Chin Hero Dr. Za Hlei Thang le Indy Chin Mipi Tonawnak

Dr Za Hlei Thang (MP)

ZLT: Lusei nunphung, ttong, calai ih ciahneh mi kan miphun pi pawl mai ttong hmang in zalen zet in kan nunphun kilkhawi thiamnak ding ah, cawisan thiamnak ding ruahsan thawn kum-1980-81 Tahan ah dinsuah a si.

Mipi: Ziang ruangah CNF lole Politik ah na lutsal?

Van Tuah Piang, Dr Za Hlei Thang, David Nun Tho, Kawl Lian

ZLT: Kawlram kum ziangmawzat Federal Ukawnak duh ah kan buai taal rero ih tubaite kawlram politik thlengawnak in boruak tampi a danglam ter. Kawl cozah cun tlangparmi hriamhrei kai pawl thawn rualremnak an tuah vivo tikah Chin mi hrang ih kan neihsun cu CNF lawng hi a si. Federal/democracy ukawnak  kan duh ruangah thawngthlak tuar le nunnak liam mi a tamzet zo.Tuhi lamzin thar zawh ding a um thar sal ruangah asiih Chin phun hnam tinkim an tel laiah CNF pawl ih sawmmi ah kei Chin-Falam pa ka telve lo ahcun timi lungput in le Chin State um mipi zaten thah hnemnak ruahsan in  CNF ka lutsal tin tawiten sim sehla nan theithiam ding ka zum.

Mipi: Supreme Council ih Chairman (CNF) na si bangtuk in ziangvek tuanvo na kai ih thuneihnak na nei?

ZLT: Supreme Council timi hi a thar dinsuahnak a rei hrih lo ih council member mipum-21 kan um ih keihi Chairman ding in hril ka si. Hnatuan ding cu Central Committee pawl in tuahmi dun le daan, thu hmuahhmuah tawlreltu ding a si. Central Committee ah phunhnam kim delegate kan zaten mipum-55 kan um.  Tuahtheinak lole thuneihnak tivek kha cu Confirmed mi dun le daan pawl a suak hnu ah ka lo simfiang ding ih mawitawk US President in Veto a neivek in a si ding cu zum  a um.

Mipi: CNF Emergency meeting tum ih a hmun tel lole meeting kai palai pawl hi Official ih sawm an si maw?

ZLT: Official tak in sawm cu asikonan an peng mipi huap palai an si le silo cu sim a har. Thil pakhat a um micu ram hnuai ih cangvaihnak le leipar ih cangvaih daan politik hi a bangaw lo ti kan theihfiang ka duh. Mindat, Matupi, Zotung, Zophei, Thangtlang……….tivek pawl an suak thluh deuh thawh ih Falam ihsin palai(6 or 7) kan suak ih Tedim ihsin palai(22) an rak suak. An kim thepthep ka ti ding.

Mipi: Ziangtin ceasefire thu a ra suak?

ZLT: Simzovek in kawlam acozah cun tlangpar hriamhrei kai lole anmah dotu pawl thawn rualremnak tuah duhnak an neih mile an tuah rero zo. Pu Zing Cung le Pu Sui Khar te pahnih in Thailand ramah kawlram Railway minister thawn an tongaw hnu ihsin himi thu hi a suak mi asi.

Mipi: Chin mi pawl hrangah ziang ruangah CNF thawn kherkher rualremnak an tuah? Ram hnuai um ve mi Zomi (ZRA) pawl thawn ziangah an tuah lo?

ZLT: Zomi ram hnuai um pawl cu India ram kuki, Thado tivek doawnak lawngah a telih Kawl ralkap a do dah lo. India cozah in an ralkap hniam bik ihsin sangbik tiang thlahlawh an pe. ZRA rori khal in kawlram ramkhelh thu an buaipi lo thu le an do lo thu an phuang. Cutikah CNF lo dang Chin ramsung ah hriamhrei kai an um nawn lo.

Mipi: CNF tlun ah mipi in kan rin lo emem ih unau Tedim pawl tla cun an ram ih Laison Office onn an duh lo thu nasa tak in an langter mi par ah teh Emergency meeting ah palai tambik an kai fawn ih thil umtu dan in sim thei pei maw?

ZLT: CNF ih sawmmi vek in palai (22) a tambik poksuak tu an si konan a kaitu pawl hi politik lam interest deuh pawl an siih mipi ai-awh ti ding cu a har. Cule ram pakhat ah Party pakhat lawng um ding timi a um lo.

Mipi: Nangmah rengreng teh CNF in an lo sawm tikah Chin-Falam mipi lole pawlkom tivek rawn mi na nei maw?

ZLT: Thu hman ka sim ding ih Mipi kan timi zopawl an si ding?? Pawlkom kan titikah ziangmi pawlkom? Chin Community/ Chin Pawlpi kan fehpi daan ahle politik thu a tel lo. Ka rawn ngaingai ding tiah teh mi paziat in ruahnak I pe ding? Ziang can a rei ding? A ol sambik in rel sehla thu rawn ding Politik party kan nei lo tikah rawn ding a um lo tuk ah a cang. Asinan, mi pakhat hnih hnen ah cun ruahnak vek ka lak mi cu a um ko.

Mipi: Chin-Falam mi in Politik party vek nei bang ta sehla Hruaitu ding vek in  tuanvo pek si bangsehla na cohlang thei kem?

ZLT: Atu CNF,Supreme Council ah ka tel ih ka tel theinak lamzin in onnsak ahcun Ka miphu Falam hrang ahcun ka man ringring asi.

Mipi: CNF pawl ih hmarua vek in an lo hmu mi thu ah teh simding na nei maw?

ZLT: CNF pawl ih hmarua fang ka siih Supreme Council le an sung ih ka tel ruang ih Chin mipi hrangah le ka miphun pi hrang siahnak athleng ding ahcun cawl ding ka man ringring asi timi nan thei ka duh.

Dr Za Hlei Thang (MP) Leh David Nun Tho

ZLT: Kan Chin mi tamsawn cu US vaih ding in kan ra, asinan keicu ka nupi faa le khal ka sim cia. Cumi cu kannih innsang cu vaih siloin kan tlungkir caan a kim le tlung kir ding ti hi a si. Ka innsang pawl an tlung kir le kir lo cu an thu ah va sisehla keicu tlung kir ding ka man cia ringring ih arei hlanah Pathian in tlung theinak caan i pe cing ding zum a um.

Mipi: Kannih mipi lam ihsin kan tuanvo hi ziang a si?

ZLT: Chin-Falam mi zaten in support thluh uh ka ti ngam lo, asinan US hman ah Indianapolis ih um mipi-400 in ka dung ihsin in support ahcun huaisen tak in ka miphun le ram thatnak ding ah tlang ka au vivo ding ih hmual anei nasa ding ticu mipi in kan thei ka duhsak.

Mipi: Chin-Falam mipi ih kan tlasam(Weak point) mile kan cahnak (Strong point)thucah duhmi na nei kan zum?

ZLT: Strong Point ahcun Chin-Falam mi pawl hi Creative Idea thatha a neitu kan siih asinan cupawl cu hnam dang mi hrang  ah kan canter ringring. A thoktu kan si ringring ih hnam dang pawl hi a neiah a cang ringring, ruah ding tampi a um. A besiabik micu “ A tak ih tuahsuak ding cu hreh emem siih mi soisel le midang thiltuah mi relsia kan hmangtuk mi hi a si.

Note: Nazi 4 sung komkhawmnak nei hnu a thaizing Chin National Day ah Honorary Guest din hmun in Indiana Chin Mipi 1500-2000 hmai ah thucah simnak a nei. Athai sun Sunday zing khawm khal Falam khawmnak biakinn le unau Hakha pawl biakinn lam ah thusimnak tawi nei vivo a si. Cule mipi thawn Press Conference CNF hotu pawl thawn Feb 19,2012 (Chin Center) ah neih a sibet. Midang tampi kom a duhzettu an tamzet konan caan a nei lo, Indiana Chin Pawlpi hi Priority ret in tonkhawm mi pawl an si. Indianapolis lawngah Chin mizate mipum 5000-8000 karlak um zo ding in zum a siih cumi lak sungah Falam mi mipum-500-800 karlak a um ve.

(Visited 166 times, 1 visits today)

Comments

comments

8 Comments

  1. Tuttum Dr. ZHT face to face kan kom thei cu, hna a ngam tuk. Tampi theih ttulmi le theih dahlo mi kan thei phah. Pakhat le pakhat ttanpi thiamaw a thupi tuk…..

  2. Dr. Za Hlei Thang hi a ttong a nem zet nan hmual a neiih miih thinlung a kuai nguahngo thei . A thusim ngai ah fimnak leh miphun duhdawtnak thinlung a karh sinsin ter. Laimi Politicians lak ah Zohthim tlak zet pakhat a siih Upatnak khal ka peek fawn. Pathian in a fimnak, a cahnak,a ruahnak leh a cangvaihnak ah malza sawm hramseh tiah ka duhsaknak sangbik ka hlan a si.

  3. Hi, CT

    Pu ZHT kawmnak cu siar a nuam zet.
    Kan Falam Laimi pawlin a tuah a tuan
    mi par ah nasa zet ih bawmnak le tha
    zang kan pek thei vivo a tha nasa.

    CNF pawlin Chair-Man an hril pek lai ih
    au kungko ( Pu ZHT hi Falam aiawh ah
    ka pawm lo ) cu e, kha e ti tong rero pawl
    tla a rei hlan ah a kawmtu le a zukpi tu a
    phur bik bik ah an tang saih bai .. hnih-
    suak um fawn si lungawi um phah fawn….

  4. hahaa Salai Mawia nava ti dik ve. Falam pawl cu kha kha kan si theu. Kan si phah rero lai ding. ASINAN KAN DAM SAL DING!

    Falam pa cu tawngkam nem, Midik, zangfahnak nei le mitaima in ti leh ding hi ka nghakhlap zet.

    Falam fa (a tamsawn) cu zianghman kan silo tikah, mi nih in uar seh ti kan duh tuk fawn, thil silo lo tuah kan hmang. Mi siatnak rel tla mah coisanawknakah kan hmang men. Cazir le Thil tuahthat lam tum ai in a thangso tum mi dirhthlak le siatsuah hi hminlarnak le mi uarnak ah kan ruat ring ring lai.

    ***Salai Optimistic, a lungawi um nasa. zangfahten in rak ngaikoi lo aw la, hivek kan upat zet mi Official interviewnak hi cu nan cafang tla hi fimkhur deuh in 1 te hman sual lo dingin prove reading ta uh la, kan nih a siar tu hrangah khal thansohnak asi vivo ding ti ruahsannak thawn.

  5. Kei cu Mawia ih thlirvekin ka thlir ve lo.
    CNF hotu an si ruangah Kawlram ah zalenzet in an luh thei ding ka duhsak,lut thei hram haiseh uh. Amahbelte hmai election ahcun CNF pawl in nehnak an co ding ka zum lo lawlaw.

    Cuhnakin tu ih dinglai party pawl in nehhnak an co sawn ding.
    CNF cu party pakhat a si ve ti bak lo ziang an tuah theimi a um ding?????

  6. Pu ZHT ih ttongmi ka duhtuk mite,”kan Falam hi creative idea,a thoktu kan si ring2 nan a tlaitluan ih neitu kansi ttheulo”, a poi theituk ngai,kan neihciami cu kan ta asi ih kan ttuanthok rero(creating) caan vek khaan daithlang loih ttuan vivo rero ding hi asi.

  7. @ Salai Thawm CNF hi local party thawn category khat ih rak ret men cu an mah khal in an lungkim lem ka zum lo. Tahthim ci khal an si in ka thei fawn lo.

    Party 1 vek men ih na hmu asi le cu ziangawk ti tha. Kan Bawipa, leitlun a um lai ah “a rah in nan thei ding” a ti kha. Kan thei leh ko ding.

  8. Van Nei Zing says:

    Mifim thiam le hruai tu tha kan nei thei vivo ih lungawi um z a si,Pathian in kan laimi (chin mi) te hi in hngilh siang lo thlawhsuah in pe zet a si.mahlawngte Pathian ih thlawhsuah hi kan hman thiam a tul in ka hmu.Mifim thiam kan tam vivo ih party thar le dangdang khal cu a tam vivo ding cu zum a um…a tha ko. Asinaan khat le khat do aw lo ten ruahnak le thu um daan pawl ruatkhawm in tangrual tlangin thinlung hmunkhat ten feh tlang thei le bawmaw thei tu si sehla ti a duh um zet fawn a si. Kan mipi le ram duhdawtnak dik le an thinlung khaikhawm thei ding cun tanrualnak dik a tul a si.
    zo party sungtel ka si ti hnak in khui party ih ka/na tel khal le a tha, a bangaw thluh ko tih in hrruai tu pawl in an tanrualnak ankaa an thlak thei ding hi a thupi zet…tin ka hmu; mipi lung an luah theinak dingah cun…

Comments

%d bloggers like this: