Facebook: Stocks Zuar Ding

Myanmarnewshub, the star.com | Febuary 2

Leitlun ih  social network thabik le thangthar pawl in an ngainat zetmi Facebook cu private company neitu pawl hnenah Billion 5 tiangih share an neih ve theinak ding hrangah tu’ini Febuary 2, tlawngkainithum ah share an zuar thawk thlang ding a si.

Facebook company cun an share zuarnak ding thuah thla reipi sung company dangdang pawl thawn biakawknak an rak nei zo ih Billion $100 tianglai ih zuar thei an beisei thu thuthangca in a tarlang. Facebook cun an share an zuar theinak dingin a tulmi an tuah theh ngaingai asi ahcun buainak tamzet a suahpi thei ding a si.

Famkim Siarbet

What Is Next? (Kawlram Politik Thlirnak,Pastor.Hre Mang)

CT: Kawlram in ramkhelh buaipitu thawngtla (politician) tampi a thlah mi tlun ah ziangtin na hmu?

HM: Zanglam zawngin a thlah khal asile ralkap a cozah in politics ruangah thawngtla a thlahmi cu thiltha asi. International ah mithmaitha a ngah duh ruangah siseh Kawlram mipi hmaiah Ralkap a cozah tan dingin a tuahmi khal asile a tha asi.A tufang thuanthunung zoh asile Kawl cozah in remdaihnak, thleng awknak hrang ke a kar rero timi cu eltheih asilo. Cumi lakah thuthla suah hi pakhat asi.

CT:Amnesty ih umtu daan malte in sim thei pei maw?
HM: ” Amnesty” timi cu cozah kumpi lareltu pawlin dandinglai thleng cuang loin daan in a mawhsiatmi pawl kha thu pakhatkhat ruangah luatnak peknak asi. Ramkhat le ramkhat daan a bang aw lo nan, Cozah kumpi dan tuahtu (legislative body) thuthluknak in siseh president, lole siangpahrang thusuak in siseh amnesty thupek theih asi theu.

CT: Kawlram ah ramtin kim ihsin palai an thlah ih Mr. President Thei Sein a bulpaak cangvaihnak ah le kawlram hrangah that hnemnak a suahpi tin na hmu maw?
HM: Ramdang ihsin ram palai pawlin Kawlram cozah kumpi hruaitu an tawn mi tla thiltha asi. Kawlram thleng awknak ding hrangah a tul hrimhrimmi asi. Kawlram thleng awknak dingah le democracy uk awknak suak dingin Kawl ralkap a cozah cu hriamhrei thawn ramdang zohman in an do lo dng ti cu a fiang vekin a nemzawngin cabuai parah thu reltlang in ram tuahthat asi ding timi cu kawlram a ngaihventu pawl siseh ramkheltu pawlin siseh leitlun politics lam thiamsang filawr pawl khalin an hmuhdan cio asi.

CT: NLD party cu legalized party a si zo tikah Daw Suu kyi in Parliament house ah ziangmi tawk cintiang thu (voice) a nei thei ding?
HM: Daw Suu Kyi in parliament ah tohkham a co ve asile a tu hnakin tam sinsin thleng awknak hrangah ralkap uktu pawl a ciahneh in rampi hmasawnnak hrang hna a tuan thei sinsin ding. A tuvek ram dinmun thleng awk laifangah Daw Suu in a nemzawng politics huham (soft power) a hmanthiam a thupi tuk. Kumpi cozah uknak tohkham ah pakhatnak a colo khal asile parliament ah ziangvek dinhmun khalin thleng awknak hrang tampi a tuah theiimi a um asi.

CT:Parliament innpi sungah a tamsawn hi Ralkap palai hlir an si tikah Pi Suu Kyi in a thun lut thuthapawl dodal tu lam ah maw an ttang pei culole a thu an thlun pi ding tiah zumnak na nei?

HM: Pi Suu Kyi in a duhmi policy a fehpi tikah dokalh zawng si loin innpi sungtel pawl hnenah zapi hrang thatnak, rampi daihnak le thanlennak hrang asi ti fiangzetin a thu a putlut thiam a thupi zet. Lamtang tuah ciamco tahratin thahrum (hard political power, hriamhrei tinak si loin) a hmang asile a thatlonak a tamsawn ding. A tlunah sim zovekin a nemzawng ramkhelh huham cahnak (soft political power) a hman thiam a thupi zet. Ziangah tile Kawl ralkap uktu pawl khalin a nemzawng huham cahnak a neihmi, ram mipi le ramleng leitlun khawmual in Pi Suu Kyi an tannak dinpi mi hi anmai thatnak hrangah an hman duhmi asi. Thleng awknak (reformation) hrangah Pi Suu Kyi ih a nemzawng ramkhelhnak huham (political soft power) a neihmi hi hman an duhmi asi. Pi Suu Kyi in a nemzwng huham a neihmi a hmang thiam asile khatlam le khatlam hrangah thatnak (win-win) tuanrah a suahpi hrimhrim ding asi.

CT: Dun daan thazet mi Economic Free Zone nei tha tikah Kawlram mipi kan nun a nuam deuh pei maw? Chin mi in teh hivek chance kan ngah mi ziangtin kan hmang ding?

Ramsungah pursum leilawn thuken (economic policy) a zalen ih mipi pawlin ramsung ramleng cozah, pawlkom, company pawl thawn hnatuan tlang thei dingin cozah kumpi in a sian asi ahcun ram cu hmakhat te ah thangso thei mi asi. Leitlun pumhuap pehtlaihnak a tha tuk zo ih ziangkim awlsam ten ramsungah lei killi ih ta bungrua (resource) laklut theih asi tikah thansonak cu harsa asilo.

Chin mipi pawl hrang khalah tampi hmasawnnak a um ding. Harsabik zual ram (special economic zone) ah in retih a hleice in duhsaknak kan co sinsin asile Chin mipi hrangah hmasawnnak a tlancak zual ding. Curualrualin kan mipi kan ram a farah tuk tikah fimkhur tulmi a um. Chin State sungah siseh, Chin mipi pawl umnak (majority sinak) hmun kipah Chin mi rori in thansohnak (development) hnatuantu si thei dingin dan khuahkhirhmi neih tengteng a tul. Cutin kan miphun pawl ramlian, miphun lian pawl in cimneh lo dingin kanmah le kanmah kan kilhim awk thiam lo asile hlohnak a awlte fawn. Kan nunphung, kan thuanthu, kan khua kan ramah miphun dang in sumpai lennak tawn in nampil theimi fimkhur a tul. Ramleng suak kan mifim mithiam pawl tla ramsungah kan kawhkir sal thiam tla a thupi zet. A tlangpi thu sim asile kan harsatnak tla a rei tuk zo ih thansoh ding lawng kan hmabak asi ko.
CT: Hmai lam ah Thein Sein acozah in ziangtivek in hma an lak pei, tlangpar mi (Ethnic group) pawl thawn ceasefire an tuah tum mi tlunah teh an hlawh tling thluh na zum maw?

HM: A tuvek asile thleng awknak hi ke an karcak tuk lam maw ti ding khawp in tuihlan Kawl Ralkap Cozah vek an silo. Thleng awknak an duh taktak in a lang. Ralkap pawlin an tihmi cu mipi uknak, democracy a suak tikah a tu hlanih ralkap upa pawlin hremnak, an parah thuthennak an tawn dingmi hi an tihbikmi pakhat asi. Curuangah Ralkap Uknak duhlo tu pawl khalin dunglam thu cu tanta thei in hmailam sausawn zoh in rualrem  ten ralkap hruaitu, U Thei Sein te pawl an tuanpi thei asile thleng awknak a hnget khoh sinsin ding tiah zumngam asi. A tu ah miphun dang ralkap, ramkheltu pawl lawng si loin kawl pawl, ralkap uknak duhlo in ramleng suaktu pawl tla kokir in thlawngtla pawl tla a suah, remdaihnak a tuah rero mi hmuh tikah remdaihnak cu suak taktak ding tiah ruahsannak neih hi neih ding mawi hrimhrim asi.
CT: CNF ah thu ah teh Chin ramah ziang tivekin an cangvaih vivo pei? Kawlram cozah in teh an dilmi (demand) mi pawl hmuahmuah an tuah sak zum a um maw?

HM: CNF le Kawlram cozah biak awknak thu hi sim a har lai hrih. Nupi be ding vek fang an si lai. An thatsuak thei ding cu zum a um ko. Kawlram pumpi biakrem awknak cu a tu ih cozah ih tumtahmi asizia cu a langfiang zet. CNF in an dilmi hrekkhat cu parliament tiang thlen tulmi, State pakhat ih dinhmun (State rights) tiang a tel tikah thu harsa asi ih lehhnu nuamteten rel sunzawm vivo ding mi thu asi. Cuhnakin rualrem ten CNF pawl khalin ramsungah an tuah duhmi tuah thei in cozahpi pakhat thawn dawr aw thei dinhmunah an din asile CNF hrangah kekar hlawkzet a karngah asi ko.
CT: CNF in Chin ram hrangah ziangtivek Development tuah a tum, Chin ram huap in teh an tuahsuak thei zum a um maw?

HM: CNF in ramsungah development tuah dingin cozah in siannak a pek asile development an tuah thei ko. Asinan cozah in ziangtiang sumpai le bungrua, hmun le ram a pek ding, tvp a fiang hrih lo tikah sim a harsa zet. Cun CNF lakah ramleng sumpai bawmtu pawl thawn tuan tlang thei an si sinsin asile sumpai hrampi tampi ngah thei nak lamzin a um ko.
CT: CNF rualremnak an neih mi ruangah Chin Society ah Lungrualnak maw lole thenthetnak a suah ter pei?

HM: CNF in rualremnak an tuahmi cu Chin mipi zapi te lungrualnak asi tiah sim thei dingin zianghman a lang hrih lo. Rualremnak an tuah mi in thenthek nak a suahter khal asi fawn lo ding. Chin miphun pawl cu miphun dang thawn tahthim theih lo nak cu mah le tlangkulh, ramthen, peng ah miphun fatete in hmun le ram kan luahcio tikah rualremnak timi hi a thu in rem awknak men si loin miphun, miphun tete an telkim ringring hi a tulnak lai a rak um theu. Tuini tiang a thenthek aw cia mi Chin miphun pawl cu CNF in miphun rualremnak an tuah ruangah a thenthek aw mi siseh an rem aw mi a thar in an ummi sim ding a um hrih lo tluk asi. A tuih president an pek mi pawl cu CNF thawn rualrem cia mi an sinak a rei tuk zo. Cun ramsung ihsin CNF pawlin tuahmi miphun rualremnak ah a teltu pengdang milesa pawlin anmah le peng, phunhnam tete ziangtluk an kaihruai thei, an ciahneh thei timi parah tla a thum aw mi asi.
CT: Kawl cozah in CNF hmang in Chin mipi sungah Politic game an lek rero a si tiah ruahtu an um ih cumi teh ziang tin si na hmu?

HM: A ruatu an um tla le an mawh lo. Kawl pawlin CNF hmangin nasa ten Chin miphun thentheknak a tuah thei mi a um ko. Asinan a tu hrih ah Kawl pawlin CNF hmangin Chin miphun rem awk lonak an tuah asi tiah sim thei dingin thu zianghman theih mi ka nei hrih lo. Ziangah tile Kawl cozah cun hriamhrei kai pawl zo poh tla a biakrem laifang asi. Kawl cozah in CNF hmangin Chin miphun thentheknak a tuah thei dan tampi a um ko. Cu pawl sim dingah a tikcu hrih lo. An tuah lo dingah ruat hrih a tha sawn.
CT: Santhar Chin ram  tiih kan ti ringring theu mi hi ziang vek ram a si pei ? leitlun ram pakhat thawn taththim ding na nei le in sim thei pei maw?

HM: “Chin ram thar” na timi cu ziang na sim duh ti ka fiang ciah lo. Asinan a thangso mi, santhar Chin ram na sim duhmi asi ding tiah ka ruat. Cutin asile Chin ramthar ahcun pursum leilawn, ei hawlnak (Economic) lamah mahte kutke in ding thei, miphun fatete lakah rualremnak miphun pumkhat sinak in thilri, sinak le duhmi canpual, canvo cuh aw in sual aw, that aw, thisen suah awaw, hua aw rero lo in mah le peng, ramthen ciar ah siseh Chin ram hmunpi ah siseh duhthusam miphun pakhat canpual canvo kan neih thei ding le kan Chin fahniang pawl fimthiamnak le thansonak lamah zohman dunglamah tanta mi um lo ten rualran ten thansoh, hmasawn tlang ding hi asi bik. Chin miphun in leitlun miphun dang vekin miphun pakhat pianpi canpual, mahte lairel, roral theinak kan neih le kan nupi thei ding hi asi ko.
CT: Kum ziangmawzat ah Chin ram ziangtinkim leitlun ramthangso pawl kan bang thei pei?

HM: International level in Chin ram thangso dingin ram uk awknak a that ahcun kum reipi a tul lo ding. Sihman sehla, Kawl pawl hin Chin miphun thansohnak kan tlan cak ding taktak hi ziangtluk tiang sangka in onsak ding timi cu sim harsa asi. Curuangah cozah kumpi in ziangtluk zalennak a pek, ziangvek hmanrua bungrua, sumpai a pek ih ziangvek ramdang le pawlkom, company pawl hmang in Chin ram thansohnak hrang hna a tuan duh timi parah a hngat aw zet. Cumi pawl cu ramkheltu pawl cabuai (political table) parah a um mi asi tikah ramsung remdaihnak, uk awknak, tvp cozah kumpi kekar parah a thum awmi a tamsawn tikah kum ziangzat a rei ding timi cu sim harsa asi.

Bangladesh Ih Lamzinzawhtu 4 Palik In Kap That

VOA | January 30

Bangladesh Nationalist Party (BNP) tantu thawngtel cu cozah in vote pekhrilawknak cu dik tak ih an neih theinak ding ah zohfeltu ruat ding in an nawrnak ah lamzin cu January 29, zarhpini ah an zawh ih hi lamzinzawhnak an neih rero laiah palik pawl in an melthal an hmetpuak ihhleiah mitthli titlaknak gas an kah ruangah 4 in nunnak an hloh phah ih 200 lenglo in hliamhma nazet an tuar phah a si.

Hi lamzinzawhnak cu Chandpur le Laksmipur khawpiah asi ih palik cun veihnih hmethal an hmetpuak asi. Thuneitu lam cun mipi in palik pawl cu lungto thawn an deng ihhleiah palik in mipi fehtlang lo dingih an khamnak pawl par tiangih an kai ruangah palik cun tingaihnak theilo in hivek ih an kahnak san asi thu an rel.

HI vekih vote peknak zohfeltu cu wingi Sheikh Hasina in a rak hnawl ruang ih hivek ih mipi in an lungawilonak an lanternak san a si khawpi dngdang khal ah lamzawhnak an neih thukhal tuhthangca in a tarlang.

Iphone Thar Dang Lam Tuah Ding

Myanmarnewshub | January 30

Leitlun fimthiamnak a sang in a cangkang vivo vek in thil cangkang le tha tampi cu man awlai ten lei ding khal an um vivo thlang. Mifim pawl khal cun tha sinsin le cangkang sinsin ih technology an hawl rero ih a rei hlanah iphone 5 cu tidai tuar thei(water resistant) in an tuah thei cing ding a si.

Apple le Samsung company pawl cun iphone thar tidai tuar thei cu tuah tumin an buai rero lai ih hi iphone thar an tuah tum mi cu Nanotech antimi technology hmang ih tuahmi HZO (cover)a keng tel ding a si. HZO cun iphone cu tidai lakin siseh tiek lak ah siseh a humhim ding a si.

Asinan technology sangbik ih tuah asi ding ruangah tu’itum an tuah dingmi iphone cu a hlan pawl nak in a hman a kung deuh ding asi.

Ngui Ringring In Minute 2 Dîng Ding

CT News Mizoram | January 29

India cun zalennak a sual lai ih nunnak liam (thi) pawl hngilh lonak dingah January ni 30, 2012 ahkhin ram pumah Martyr’s Day hman a si zik ih, Mizoram acozah cun himi ni pual hin Tlawngkai nikhat sunhlan sml 10:59 – 11:00 karlakah Siren a ti awn ding ih, hnattuan ih feh hmuahhmuah khalin an hna cawlhsan lawkin, ngui ringring ih minute 2 sung cangkhai loih din ding a si.

Minute 2 a liam ti theih theinak dingah Siren hi sml 11:02 le 11:03 karlakah ti on sal a si ding. Aizawl khawpi sung ih Veng tin ah Local Council aurinnak hmang ih phuang darh dingin Mizoram acozah cun a ngen a si. Mizoram District dangah cun Martyr’s Day hman daan ding hi an DC pawl hnen ciar ah ttuanvo pek a si ih, Sub Division, Block le Village Level Office hmuahhmuah khalah hi caan hi, hmang cio dingah theihter an si zo. Fim zirnak inn tinkim khalah hi caan hi urhsun tak ih hmang ve dingah acozah cun ruahsannak tumpi a nei.

Leitlun Ih Niambik (Shortest) India Ihsin

TOI, Mail Online, The Telegraph  | January 28

Leitlun ah cun a niambik, a sangbik le a phunphun in bik sinak tah  asi theu ih kum 2012 ih mi niambik (shortest) khal ‘World Record’ thar hmuh ding kan neih leh ta.

Tu’itum ih ‘World Record’ le ‘The Guinness Book of Records’ ih ngankhum asimi cu zo dang le khawi hmun dang ihsin hman siloin Chin-mi beunakhawl tampi umkhawmnak India ram asi ih zohman in hivek an um kan zum bang cio lo a si lo maw?

India ram, Nagpur mi asi ih tlangkai lai a si. ‘The Guinness Book of Records(GWR)’ cun asanlam (height) cu 62.8 centimeters (24.7 inches) le a ritlam (weight) 12lbs(5.5kg) asi thu an phuang.

Ahlan ih ‘World Record’ rak ngahtu cu America ihsin Bridgett Jordan (22) asi ih a nih hi feet 2 le inches 3 ih sang 11 lbs ih rit(weight) a si. ‘The Guinness Book of Records’ thuneitu pawl cun London ihsin India ah Jyot cu a sanlam diktak a tawpnak hrang an teh leh ih ‘World Record’ thar a si thu cu an phuang a si.

… hram: DBCF Meifar (Vol.3, Issue 1)

Zuknung :

“Praise With Heart” Awnmawi Puai Neih A Si Ding!

CT News | January 28

“Praise With Heart” tiih hmin pekmi awnmawi hlasak puai (Live Concert) cu February 20 ni zanlam nazi 6pm ihsin 10pm tiang, PuDu Plaza kiangih um mi First AG Church ah tuah a si ding tin tuanvo neitu pawl cun an sim.

Himi awnmawi puai hi Chin Christian Youth International (CCYI) le Chinhill Collection pawl hohanak ih tuahmi a si. Hi Pathian hlasaknak hmun ih hlasaktu ding pawl cu tufang Kawlram sungih hlasakthiam hminthang Sang Pi, L Lun War le Chaw Su Khin pawl an si ding. Malaysia ram sungih um cia mi ihin hlasakthiam Kim Kim le Henry VL Hmangaih khal hi awnmawi puai ah an tel ve ding. Laimi sungih Guitar tumthiam Salai Cung Aung khal hi Concert hrangah Philippines ihsin a ra ve ding.

Hi Live Concert zoh theinak Ticket cu pakhat ah RM30 in zuar a si ih Falam Community pawl, FRO zung le hmun dangdang ah lei theih a si. Thuhla cipciar deuh ih theih a duhtu cun a tanglam vekin pehtlaihnak tuah a theih.

Wesley Bawi (017 882 5271); Than Te (017 343 5492).

UNHCR Card Kai Pawl March Ah Kutzung Nam Ding

UNHCR, CDU Department honanak ih tuahmi kum 2012 sungih a hmaisabik meeting cu Chinese Assembly Hall ah January 19/2012 ni ah tuah a si ih refugee community tinkim ihsin palai pawl an kai khawm. Cumi ni ih an rel dan vek asiah cun March thla ihsin UN card a nei cia tu refugee hmuahhmuah kutzung nam (finger print) ter sal ding a si.

Kutzung namnak ding hmun, a ni le tikcu can pawl cu UNHCR hin community pawl hnenah theihternak a nei leh ding. Curuangah UNHCR card a nei cia zo tu pawl cun March thla a thlen hlan deuh ihsin timtuah cia in thu le hla felfai ten thei dingah mai community thawn cat loih pehzomnak nei dingin sawm a si.

Hi kutzung nam dinghy refugee community pawl hmangih tuah ding a si ruangah UN Card a ngah zo tu FRO member zozo khal a nung lai mi FRO card (valid FRO card) nei cio dingah le a nei hrih lo tu cun a rang thei bikin FRO zungah card a thar tuah dingah sawm a si.

(FPM/ FRO)

Kum 2012 Ih Kawlram Political Zuknung Langsar Pawl Lawrkhawm

CT Media Myanmar | January 27

Kawlram sungah remthatawknak hmuh ding tampi kan hmu ih cuvek lak ihsih hminsin tlak le mipi theih ding ih tarlan tlak tete tarlannak CT in mipi hrangah a rawn pholang a si.

Kawlram cozah in NLD cu ramthukhel (political) party ih a bawm in lailak-hrilawknak ah kal tel siannak  apek zoruangah Kawlram mipi hrangah cun beisei ding tampi a um phah ih Kawlram president U Thei Sien khal in remthatawknak a fehpi vivo asi ahcun Kawlram cu democratic rampi ah a hlangkai lo ding ti rel theih a si lo.

Zuknung Pawl :

Kim Jae Joong ( JYJ from TVXQ) Birthday – 2012 Hero Festival Video Collection Pawl

Korean Gossip Girls | January 27

Birthdaylawmnak hi mitam sawn cun an ngaina vek in mi thenkhat cun an mai birthday hman theilo le ngaihsaklo khal an bo lo tisehla ka sual lemlo ding ka zum.

Korea lam ih tulai hmingthang zetzet hlasakthiam pawl khal hi a tamsawn cun birthday ropi zetih lawm hi an uar in an tihmuhawk reromi a si. Tu’itum ah cun Hero Festival zuknung collection pawl kan rak thlir sin lo ding maw. Hi puai ah Kim Jae Joong hi a bikih thlurbin mi a si.

Zuknung :

UN Secretary-general Ban Ki Moon Kawlram Ah Feh Leh Ding

Irrawaddy | January 27

United Nations (UN) secretary-general Ban Ki Moon cun a advisor Vijay K. Nambiar thawn Kawlram ah a reihlan ih a feh ding thu January 25, tlawngkaini thum ah a rel.

“ Kawlram hruaitu pawl thawn ramthu le pursumleilawnnak thu relkhawm dingin a rei hlanah Kawlram ah ka feh ding. Ka advisor Vijay Namniar khal fulltime rori in a bik ih UN hrang Kawlram le UN lak ih palai si ding ah ka ruat cih ding.” tiah a rel.

Famkim Siarbet

Happy Republic Day Aw India!!!

CT India | January 26

Theihcia zovek in tu’ini January 26, tlawngkaini li hi Republic Day Of India a si ih India ramsung hmun tinah cun ropi zet in hman tan rero zo a si.

Republic Day ah India cozah cun an ram in an neihmi ralthuam a phunphun siseh ralkap siseh aleitlun mipi hmuhah a pholang theu vek in tu;ini khal ah a pholang tan rero zo asi.

Republic Day hman a sinak san le a suahkehnak san hi kan theih khal a poimawh ve.

Republic Day Thuhla Tawi

Republic Day cu kum 1930 ah India rampi in independence a ngah lawmnak ih an tuah theumi a si ih hini hi India rampi in an ram constitution a tak in a tuahsuak ni(constitution enforce) kum 1950, January 26 ih rak hman tan zo mi cu lawmnak le theih ringringnak ih hman a si.

India ram cozah cun ram dang in India ih an neimi ralthuam, liannak le ropinak pawl a hmuh ternak hrangah mipi hmuh ding ih ralthuam pholan le lamzin ahsiseh vanlam ah khal siseh show ropi zet (parade) a hamng rero zoih India ramsung um Chin-mi beunak hawl pawl hrangah cun a takin hmuh theih a si zo.

Famkim Siarbet

Next Page »