CCOC2 Ah Falam or CBA NA Kan Telve Ah A Tha Pei Maw?

Chin Vapual

CCOC2 kan thok ngaingai ding a si ahcun CCOC hmaisa ih keneh kan thlun ding cu zoh mawibik le remcangbik kan Chin miphun in funkhawm theitu ding khal a si. Dr. Hre Kio le Rev. Sa Tin Lal ih CCOC2 tuan dan ding an nganmi ihsin ka hmuhdan cu a hnuailam vekin a si.

1. Dr. Hre Kio cu CCOC2 hnatuannak ah hotu a si vekin kan Chinmi zate telkim thei dingah a saduhthat thu a tarlang. Cuihlei ah ahmaisa CCOC hnatuannak vekin tuahsal a duh thu khal a ca ngan mi ah hmuh theih a si. Ka theihsual lo asile CCOC hnatuannak ah sumpai a rak thawh tambiktu sungkua cu Dr. Hre Kio tei’ sungkua an rak si tiah cabu pakhat ah ka rak siar dah hngehnge. Tuitum ih CCOC2 khal kan Chinmi zate huap ih in khaikhawmtu ding khal ah a tlak hrimhrim.

2. Rev. Sa Tin Lal ih ca leh nak khal ah CBA NA khal in himi CCOC mission hnatuannak thu ah a thok ihsin a lungkim hmaisabiktu pawlkom an sinak thu fiangten a ngan. An meeting thurel mi record rori phorh in a sim thei. Mah pa le vekin a zoh mi Dr. Hre Kio khal sisehla thudik ahcun simngam/ relpi ngam le thudik tan ngamtu a si nak a langter ih CBA NA hruaitu ropi a tling ko.

3. Lairam ah mission hna tuan dingin CBA NA in lungkim hman sehla, palai ih an thlahmi le an rinsanzet mi kan Siangbawipa in CBC USA (Hakhapawl) ih thurelmi el lo le peng dang thawn mawizet in hnatuan thei dingin sangka a on sak ngah lo tikah CBA NA cu mangbang in pakhat le pakhat an mawhthluk aw zik zuakzo a si cu. Curuangah Kansas City,KS ih CCOC2 thuhla relsalnak dingah CBA NA tel ding le ding lo hman tuni tiang a fiang hrih lo. A san bik ih lang cu CCOC2 hnatuannak cu CBC pawl in an maita vekin in an ham ih sinak’dinhmun an zem aw ttheptthep zo. Bo an ben ttheptthep zo. Falam pawl cu sawm cop le Ak za 2 dinhmun ah an din a tul ding a bang. Cuvek cu milai sinak cun tuar a harzet ding. Semsem damdam hi a nuambik nan panteh.

4. CCOC timi hmin cu kan lairam ti engmawitu hmin ih ruahmi, kan lai pacangtha Pathian riantu Rev. C Hrang Tin Khum ih ZBC GS a tuan vanglai ih rak tuan mi a si. A tuantubik Baptist kawhhran si hman sehla tuni ah kan miphun Pathian thlawsuah kan dawnnak a rak si. ZBC ih lo hma a si ih a keneh cu a mawi hrimhrim Pa Pathian khal a lungawi si ding, Laimi thinlungah CCOC timi hmin hi sankhuk daih hminmawi ah a cang vivo.

5. Falam or CBA NA hrangah sangka khar a si zo maw? Si lamlam hlah ee. Tuan theimi tamtuk kan nei lai. Kansas City ih meeting nak ah tel tengteng a tha ih, CBA NA ih a hmuhdan cipciarzet in sim ding. Sim hnu ah CBC USA ih thu lehnak cu a danglam tengteng ding. A danglam lo hman ah Pathian hnatuannak ah sinak/dinhmun zoh in hnatuan a si lo. Pathian ih duhnak a thluntu miphun kan si ahcun a mah in in cawisang vivo leh ding. Bawipa ih lohma a si raungah tuantlang phot ding a thupibik.

6. Himi CCOC2 hnatuannak ih phen ah politics a thup aw timi cu zum cio a si. Ziangahtile unau tuanpi cia (CCOC thoknak ah) a si mi Falam le Tiddim pawl ih thinlung le ruahnak sut ta lo, tuan khawm vialvo duh lo ih maita vekin ham vukvi cu mi aa thla lo cun kan theithiam theh ko ee. Asinan kan zum vek in politics a tel le tel lo cu Pathian lawng in a thei fiang ding. Mirang acozah in leitlun ram tampi uk dingah a nawr vivo lai ah missionary pawl khal in mission hna an rak tuan ve. Acozah cun an ram lakmi sung ihsin thil mankhung tampi an lak sak. Asinan Missionary pawl cun Jesuh in tanta sawn a si. Amen, cumi si sunglawibik. Cuvek thotho in ram kan nawr tikah tong le calai ah ciahneh tum in thinlung nei khal rak um pang hmansehla kan nih cun Pathian hna lawng kan tuan mai ke. Mision hnatuan cu laksak, ciahneh le mai’ tong va zirh silo in Thuthangtha sim ding a si sawn. “Jesuh cu ka Bawipa a si” timi an theih ngah le an co ngah ahcun Chinmi hrangah a sunglawibikmi a si ding. Tahthimnak pakhat la sehla, Mizoram ihsin mizo pawl in kan lairam a si mi Simram,zahau ram pawl ah mission hna an rak tuan tikah kan mah le kan tong thupi ah ruat lo in an mai’ tong riangri Pathian biaknak ah in rak hmangter. Tuni ah a rah cu lungawi hnakin an tong hmang duh lo tu bik ah an cang. Curuangah kan nih Falampawl hrangah cun duhdawtnak Jesuh ih Thuthang kan sim niakno men a duh um. Cui Thuthangtha an theih ngah hnu ah duhdawt awknak a karh ding a si sawn.

7. CCOC2 ah kan tuan ve lo a si ahcun hmailam kan fanaupawl in ziangtluk in mawhthluk lai ding ti cu ka ruat ngam riai lo. Ziangmi phuahhlam kan sim ding? Tuni ih Pathian hnatuan sawmmi kan cohlan lo ahcun kan mipi thlawsuah phitsaktu ah kan cang riangri ding. Mi in lohma kauzet le tuantu tampi an neih lai ah kan nih kutsih in kan rak to men ding maw? Ningzaktuk kan si ding ual. Thlanglam laitlang lo khal ah mission hnatuan ding a tamtuk kan ti men thei. Kan unau naibik tanta in mi dang va duhdawt ciamco teh cu ruah ding tampi a um. Kan chinram sungih kan unau thlarau hlo kan kaih lo ahcun kan miphun duhdawtnak thawn kaihruaitu dingah Falam mi cu kan tlak lo tluk ah kan cang vivo thei.

8. Himi CCOC2 ah kan tel ih kan thlah ve a si ahcun kan Chinram ah lungrualnak suahtu le pakhat le pakhat tuantlang duhnak a suak sinsin ding. Ziangthu kan thennak poh ah duhdawtnak thawn thuthen a si vivo ding. Zovek uktu kan neih hmanah Bible thawn thukamnak an tuah thei ding. Tusun ah sawmcop dinhmun vekah in ruat hman sehla kan Falampawl kan neih ui lo in, kan thazang zate suah in kan tan ahcun Pathian a lungawi ding. Kan Pathian sunlawih uhsila anih in kan miphun in cawisang dingih thlawsuah in pe ding. Thuneitu sihnakin thungaitu si a tha deuh. Pathian ih tumtahmi sungah kan miphun zate lut uhsi. A thoknak hnakin a netnak a thupi sawn deldel. Ziangtluk Pathian hrangah kan pum pe aw timi a thupi.

Kan nu le kan pa in Arti,Ar le vokte zuar in an rak tuanmi CCOC hnatuan cu tuni ih kan Laimi cun Dollar thawn kan tuan thlang ding. Cucu kan mah ah uan awknak siloin, Pathian thlawsuah liolio a si. Lairam lawng silo, kawlram le leitlun ti engtu dingah Pathian in kan Chin miphun in hmang vivo seh.

Hminsin: Ka thinlung sungah in kamhtuk ruangah ka rak ngan.

 

Comments

comments

7 Comments

  1. ca kan ngan le kan hmin dik tak langh ter ngam sehla, cunah nan thu thlun ding leh zumh ding ah thu kan then thei ding, kha ti vek VAPUAl cu mi tih pawl cu kannih ca siar mal hrang zo nansi tih kan lo thei lo theu/thei a har deuh ee,

  2. Pu Vapual…………..; Paluai ih a lo ti vekin,
    Na hmin ngai langter phah aw la cu duh a um nasa ding.
    Na ca ngan mi a tha tuk, na thinlung a picang nasa ti a lang.
    neta lam khal ah ngan bet thei rak zuam hrih aw.
    Kan khawruahnak pawl lamzin fiangfai in hmuh tir phah tu na si.

  3. Hmin langhter a herh lemlo.
    A bia tu kha a thupi sawn..
    Vapual na za bak…
    A tha ngai..hivek bangtuk in lungthin neih ding hi Laimi kan si..

  4. chinlandtoday,
    a hi va pual ti vek hi
    a hmin tak zo saw, in sim thei tu a um kem, zo bik a si, a nu a pa , a hmin, khui tawk a um

  5. CCOC cu kan tel attha Thlanglam Unau pawl tla kan Tawngan thei pei ih Lungrual naktla kan nei sinsin ding Mihlo kaih nak khal attulsinsin.Midang Hmaisong attul lo.Atirte in Kanraktel zomi asi.Midang unau pahnihkhat menih hAM theih thilkhal asilo.An Ham le Mi hoizawnglo an si ti theih cia ansi8 pam lo sawm.

    Pu Hre

  6. CCOC cu kan tel attha Thlanglam Unau pawl tla kan Tawngan thei pei ih Lungrual naktla kan nei sinsin ding Mihlo kaih nak khal attulsinsin.Midang Hmaisong attul lo.Atirte in Kanraktel zomi asi.Midang unau pahnihkhat menih HAM theih thilkhal asilo.An Ham le Mi hoizawnglo an si ti theih cia ansi pam lo sawm.

    Pu Hre

Comments

%d bloggers like this: