Chin Calai Thleng Danglamnak

CHIN CALAI THLENG DANGLAMNAK

PART-I

(THANG LIAN MUNG)

Leitlun ih calai thuanthu kan zoh tikah calai hin tong tlunah thumaw in a thleng danglam ve theu ti hi kan hmu thei. Ziangvek calai hmanin cumi thleng danglamnak cu a eel thei lo. Cuvek cun kan Chin calai khal hi a thleng danglam ve rero. Calai pawl an thleng danglamnak hi amahten a rak thleng aw menmen mi a si lo. Asan tlangpi thu in pa (4) in kan hmu thei. Kan Chin calai thleng danglamnak khal cu cumi pa (4) ruangah a si. Cuih pa (4) pawl cu-

(1) Thiamlonak Ruangah
(2) Thelhpangnak Ruangah
(3) Tumtahnak Ruangah
(4) Zangzelnak Ruangah, pawl an si.
Himi pa (4) pawl hin calai pawl an thleng danglam ter daan tawi famkim in kan zohtlang ding.

(1) Thiamlonak Ruangah

Calai thleng danglamnak lakih a telmi pakhat cu cangan thiamlonak hi a si. Cucu cangan daan thei taktak lo le, thiam le theihfiang taktak lotu pawl ruangah a si. Ngan thiamlotu pawl hi mi menmen lawng siloin mi zirsang zetzet pawl tla an um phah theu. A poibik cu cangan daan hrampi theihfiang ta lo pi in calai lamah tanlak ve ciamco in mipi tampi ih cangan daan buaitertu ah tla an cang pang theu a si. Leitlun calai thleng danglamnak kan zoh asile calai lam zuam, calai humhalh le calai milesa pawl ruangah a si deuh theu.

Curuangah calai milesa pawlin kan cangan daan hi ralring ten ngan cio dingin kan zuam ding cu a si. Ca kan ngan tikah calai ngandaan hrampi pawl theihfiang ta tengteng a tul. Mai duhduh in cangan daan hrampi vek sisi loin phur le thawzet le, mai ngan daandaan hi hmanbik vekih neih in, pom lanta le midang zirhsawng, le cangan daan hrampi hman a hman lomi ah retngah pangnak pawl hi cangantu le calai milesa pawlin calai parih kan lungput ah neihsual a olte a si. Hivek ruahnak neih pang ruangah kan Chin calai khal tampi a thleng danglam zik rero hi kan mithmuh rori a si. Curuangah thiam lo le theih lo ruangah cangan daan le calai pawl a thleng danglam thei a si ti thei in kan calai hi thiam hmaisa ta tengteng ding a si. Cuthehah kan thiam lomi le kan thei lomi pawl kha theihfiang in a hlanih tansan kan laknak ihsin ralthazet in dungkir ngam ding khal a tul a si. Cuvek cu ‘Calai Pacangtha’ an si.

(2) Thelhpangnak Ruangah

Calai thleng danglamnak hi ngan thelhpangnak ruangah khal a si theu. Ca kan ngan tikah thelhpang a olte. Hivek ngan thelh ruangah calai thleng danglamnak cu zirsang mithiam sang pawl ruangah a si deuhbik. Ziangah tile mithiam zirsang lo cun ca a ngan tikah a thelh ih a sual pang ringring ih remsal a si theu. Asinan mithiam zirsang pawlih ngan sualmi le ngan thelhmi cu remsak ngam loin upatnak langternak ah cawngve ih nganve tla an si theu. Himi ngan sual le ngan thelh ruangih calai thleng danglamnak cu atu ICT kan san ahcun a mal ngaingai thlang. Asinan malte ten a um hrih thotho.

Veikhat veihnih mi ih ngansual mi tla cangan daan hmanzet vekin neihsual tla a olte. Nauhak pawl kaa ih auh ih ngan ter caan ahhin ngansualmi tampi a um theu. Zirhtu saya/ma pawlin cuih an ngansual mipawl cu a remsak a tul a si. Remsak lo a si ahcun nehhnu an fimzir theh tikah cuih an ngansualmi kha hman le famkimzet ah an neih dingih tlangau pi pang ding a si. Cuvek remsak lomi nauhak pawlin an upat tikah calai milesa an si leh tikah kan Chin calai siatsuahtu ah tla an cang riangri pang ding a si. Curuangah Chin calai hi nauhak pawl hnenih kan zirh tikah rinhmang le zummi parah thum aw loin calai ngandaan hrampi rori kha thiam ter dingin zirh ding a si. Cun upa pawl hrangah can kan ngansualmi kha ‘ka ngan thelh’ ‘ka ngan sual’ tiih remawk ngamnak tla neih a tul a si. Ngansualmi rori mi zapi hmaiih a hman tiin thih tiang tan ih kaihnget lanta duhtu kan Chin calai milesa pawl lakah kan tel pang ahcun kan Chin calai cu a van a siat tinak a si. Cun kan tesinfa pawl hnenih kan rohtami kan Chin calai in a thin a na ding a si.

Hminsin:Part-II nak pehsal ding.

(Visited 58 times, 1 visits today)

Comments

comments

One Comment

  1. Na canganmi hi ruah ding tampi mi a pe ih a thazet in ka thei. Part II kan rak thlir.

Comments

%d bloggers like this: