Cawl Men Hlah

July 22

Tlawngkai Nili 

Cawl Men Hlah 

Siar:

Mipumsiarnak 8:23-26 

“Cuih hnu cun Puanthlam sungih hnattuan an duh lai hrih asile an rualpi pawl bawmtu lawng an si thei pei. Levi mi pawl ih hnattuannak cu na tawlrel sak pei,” tiah a ti.    – Mipum. 8:26 

Kumkhat Sung Baibal:

–   Saam 31-32

   Tirhthlah 23:16-35 

Leilung tlun ih tlang saangbik Everest tlang kai hmaisabiktu cu Edmund Hillary le Tenzing Norgay an si. Kum 33 lawng a si hrihmi Hillary cu a kaisuak theinak in a hmin a thang, a lianzet ih a nunnak cu hminsin tlak sinak a coter.

Asile Hillary in hmailam kum 55 hrangah ziang a tuah? Hillary in cumi hnak ih  tlang saang kai ding a nei nawn lo na’n a cawl men lo. Thil dang hminsin tlak  Everest tlang kiang ih a ummi Nepal miphun pawl hrangah kum 2008 ih a thih ni tiang  tthansonak hna a ttuan.           

Pathian in Levi mi pawl an hnattuannak ihsin kum 50 ah cawl ding ti a sim hngaimi na thei dah maw? (Mipum.8:24-25). Asinan puanthlam sungih hnattuan an duh lai hrih asile an rualpi pawl bawmtu lawng an si thei (c.26). Himi thu cu hnattuan kan cawlh tikih thlun ding a si ti ih laak ding cu a si kher lo na’n hnattuan kan cawlh hnu ah um men loin midang hnattuan bawm ding timi cu ruahnak ttha a si. Pathian duhdawt ih hnattuannak a si.           

Minung tampi in an hnattuan an cawlh tikah sim ding tlak ttuan ding an nei lo tiah an ruat. Asinan Levi pawl le Hillary vekin kannih khal tumtahnak kan nei thei. Kan tikcu caan neihmi hi midang bomnak ih hmang ding kan si.  -C.P. Hia 

Bawipa in thazaang le bomnak a lo pe ding,

A lo pekmi hnattuan ttuan theinak hrangah;

Duhdawtnak thinlung thawn riantu si dingah,

Ziangmi si Bawipa in a lo fial?     – Fasick 

Midang hrangih kan pek awk tikah

kan nunnak cu a thar in man a nei.

Comments

comments

Comments

%d bloggers like this: