Chin: Kan No Tuk Lai

CHIN: KAN NO TUK LAI

(August 7, 2012)

Pu No Than Kap

Leitlun ram zaten ziangtik can talah hnamdang kut hnuaiah rak um dah thluh an si. Kannih Chin khal hnamdang kut hnuaiah vei hnih kan um: kan duh locing in veikhat, kanmai duhhrilnak in vei khat.

Kan duh locing in in uktu Mirang pawlin kan hrangih ro sunglawi in pek mi pahnih a um. Pakhatnakah, Roman alphabet (a, b, c) hmang in calai in tuahsak. Hiruangah Chin sungih hrin khat le hrin khat kan cangandan awlten kan siarsakaw thei. Pahnihnakah, Chinram tlawng zate ah tawng pakhat lawng hmang dingin Education Department in Maymyo conference (1922)ah, thu an relcat. Aungsan ih sim* bang in Chinmi hnampi in siter theitu hitluk thutha hi kanmah Chinpawl lala in kan kilhim in kan cawisang vivo thiam maw?

Kanmai duh hrilnak in in uktu Kawl in kan hrangah ro sunglawi in pek mi a um: Chin aiawh in tawng pakhat lawng Radio awsuah (Myanmar Broadcasting Service) ah in neiter (Tunai ih aw hnih an suah thu cu tanta hrih in). Chinmi hnampi in siter theitu hitluk thutha hi kanmah Chinpawl lala in kan kilhim in kan cawisang vivo thiam maw?

Tunai ah Chin State cozah in Chinram ah tawng pakhat lawng si loin panga (5) hmangin pengtin Tlawngpawl ah ca zirh dingin lai an rel. Kutzabeng in rak “haleiluiah”tu khal kan um. Himi zoh tikah, hnamdang uktupawl riangri in Chinpawl hnampi si thei dingin tawng pakhat hmantlang mi kan neih ih thupitzia le tulzia an theiban sawn ti a takin kan hmu.

Tui ni thawk talin Chinram tlawng zate ah tawng pakhat lawng kan zirh a thupi ti khua ruat thiam lo kan ti ding maw, ruat thiam nan mi huat phang kan ti ding maw, kanmah Chin uktu lala lak hmanah kan um lai tikah hnam fate le hrin fate lungput (tribal spirit or mentality)kan tanta thei hrih lo ti a lang. “Chin zate pumkhat si theinak le hnampi sitheinak a si ahcun, ka duh zet mi keimai tappi tawng khal ka tanta ngam” ti theitu kan mal tuk lai.

Tuvek kan si le Chinpawl cun naute thang thei lo kan hluan rero lai ding. Mah le mah doawk lam ih mitmeng kauzet, hnamdamnak lam ih mitcaw kan tam tuk lai. Hnamdamnak lamzin panih hruai theitu hnakin “ramthu ih mitdei hrih lo” uartu kan tam lai. Independence sim lo Federal ngah tlak hman kan si hrih maw ti pangnak a si. Ramthu le hnamthu ah kan lungput a no tuk lai.

______

*Angsan in,     “Myanmar ram sungah Kawl le Shan lawng hnampi tin kawh theih an si. Jinphaw (Kachin), Chin, Kaya, Kayin, pawl cu hnampi an si ban lo. Jinphawpawl cu sumdawnnak ruangah hnampi tiin kawh theih an si lo, Chin, Kaya le Kayin pawl cu tawng pakhat hmang an si lo ruangah hnampi ah ret theih an si lo,” tiin May 20, 1947 ah a sim.

Rihli group mailing ta lak mi a si.

(Visited 30 times, 1 visits today)

Comments

comments

One Comment

  1. Na ti dik na sa ka ruah ve dan si. Mi kan bang nak dg leh kan than so, kan lungrual nak dg ah cun tong pakhat kan hman a tul si. Rel men in Mizo Ram hi tong pakhat hmang an si ih, na thang so na sa tuk, India Ram sung men ah si lo in an lang ban ve ih an thiam nak a nep lo na sa. Na lung a rual ih Tong ci khat an hmang ka daw na sa.

Comments

%d bloggers like this: