Cawicop Khalin

Mai Khuaitizu

“Bawithang, na nau kha t’haten rak kilkhawi aw maw! A thinheng dingin tla rak tuah pang hlah. Na farnu neihsun a si kha, na duat thiam a t’ul. A duh rak zulh aw maw! T’ongtheilo pam ka nu le pa a sim theilo ding tin rak lengsan men hlah. Khah, nan unau ten ra uh. Nan khukbil uhla na pa thawn thlawsuah kan lo pe ding ” tin a nu in a ti ih an unau ten an t’hilht’hiam . A nu le pa in thlawsuah an pe. Cumi t’heh in bawm le tuhmui le tithawl thawn lo feh dingin tim an tuah. Parte in sunt’ha ti si awm tak a kutin a zap ih a nu le pa khal cu hnangam ten lo lam pan in an khawr aw tuunto.

An unau te cu nu le inn hlumlo tiah an umhar zet. Rualpi in an lengih an inn hmai ah labar densuah an rak lek. An lek an ningin inn kiangkap ah laiking vek an pel. Parte khal cu a u keneh thlunin an kiangah thlansa bekbek in a rak her durdo ve. Sunvu cuti cun an rak nuam aw. Khua a thim zik thlang, ruahhmai ti sekso ten a sur. An unau ten sangkaa hramah com khekkhi ten to in a nu le pa rawn tlun ding cu an cuan cuahco. Thingphur rit t’eit’ei ih rawng tlung a nu le pa an hmuh in an tlan vervawi ” nunu papa ziangha in sum?” tin a pa’i tawngphu cu an pur t’ungt’o. Kuahli le saihlum lakah vate hmul thawi t’hih aw bekbi zawhte zakhat lai sunhlu an hmu ih an unau in an lungawi an khir hleuhlo rero. A nu le pa cu a cu menih lungawi fa neih manhla tukaw an ti rero. An fate lungawi duh ih thing phur rit t’eit’i cing khal in zinkap sunhlu cu an bawt t’uatt’o paih thotho. An fa le lungawi mithmai an hmuh cun sun ih an hnat’uan bang khal an thei nawn lo.

Zanriah cu an hun suangih hmeh ah aitebop le turbung hnah sihmui thawn an hun bai. Rawl a hmin in pa bikin far a vangih cuti’n an uico le zawhte si cabuai ah rawl an kil vialvi. Ui tlan aw tin an kutin an hngawng phahphah. An tihang hrawp awn le an kaa tleptlep awn cu a thawt hmel nasa. Rak ei ve a cak um zet. Parte cu rawl a ei tawkfangin rawlbar ding vekin buh cu a kutin a huam. Bar suak theiloin a mit ngau ruairawn a sing cuahco. A nu in a kut a kholh sakih ih-khun ah t’haten a hlum. Bawithang ih nu le pa cu Pathian t’ihzah zetmi an si vekin an fa le hrangah an lu tlunah thlawsuah an pe ringring. Pastor le a dang zumtu pawl hnen khal ah kan fa le hrang tin a hlei in thlaici(seed faith) an tuh t’heu.

Cherry an hung parih thlatang rim a nam hmerhmo thlang. Tukum x’mas hmannak cu kan sungten falam ah kan vung dawr aw ding tin tumtahnak an nei. “falam kan feh le x’mas hmannak hrang meithal in leih uh” tin Bawithang in a nu le pa a ngen. Parte khal cun zing sim ih naute ti a pawk t’heumi tohkham a khih ih a nu le pa in naute lem si hi a duh ti an rak theihthiam sak mai. An hngakhlap zetmi falam tlawn caan cu a rawng thlengih banhla hnah thawn suncaw an fun t’aiht’i . Losau khua le falam hi peng 24 lai a hla ruangah parte hi paawk ding tin le a rit laklawh fawn cutikah rang an to ter.

Unau hmel palh fangah falam cu an ban nerno. Pathangkhan veng, phunki thlawng an thlen in falam khaw hrek a langih meisa(light) le inn tin in an vang fawn, Bawithang te unau cu an be aw thiamlo nan mangbang tukin thinlung hmu aw zetin an zoh aw . ” papa himi kan thlennak khua hi Jerusalem khawpi maw si” tin Bawithang in a sut hngehnge. Cui a thu suh cu a nu le pa an hni hruthri.. An thlen inn ahcun zanriah an hun kil. buhcang, ngapih kio le pee hang an hun ei ih Bawithang te unau cu thaw an ti tuk. Pum ki kiarkiar in an ei thei. Bawithang cu daiten um niakni men loin tuzan kan rawl ei mi hi ” van mana maw si?” tin a sut lala. An thlen inn te cu an zoh aw ih an hni sese. ” aw si e! Van mana” an rak ti betbet.

Zanriah an khawh ngah in mileng khan lamah meibung ai phah in com ferfi ten TV an zoh. Bawithang te unau cu an mit ah thothe lut khal sehla an mit an t’hep lo ding ti khawp in TV cu an zoh kerker. Zoh nuam hi an ti lu tuk. Zan ih khal an paih nawn lo. Falam an tlawn caan le parte ih suah a rak deng aw ngelcel. ” Nidang ahcun kan fa le an suahcam ah arti kan buh t’heu ih thla kan cam t’heu. Tu t’um cu danglam deuh in birthday cake kan leih ke cu” tin Bawithang nu in an pa a rawn. A rak lungkimpi ve.

Parte kum 8 kim lomnak cake cu an thlen inn ah hmang tlang dingin an lei. “Happy Birthday to you, Happy birthday to you, happy birthday to you all, happy birthday parte” tin hla an sak. An sak t’heh in parte in a duh dan in at seh an ti. Parte in naam cu a vun kai ih at lohli loin a nu le pa cu a zoh keukeu. Tawkfang nawn a zoh in ” ka…… ka…. ka…..lungawi…….. tuk” tin a hun t’ongsuak. A suahthlak in a veikhat t’ongsuak an theihnak a si tikah an lungawi tukih mitthli thawn parte cu an pom ciamco. Nuamte ten a t’ong ih neta ahcun t’haten a t’ongsuak thei sal. A hiti ding theicia sehla CAWICOP KHAlIN birthday cake kan leih lohli ding nan tin a nu le pa cu an ti aw rero.

 

(Visited 96 times, 1 visits today)

Comments

comments

Comments

%d bloggers like this: