Cerhti vei (16)nak

Editor Awkam

Sawmngiarnak

Thlakhat veikhat rak suah qheumi Cerhti Cazual cu Pathian lamhruainak in zarhkhat veikhat suah si dingin khuakhannak vekin sulltluangten suah vingvo a si. Tuikum ih Cerhti Cazual suahnak hrangah a hlan vekin stencil ih ngan hnu ih rial si  nawnlo in Riso (Flim tuah ih nammi) in suah thei dinhmun ah Pathian in in hun somdawl. Copies 500 cu kawhhran sungah zemdarh ringring a si. Qumkhat suahnak hrangah Ks. 7,500/- cem qheu a si. Curuangah thlakhat ah vei (4) asilole vei (5) ih kan zoh le amalbikin Ks. 30,000/- (Thawng Sawmthum) kan cem qheu tinak a si. Kumpi kumkhat sung ahcun a malbik Ks. 300,000/- (Tingthum) a cem tinak a si. (Tukum hrang ih Bupi ih Budget kan khuakhan sungmi cu Ks. 200,000/- lawng a si fawn. A taangmi cu Pathian in rem a ti asile a caan ah in timtuah saksal leh dingmi kan ring).

Cuih cemheumi sumpai cu Kawhhranpi in duhsaknak thawn cemliam tuar in tuini tiang thapeknak cakzet thawn fehpi vingvo a si. Hitivek ih man nei zet ih tuahmi a si vekin Cahram, ruahnak  le cangan lampang hi mipi in daithlang siang ding kan si hrimhrim lo. Catluan tin ah man a neimi, Pathian thu in siseh, theihkauhnak lam in siseh, sim le zirh awk duhmi a um ah siseh nasazet in qanlak ih kan fehpi a qulmi a si fawn. Quansuaktu pakhat hnih ih ta lawng a silo vekin mipi ih telvenak thupi zet in sawm le sangka on ringring a si fawn.

Curuangah kan hmuh sunmi, kan theih sunmi le kan thiam sunmi pawl suup loten mipi hnenah, mipi hrangah, mah le mah taat awknak ah thluak, thinlung le ruahnak qhaqha suahpi qenqo cio dingin sawmngiar awknak pawl thawn…

Nunzia Mawi

# Thutulpoi sim ding ih an kawh awk tikah an kiangah rak um ringring hlah aw. Midang umdaan zoh thiam aw.

# Tirawl na ei/in tikah awn tlaptlo in ei hlah aw, na hmur ciipten ei zuam aw.

# Puante na hman khal le rawl-einak le zalak ah cil, hnap, khak phui hluahhlo hlah aw.

# Mi’h inn na leen tikah reilote ih tlunsal zuam aw.

# Pawlkom thil, pumpaak thil tivek na siatsuah pang asi khalle qhaten sim awla ngaidam dil aw (Dingfelnak a thupi).

Thudik

Conkiang

Compass cun

Saklam a Sawh ringring.

Ka Lungthin cun

Bawipa a hlam caamciin.

Tualsuak Thuruah

@  Pawlkom thilri pawl hi bulpaak ta vekin kilkhawi awla, Pawlkom ta vekin hmang aw.

@  Maih nupi, pasal, nu le pa, fanau a zahpitu cu zahpi an si ve ding.          (TS)

@  Pawlkom sungah hotu ih thu cu upat an tlaktuk ruangah silo in Pathian na qihzah ruangah thlun thei zuam ringring aw.     (Arsi)

Kawhhran Sungih Au-aw Hrekkhat

~    Aiawh thlacam siseh, peekhlannak (Ahlu) thlacamtu khal in siseh maih tuanvo leng in cam lo a qha.

~    Special peekhlannak hi ai-awh thlacam ah silo in Peekhlannak ap zawngah camceem thei sehla.

~    Veng khawm caan ah khawm hotu in caanhmangtu pawl ih hmandaan lomselnak (fakselnak), thapek, thusimtu ih thusimmi simzaihsal tivek hman lo a qha.

~    Nipi zing khawm caan ah Paakzai (Solo), Kopzai (Duet), le Thumzai (Trio) pawl ah zoh-lo rori’n sak thei dingah timlam sehla kan duh.

Sizung Ziin an Sial

Falam   August   5

FCC YF hohanakin August 5, 2009 (Nithum) ah kan sizung ziin (Ziinte) lamziin le sibawi inn kiangkap pawl thianfainak an nei ih minung (40) lenglo in thatho zetin an quantlang hrut-hro. Sayama Tial Kip (Shwelinyung) in hnaquantu zate hrangah a qulmi intithiang peekhlannak a nei ti’n thuthang kan ngah.

A Va Mak Ve Cuih Lungput

Salai Thawng Lian Mang

Purna an timi mipa pakhat cu biaknak lam ah le khua le ram hrangah rinsan tlak zetmi a si. Ni nikhat cu a bawipa hnenah a feh ih a bawipan’ thu a rak sut:

Bawipa: “Purna na khawpi vangpi pawl hi thu le hla tamthei zet, pakhat le pakhat rem aw lo, buai celcel hmang pawl an si cu na theih cia an si. Annih in na thinheng ding in lo camriam, lo dodal, lo thangsiat, lo nehsawh hai sehla ziangti’n na tuah pei?”

Purna:  “Bawipa cuvekin ka parah an thinheng nan, thing le lung hmang lo in an um ruangah mi zaangfah thiam rual le pi an si ding tiah ka ruat”.

Bawipa: “Asile thing le lung thawn lo vuak, lo phom hai sehla…

Purna:   “Bawipa a hriammi fei le naam hmang siang lo in an um ruangah lainat zawnruahnak a neimi rualpi qha an si tiah ka pom ding”.

Bawipa: “Fei le naam thawn an lo tuahmawh hngai  sehla teh?”

Purna:   “Bawipa thi le hnai suakin in tuahmawh nan, thi seh tiah in that sianglo ruangah mi zawnruah lainat thiam rualpi qha an si ti’n ka ruat hai ding”.

Bawipa: “Purna asile na nunnak lo that hai sehla ziangti’n?”

Purna: “A si bawipa ka nunnak in that nan ka thlarau kumkhua nunnak hrangih i dawn-khamtu ah an qang lo ruangah zaangfah zawnruahnak a nei mi an si thotho tiah ka cohlang ding.”

(Ref: Snacks for the Soul: by J.P Vaswani)

FBC Church Pastor ih Sunghno Nu in Mual in Liamsan

Bualkhaw  August   5

Falam Baptist Church ih Senior Pastor Rev. Nun Uk ih nu Pi Zong Nei (kum 77) cu 5 August 2009 (Nithum), zaan 10:30 ah Bualkhaw khua ah mual in liamsan. “Bualkhaw ih an vui tikcu 6 August, 2009 (Nili) zaanlam 3:00 pm ah Church Pastor ih  inn, Falam  ah ZBC, ZTC, FBA, FBCA le FBC, Galilee veng le duhdawttu unau dangdang sawmkhawm in thlacam khawmnak thawn caan kan hmang” tiah Rev. P. Hram Kulh Thang in a sim.

Saya/Sayama le Nu le Pa Thuzirnak FBC ah

FBC   August   2

FBC CE Department ih hohami Saya/Sayama le Nu le Pa thuzirnak cu 2 August, 2009 (Zarhpi), zaan 7:00, Youth Hall ah an tuah. Mipum (50) lenglo an kai thei. Pastor Nang Kim Mang in “Zirhtui’ thupitzia” le Pastor Neih Kim in “Nu le Pa Thupitzia” pawl zirhnak an nei.

FBC Mino Foundation Fund hrang Peekhlannak

Falam   August   3

Galilee veng Pu Tlang Than Hrang tei innsang in FBC Mino Foundation Fund hrangah Ks. 100,000/- (Tingkhat) peekhlannak an nei. “Mino pawl ih zuamnak le Nu le Pa ih duhsaknak thawn Foundation Fund a zaten Ting sawmthum lenglo kan nei zo” tiah Mino Secretary, Pastor Lal Biak Sum in a sim.

Nubu ih Thansonak Training

Falam   August   6

FBC Nubu ih hohami Qhansonak lam zirnak cu 7-8 August 2009 (Ninga + Zarhte) sung FBC ah zirnak an nei. Pastor Qial Hliang in “Bible Study -Deborah thuanthu”, Rev. Mang Khan Sum in “Nu le Qhansonak” le Sister San Thawng Fam in “Harhdamnak” thuhla pawl 9:30 am – 3:00 pm sung zirhnak an nei ih nu (174) in thatho zetin an zir.

Victorious Tlawng ih Lungawi Thusimnak

Falam   August   4

Falam ih Victorious Boarding Class in a vei (17) nak 2008-2009 Cazir kum phunhra ong sunloihnak le lungawi thusim thlacamnak cu 4 August, 2009 (Nihnih) ah hlunghlai zetin khawmnak le zaanriah hiiltlangnak thawn an tuah. Tuikum ah Victorious ihsin Distinction 3 ngahtu mi (1), D-2 ngahtu mi (1), D-1 ngahtu mi (3) le Camibuai ongtu zapi (27) an um.

Falam NTS Sayamakyi Thar A Thleng Zo

Falam  July  31

Falam khua Nursing Training School ih quanvo neitubik Sayamakyi thar Daw Wai Wai Oo cu hnaquannak quanvo la dingin 20 July, 2009 (Nikhat) ah damten Falam a thleng sal zo. Tulaifang NTS dinhmun cu tlawngta zate (134) an si ih zirhtu zate (6) an um. Falam khuasung ihsin tlawng a kaitu tla (34) an um . “NTS zirnak ah hin Nunau lawng silo in Mipa (male nurse) khal (2) an um. Tlawng cu November ihsin September thla sung on a si ih October thlakhat sung lawng tlawngpit a si leh ding” tiah Mai Iang Iang (Final Year) in Cerhti a sim.Nursing Training kai dingah luhnak cu  phunhra ong hnu Myanmar, Maths le English hmatkom zoh a si ih Laitlang (Falam) ih phimi pawl hrang lawng a si. Laimi hmuahhmuah in phit a ngah lo. Cule Phi duhtu in Phun (10) on Caken le Hmat cazin Original ken tengteng a qul. Cun tuikum ihsin cu ruangrai Sanlam an zohcih Sister San Thawng Fam le Sister Ngun Nei Cuai in Cerhti an sim.

R e s t r i c t e d    c i r c u l a t i o n

Cerhti Cazual Editorial Board

Chief Editor              :  Pastor Thawng Bik

Editor in Charge        :  Salai Tuak Sang

Consulting Editor      :  Salai Dar Lian Uk

Editors                      :  Jt. Zung Lian Sang

:  Pastor Lal Biak Sum

:  Pastor BenjaminVTNL

:  Sayama Sang Nei Ting

:  Saya Bawi Cung Lian

Computer Layout      :  Salai Bawi Cin Thang

(Visited 71 times, 1 visits today)

Comments

comments

Tags:

4 Comments

  1. Hi mi sung ah GreenEden hla nan rak than thei seh la

  2. Dear Cerhti,
    Chinlandtoday Website pi ah siar nuam zetzet le theih tha tampi a um ruangah siarkhal a nuam ih lungthin tla a hah dam zet. Cerhti vei (16)nak tiang lai a suak zo ih siar nuam zetzet tla tampi ka hmu. Online ih sin zingzoi paih tu hrangah cun a ropi zet ti’n ka hmu.

    Sutduhmi:
    Falam tongfam ah (Cerhti le Cirhti) hi a danglamnak a um pang maw tiah suhduhmi ka nei ee. Cerh ti cu (Thingkung phun mi pawl parin thil pakhatkhat a rong cerh ti asi ti’n ka rak thei dah) cun (Cirhti ti cu a mah ten irh suah rero ih hningno zetih kiang le kap ti nung tu a si ringring) ti’n ka thei. Cerh in santampi a nei vekin Cirh in tla san tampi a nei ding ti’n zumnak ka nei. Thangthar nonawn ka, ah cun Laitong/Chin tong hi (Bazar tong) vekin kan fehpi thlang maw ti’n ka ruat pang ruangah si.

    Creative mind nan neih nak parah le Laimi duhdawtih catha tha nan suah thei ringring ruangah Pathian in thlausuah lo pe hram seh tiah……….

    S.Sangte
    Malaysia

  3. S.Sangte

    Cerhti le Cirhhti na simfiang daan a mawi tuk.
    Na ruah vek cekcin ka rak ruat ve.
    A si, Falam tong khun mawi zetzet pawl kan hmang nawnlo….

    Ukte

  4. Dear Casiartu,

    Falam tongfam ah (Cerh – Kan thinphun mi a hnge a cerh) ti’n a si. Cun (Cirh – Kan Khualu ih Cirhti thiangte in ka hiar) falam tongfam a si. Falam peng sungih um hnam citin tongfam tampi ka theih lo tuk ruangah si sawn ding ti’n ka zum. Ka sentet te lai ih sin kan hman theu mi tongfam cu (Cirhti) ti a si na’n ka hong upa ih (Cerhti) ah a cang. Thangthar pawlin ziangti’n ruat hai ke maw? Cirh le Cerh ih an danglamnak thei fiang tu hrangah cun um men theih a si lo ti’n ka ruat. Pupa ih tongkun tla a si lem lo ding tiah ka zum. Lungawi

    S.Sangte
    Malaysia

Comments

%d bloggers like this: