Chin Ṭong Tlaksiatnak

CHIN ṬONG TLAKSIATNAK

Part-1

THANG LIAN MUNG

Thuhmaihruai

Tulai kan Chin mi pawlih inn sungsang ah Chin ṭong in a luah mal vivo. Cumi cu hmun tampi ah kan hmu thei. Nu le pa tampi in kan Chin ṭong hi nu le pa covo vekin kanmah te lawngin kan hmang. Fale pawl an thanglen ih fala tlangval an si tikah nu le pa lehlam in fale pawl hmangmi ṭongdang sawn riangri in anmah kan biak. Nauhak pawlin nu le pa ih hmanmi tappi ṭong cu an tappi ṭong ah an pom thei ve nawn lo. Cuticun Chin ṭong cu a tlasia vivo. Hmun tampi ahcun kilhim cang theitu tampi an um ko nan hmun tampi lala ahcun kilhim cang thiam lotu kan um. Kan Chin ṭong hi kanmah Chin mi pawl lala in kan kilkhawi lo ahcun zohman in in kilkhawi sak lo ding ti thei in a tlaksiat rero mi Chin ṭong cu kilhim tlang ding a si.

1. Ṭong Phunkhat Hi Ziangtin A Hlo?

Japan ih linguistic professor Miyaoka Osahito cun, “Ṭong phunkhat hi nauhak pawlin an hmang lo-ih an ṭong lo; tappi tong(mother tongue)  in an hmang lo asile a hlo ih a thi,” a ti. Osahito in ṭong phunkhat a hnget theinak dingah upa pawlih tong an hmangmi parah a tah ve lo. Mi tampi cun ṭong phunkhat hi upa pawlin an ṭong sung cu a hlo lo ding ti’n an zum. Nu le pa pawl cun mai tappi ṭong te kan hmang dingih fale pawlin an upat hnu-ah anmah ten an thiam leh ding si ko ti’n a ruattu tla tampi kan um. Curuangah ṭong phunkhat a hlonak cu nauhak pawlin cumi ṭong cu an zir ih an hmang nawn lo ruangah a si.

2. Tappi Ṭong Zirkhawlnak

Professor Osahito in ‘tappi ṭong zirkhawlnak’(native language acquisition) timi in a ruahdaan a phorh suah. A reldaan ahcun nauhak pawlin cumi tappi ṭong zirkhawlnak a cawl ahcun cuih tong ih suanpeh vivonak(chain of transmission) khal a cat. Upa pawl cun ṭong phundang an zir ih cumi cu ṭongdang zirkhawlnak a si. Upa pawlin tappi ṭong zirkhawlnak nei ding a ṭul nawn lo. Annih cun an thiam ṭheh zo. Curuangah upa pawl vekih a thiam ṭheh ve hrih lotu nauhak pawl lawngin tappi ṭong cu an zirkhawl a tul theu. Hitivek ih zirkhawlnak hi hmun tampi ih a ummi kan Chin nauhak pawl hnenah a hlo vivo.

3. Mi Burpi Pawl Karlak Ih A Tlaniammi Ṭong

Languesticlam hliakhlaitu pawlin leitlun ah ṭong phun 6760 hnakih tam a um ih, kum 2100 ahcun a hrek hrawng cu a hlo thluh dingih, ṭong phun 300 hrawng an tang ṭha ding ti’n an zum. Tong pawl an hlonak thu ahhin mi burpi hmun dangdang ih an thawnkual le an vakkual rero ruangah mipi in ṭong a hlo ih cucu kham a tul timi hman an theingah theu lonak a si. Mi burpi hmunkhat ihsin hmunkhat ih an thawnkual aw rero lawng kha an thei men ṭheu. Tong timi cu mi burpi ih hmang tlangmi a siih cuvek mi burpi burkhat hnakih tam pawl an komkhawm ngah tikah ṭong pawl khal a tlaniam phah thluh. Cuticun mi burpi cu a tlaniam phah cuang lo; an pung ringring thotho ruangah ṭong ih tlaniamnak kha thupi hlapi in ngaipoimawhnak nei lo-in theihhngilh lantami ah a cang ṭheu.

Hminsin: Part-2 nak pehleh ding.

(Visited 61 times, 1 visits today)

Comments

comments

Comments

%d bloggers like this: