Caw rual Nun Cawng Hlah, Naa rual Nun Cawng Aw

Salai Siang Lian Uk @ Kianghrol

Kei hi Amerika ram, Colorado ramkulh laili ih Boulder khawte ah ka tthanglian. Colorado hmunram hi a mawi zet mi lungto tlangtluan pi pawl ruangah, thlirmual a mawi ti’n a hmin a thang. Cui’ lungto tlangtluan pawl karlak ahcun a hring dildel mi hrampi mualrawn kaupi pawl an um. Caw le naa thlahnak ih a tthat ruangah caw le naa tampi hmuh theih an si. Leitlun ah caw rual le naa rual hmun khat ih hmuh kop theihnak hmun malte lakihpakhat a si.

Curuangah kei hi caw rual le naa rual ih umtudan pawl felfaite’n hliakhlai theinak can ka ngah. Caw rual le naa rual hi thlipi a hran tikah an hmaton dan a bang aw lo.

Nitlaklam ihsin thlipi a ra hran tikah caw rual cu nisuahlam ah an tlan ciamco. Caw hi tlan cak thei pawl an si lo. Curuangah a rei hlan ah thlipi in a dawi man hai. Thlipi cun caw rual pawl cu a thendarh hai. Curuangah caw tthenkhat cu hriamhma an ngah ttheu.

Naa pawl cu cuvek an si ve lo. Nitlaklam ihsi a ra hrang mi thlipi cu an zate’n ding in an rak hngak. An kiang ih thlipi a ra thlen tikah thlipi lam pan in tha suah in an tlan ciamco. Curuangah thlipi hnuai ah reipi um lo in, rei lo te ah an luat mai. Can malte sung an tuar hramhram ruangah harsatnak khal malte sung lawng an tong.

Kannih khal buainak pakhatkhat kan ton tikah cumi thuhla lawng rori kan ruat, kan thin a har, kan thluak a buai. Kan van a tthat ahcun amahte’n a reh mai ding tiah kan zum. Reh lo ih a awh rei tikah thinhar mangbangnak kan tong. Cumi cu Colorado ramkulh ih caw pawl dinhmun vek a si. Thlipi thawn a hlatnak lam ih an tlan ruangah thlipi hnuai ah reipi an tang. Buainak kha cingfel duh lo in can kan dir sau, buainak thawn a hlatnak ah kan tlan rero ahcun, buainak cun kan dunglam ihsin in dawi rero ding. Harsatnak in pe ding.

Buaibai harsatnak timi cu a ra suah hnuhnu cun pai ringring ding a si lo. Amahte’n reh thei ci khal a si lo. Amahte’n a reh thei a si ahcun buaibai harsatnak a si lo tinak a si. Curuangah naa pawl in thlipi hmaton zawng ih an tlanlut ih, thlipi ih pek mi harsatnak kha malte sung lawng an tuar vekin, buaibai harsatnak timi cu hrial lo in a rang thei bik ih cinfel hi thinhar mangbang anhainak tuar reilonak sawn a rak si.

Hminsin: ဗန္းေမာ္သိန္းေဖ ih “ႏြားလိုမက်င့္နဲ႔ ကၽြဲလိုက်င့္ပါ” leh mi a si.

Comments

comments

Comments

%d bloggers like this: