Chin Christian Youth Combine Service hmang

P141109_17.44Australia, Melbourne um Chin mi zumtu pawl cun a veikhatnak hrang Chin Christian Youth Combine Service cu Ringwood, Church of Christ, Emmanuel Christian Church pawl ih khawmnak hmun ah mi 500 lenglo in ropi le hlunghlai zet in Pathian thangthat tlangnak an nei.

‘Hiti vek ih a cangsuak theinak cu kan Pathian ih lam in hruainak ruangah a si, Kan Laimi in Pathian kan duhdawt zia le Khrih ah pumkhat kan sinak a tak in a lang suak a si’ tiin, Inn tek ttuanvo latu ECCMY hotu Pa Tling Za Thang cun a sim. Emmanuel Christian Church Melbourne Youth pawl in inn tek ttuan vo an la ih, khawm a thok ihsin a netnak tiang tlawmngai zet in mipi hmuah le mipi thlahnak an nei.

Bawi Khrih ah pumkha kan si.. timi catlang tar in zaihla thawn Pathian thangthatnak zanlam suimilam 5:00 ihsin 9:00 tiang an nei. Kohhran le Fellowship tin in a tum a te ti um lo in bangran ten hla fing thum cio saknak an nei fingfing.

‘Kan tong bangaw lo in, kan umnak bang aw lo hman khal sehla, Khrih ah pumkhat kan si, kan suahnak hmun Chin Ram a si, Jesuh in thlarua ah pumkhat si ding in duh’ tiin ECCM pastor Rev. David Khaw Lian Zam in thucah tawi simnak a nei.

Chin mi lawng si lo in, Australia zumtu mi ziang maw tizat khal in hi khawm awknak an tel pi ve.

Kan khawmnakah Pathian thlarua thianghlim in-in umpi, kan nuam aw rori, khawm ttheh hman ka thei manlo, tong bang aw lo hman khal sehla Pathian thangthat nak dingih kan zai aw phunkhat ih kan suak hi a ropi ka ti tiin fala Zirpui cun CT palai a sim.

Melbourne um Chin mi awnmawi tumthiam le zaihla sakthiam pawl khal hin hi Pathian sunlawih thangthatnak ah tel ve in awnmawi tumnak le zaihla saknak an nei.

A ra suak khawmtu Fellowship tin le Kohhran tin pawl cun hitivek ih Pathian hmunkhat te ih sunlawih tlang a ropit thu le, hmai lam khalah zuam vivo ding an duh thu an rel cio.

Melbourne ah Chinmi 2000 lenglo tluk an um ih nisuahnak le ni tlaknak tin hmun hni ah an then aw. Hi hmun hnih um pawl cun Kohhran le Fellowship tin mah le pawlkom cio ah khawm awknak an nei.

A veikhatnak Chin Christian Youth Combine Service Melbourne ih a tel cu Church le Fellowship pawl cu :- Emmanuel Christian Church Melbourne (Youth) ECCM, Victoria Chin Baptist Church (Youth) VCBC , Lai Christian Church Melbourne (Youth) LCCM, Melbourne Burmese Christian Church (Youth) MBCC, Melbourne Chin Church (Youth) MCC, Grace Community Church (Youth)GCC , Zotung Fellowship Melbourne (Youth) ZFM pawl tla an si.

Comments

comments

One Comment

  1. Amen !

    Pathian in Kan Lai Miphun zate’n hmun khat te ah le lungrual zet in a mah thangthat tu dingah lam in hruai sinsin hram seh !

    ka lungawi,

    Justin
    Indianapolis,USA.

Comments

%d bloggers like this: