Chin Ṭong Tlaksiatnak

 CHIN ṬONG TLAKSIATNAK

Part-2

THANG LIAN MUNG

4. Tappi Ṭong Tlunih Hmuhdaan Hmanlonak

Mi tamsawnpi ih hmangmi ṭong(majority language) hmangtu pawlih mi malsawnte ih hmanmi tong (minority language) tlunih hmuhdaan hmanlonak ruang khalah ṭong pawl hlo dingah thazang a pek. Ziangahtile mi tampi hmanmi tong hmangtu pawlin mi malte hmanmi tong cu san a man lo ih tong pakhat ih sinak (quality) khal kimcangten a nei lo tiin an raut theu. Cumi cu mi malte hmanmi ṭong, cuvek tong tongtu pawlih tappi tong, tlunih hmuhdaan hmanlonak cu a si. Cuvek ruahnak cun mi malte hmangmi tong a hmangtu pawl hnen khalah a leengih anmai tong, an tappi tong, tlunah duhthusaam lonak pawl retkhawm in mai tappi tong ziangsiarlonak pawl a suak ter. Cucun tong pawl cu an hlo khalle kilhim ih thansoh ter sal a tul lo ti ruahnak cu an neih phah cih theu. Cun mai tappi tong rori hlo lanta ding khal phang lo le pamhailonak thinlung nei dingin ruahnak le hmuhdaan thalo cu a suahpi.

5. Ṭong Hi Nunphung Ih Hrampi

Mi tampi in ṭong hi pehtlaihawknak men lawngah an ruat ih kilhim ding tul lo in an ruat. Thimnak ah Chin mi veve Chin tong lo-in thaten kan pehtlaihawk thei ahcun Chin tong cu a hlo khalle a poi lo ti ruahnak a suak. Thungai ti ahcun tong hi pakhat le pakhat, le mi burpi khat le mi burpi khat pawlih pehtlaihawknak menmen a si lo-ih mi umkhawm, mi burpi, ih nunphung, umtukhawsak daan le minung nuntlannak pawl thawn then a theih lomi a si. ‘Curuangah tong hi mi burpi ih nunphung, umtu khawsakdaan le minung nuntlannak pawlih a netabik ding hngetkhohnak (language as the last stronghold of a culture,etc.) a si,’ ti’n Professor Osahito in a sim. Curuangah kan Chin nunphung kan kilhimnak dingih a thupibik cu kan Chin tong kilhim ding hi a si.

6. Chin Ṭong A Ziamhlo

Chin mi tampi cu nikhat hnu nikhat in Chin ṭong hnakih a nasa sawnmi tong hmangtu pawl karlak ah kan thekdarh rero. Kan mithmuh ahcun Chin mipi le Chin mi burpi pawl kan thekdarh ih, hmunkhat ihsin hmunkhat ah kan thawnkual-aw rero lawng hi a cuang in a lang ko ding. Asinan kan theih lo lai-ah kan Chin tong khal cu a ziamhlo rero. Kan Chin tong cu tong phundang lakah a ziamhlo rero cu kan hmungah lo. Ziangahtile theithiam a harzet raungah a si. Chin mi tampi in thansonak hawl in kan tawi kan vak, kan tlawng kan thawn. Cun kan kiangkap ramnuam le ramtha pawlah nikhat hnu nikhat in umhmun kan khuar. Cuticun kan thlennak ih tong le nunphung pawl cu a thasawn tiin kan lak ih kan Chin tong le nunphung pawl cu kan tansan thlang. Thatho zazet in cuvek hmun le ram ihsin kan Chin tong le kan Chin nunphung hrangih tanlatu kan tam vivo hrih. Atu ICT san ahhin leitlunpi hi khawte pakhat tluk a si zo. Cumi cun kan Chin tong ziamhlonak ihsin a kham thei a tul a si. Khuitawk khuitawk ih kan um khalle kan inn sungsang hi Chin tong kilhimnak le, kan fale nauhak pawlih Chin tong zirkhawlnak ah canter ding hi Chin mi hmuahhmuah ih tuanvo a si.

Thunetnak

Ṭong pawlih tlaksiatnak hrampi hi inn sungsang ihsin a si. Asan cu nu le pa pawlin fale pawl kan zirh lo ruangah a si. Upa zomi nu le pa pawlin kan Chin tong kan tong nan; nauhak pawlin kan Chin tong an zirkhawl ih an tongsuak ve lo a si ahcun kan Chin tong hi a tlaksiat vivo ding. Upa zomi nu le pa pawlih liang parih a thum-awmi tuanvo hi kan theih ni ihsin thok in ziang siar lo-in um ding a si lo. Atu hmanah a tlaituk zo, theih lo ter-aw ding can a um nawn lo. Kannih nu le pa pawlin kan tappi tong hi kan  fale pawlih tappi tong ah cansuah dingah tuanvo tumpi kan nei. Cumi lawngah Chin Tong tlaksiat lantanak ihsin kan runuak thei ding.

Hminsin: A theh zo.

Comments

comments

Comments

%d bloggers like this: