrilmi le Kawlram acozah khal in lungkim ih rak pompimi: Zung sung hman ding asilole Tlang ttong Official Language or Common Language Chin-Laizo ttong neitu miphun/hrinhnam kan si hi kan hrangah a sunglawi hleice. Himi zawnte ahhin kan milesa zate hnenah thungai hramfak ih cah ka duhmi cu: kannih cun, “Tlang ttong kan nei lo” timi ttongfang hrimhrim hi a sal ih sal hrimhrim lo ding a si. Ziangahtile leitlun ih nunphung saangbik neitu Mirang ih hril sak zomi le Kawl Acozah khal in tuni tiang hmang dingih a sianmi kan Ttong te hi a va sunglawi ve.

Tlang ttong hi atu lawngih sersuah tum ciamco dingmi a si lo; kan neih ciami kha kilkhawi sawn ding ttuanvo kan nei. Duh lotu pawl le iksik nahsuahtu pawl in midang ih au-aw cawng tahrat in “Laimi in Tlang Ttong kan nei lo” tivek cu ttong hrimhrim lo ding. Chin-Laizo ttong hi hrinhnam dang pawl ih a cohlan khal le an cohlan lo khal le kannih cun kan sunsak a ttul. Lai ttong lawng si loin Laica (Chinca) tla kan sunloih thiam ding a thupituk. Pathian in kan ttongmi kha Calai ih ngan le hminsin theinak dingah missionary Joseph Herbert Cope hmangin in pekmi a si.

Cule kan pipu san ihsin an rak neihmi nunphung thuamhnaw pawl tla sunsakzet le sunglawizet ih hman thiam tum ding kan si. Lai ttong thiam lo Laimi, Laica thiam lo Laimi, le Laimi sinak Lai Nunphung zahpitu Laimi um lo hram uhsi! Laimi kan sinak langternak ding hi ka titak le riruang in a si lo; kan sinfen le kan nuntu khuasak daan in a si nawn lo; kan thinlungput (Laimi ka si ti thei aw in diriam awknak); kan rin-umnak (Vapual symbol atak ih nunpitu) le Laimi le Laimi pehtlaih awknak ah Laittong le Laica hmang fekfo theitu si kan zuam pei.

2. Lai Kum Thar Puai (Chin Harvest Festival)

Leitlun ih miphun le hrinhnam citin in mah le nunphung nithlasiar daan an nei fingfing. Nunphung saangbik neitu Mirang (English) ih Nithlasiar (Calendar) cu leitlun mi zapi ih pompi le hmanpimi a si. Hih Nithlasiar thluntu poh cun leitlun huap in ram le acozah in kum (year) siarnak le hminsinnak ah an hmang. Thutthimnak ah tuni hi 2012 kum October thla ni 20 (Zarhte Ni) kan ti ih himi ni hi kan Chin Nithlasiar ahcun Faang-er thla ni (2) a si ve. Lairam Falam khua ah tla tuni ah Chin Kum Thar (Faang-er) Puai an hmang ve ti a si ih a va deng aw ngelcel ve, sim aw cia bangin ka ti rero.

Leitlun miphun tumpi le fate pawl khal in mah le nithlasiar an/kan nei cio ih kum hlun le kum thar hminsinnak puai kan nei fingfing. Thutthimnak ah Chinram le Chinmi original kan rak umnak ram a simi Kawlram (Burma) ih Kawlmi pawl in “Zilawng Puai (Water Festival) khi kum hlun thlahnak le kum thar hmuahnak a si. Leitlun ih mipum tambik Taluk pawl in an rampi le an minung umnak ramkip ah mipi theihpi ding tlakin “Taluk Kum Thar Puai (Chinese New Year) ti’n an nei, an hmang ringring. Cuvekin kannih Laimi khal in kan pupa san ihsin kan ram ih khurkhua (geography) umtu daan le nikhua um daan ih zirin pumcawmnak le tthansonak ah Lorianram an rak ttuan ih an ciciin thlaithlakmi an patthat le thlairawl tinkim an laak khawm thluh caan ahkhin khuazing pathian biaknak le Thlai thar Puai/Kum Thar Puai (Chin New Year) an rak tuah. Chin Calendar vek asile October thla hi Faang-er thla an rak ti ih hih thla ahhin thlathul zoh in Thlaithar Puai an rak tuah ttheu. Hih puai hi lungawithusim puai khal a si ih fanau neihmi pawl ih kumsiarnak khal a si cih.

Curuangah kan pipu pawl in sullam neizet le fekfelzet in a tikcu caan felfaizet in khiah fekfekmi a si. Tusan tthangthar nonawn pawl in kan hminsin ding le hmailam ah kan hramttohnak hmun Lairam ah siseh, leitlun hmuntin le ramtin Nisuah-Nitlak-Sak-Thlang hmundang khui ram le khui khua ih kan um khal le Chinmi pumkhat kan sinak langter in Chin Kum Thar Puai hi a tuah dingmi nithla bangrep tein hman thei zuam sehla a sunglawi sinsin ding ti’n ruahnak pek ka duh cih fawn.

3. Laimi le Christian sinak (Chin People and Christianity)

Chin miphun in Pathian nung kan rak theih hlanah nunphung kan rak nei felfai ve. Nitlaknaklam ram ihsin Pathian hnatuantu missionary pawl kan ram an ra thlengih Pathian Thu in sim, fimthiamnak in zirh, kan miphun in ra kaihruai tikah tuni ahcun Laimi zate zikzik cu Christian kan si zo. A nungmi Pathian a biatu miphun kan si hnu in kan thlarau-thinlung-taksa a kilkip in a tthangso. Khrih ih rundamnak thuthangtha kan theih le kan simzirh awk hnu thlaraulam lawng si loin fimthiamnak ah kan tthangso, kan thinlungput a saang vingvo ih kan nuntu khuasak daan (life style) a tthangso.

Bible in, “Bawipa kha an Pathian ah a neitu miphun cu mi thluasuak phun an si” (Saam 33:12) a ti bangin Lai miphun hi Pathian nung theitu kan si ruangah mi thluasuak phun kan si. Jesuh Khrih hi kan miphun in rundamtu le in cawisangtu a si. Khrih lawng hi kan ziangkim ih kan ziangkim a si. Khrih lawng hi kan theih tulbikm , kan zum le rinsan tulmi, kan ren ding le kan ruahsan ding umsun a si.

Thunetnak

Lai Nunphung ih laimuril a simi: Ttong le Calai kilhim le khaisaan ding cungcang ah siseh, khuahlan kan pupa san ihsin an rak neihmi Lai Nithlasiar Faang-er timi Thlai thar Puai kilkhawi le hman vingvo dingah siseh, Chin Culture ih mipi santiluan dunglam ih a dirthlatu si loin, Christian sinak langter le khaisan ding hi kumtin Chin Kum Thar (Faang-er) Puai kan tuah duhsannak ih thuhrampi si vingvo hram seh!

Dr. John Ong (Principal, Malaysia Baptist Theological Seminary) in, “Tuni Asia ram pawl kan thlir tikah Japan Christian pawl an tthangso rangzet, ziangahtile JJ: Jesus le Japanese sinak zahpi loin an kaihnget ruangah; Korean Christian pawl tla hi an tthangso nasa, ziangahtile cu KK: Korean an sinak an zahpi lo ih King of Kings a simi Jesuh Khrih kha an Pathian ih an kaihhnget ruangah a si; Singapore tla an tthangsozet, ziangahtile SS: Singaporean an sinak an zahpi lo ih Savior Jesus Christ an zumhnget ruangah a si; Chinese Christian pawl tla atu hi an tthang cakzet, ziangahtile CC: Christ cu Chinese ih rundamtu ih an kaihhnget ruangah. Kannih Malaysian ram ihj a ummi zumtu pawl tla MM: Messiah Jesuh (M: Money si loin) kha Malaysian rundamtu ih kan kaihnget asile kan tthangso ve ding ti’n a rak sim dah (2006) ti a si.

Cumi thu laakin tuni ah kannih Laimi/Chinmi pawl tla CC: Christ cu Chinmi ih Pathian ah; malte bi deuh in kan sim asile kannih Falammi pawl in FF: Faithfulness le Falam mizia kan kaihhnget dingah a thupizet. Kan nunphung ih muril hi Khrih (Christ) le Rinumnak (Faithfulness) a si ahcun atu hnakin kan hmailam caan ahcun Lairam ah siseh, ramdang ah siseh, kan umnak kipah Pathian ih zaangfahnak in kan miphun cu a kilkip: thlarau-thinlung-taksa daan ah kan tthangso vingvo ding.

(Visited 286 times, 1 visits today)

Comments

comments

One Comment

  1. Khui tawk Hmun le Ram kan thlen khal ah kan Nunphun le Calai kilkhawi vingvo uh si.

    Lungawi zet!

Comments

%d bloggers like this: