Chin Famine Concert hlunghlai zet in Melbourne ah nei tum

Laitlang ih Zinghnam le Rua par ruangih harsat tuartu pawl bawmnak ding hrangih concert (zaihla saknak) cu Australia ah ropi le hlunghlai zetikin Feb 14, 2009 ah neih tum a si. Australia khawpi hmun thum ah neih tum a si ih Melbounre, Adelaide le Perth ah an nei ding.

Laitlang ihsin hlasak thiam Cung Lian Thawng (Thawng Bawi) le Mizoram Youth Icon ih paruk nak tiang a rak ngah tu MiMi Lal Zam Liani le Melbourne ih Chin mi hlasak thiam pasarih (7) pawl in zaihla saknak an nei ding.

Cung Lian Thawng le Mimi hin Malaysia, Singapore le Thailand ah Laitlang ih Mautam harsa tuar pawl hrangah zaihla saknak an rak nei zo.

Australia, Melbourne ah Feb 14 zanah zaihla saknak nei ding an si ih, zaihla saknak an neih hlanah CT palai in zaihla sak tu ding pawl le awnmawi tumthiam pawl kawmnak le thusuhnak a nei.

Melbourne ih Chin hlasak thiam mi pasrih (7), Ngun Bor Chin, SB Kim Boih, Tin Thang, Khai No, Helon, Sang Uk Lian le Sang Ling pawl khal in zai hlasaknak an nei ding.

Mizoram ih Gospel hlasak thiam Van Lal Fela khal in hi concert nakah Teuh Lo Mai ti hla sak nak a nei ding. Fela hin hiti vek ih Chin mi le Zo hnahthlak lungrual te ih hlasak tlangnak le ttuan tlangnak kan neih theinak ah hmailam ih ruahsannak sangpi a neih thu a sim. Teuh Lo Mai ti hla a sak tum nak cu tulai Leitlun nun a siatral rero mi le sualnak pung sinsin ah thalai pawl in dung sip lo ih hmai lam nawr sinsin ding le, ttih ding kan si lo ti a duh san thu CT palai a sim.

Melbourne ih concert an tuahnak ding ih a hoha tu le zanghlei cawi ih ttuanvo a lak tu cu Hornbill Chin Association of Australia (HCAA) an si ih, Melbourne Chin Churches pawl, Chin Human Right Organization  (CHRO) le midang dang ih bawmnak thawn tuah mi a siin theih a si.

Tiket pakhat ah sungkua hrangah $ 25 a siih mimal hrangah $ 30 a si.

 

Zaihla saktu le awnmawi tum tu ih aan ka

 

Mimi Lal Zam Liani (Mi Mi)

‘Chin mi hnen ih hivek ih ka thiamnak suah ih ka bawm theinak ah bawm vivo ka tum’ a ti. Tui ttum concert nakah khal fing kua (9) sak a tum thu khal a sim. ‘Awn mawi tumtu pawl khal duhthusam, a mahlawngte zirnak hi duhthusam vekin kan nei man thiam lo ih, harsatnak le tlamtling lonak tampi kan nei men thei, a mahlawngte kan theitawp suahin kan zuam ih mipi khal hlunghlai zet ih awih ding kan tum, kan hlawhtling ding khal ka zum’ a si tiin a sim.

Cung Lian Thawng (Thawng Bawi)

Laitlang ih hlasak thiam Thawng Bawi khal cun, Melbourne ih um Chin mipi hnen ihsi bawmnak tampi a hmu thu le, hi tivek ih harsa tuar pawl hrangih bawm thei ding dinhmun ih a thiamnak a hman thei ding hi Pathian thlawsuah a si tiin a sim.

‘Mautam ruangih harsat tuar pawl an tuarnak theih pi ih neihsin pe ih thazang a ra petu hmuahhmuah hnenah le, duhsaknak thawn Ticket a lei tu pawl hnenah lungawi thu ka sim’ a ti ih, ‘Laitlang ih a um mi pawl in hmuhtheihlo tlang za dan in ka lo ngai tuk’ tiin a thinlung seherhnak le a duhsaknak, ngainak thu khal a sim bet. Melbourne ih concert an neihnak dingah Laitlang in an lo ngai tiih a mai hla phuah mi Tarnu Tahnak  ti khal sak a tum thu CT palai hnenah a sim bet. Thawng Bawi hin a mai hlaphuah mi zun 6 tel in hla fing 12 a sak ding.

Ngun Bor Chin (Hlasak)

Laimi harsat tuar pawl bawmnak ding hrangih hlasaknak ding caan tha a ngah hi kan Laimi harsa tuar pawl hrangah tthathnemnak a si thei ding a duh thu, hoha tu upa pawl hnenih a lungawi thu le mipi hnenah thazang suah ih theihtawp ih bawmaw ton cio dingih a duh pawl a sim. Canvo tha ngah vek in ka ruat aw ih, a rel dan ding ka thiam lo, ka phur zet’ ti khal cun a sim bet.

Daniel GS Mung Pau (Guitar lead)

Daniel cun hivek ih a thiamnak Lairam hrangih hmang thei dingih an sawmnak ah danglam zet ih a ruat awk thu le, ‘Mautam ruangih harsa pawl ka bawm theinak um sun pakhat ve a si’ a ti. ‘Duh vek cun zirnak ding caan cu kan neilo, caan harzet karlak ah hla pawl duhthu sam lo zet in kan zirnan, an hlasak ding mi pawl cu hla har an um lemlo ih tlamtling zet in kan tum thei ko ding’ tiin a sim bet.

Lal Ram Sang (Bass & Drummer)

Sangte cun tuitum ih an hlazirnak ah harsatnak tumpi cu a um lo tiin a sim. A mahlawngte hla an zirnak ahcun a duhthu a sam tuk lemlo thu a sim. Tuittum ih Melbourne ih concert an neih nak dingah cun an hlawhtling zet ding a zum ih hruaitu upa pawl ih an thiltuah dan khalah ‘An thiltuah mi hi ka lung kim zet’ tin a sim.

‘Hmai lam caan khalah hivek in kan Laitlang ih harsa a tuartu pawl hnenah kan theitawk cio bawm ding hi kan ttuanvo a si’ a ti hleiah Melbourne ih Laimi zate ih tawi awm pi cio ding a duh thu khal uar zet in CT palai a sim.

Van Biak Peng (Lead)

‘Harsatnak ciamco cu kan nei lo’ a mahlawngte hivek ih harsa tuar pawl hrangih ka thiamnak hmang thei dingih insawm nak parah ka lungawi ih, kei khal in ka theitawp suah in ka zuam ve. Kan ttuannak khal in Chin mi harsa tuar pawl hnen ih a thlen ding khal ka zum ih tthathnem nak pakhat te nei vek ah ka ruat aw.

 

Hoha tu pawl ih aan ka

 

David Ca Lian Thang

 

David Chin Famine Aid Concert ih pehtlainak le hoha tu hnen in.

 

CT       : Tui ttum concert nan neih nak dingah ziang tluk in timlamnak nan nei?

CLT     : Thla thum (3) lenglo caan pe in timlamnak kan nei.

 

CT       : Music tumtu pawl thawn teh harsatnak nan nei maw?

CLT     : Band pakhat vek ih um an si lo tikah mallai cu ahar deuh, amahlawngte theitawp suah in pehtlainak nak kan tuah ih, ziangkim a rak tlamtling vivo ko.

 

CT       : Hlasak tu ding pawl hnen in ziangvek harsatnak nan tawng?

CLT     : Si, a hlei ce in Laitlang lam ih ara ding mi le Mizoram ih a ra ding mi pawl an ra thlen hlan tiang hi cu thin a phang zet. Asinan Pathian zangfah nak in a ni kim hlanah felfai te in ziangkim hi Pathian in, in ruat sak.

Australia ih ramdang vek a si lo ih Visa ngah le a harzet fawn ih cu ruangah kan thin khal cu a phang zet.

An rat nak dingih in bawm tu Victoria Chin Baptist Church of Melbourne (VCBC) hnen khalah lungawinak tampi kan nei.

 

CT       : Zaihla sakthiam pawl hril dan dang nan nei  maw?

CLT     : Cuvek cun kan nei lo, kan laimi hlasak thiam cawisanak ah kan ruat ve. Sung Tin Par, Sang Pi, Zam Nu pawl an caan ol a um lo ih cumi lai te ih a awl um sun an si ruangah Mimi le Thawng Bawi kan kohnak khal cu a si ih, cun ka sim zo vekin Australia cu ram dang vek si lo in Visa ngah a har zet ih cunah, Passport nei cia pawl kan hril nak khal cu a si.

 

CT       : Bil Sung a ra ding tivek in kan thei ih a rat lo ih ziang tin si?

CLT     : Kan ni khal in a pawi kan ti zet. A rat lo nak cu Visa a hmuh lo nak ruangah bik ah a si ko.

 

CT       : Mizoram ihsin Mi Mi nan konak san a hlei ce in a um maw?

CLT     : Cuvek ih a hleice ih kawhnak cu a um lo, a mahlawngte unau kan sinak pumkhat ih kan ttuantlang theinak ih ka ruah nak le, thinlung hmunkhat te ih kan ttuan tlang ding kan duhnak pakhat a si. Mizo le Chin cu unau kan si, ziang hmuahhmuah hi hmunkhat te ah ttuan tlang ding kan si. Hi tivekin kan ttuan tlangnak ihsin pakhat le pakhat theihthiamnak le pehtlaihnak karlak a tha vivo ding kan zum.

 

CT       : Melbourne ih concert nan tuahtum nakah ziangtluk ih hlawhtling ding in na zum?

CLT     : Mi pi pawl khal in Laitlang ih harsa tuar pawl hrangah an thinlung an pe zet in ka hmu ih, kan hlawhtlingzet ding ti khal cun zumnak ka nei.

Mipi pawl ih Ticket an lei dan ihsin khal in nasa zet in an thinlung an pe ti cu ka hmu ko.

 

CT       : Tui tum Australia ih concert nan neinak dingah a lo bawm hleice tu an um maw?

CLT     : Melbourne ih um Kohran mipi pawl le, Lairam duhdawt u unau zate pawl an si ko.

 

CT       : Hlawh tling zet ih nan concert nan tuahtheinak dingah Chinland Today in duhsaknak kan lo hlan, na caan sunglawi in pek ruangahkhal kan lung awi.

CLT     : Kei khal ka lungawi.

 

Cung Hu Lian (HCAA President)

Tuitum concert neinak diangah mipi hin nasa zet in thazang pek nak in nei in ka hmu a ti. Harsa ka ti mi cu, mipi a theithiam lo tu pawl hneni Ticket zuar hi an theithiam lo ih a man khung vekah an ruat ih a har zet, a mahlawngte a thei thiamlo tu cu mi mal te lawng an si. Kan mipi hin thiltha tuah hi an fiang zet in ka hmu ih ka lungkhal a awi zet. Zatek 60 tluk cu hlawh tling dingkhal in ka zum’ tiin uar zet in CT palai a sim.

Van Kung Ling (HCAA – EC)

Hivek ih zanghlei cawi ih kan ttuannak ah hin, mipi pawl in theithiam lo in sawisel tu cu an um nan, kan ni cun Kan Laitlang ih harsa tuar pawl bawmtheinak ding pakhat vek ih kan ruah ruangah, Laitlang ih ruahsannak, tleunak pek thei ding ka zuam. Ticket zuarnak lam khalah harsatnak cu tampi a um ko nan harsat a tuartu le rawl ei ding a nei lo pawl thinlung mitthlam ih ruah ahcun zianghman hi har a um lo ti in uar zet in a sim bet.

 

 

Comments

comments

Comments

%d bloggers like this: