Thianhlimnak sungih Lungawinak

May 8
Tlawngkai Nihnih

Thianhlimnak sungih Lungawinak

Ziangahtile hih harsatnak nan tuarmi cu nan zumnak a ngai maw ngai lo ti theihnak dingah a si. A siat theimi sui hman meisa in hniksak a si ttheu. Cubangtuk in sui hnakih a sunglawi sawnmi nan zumnak cu harsatnak a tuar suak theitu si dingah hniksak a ttul ve a si. Cule Jesuh Khrih a lang Ni ah thangthatnak le sunlawinak le upatnak nan ngah ding a si.
– 1 Peter 1:7

Bible Siar Ding: 2 Korin. 4:7-5:9

Na nunnak ah Pathian ih a thlentermi hniksaknak parah nangmah in zianghman idea na nei lo – cumi cu Thlarau ih thianhlimternak a si.

Duhdawtmi zumtu, na zumnak hniksaknak cu a siat theimi sui hnakin a mankhung sawn. Pathian in hniksaknak thawn a lo thianhlimter tikah theih sualnak, hremnak, le tuarnak tivek pawl in mangbangza thutthen vek a si ding. Jesuh in tawhfung a lo pek: cumi sungah na lungawi aw. Na borhhlawhnak le Satan huham zate na nunnak sung ihsin a laak ih A hmuihmel bangnak a hmuh hlan lo a lo thianhlimter ding.

“Jesuh ih nunnak cu kan taksa parah lang hrimhrim seh, tiah catbaang loin a thi theimi kan ruangpum par ahhin Khrih thihnak kan phur ringring a si,” (2 Korin 4:10). Himi a tuah rerolai ahcun lungawiza cu a si lemlo; ziangahtile cumi cu taksa in a cosaang duh lo. Asinan rel zo bangin tisa daan cun Thlarau daan cu a dokalh ringring. Na nunnak zate Pathian huham sungah ap in, a sunlawinak kha langhngan in aupi ding a si. Hiti ih hniksak na si rerolai caan khal ah Pathian hnenah “Amen” na ti thei a ttul. Cumi cu thil hasazet tla a si men thei, sikhalsehla Pathian in a lo bawm ding a si.

Nunsim na ton caan, mi ih ruahsual na ton caan, a harzetmi hniksaknak na tuar caan le dik lozet ih tisiat na ton caan ah Pathian in a lo tong dingih thluasuah a lo pe ding a si. Mipi in cumi cu Satan an ti. A poi lo, meisa bangin lo kaang ko seh, na hrangah thil ttha a si ding. Phunzai rero hlah, thinsau le lungawi te’n tuar thei zuam ttentto aw. Cumi cu theih a ttha, “duhdawtnak cu a thin a sau ih mi zaangfah a thiam” (1 Korin 13:4). Bawipa ih sunlawinak cu lungawinak thawn thangtthat uh.

Amahcu nan hmu dah lo na’n nan duhdawt; nan hmu lo na’n nan zum. Curuangah kaa ih sim thei lomi, a maksakzetmi le a sunglawimi lungawinak nan nei” (1 Peter 1:8).

Duhdawtmi, meisa ih hniksak na si bangin Bawipa in ziangkim lo thianhlimter in na nun ah Amai’ hmuihmel cuang hram seh!

@ Smith Wigglesworth

Daihnak le Ruahsannak

May 7
Tlawngkai Nikhat

Daihnak le Ruahsannak

Ruahsannak hram a simi Pathian in Amah nan zumnak thawngin lungawinak le daihnak phunkim thawn lo khatter sehla cuticun Thlarau Thianghlim in Amah ih cahnak thawngin ruahsannak cu nan hnenah lo burh hram seh!
– Rom 15:13

Bible Siar Ding: Efesa 1:2-21

Thlarau ih thianhlimternak thawngin cawlhhahdamnak hmun ah na thleng thei ding. Thianhlimternak sungah thlangam daihnak a um, ziangahtile cumi cu phuanlang awknak a si ih vancung uknak sungah a lo hruailut ding a si. Pathian cu leitlun ah a ra, a ttong, ih na hnenah a phuanglang aw a si. Cule Pathian thawn hmaiton ih na um caan ah thlangam daihnak thluasuah na co, “Cuticun minung ruah ban lomi Pathian ih daihnak in nan thinlung le nan ruahnak cu Khrih Jesuh ah him te’n a kilkhawi ding” (Filipi 4:7).

Aw cumi cu ka hrangah vancung bangtuk a si,
Vancung bangtuk a si;
Jordan tiva ka tan ih Canaan ram nuam ka thleng,
Cule himi cu ka hrangah vancung bangtuk a si.

Hih Thlarau Thianghlim ih thianhlimternak in Pathian sunlawinak ih mangbangza ruahsan thawn mil aw in rualremnak sungah in hruailut. A nungmi ruahsannak cu cangvaihnak a si. Cumi cun hmai in norter. A nungmi ruahsannak cu ziangtinkim dunglam ah a taanta. Cumi cun sunmang (vision) in neihter. A nungmi ruahsannak cu Bawipa Jesuh ih rat saalnak thu a hmu! Cun a sungah a lo umter, hih a nungmi ruahsannak sungah. Nangmah cu zum dingin nangmah le nangmah thinlung phurnak nei dingin na zuam aw ciamco a si lo, cuhnakin a nungmi ruahsannak in na nunnak cu lungawinak le nunnak Siangpahrang rat ding hngakhlapnak thawn a lo khatter sawn. Bawipa cu thangtthat in um ko she! Pathian in a hnakkar ah a lo ten ringring timi thutak hi theihter ka lo duhsakzet a si.

Thlarau Thianghlim Pathian hnenah thla ka cam, Amah in hih lamzin ah a lo hruai ding. Pathian thawn rualrem saalnak nan nei ding ti ka zum ngam. A nungmi ruahsannak na neih theinak dingah zianghman in a lo dawnkham hrimhrim lo a si.

Ziangtlukin in duhdawt, in huppheng, ih lungawinak in neither! Ziangtluk in Pathian in kan khuat hai cu a liamter (Saam 23:5)! “Bawipa hnenih lungawinak cu na cahnak a si” (Neh. 8:10). A nungmi ruahsannak cu na hngilh lo ding ti ka zum. Cumi cu na thlarau hrangah Pathian ih tumtahmi a si. Cumi cu mangbangza a si. Hallelujah!

A nungmi ruahsannak le a thimi ruahsannak cu an raalden aw.

@ Smith Wigglesworth

Na parih a Cangvaimi Thlarau

May 6
Zarhpi Ni

Na parih a Cangvaimi Thlarau

Pathian in leilung hi a duhdawttuk ruangah A Fapa neihsun a pek ih Amah a zumtu hmuahhmuah cu thi loin kumkhua nunnak an co ding.
– John 3:16

Bible Siar Ding: John 3:5-21

Kum ziat na si timi hi a thupibik lo. Hi ti’n lo sim bang sehla, “Thlarau ih a lo thamdai caan na ciing maw?” Khuaruahharza a simi cu mi tampi in, “Thei lo” ti’n an letmi hi a si. Ziangti’n na ko ding cumi cu? Pathian in nangmah cu hih leitlun ah a run lo thlenh zo ih A zaangfahnak in Amai’ hnenah a lo hruaikir saal.

Ka nunnak keimah te’n ka ruat awk tikah, ka nu le ka pa kiangte ih ka umlai ah Pathian pan ding le hlam ding duhhiarnak zianghman ka rak nei lo. Asinain ka nauhaktelai ihsin lamdangzet in Thlarau Thianghlim ih cangvaihnak cu ka parah a thleng. Kum 8 ka ti ah felfaizet in rundamnak ka co. Kum 9 ka kim tikah Thlarau Thianghlim ka sungah a nung ih hriat lo ttong in ka ttong thei. Keimah cu “Pathian in a tumtahnak bangtuk in hrilmi ka si” (1 Peter 1:2). Midang tampi in tla cumi vek tontehnak an nei ve ding ka zum.

Duhdawtnak, zawnruahnak, le zaangfahnak ih khat misual pakhatte khal hloralter a siang lotu Pathian kan neih hi cu thluasuah taktak a si. Pathian in Jesuh Khrih thawngin mi hmuahhmuah rundamnak co ding hi cang thei ko in a tuah. A duhdawtmi a Fapa, mi hmuahhmuah ih sualnak ruangah thi dingin a pek. Kan sualnak a laak timi cu thutak a si; leilungpi hrangah sualnak ih man a pek timi khal hi rinsan tlak thutak a si; ih A Fapa cu mi zapi hrangah a pek timi hi zum tlak thutak a si (Matt. 20:28). “Zo pawl hrangah?” na ti thei men. Bible in, “Tihaal mi hmuahhmuah in ra uh; nunnak tidai a duhtu hmuahhmuah in man loin ra in uh” in ti (Thup. 22:17).

Pathian ih pekmi “Rundamnak laksawng” a cosaang duh lotu pawl nunnak ah teh ziangti’n a si pei? Anih pawl cun Jesuh ih thiisen kha direct in an hnon ruangah; Khrih ih uknak an el ruangah, “A duhtu” timi hi khatlam kamah kan um ih “a duh lotu” timi cu khatlam kam ah an um. Hih leitlun ah Pathian ih laksawng duhhiarnak nei lotu an um. Ziangahso hiti’n an um thei? Ca Thianghlim in hiti’n in sim: Ziangahtile “Cu pawl cun an zum duh lo, ziangahtile hih lei khawvel ih khawzing in an thinlung cu khawthim lakah a ret ringring ruangah a si. Thuthangtha ih tleunak, Khrih sunlawinak ihsin a rami tleunak cu hmu hlah hngai seh, tiah cuih lei khawvel khawzing cun a phen ringring. Cule Khrih cu Pathian hmuihmel taktak a si” (2 Korin 4:4).

Jesuh cu Pawlkom hmuahhmuah hnakin a tum sawn, sikhalsehla mi zovek ih thinlung sung khal ah um thei dingin a fate.

@ Smith Wigglesworth

Pathian ih Hrilmi

May 5
Zarhte Ni

Pathian ih Hrilmi

Raaltlan bangin a tthekdarh awmi, Pathian ih hrilmi pawl… Jesuh Khrih ih thu nan thlunnak dingah le Amai’ thiisen ih thlentermi nan sinak dingah nannih cu kan Pa Pathian ih tumtahnak bangtuk in hrilmi le Amah ih thlarau in mi thianghlim ih tuahmi nan si.
– 1 Peter 1:1-2

Bible Siar Ding: 1 Thess 1:2-7; 4:3-12

Milai sinak, tisami sinak, leitlun ih amahte a cangmi thilri tlaihsannak timi pawl zate hi vanlam huham dokalhtu an si. Satan huham in milai nunnak ih himi vek dinhmun parah a tthum aw, hram a khuar ih hna a ttuan, ahleice in minung thinlung muril thuhrisahcatnak in Pathian hnenih a pek awk lo tikah a luarkaibik. Cuticun thim thuneihnak cu tho le cangvai tahrat in vanlam tleunak ih thuneihnak kha a doraal thlang. Sikhalsehla ziangtik hmanah khawthim cu khawvang cu a do neh thei dah kel lo.

Vanlam thuneihnak hi a caangcaang ahcun mi malte a si aw ttheu hmanseh, mi tamsawn a si aw ringring ko. Ka simmi hi a dik maw? A si, ka sim duhmi cu a fiang ko. Mi malte sungih a um caan hmanah nehnak a co ringirng thotho.

Thlarau Thianghlim in kan thuneihnak le kan caan ttha theihter in duhsak: “Kannih cu kan Pa Pathian ih tumtahnak bangtuk in hrilmi le Amah ih thlarau in mi thianghlim ih tuahmi kan si” (1 Peter 1:2). Atu ih Thlarau ih thianhlimternak cu sualnak ihsin thianhlimternak a si lo. Cumi cu tlennak hnattuan hnakin a saang deuh. Jesuh thiisen cu thianhlimternak hrangah huham cakzetmi a si; cule huham cahnak dang pawl cu a dawihlo ih a cakzetmi Pathian ih huham in kan nunnak cu a thar in in thlengh sak.

Kan sung ihsin sualnak ih in suahsan tikah, kan nunnak cu thianhlimter a si tikah le Pathian Thu cu kan sungah nung in Thlarau Thianghlim huham cahnak a cangvaih tikah ziangtinkim ah nehnak in coter. Cuti’n Thlarau Thianghlim huham phuanlang awknak in a saannak hmun ah in khaisang dingih Khrih sungi a phuanglang awtu Pathian ih sinak famkim sungah in hruailut ding.

Cumi cu Thlarau Thianghlim ih ti thianghlimnak in a si ih thunthlunnak le Khrih thiisen ih thehnak in a si. Thuthlunnak siar lo thianghlimternak dang a um lo.

Sualralnak cu a karhzaizet ko ding, asinan Bawipa in a mithiang pawl tlunih thantar a thlir ahcun nehnak a si.

@ Smith Wigglesworth

Mi Zaangfah Thiamnak Thlarau

May 4
Tlawngkai Ninga

Mi Zaangfah Thiamnak Thlarau

Mi zaangfah thiamtu pawl cu mi thluasuak an si; ziangahtile Pathian in anmah a zaangfah ve ding. – Matthai 5:7

Bible Siar Ding: Hosea 6:1-6; Saam 85:4-13

Pathian in nan leitisa nun thihter in Thlarau sungin Pathian lungawitertu nan si theinak dingah nan nun cu dingfelnak thawn lo thuam hram seh, ti’n thla ka cam. Pathian in tuah ding in duhsak timi Ca Thianghlim sungah kan hmu: “Mi zaangfah thiamtu pawl cu mi thluasuak an si; ziangahtile Pathian in anmah a zaangfah ve ding” (Matt. 5:7).

Himi hi thlaraulam ih kan dinhmun ding diktak a si ti’n ka zum, ziangahtile leitisa daan hnakin a saang sawnmi thlarau daan a si ruangah. Mi zaangfahnak kan ti tik ahkhin tthatnak, zaangfahnak, le midang parih zawnruahnak awkam hman khi kan sim duhmi a si ttheu. Cuvek pawl khi ttihzah upat tlakah kan ruat ttheu. Sikhalsehla cuvek pawl cu leitlun mi pawl ih tuah theimi an si. Duhdawtmi zumtu, cumi cu kan neih dingmi hrimhrim a si ih asinan cumi hnakih uak deuh kan neih a ttul a si. Jesuh Khrih ih neihmi zaangfahnak cu Amah rori kan sungih a nun lo ahcun a sinak diktak ziangtik hmanah kan thei ngaingai thei lo ding. Maw, Sunglawi ka Bawipa! Nangmah bangtu zoso um dah? Nangmah vekih nunzia mawi le nunnak liamtu zoso a um?

Bible in, “Mi zaangfah thiamtu pawl cu mi thluasuak an si,” a ti. Bawipa na sungih a cangvaih lo ahcun mi zaangfahnak na nei thei taktak lo ding. Hih a cuangcemi zaangfahnak na neih lo ahcun huham neimi baptism khal na co thei lo ding. Vanlam ih tonghthamnak in Satan ih thiltitheinak a siatbal dingih hremnak sungin a lo luatter ding, bawmtu nei lo dinhmun ihsin cahnak a lo pe ding. Himi hi Pathian ih in pek duhmi thlarau a si. A maksaknak, A sunlawinak, A cahnak le A huham thawn khat ding cu kan thinlung muril ih duhhiarnak le ttahhnawhnak au aw si hram ko seh!

Hminsin ding ummi thil thupizet pakhat cu, mi zaangfah thiamtu pawl cu zaangfahnak a co rori timi hi a si. Thlarau nun tahnak hi zoh hnik: hmaisabik ah thlarau thawn khat, cule kutkai aw, cun luangliam (Luke 6:38). Hih vanlam tonghthamnak cu duh a nung. Leitlun ih lungawizabik le a thlumbikmi a si. Pathian in hih sabit thar nei ding in duhsak. Mi thinlung a hninter. Vancungram ah mi a hruai thlenhtu a si.

Nan zate’n zaangfah ka lo dil, thlaraulam ah ka farah ti thei aw in, “Pathian bawi tokham cu raaltthazet in pan uhsi, cutawk ah zaangfahnak a um.” (Heb. 4:16). Rak pan zaang uhla, Bawipa in a lo thluasuah ding.

Thlaraulam ih farah pawl bawm thei dingah vanlam lennak kan neih a ttul.

@ Smith Wigglesworth

Dingnak hrangih Rilrawn le Tihalnak Thlarau

May 3
Tlawngkai Nili

Dingnak hrangih Rilrawn le Tihalnak Thlarau

Pathian ih duhnak tuah ding a hiarhaltu pawl cu mi thluasuak an si; ziangahtile Pathian in an thinlung di a riamter ding.
– Matthai 5:6

Bible Siar Ding: Hebru 1:8-9; 2:1-18

Jesuh ih Tlangpar Thuzirhnak hi a mawi ngaingaimi thutak a si. Pathian in thlaraulam ih kan rilrawnnak le kan tihaalnak ah diriamnak in pe tengteng ding timi hi kan ruah le kan zum a ttul. Pathian in an thinlung sungah duhhiarnak thlarau a pek lo ahcun zohman “Pathian ih duhnak tuah ding a hiarhaltu” an si thei lo ding. “Dingfelnak” timi hi Jesuh Khrih ih dingfelnak sim duhmi a si.

1 Johan 5:4-5 sungah hiti’n kan hmu: “Ka lungawinak kim seh tiah hih ca hi nan hnenah ka ngan a si. A Fapa hnen ihsin ka theihmi thu le nan hnenih ka phuanmi cu himi hi a si: Pathian cu tleunak a si ih a sungah thimnak zianghman a um lo.” Dingfelnak cu kanmai’ tuah theimi hnakin a nasa deuh. Hiti’n an simmi ka thei dah: “Aw, kei cu zo ih hnen hmanah thilsual zianghman ka tuah dah lo. Ka lamzin ka pek,” ti’n. Himi cu a olzawng in kan sim asile tisami sinak langternak a si. Asinan himi hnakih a saang deuhmi cu: “Ziangahtile Khrih Jesuh thawn kan pehzom awknak thawngin nunnak in petu Thlarau ih daan in sualnak le thihnak daan sung ihsin in luatter zo,” timi hi a si (Rom 8:2). Jesuh cu kan hrangah a famkimmi dingfelnak a si. Amah cu Pathian huham ih rami a si:

“Minung sinak hi a ttonttaihtuk ruangah Daan ih a tuah thei lomi kha Pathian in a tuah suak. Amah ih Fapa run thlah tahrat in minung sinak sungih a ummi sualnak kha a hnon sak; cuih a Fapa cu sualnak siatralter ta dingin minung sinak thawn a ra” (Rom 8:3).

Vanlam ihsin a thianghlimmi tonghthamnak cun zianghman cangvai lo ih a um menmentu a lo siter lo ding. A nasa sawnmi thil tuah dingih hiarhalnak kha na thinlung sungah a karhzaiter sawn ding. Na sungih a ummi Thlarau hnattuannak in na leitisami sinak kha a kawlawngter dingih vanlam thlarau nunnak in na nun a luahkhatter ding. Cumi cu Jesuh ih mit-hmai hawlnak ihsin rami a si. Thlarau Thianghlim na cosaan asile a thluasuah cu na sung ihsin catbaang loin a luang suak ding. Kei ka hrang ahcun Khrih ih dingfelnak siar lo nun diriamnak i pe theitu zianghman a um lo. Thlarau hnattuannak in Pathian ih huham in hiarhaalter. Cumi cu vanlam buainak a si ih buainak rehter theinak umsun lamzin pakhat cu Amah neih ding lawng hi a si.

Jesuh kan neih ahcun ziangkim neitu kan si.

@ Smith Wigglesworth

Rilrawng le Tihaal mi pawl

May 2
Tlawngkai Nithum

Rilrawng le Tihal mi pawl

Pathian ih duhnak tuah ding a hiarhaltu pawl cu mi thluasuak an si; ziangahtile Pathian in an thinlung di a riamter ding.
– Matthai 5:6

Bible Siar Ding: Saam 42

Nangmahlam in tuah ding ttulmi pawl tuah awla cuti’n Pathian in A Ttongkam cu na parah a famkimter ding. Hih cacaang: “An thinlung di a riamter ding” timi hi ttha te’n hminsin aw. Pathian ih Thlarau cun hiti’n in sawm rero. Bawipa in, “Ra uh, tihaal mi hmuahhmuah ra uh, hinah tidai a um. Ra uh paisa a nei lo mi pawl rawl ra lei uhla ei uh. Ra uh sabit le cawhnawi ra lei uh; man loin nan ngah ding,” a ti (Isaiah 55:1). Pathian Thlarau in Khrih ih famkimnak pawl a laak dingih na hnenah a langter ding.
Cule nang tla Khrih tlamtlinnak kha co le neih ve na hiarhaal ding. Cuti’n dingfelnak nun neih ding hiarnak na neih tikah Pathian in na nun ah a famkimter ding a si.

Judah mi pawl ih Puai thupi ni ah Pathian bia dingih a ra suaktu mipi tamzet na mitthlam in cuangter hnik aw. Annih pawl hi thinlung diriamnak zianghman an nei lo. Sihmansehla puai ni nitabik a thupibikmi le sunglawibik ni ah, Jesuh cu mizapi hmaika ah a dingih aw ringzet in hiti’n a au: “Zokhal ti a haal mi cu Ka hnenah ra sehla ra in seh. Ca Thianghlim in ‘Zokhal keimah i zumtu cu a thinlung sung ihsin nunnak tiva a put ding,’ tiah a ti vekin a si ding,” tiah a sim (John 7:37-38).

Jesuh in a theih fiangmi cu hih puai hmun ih a ra mi pawl nunnak ah nunnak tiva a luang lo timi hi a si. Curuangah an hnenah duhdawtnak thawn nun diriamnak taktak ngah theinak hmun cu Amah lawng a si zia a theihternak a si. Duhdawtmi zumtu unau, tuni ahhin nang teh na nunnak ah diriam lozet le tihaal in na um pang maw? A nungmi Khrih Jesuh in duhdawtnak aanka neem thawn Amah hnenih rak pan dingah a lo sawm ringringlai a si. Ka nunnak in tettikhan ka duhmi cu Khrih in tuni khal ah thlarau nun in rilrawng tihaal taktaktu pawl le thinlung takih hiarhalnak a neitu pawl cu an nunnak ah thil ttha in a khatter ih nun diriamnak pe in an nun a famkimter a si.

Pathian in milai pawl hi rilrawng le tihaal ih um ding in siang ttheu. Asinan a netabik ahcun Amah a pantu le a rinsantu pawl cu a tthabik in a cawm saal. Hmunkip le ziangtik caan khal ah rilrawngmi a cawm ih tihaalmi an tihaal a riamter. Dungthluntu pawl in a thoktirte ah thlarau nun diriamnak thluasuah an rak dong ngah. Tuni zumtu nang teh na rilrawng maw? Rilrawng tihaal in na um asile nun diriamnak coter dingin Pathian in thutiamkamnak na hrangah a nei ringring a si.

Bible sungah tuah sak ding (shall) timi na hmuh tinte na hrangah tuah aw.

@ Smith Wigglesworth

Lungneemnak Thlarau

May 1
Tlawngkai Nihnih

Lungneemnak Thlarau

Lungneem mi pawl cu mi thluasuak an si; ziangahtile Pathian ih kam ciami an co ding.
– Matthai 5:5

Bible Siar Ding: Isaiah 11:1-9

Tuni ah Pathian in lungawi aipuang ih um ding in duhsak. Amah in hih hmun ah in hruai khawm a si ruangah ninghan riahsiatnak ihsin atu ahcun lungawi thinnuam ih um ding kan si. Ca Thianghlim in, ‘Lungneem mi pawl cu mi thluasuak an si; ziangahtile Pathian ih kam ciami an co ding” (Matthai 5:5).

“Lungneemnak tivek thuhla in sim hniaihniai hlah aw,” na ti thei men. Asinan kei cun cuti’n ka ti thei lo riai. Moses ih thu hi ttha te’n zohfel hnik aw. Egypt pa a thah lai ahkhan a thinlung a neem lamlam zik lo. Sihmansehla Pathian in Midian ram ah Moses cu a ko, ih a nunnak kha a kutcak sungih a laaklut ngah tik ahcun a thinlungput le a nunnak zate a thlengh sak thluh, a rem ttha saal in leitlun ih mi lungneembik timi dinhmun ah a thleng riangmang ee. Na thintawinak cu ziang vek a va si hmanah a poi lo. Vanlam huham ih tonghthamnak le thamdainak na neih ngah asile Pathian in mi tongdor le mi lungneem ah a lo sersiam saal thei a si.

Kei tla hi mi thintawizet ka rak si dah nain atu ahcun Pathian ka theih ngah hnu le A hnenih pum ka pek hnu ahcun Amah in kan thinlungput i rem tthat sak ih a hnattuantu dinhmun ah i khaisang in i hmang a si. Ka minung sinak ih thinlung siava pawl le mizia ttha lo pawl hmuahhmuah a tthiatbal thluh ih Amai’ duhmi thinlungput ka sungah a ret.

Nikhat ni cu Pathian ih huham ka parah a rung thleng. Pathian ka tong ih a hmaika ah ka bok. Mipi in hiti’n thu an sut, “Smith Wigglesworth in ziangmi sualnak so a tuah?” ti’n. Cuti’n zarh kar hnih cu a liam. Pathian ih biakttheng ka thlen tinte’n ka thinlung sugah zianghman ka si lo zia le bawmtu nei lo ka si zia pawl nasatak in in theihter. Cule Thuthangttha simtu Pastor le hruaitu pakhat ka kiangnai ah an thleng. Pathian in ka nunnak ah tthangphawknak a thlenter. Pathian in ka nunnak cu a khekkhuai thluh ih ka sunglam nun ah tthangharhnak a umter. Oh ziangtluk duhnungza so a si?

Pathian lawngin minung nunnak a rem ttha thei. Sui cu meisa ih an rawh tik lawngah an duhmi design an sersuak thei. A kekkuaimi thinlung lawng beltuahtu in a duhmi bel pianhmang (design) ah a tuah thei. Aw, Bawipa, cuih thluasuah dinhmun cu in pe hram awla kannih hi mi lungneem le mi thluasuak kan si thei ding.

A famkimmi duhdawtnak in mi lungneem ah in sersiam.

@ Smith Wigglesworth

Lungneem mi Hrangah

April 30
Tlawngkai Nikhat

Lungneem Mi Hrangah

Lungneem mi pawl cu mi thluasuak an si; ziangahtile Pathian ih kam ciami an co ding.
– Matthai 5:5

Bible Siar Ding: Isaiah 11:1-10

Moses cu a miphun hrangih a thinlung thawhnak ahcun lungkhoh ngaingai mi a si ruangah a rahsuah cu mithah tiang rori a si (Suah. 2:11-12). A thinlung cu a dikmi tuahsuak dingah a dikfel, asinan minung fimnak le cahnak parah a hngatsan. Lei tisa fimnak le duhhiarnak parah hngatsan ih thiltuah tikah palhnak a um thei ringring. Moses in a miphun hrangah duhnak nasatak a nei. Cuih lungthawhnak cu Pathian ih kilvenmi (control) a si ahcun leitlun ih thil tthabik lakah a telmi a si. Sihmansehla Pathian ih kilven lomi a si ahcun leitlun ih ttihnungbik le thil siavabik a si thei.

Paul tla duhsaknak nasatuk neitu a si ih a hmaisalam ah Jesuh ih dungthluntu zumtu pawl thawngthlatu le hremtu a rak si (Tirh. 8:3). Asinan Pathian in a ko, a nunnak a thlengh sak ih netalam ahcun tisa daan ih a miphun hrangah amah sawn kha Khrih duhdawtnak sung ihsi hman tthen ding tiang a ngam thlang (Rom 9:3-4).

Pathian in Moses ih lungkhohnak a laaksak ih leitlun ih mi lungneembik ah a sersiam. Tarsus khua mi Saul ih thinlung hakzet khal zaangfahnak sungih thinlung tangdorbik le thinneembik ah a tuah. Aw, duhdawtmi u le nau pawl, Pathian in cubangtuk in na thinlung tla lo thlengh sakin a lo rem sak thei. Na nunnak sungah vanlam lungneemnak thinlung a lo retsak thei ih na neih lomi thil dang ziangkim khal a lo pe thei thluh a si.

Kan minung hlun hrem ding le tthatter ding hi kanmah lam ih zuam ciamco ding thil a si lo (Efesa 4:22). Asinan Pathian in ziangkim a rem ttha thei a si. Zumtu leitisami (carnal man) cun Pathian ih duhnak thlun in a thu a ngai thei lo, sikhalsehla Pathian in thinglamtah ah hruai in a duhnak hmun ah a umter thei. Pathian ih nun thlengh theinak huham in kannih cu thinlungput thianghlim neitu le mi thianghlim ah in sersiam thei. Cuti’n a ruhzetmi le a khohzetmi kan leitisa thinlung cu hlonhlo tahrat in kan Bawipa Jesuh Khrih ih thinlungput (Filipi 2:5) vek in neihter thei a si.

Pathian cu na nunnak sungah thuneitubik le uktu na siter a ttul. Na siter thei pei maw? Amah cun na lungruhnak a khekkhuai thei. Mi lungneem ah a lo canter thei.

Zumnak dik neihnak ih a cemnetnak cu lungawinak a si ringirng.

@ Smith Wigglesworth

Ninghannak Thlarau

April 29
Zarhpi Ni

Ninghannak Thlarau

Ninghang lungsia pawl cu mi thluasuak an si; ziangahtile Pathian in a hneem hai ding.
- Matthai 5:4

Bible Siar Ding: Saam 23

Kannih cu kiangkap thianghlim, Pathian cu kanmai’ sungah le kanmah ihsin a tleu theinak ding hmun ah um hrimhrim ding kan si. Aw! Ziangtluk ih rundamnak so a si! (Heb. 7:25)! Pathian Fapa Jesuh theitu le neitu ka sinak ahhin ka diriam ngaingai, ziangtik hmanah ka derthawm nawn lo ding. Kan nunnak cu tidai kai bangin a saannak ah a kai vingvo ding. Matthai 5:4 ah Jesuh in, “Ninghang lungsia pawl cu mi thluasuak an si; “Ziangahtile Pathian in a hneem hngai ding” in ti.

Jesuh ih sim duhmi hi kan duhdawtmi ih thihnak ruangah ninghan riahsiatnak a si maw? A si lo. Kan fanu kan fapa vancungram thleng lo ding pawl hrangah, le Thlarau thu zianghman thei lotu pawl hrangah riahsia ih um ding kan sinak sawn a sim duhmi a si. Pathian in riahsiatnak thinlung kha kan sungah ret in A huham a cangvaihter tikah inntin ah tthangphawknak a umter ding.

Hih thlarau hlo hrangih ninghan riahsiatnak hi a vun simbetmi “Pathian ih hnemnak hainak” timi na ngah lo ahcun a cang thei lomi a si. Pathian in thlarau rundam a ttulmi pawl hrangah ninghan riahsiatnak thlarau a lo pek khal le, nehnak cu pek na si lo ding! Duhdawt mi, Pathiam ih a cakzetmi huham cu kan sungah a um. Cule Thlarau in a hloral dingmi le kaa lawngih Khristian a ti awtu pawl hrangih ninghan riahnak thinlung in neither tikah an tlaksamnak pawl kan hmu thei ih Pathian hnenih kan thlenpi hlan lo zianghman a cangsuak thei lo ding. Sikhalsehla cuvek a can tikah Pathian in na nunnak sungah lungawinak a umter ding a si.

Tthangphawknak a thleng rerolai. Pathian ih thinlung cu thlarau hlo zawnruahnak a umnak hmun ah a um. A siatral cuahcomi thlarau hlo pawl hrangah thinlung kekkuai in um uhsi, ziangahtile Pathian in thluasuah pek in duh a si. Aw, Bawipa hrangih hnattuan le harsatnak tuar ruangih lungawinak cu a va mak ve! Jesuh Khrih parah hngatsan uhsi! Pathian cu a huham cahnak thawn a thleng ding. Thinglamtah ihsin ttummi si loin, zumnak in zumsinnak ah, sunlawinak in sunlawisinnak ah a kai vingvo dingih mawh nei lo le soisel ding um nawn lo dinhmun ah a thleng vingvo ding (2 Peter 3:14). Pathian hmaika ih rin-umnak nun kan neih tikah ninghang riahsiatnak thlarau cu lungawinak thlarau ah a thlengh aw ding a si.

Zumnak dik neihnak ih a cemnetnak cu lungawinak a si ringirng.

@ Smith Wigglesworth

Ninghang Riahsiami hrangah

April 28
Zarhte Ni

Ninghang riahsiami hrangah

Ninghang lungsia pawl cu mi thluasuak an si; ziangahtile Pathian in a hneem hngai ding.
- Matthai 5:4

Bible Siar Ding: 1 Korin 15:51-57; 1 Thess 4:13-18

Mipawl in ninghan riahsiatnak hi a palh zawngin ruahnak an nei ttheu. Switzerland ih ka umlai ah an tuahmi pakhat ka hmuhmi cu, ni nikhat cu ninghan riahsiatnak langternak pangpar kual kha thlaanmual ih ret ni an nei. “Ziangruangah tlaanmual ahcun nan tikcu caan nan cemter rero?” ti’n thu ka sut. Nan duhdawtmi nan unau pawl cu hih thlaan ah an um nawn lo. Pangpar kual pawl thlaanmual ih nan rak ret ciamcomi hi zumnak dik a si lo. Khrih sungih a thi zotu pawl cu Amah thawn vanram ah an feh zo a si. Paul ih a simmi hi a tthasawnmi a si ti’n ka sim hngai (Filipi 1:23).

Kan nu in veikhat cu hit’n i ti; “Thu ka sim tikah in zoh aw. Thuthangtha ka sim tikah vancungram thawn ka naih cuang, veikhatkhat ahcun ka hlocih lai ding” ti’n. Zaan khat cu thuthangttha a sim rero ih a sim ttheh tikah a feh hlo ngaingai. Kei cu Glasgow ah feh ding ka si ih khawmnak a feh hlante ah kan cibai aw taa. Inn ihsin ka suah zawngah siibawi le palik pawl kan inn ah an ra thleng ih, “Na nupi cu Biakinn sangka ah a tlu ih a thi,” tiah in ra sim. Ka nupi cu a duhnak hmun ah a thleng zo ti ka thei. Ka ttap lo, theih lo ttong in thla ka cam, Pathian ka thangtthat. Minung tisa daan in ka sim asile amah cu ka ziangkim a si; sihmansehla tisalam daan in ka riahsia thei lo ih thlaraulam daan in ka lungawi. Kan inn cu a rei hlanah mipi in an khat thluh. Siibawi in, “A thi zo, a hrangah zianghman tuahsak theimi kan nei nawn lo,” a ti. A ruak umnak ahcun ka va feh ih, thihnak tlunah thu ka pek, nungter saal awla hmakhat te’n kan nu cu ka hnenah ra she! ti’n thla ka cam. Cutikah Pathian in hiti’n in sim, “Amah cu Keimah ih taa a si; a hnattuan a ttheh zo.” Pathian ih i sim duhmi cu ka theithiam.

A ruak cu ruakkuang sungah an ret, ka fanu le ka fapa pawl cu inn sungah ka hruai hngai ih, “Hitawk ahhin nan nu a um maw?” ti’n ka ti hngai tikah, annih in “Ka pa, ka nu cu hinah a um lo,” in ti. Cutikah a ruak cu lang loin kan khuh pei ka ti. Na duhdawtmi mithi, Khrih thawn a feh zotu pawl hrangih na riahsia asile – hiti’n ka lo sim duh – Paul ih Pathian thutak a phuanmi ih phuanlangnak na nei ngah hrih lo tinak a si. Paul ih in hmuhmi cu thih cu hih lei tisa ih um hrih hnakin a ttha deuh ti a si (2 Korin 5:8). Hih Ca Thianghlim hi kan siar, asinan a buaimi cu mipi in an zum thei lomi hi a si. Pathian na zum taktak tik ahcun hiti’n na ti thei ve ding, “Ziangvek a can khal le a ttha. Bawipa, ka duhdawtmi in laak sak a si khal le Nangmah thu si ko,” ti’n.

Zumnak cun mai’ zawn kan ruah ruangih kan mitthli tlaknak a kiangter.

@ Smith Wigglesworth

Farahnak Thlarau

April 27
Tlawngkai Ninga

Farahnak Thlarau

Thlaraulam ah ka farah ti a thei awtu pawl cu mi thluasuak an si; ziangahtile vancung uknak cu anmah ih taa a si.
- Matthai 5:3

Bible Siar Ding: Saam 37:25-40

Hih thlaraulam ih farahnak timi thuruahnak (idea) kan theih fiang ngah tikah le kanmah le kanmah Jesuh Khrih thawn pumkhat kan si timi kan fiang awk tikah Pathian hrang ahcun ziang hmuahhmuah a si thei timi hmun ah kan thleng tinak a si. Pathian in rikhiah thei lomi bom theinak a nei timi cu kan lungkimpi ih thlaraulam ih mi farah kan sinak kannih cu Pathian taa kan si ih “kannih cu vancung uknak ih minung kan si.”

Jesuh cu Samaria khua ih Shchar tikhur ih a thlen tikah “a khualtlawnnak ah a tha a baangzet (Johan 4:6) ih tikhur kiangah a to. A dungthluntu pawl cu khua sungah rawl lei dingin an feh thluh ruangah a kiangah an um lo (c. 8). An ra thlen tikah Jesuh cu thlangam le thinnuam ih a um kha an ra hmu. Rilrawng le rawl ei ding hiarhal in a um lo ih a hahdamzet. Cuti ih Jesuh cu an rawl leimi pawl ei dingah zianghman hiarnak nei lo ih a um tikah , dungthluntu pawl cu pakhat le pakhat hiti’n an ti aw, “mi pakhatkhat in ei ding rawl a rak keng zo a si pei maw aw?” ti’n (c. 33). Himi thu in minung cu Pathian sungih a um tikah le Pathian sungih a hnimpil awk tikah ziangvek tikcu caan khal ah hih leitlun buainak in a tham baan lo, a hnaihnok baan lo timi a fiangter.

Cule an hnenah, “Ttongtthimnak ah, ‘thla li hnu ah rawl khawm caan tiah nan ti. Sikhalsehla thungai in ka lo sim: Lo sung khi hei zoh hnik uh! Lorawl an thar zo ih rawl laak caan a cu zo a si” a ti (c. 35). Cumi cu Anih hrangah a rawl thawbik cu a si. Pathian sungih kan thlarau nun ah Thlarau Thianghlim sungih kan lungawinak a si.

Amah cu kan nunnak sungah lut ih um a duh, leitlun tisa daan ih duhdawtnak menmen cu khekkhuai thluh tahrat in vanlam duhdawtnak thawn airawlter a duh. Lei tisa daan si loin vanlam daan, a thianghlim lomi ai ah a thianghlimmi, le minung ih thinlung phurnak can-ai ah Pathian a hmutu zumnak in airawlter a duh. Pathian Fapa cu kan sungah a nung, kan lei tisa minung sinak thihter in kan nunnak hmangin Amah nasatak ih cangvaih a duh. Hih Tlangpar Thuzirhnak in in simzirh duhbikmi cu thlaraulam ah mifarah kan sinak thei awk taktak hi Pathian Thlarau Thianghlim ih huham cahnak rinsannak nun taktak kan neihnak ding a si.

Kan ttawittaizet, bawmtu nei lo kan si na’n Pathian taa zate cu kan taa a si.

@ Smith Wigglesworth

« Previous Page — Next Page »