Chin Mino Calai Siangpahrang Salai Siang Lian Uk (Kianghrol) Le CT Camkhat

Mhingte
CT :: Tulai hi facebook online ah na ttang ttha zetih kan Chin mino pawlin calai kan buaipidan hi ziangtin na hmu?

Kh :: Mino pakhat cio ih zuamnak par ahcun a lungawi um zet ka ti. Poi ka timi pakhat cu hitivek ih mahte rak zuam rero mino pawl hi bawmtu, somdawltu, le kaihruaitu pawlkom tivek simaw, mithiam upa simaw, an um lo mi hi si. Finkhawm aw te’n hna ttuan tlang thei sehla tu hnakin kan thazang tla a cak ding ih, pakhat le pakhat kan tlamtlinlonak pawl zirh le silhkhah aw ton in kan tthangso lohli thei deuh ding tiah ka ruat.

CT :: Mihrek in Online ih cangan rero pawl an ngaisang lem lo ttheu ih himi ah teh ziangtin na ruat ve?

Kh :: Online ih ngan a si ruangah ngainepnak ding san cu a um in ka thei lo. A thuhla tthat le tthat lo, ca fehdan kalhmang, thuhla herhawidan tthat le tthat lo, cafangkom dik le dik lo a ngaihsak dan, a ca ah cangantui’ duhsaknak lungput ziangzat a lang tivek pawl hi online ah siseh, printed ah siseh, a thupi mi an si tiah ka ruat. Mipi parih duhsaknak taktak a neitu cu an ca ah a lang mei ko.

CT :: Mi tampi in calai na buaipinak a rei ruangah maw cu thei hlah, upa tukah an lo ruat ttheu ih ziangtik cekci in calai na rak buaipi?

Kh :: Mipi hnen ihsi ka theih sal mi ahcun upatuk ih in ruatnak san hi ka nganmi thuhla pawl ruangah a si deuh a bang. Upa lawng in ngan thei ding ih an ruah mi pawl ka ngan ruangah upa ih in ruat mi men a bang. Calai khawvel ih luh beisei in Lai ttong ih ca ka ngan thoknak cu 1998 in a si. Suah mi cahram ihsi siar cun calai khawvel ih ka luhnak hi kum 9 lawng a si lai.

English in Literature timi ttongfang lawng an hman can ih an kawhhmuh mi cu biazai, nunthuleng, thuanthucawn, calai manmual a nei mi essay, le calai fakselnak tivek pawl khi a kawhhmuh. 

CT :: Ziang thulu thawn khuitawk ah ca na rak ngan hmaisabik?

Kh :: Sutsuahmi ka nganca hmaisabik cu Vankau Arsi mekazin ih suahmi “Vankau Arsi” timi, le “Sweet December” timi bezai an si.

CT :: Ziangah ‘Kianghrol’ ti hmin ngelcel na pe aw?

Kh :: Calai khawvel ih ka luh zik lai ah kan calai khawvel cu a ttawnttai zet in ka hmu. Cangandan ih kut hnuai ah sal dinhmun vekih a um ka hmuh tikah mi ttawnttai pawl in feh theinak ding ih an rinsan mi, le Israel pawl Pathian ih a hruaisuah lai ah a kutcak langternak ih a hman ttheu mi kha kianghrol a si tiah ruat in Kianghrol tiih hmin ka pekawknak si. Tu hrih ahcun ka hmin pekawknak san tla ka phur neh hrih lo a si hi.

CT :: Cabu na siarsuak hmaisabikmi na mang lai maw? Zoih nganmi? Ziangtik kumah? Na siarsuah zo mi lakih na cinkenbik mi cabu?

Kh :: Phun Hrek ka kai kum ah Laica ka siar thiam cih ih, ka pa in Civic Ethics pawl Lai ttong ih a leh mi amai’ kutnganca pawl ka siar thok. Phun Khat ka kai ihsi cun kan inn ih um mi Lai ttong cabu pawl cu ka siar hai zo. Phun Hnih ka kai ihsin Kawl cabu pawl ka siar thok. Ka siarsuak hmaisabik mi cu ka pai’ kutnganca an si bik. 1993 kum ah a si. Siarsuah zo mi ih ka cinken hleice mi cu kum 12 ka ti lai ih Bible ka siarsuah kha sibik ding.

CT :: Cangantu pakhat in a theih hmaisabik ding ttul ih na ruahmi ziang a si?

Kh :: Cangantu pakhat cun ziangruangbik ah ca ka ngan timi hi a theihawk hmaisat ttulbik in ka thei. Mipipawl an lungawi, an tthansoh, an fim, an thiam ding duhsaknak ruangah maw, mai’ hmin thanter vivo duhnak ruangah maw, ruahdan pakhatkhat sungih mipi huilut duh ruangah maw, tivek a phunphun lakah amai’ hmuitin mi kha a theihfiang a ttul hmaisabik ding. A hmuitin mi a ttha maw ttha lo ti lam cu amai’ thu va si sehla maw.

CT :: ‘Calai Zirnak Hmaihruai’ timi cabu na nganmi ah khan ‘Ronmi Cabu Hrekkhat’ na timi ah Cahmai hmai nga ruk lai a kim ih Calai thu na hliakhlainak hi cu a rak men lo lawlaw ti a theihtheih zet. Himi pawl na siar lai ihsin cabu ih ngan ding na tumtah cia maw?

Kh :: Cabu ih ngansuah cu ka rak tum cia ko.

CT :: Atuih na biazai cabu hiteh cabu suah ding hrang rori ih na nganmi maw, na ngancia khawlkhawm ih cabu suah sawn na si?

Kh :: Cabu ih suah ding ah ti’n sonnet pawl ka khawlkhawm mi an si. Bezai fing 300 hrawng ka ngan mi ah sonnet hi a hlirhlang in a bu ih suah ding hrimhrim ih ka ngan mi umsun an si. A dang pawl cu a remcan dandan in lawrkhawm ih suah leh ding ah an si deuh.

CT :: Thuthang letdan khal CT hnenah in rak hlawm dah ih tulai kan Chin mino pawl in Thuthang kan letdan hi ziangtin na hmu?

Kh :: Hnattuan dang ttuan phah in tlawmngai ih ttuan kan si hai ih, cumi dinhmun ruah cun kan tthangso ve pam ko. Mi tamsawn cu  Professional journalist pawl ih thuthang ngandan level thleng ding cun kan zuam hrih deuh cu a ttul lai.

CT :: Leitlun Calai Romual ti’n Hebru, Greek, Latin, Italian, Tuluk calai thuhla pawl na ngan mi tla Calai Deirel blog ah kan hmu. Himi pawl hi miphun pakhat cio ih calai thuhla hman ah cabu pakhat daih vivo khop in an sau sikhawh, cabu ih suah ding in maw na ngan? Na ngannak san teh?

Kh :: Leitlun Calai Romual timi hi leitlun ih calailam dinhmun sang zet thleng zo miphun pawl ih calai sanphung (history) ngan vivo ding ih ka tumtah mi hrangah hmin ka pek mi a si. Cabu in suah thei sehla tiah saduh cu ka that. Ngan peh vivo ka tum ih, English le American calai sanphung thawn ka peh sal ding. Himi ka ngannak san cu miphun tthangso pawl in ziangtivek in calai sanphung an ngan, ziangvek an sunsak, ziangvek hi calailam ih thil thupi a si timi kha kan mipi in thei ve hai seh ti ka duh ruangah a si.

CT :: Calai Deirel blog thotho ih Thazang Laknak Cahmai pawl timi ahkhin Innsang, Thlaraulam, Duhdawtnak, Nun Tthansohnak tivek pawl hrangih thazang laknak cahram ttha phunphun na lehmi an um sikhawh, khimi khi teh cabu ih suah na tum mi an si maw?

Kh :: Thazang Laknak Cahmaipawl timi khi Chicken Soup for the Soul, Real Stories for the Soul, More Real Stories for the Soul tivek cabu pawl le journal le cabu dangdang ihta ka siar mi cahram lak ihsin kan Chin mipi in thei ve hai seh tiah ka duhsak hleice mi pawl ka leh mi an si. Cabu ih suah ding in bu thum-li daih a si. Suah ding ih saduhthah cu a si nan, lamzin a ong hrih lo a si hi.

CT :: Mi ropi pawl ih nunthuanthu khal cabu pakhat daih lai na ngan zo sikhawh, cabu in na suah lo ding maw?
Kh :: Mi ropi pawl ih nunthuanthu hi cu hihnak ih tam in ngan bet vivo ka tum hrih ih cabu ih suah ding lam khal ka ruat hrih lemlo. Pakhat tete’n journal le mekazin ih suah vivo ding ah ka ngan mi an si.

CT :: Linguistics khal kum li sung na zir zo ih, a lenglam khal ah linguistics lam tampi na hliakhlai ti kan thei. Cumi ah tulai ih kan buai mi O le Aw thu ih na simfiangdan theih kan duh?

Kh :: O le Aw thubuai kan timi hi Mirang in Spelling Reform an timi a si. Cafangkom Remsalnak kan ti thei. Cafangkom remsalnak timi hi cangan a neitu miphun hmuahhmuah in an ton mi thil a si. Tthimnak ah Hebru pawl cun a hlan ah awphei (vowel) an nei lo. Lehhnu ah an run bet mi a si. Leitlun ih calai dinhmun sangbik neitu French pawl ihsi thok in, German, Russian, English, Portuguese, Dutch tivek le calai dinhmun sang zetzet nei miphun dang pawl khal khin cafangkom remsalnak hi an rak tuah ringring.

Phunhnam tthenkhat cu an hlawhtling. Tthimnak ah German le French tivek cu hlawhtlingte’n an remsal thei. A hlawhsam mi phunhnam khal an tam thotho. Sumpai le thiamnak nasa zet ih hmang cing in a hlawhtling thei lo lakih langsarbik cu English hi an si ding a bang. O le Aw thu ah Chin Literature Forum lam hi remsaltu (reformer) an si. Himi cafangkom remsalnak thuhla hi bung peh cahram in bung nga tiang lai ka rak ngan dah ih, Thuthantu journal le Calai Deirel blog ah siar theih in a um ko. Miphun dangdang in cafangkom remsalnak an tuah ttum ih an ton mi harsatnak pawl thuhla theih vivo tikah thil umtudan pomthiam a ol vivo ttheu ih, hivek hi kan theih ttul mi a si ti’n ka ruat.

CT :: Calai khawvel ih lo hnukluttu hi ziangbik a si ti’n na ruat?

Kh :: Miphun hrangih ka tthathnem theinak dingbik ih ka ruah ruangah ka hril mi a si.

A tawi theibik in kan rel asile Literature cu thiamzung (art) a si ih, Linguistics cu dengfelphung (science) a si. A dang aw verver. Linguistics timi cu ‘dengfel zet ih ttong zirhliahnak’ a si. The scientific study of language an ti mei. 

CT :: Kan duhmi fala kan ngah thei lonak pakhat in in sim ve aw.

Kh :: Cumi cu keimah hi sim ttul sawn ka si si, keimah hman tu tiang hun tlangval ah e.. heeee.

CT :: Hla phuah le sak lam teh na luhcilh vivo tum maw?

Kh :: Hla phuah hi cu thinlung ih a lang can tete ah ka phuah hrih ko. Hlasak lam hi boruak umtudan ka thlir phahphah lai.

CT :: Love song dokalh tuk an um ih himi parih na hmuhdan mal lai in ruah aw?

Kh :: Santiluan tifawn in a theh tam vivo ding ih, an tthangharh leh ko ding tiah ka ruat. An tthangharh leh ding ti tikah love song an pom leh ding tinak si hran lo in, theihfeng mi pakhatkhat cu an nei leh ko ding tinak a si.

CT :: Calai phun tam zet lakah ziangmi bik hi na hazawhzawng (paih bik) si?

Kh :: Bezai hi ka paihzawngbik a si vek maw tiah ka ruat. Asinan nunthuleng, thuanthucawn le essay tivek khal hi ka paih thotho cu si ding, ka buaipi thluh hai ko.

CT :: Chin Calai khawvel ih cangantu pakhat dinhmun in hawmthawhnak le diriamnak na nei cek dingih mallai in hlawm thei kem?

Kh :: Kan misenpi ih calai hmuhdan dinhmun a niam deuh lai ruangah mai’ hazawhzawng si lo in, ttulnak sawn ruat ih cangan a ttul phah ttheu mi hi a cancan ahcun har ka ti ttheu. Asinan ka ngan thluh cun ka di a riam thotho ko. Kan ttong rori ih ca ka ngan hi cun ka di cu a riam deuh ringring ko.

CT :: Cabu timtuah lai mi lole timtuah zo mi simaw, timtuah tummi na nei maw? Ziangtik hrawngah na kutsuak a bu ih bu 3-nak hmel kan hmu thei ding?

Kh :: Cabu ih suah theih nganca cu ka nei hai ko. Sumpai lam harsatnak ruangah ka suah thei lo mi an si ih, a suah leh thei ding tikcu sapbai cu rel a ol lo.

CT :: Calai timi hi ziang a si ti tla mino pawl hrangah in sim thei aw la kan duh.

Kh :: Calai timi hi simfiangdan dangdang a um. Keimah cun calai timi ttongfang hi terminology ah ret in English ih Literature timi thawn tluk aw in ka hmang ttheu. Cumi ihsi ka ruahdan in ka rel pei. English in Literature timi ttongfang lawng an hman can ih an kawhhmuh mi cu biazai, nunthuleng, thuanthucawn, calai manmual a nei mi essay, le calai fakselnak tivek pawl khi a kawhhmuh. Biazai, nunthuleng, thuanthucawn tivek pawl lawng hi calai ih bulhrampi an si titu mithiam an tam zet ih, hipawl hi thlimthluai calai (aesthetic literature) ti khal in kawh an si.

Cun, zirhliahnak hruang dangdang khal hi anmah le an hruang sung cio ahcun calai hmin pu ih kawh an si ve ttheu. Tthimnak ah sanphunglam calai, cinungphunglam calai, siarkoplam calai tivek in. Hivek pawl hi cu anmah lawng cun calai si lo in, zirhliahnak hruang dang hranpa an si ih, mah le thupitnak zawn cio, mah le luhcilh mi zawn cio an nei. Calai kutsuak kan timi pawl thawn an luhcilh mi hruang a bang aw lo. Zabi 18 hnu hi cun nganmi ca hmuahhmuah hi calai ah an pom nawn lo. Calailam manmual a nei ttha mi kutsuak pawl lawng calai ah pom an si.

CT :: Literature le Linguistics danglamnak in sim thei pei maw?

Kh :: A tawi theibik in kan rel asile Literature cu thiamzung (art) a si ih, Linguistics cu dengfelphung (science) a si. A dang aw verver. Linguistics timi cu ‘dengfel zet ih ttong zirhliahnak’ a si. The scientific study of language an ti mei. Linguistics ih hmuitinbik mi cu ttong ih umtudan pawl zirhliah ding kha a si. Ttong umtudan luhcilhnak hi a hlawpi pathum a um. Ttong ih pianhmang (language form), ttong ih sullam (language meaning), le kiangkap boruak le ttong pehparawkdan (language in context) ti’n tthen a theih. Grammar hi linguistics ih hngettek pakhat a si ih, a sung ah  ttongfangphung (morphology), catluan kalhmang (syntax), le awluanphung (phonology) an um. Phonetics khal hi linguistics thawn a pehpar aw mi hruang a si ve.Linguistics thiamnak le thiamnak hruang dang kom ih zirhliahnak tuah mi pawl khal an um. Cumi pawl cu an thlurh mi ih zir in evolutionary linguistics, historical linguistics, sociolinguistics, neurolinguistics, corpus linguistics, psycholinguistics tivek ih kawh an si. Literature cu minung um thok ihsin a rak um mi a si ih, cumi ruah cun linguistics hi cu santhar thiamnak deuh a si. Zabi 18 hnu lam lawng ah nasate’n a ra tthangso. Calai cu a tlun ih kan rel zo mi kan ring mei pei.

Mah in zianghman theih mumal lo ruangah a thei ding ti ih zum mi minung pakhat maw pahnih maw, pawlkom pakhat si maw va rinsan ih, aukio ve mei tivek hi sal lungput a si. 

CT :: Kan Chin calai a khuhkheh(tthang thei lo) rei tuk hi ziangmi bik si a tthan dawntu siih na hmuh? Lailanin in ruahrelh thei kem?

Kh :: Himi cu sau deuh in rel ka duh. Kan calai a tthansoh ding phang ememtu miphun kut hnuai ah kum tamtuk kan um mi ruah cun besetuk cu kan si lo ti theihnak lai a um. Asinan tthangso thei si cing ih kan tthansoh theilonak san khal a um. Leitlun sanphung kan zoh tikah Dark Age tiah an kawh mi Thim San a rak um. Calai khawvel ah lut in kan rel asile, Dark Age lai ih phunsangtlawng le calai buaipitu timi pawl in an buaipibik mi cu grammar le cangandan a si. Dark Age hlan ah calai kutsuak taktak hliakhlainak phunphun a rak suak. Calai kutsuak taktak timi cu khami lai ahcun bezai le thuanthucawn an si. Himi lai ahcun nunthuleng a rak suak hrih lo. Asinan Dark Age lai ahcun cuvek in hmunram a run co nawn lo. Dark Age a cem hnu lawng ah hmunram a run co.

Calai kutsuak taktak hnakih grammar le cangandan tivekpawl mipi le mithiam pawl in thupi sawn ih an ret sung ahcun calai tthansohnak a um thei taktak lo ti theih a si. Ziangahtile calai timi cu cangan um hlan ihsin a um zo mi a si. Tthimnak ah kaa ih simsawngawk vivo mi Simsin Calai kan timi Oral Literature tivek kha. Cangan nei lo miphun an um nan calai nei lo miphun an um lo ti theih a si. Ziangahtile tontuarnak nei lo minung um theih a si lo ih, minung cun cui kan tontuarnak kha ca ih ngansuah kan thiam lo a si hman ah zatlang hla (folk song) in simaw, thuanthu in simaw kan phorhsuak ttheu. Calai kutsuak hi miphun pakhat in ziang a ruat, ziang a tong, ziangvek a duh in a ngaina tivekpawl kha a sungmuril tiang luhcilh ih phosuaktu a si ruangah calai cu miphun pakhat ih thlalang a si. Grammar le cangandan hi an thupi lo tinak a si lo nan calai kutsuak hnak ih ret thupi theih an si lo ih, ret thupi ding khal a si hrimhrim lo. Tui kan dinhmun cu grammar le cangandan buaipitu pawl sawn kha calai buaipitu vekin ruat le cawisan an hlawh ih, himi hi Dark Age thilthleng thawn a bang aw mi a si.

Cun, Dark Age lai ahhin thuhla hruang dangdang a si mi sanphung, mathematics, geography tivek thiamnak dangdang khal ngunngaihtei’ luhcilhtu nei lo in a pawnlang tete rel men ah an rak khawsa. Cumi cu tthansohlonak bulhrampi a si. Tui kan dinhmun ah cuvek khal hmuh ding a um thotho.

Tthansoh kan duh taktak ahcun leitlun thil umtudan, a liam zo mi caan ah miphun dang in ziangvek hlawhsamnak an rak tong ih ziangtin kan hrial thei ding tivek pawl kan zohawk sal a ttul. Dr. Than Tun in, “Aa lo ding in sanphung kan zir,” a rak ti kha. Tuisan leitlun calai khawvel cu calai theory (literary theory) le fakselnak theory san a thlen rero lai ah, calai kalhmang bulhram (theory of literature/poetics) hman theifiang mumal lo kan tam. Postmodern san ih hruangkulh pawl an cim thluh tikah ramkhellam theory khal kha calai fakselnak theory khal ah hman an rung si. Tthimnak ah feminism tivek tla hi ramkhel theory ihsin calai theory ih rung lut a si. Cuvek thotho in anthropology, psychology, linguistics tivek zirhliahnak hruang dangdang ih theory pawl le calai fakselnak theory pawl hi an sihcih aw thluh thlang. Miphun dang cu an thiamtuk zo ruangah zirhliahnak hruangkulh pakhat te sung ih um men hman duhtawk lo in hruangkulh dangdang kha an pehkhawm, an luhkalhawkter rero.  Cutluk ih leitlun boruak a san lai ah, literuture timi ttongfang te hman fiangtei’ theithiam lo tla kan tam ruri tikah a ol lemlo.

Netabik ih ka rel duh mi pakhat cu, bulpak sirhsan in ttankhawh kan hmang deuh maw timi hi a si. Himi khal hi a ngaingai ahcun zirhliahnak lam ih thlen niamtuk ruangih thilthleng a si thotho. Mah in zianghman theih mumal lo ruangah a thei ding ti ih zum mi minung pakhat maw pahnih maw, pawlkom pakhat si maw va rinsan ih, aukio ve mei tivek hi sal lungput a si. Mi zalen le mi dikdawh lungput a si lo. Mi zalen le mi dikdawh cun a theih lo mi cu ka thei lo a ti ngam mei ih, a zalennak kha zirsuahnak hrangih hman ding mi a si ti a hmu thiam. Curuangah sal lungput hi kan bansan a ttul in ka thei.

CT :: Cangantu pakhat hrangah calaknak(raw material) hi mai’ tonteh rori a si a ttul in na hmu maw?

Kh :: Mai’ tonteh rori si ttul in ka thei hran lo. Ziangahtile calai sersuah timi cu thiamnak ci khat a si. Asinan mai’ tonteh mi rori a si ahcun sersuah ding ruatnak hrangih cem mi caan cu a mal phah deuh tla a si thei ko. Cun, calai kalhmang thiamtuk hrih lo hrang ahcun mai’ tonteh mi rori ngansuah hi a ol deuh timi ruahnak khal cu a um.

CT :: Tufang Klirlungz pawl ih nan dinhmun?

Kh :: Klirlungz hi minung 25 kan si nan ram sung le ram leng ah siseh, ram sung khal ah hmun dangdang ah siseh, kan darh thluh ruangah kan duhthusam in pawlkom cangvaihnak kan neih thei lo can a tam. Asinan hnattuan pakhat ah a hleice ih ttuantu ding tivek khiah aw in simaw, zatlanglam pawlkom ah mah le umnak zawn cio ih telvenak in simaw, mai’ thiamzawng cio ah pakhat le pakhat sirhsan aw ton in simaw kan feh vivo ih, kanmah tawkte cun kan cangvai ve rero cu si.

CT :: Na canganmi mipi hnen ihsin feedback na don daan ah na canganmi hin hmuar a neih ding zat a nei thei maw?

Kh :: Himi cu a ca pakhat cio ih zir in a danglam. A tthen cu thazang ka ngahtuk titu an um lai ah, a tthen cu ‘ka theithiam lo lawlaw’ titu khal an um. Keimah khal in mipi zaran siar ding tumtah ih ka ngan mi, le a zir mi deuh vial hmuitin ih ka ngan mi tivek in a phunphun an um tikah ka hmuitin mi zawn cio ahcun an ziaum ve ko tiah ka ruat.

CT :: Ca na ngan tikah zatlang siar olsam ding in maw na ngan, asilole nangmah ih na sersuah mi tongfang deuh pawl na hmang uar?

Kh :: Himi khal hi ka nganmi thuhla thawn a pehpar aw. Bezai, nunthuleng, thuanthucawn, essay, thazang pekawknak cahram tivek pawl ahcun mipi theih olsam ding kha hmuitin deuh an si. Asinan bezai ah hi cun mai’ thin diriam ding sawn ih ngan mi khal an um. Khatlam ah, thiamnak pakhatkhat zirfengnak lam thuhla ngannak ahcun ttongfang sersuah ttul can a um. Tthimnak ah Calai Zirnak Hmaihruai ka rak ngan lai ah kan ttong in kan neih lo mi calailam ttongfang (literary terms) tampi an um. Cuvek caan ahcun ttongfang tampi ka sersuak ko.

CT :: Kan Chin cangan tam pawlin zo pawlih calai feh daan an cawng in na hmu?

Kh :: Kawl calai fehdan cawng ih feh tla kan um vek in, Mizoram calai fehdan cawng ih feh tla kan um. English calai cawng ban cu mi malngaite a si aw ding. Kan hman mi awphawi, ttongfang, le calailam kalhmang pawl zoh in ziangvek ca pawl kan siar tam ti an lang hai.

CT :: Mai Sokhlei Par in calai siangpahrang sinak a lo pekmi na khum duh lo maw?

Kh :: Mai Sokhlei Par hi ka thuhla le ka calailam kutsuak thei zet tu a si ih, mi cawisan thiam tla a si. Ka khum duh le duh lo thu ahcun kei ih duh theih le duh lo theih khal ah ka ruat lo. Duh zet khal sehla kan calai khawvel sung minung pawl in in duh lo ahcun a ngah cuang lo ih, duh lo khal sehla ka khum an duh ahcun amahte’n a cang thotho ding mi a si sawn tiah ka ruat.

CT :: Cangan ih sim suak maw, tongkam ih simsuak na hril sawn?

Kh :: Himi cu a hmun le ram ih zir a si. Ca siar dah lo pawl fimter kan duh ahcun ttongkam ih kan simsuak a ttul. Ca siar ttheu pawl hrang ahcun cangan ih simsuak theih khal a si. Cangan ih simsuak hi reipi a daih sawn ruangah ca siar ttheu minung pawl cu cangan ih simsuak ka duh sawn can a tam.

CT :: Kan Chin cangantu suak thar le suak lai ding pawl hrang thucah lole thazaangpeknak kam thum-li talin?

Kh :: Ram le miphun hrangih ca kan ngan mi hi mithmuh hmaitheih in a hlawknak a lang cih lo a si hman ah, nuamtete’n ram a la vivo timi thei ringring ih, ttan la sinsin ding in ka sawm hai duh.

CT :: A lo pehtlai duhtu hrangah lo pehtlaihnak ding?

Kh :: kianghrol88@gmail.com, ah in pehtlaih thei.

CT :: Tuvekin na caan sunglawi in pek ruangah kan lungawi.
Kh :: Kei tla ka lungawi.

(Visited 1,031 times, 1 visits today)

Comments

comments

Comments

%d bloggers like this: