Kan hrangah Hmun Rem cia

May 19
Zarhte Ni

Kan hrangah Hmun Rem cia

Ka Pa ih inn ah innkhaan tampi a um ih nan hrangih umnak rem dingah ka feh ding. Cuti in si hlah sehla hiti in ka lo sim lo ding.
– John 14:2

Bible Siar Ding: John 14:1-24

Jesuh in zumtu kan hrangah hmun mawite in timtuah sak cia, ih midang pawl in an la pang ding ti zianghman thinphaan ding a um lo; kanmai’ hrangih reserve retmi a si. Meeting hrekkhat tel dingih ka feh ttheu tikah, keimai’ tonak dingah tokham reserve cia a si. Ziangtik caan ih ka thlen khal ah ka tonak ding hmun cu zohman an rak to dah lo. Umnak hmun ret cianak cu ziangsi a tthathnemnak? Amah hmuh theinak hmun na nei; cumi cu nangmah ih hrilmi hmun a si.

Jesuh in na ttulmi ziang a si ti a thei! Na hrangah hmun a ruangzing (design) cia. Ziangahtile a duhdawtnak cun kumkhua thinhar loin na lungawi ringring ding a duh ruangah a si. Cuih hmunah na thleng pei maw? Ca Thianghlim in, “Cuih hmun cu na tthelh thei maw? Ni netabik ih langter dingah atu ih ret ciami rundamnak cu zumnak thawngin Pathian huham ih kilvenmi nanmah ih covo a si” a ti (1 Peter 1:5).

Cumi ih danglamnak cu ziangmibik a si? Cumi cu famkim le zohtthim tlak duhdawtnak thawih khahnak a si. Thlaraulam ih mi farah, ninghang riahsia, lungneem, rilrawng le tihaal, mi zaangfah thiamtu le thinlung thiang mi pawl cu Khrih a lang saal ni ah sunglawizet ih lang dingin an timtuah aw cia a si. A thianhlimternak, a famkimnak, le a dinsuahnak pawl tontehnak na neih lo ahcun cuih hmun ah na um thei ringring lo ding. A famkimnak in na sunglam nun ih hna a ttuan lawngah na raalring thei ding. Thianhlimter mi na si le lawngah cuih hmun ah na feh thei ding.

Sikhalsehla cuih hmun khal ah tuah ding ttulmi a um hrih, na nunnak cu saktuah a si zo ko nain ahlan hnakin thianghlim sinsin ih lo tuah ding khi a si. A mankhung nasami pek cia a si zo: “Sui hnakin a sunglawi sawnmi nan zumnak cu harsatnak a tuarsuak theitu si dingah hniksak a ttul ve a si” (1 Peter 1:7).

Cule zumtu pawl cu nun thianghlimnak nei dingin atu le atu Pathian hnenah kan pum kan ap ringring a ttul. Cuti’n kan borhhlawhnak pawl cu faanghi bangin meisa in a kaangfai thluh ding (Matt. 3:12), ih Amah ih umpinak cu sui thianghlim vekin hmuh theih in a um ding. Cutikah Pathian sunlawinak a lang ding.

Zumtu kannih cu tthawn theih loin hngetzet in kan din a ttul, Pathian ih tumtahmi pawl kan nun ih a tuah ttheh hlan sung cu!

@ Smith Wigglesworth

A Nungmi Kan Ruahsannak

May 18
Tlawngkai Ninga

A Nungmi Kan Ruahsannak

Kan Bawipa Jesuh Khrih ih Pa le a Pathian cu thangtthat uhsi! In zaangfahnak a tumtuk ruangah Jesuh Khrih cu thihnak in a thoter ih nunnak thar in pe zo. Curuangah a nungmi ruahsannak in kan khat.
– 1 Peter 1:3

Bible Siar Ding: 1 Korin 15:1-34

Lothlotu pa in a Loram zohfelnak a nei. A thlaici tuhmi keuh daan leilung a lai ih a zohhliah. Ziangahtile a theih fiangmi cu a hmaisabik thlaici a kheuh daan in thlairawl ziangzat a suak thei ding ti a langter. Cuvek thotho in kannih tla thawhsaalnak thuhla ah thufiang kan nei, ziangahtile Jesuh cu thihnak neh in a tho saal zo ruangah a si. “Thutthennak Ni ah raaltthatnak kan neihnak dingah duhdawtnak cu kan sungah a famkimter zo. Cule leilungtlun ih kan nunnak cu Khrih nunnak bangtuk a si ruangah cuih raaltthatnak cu kan neih rori dingmi a si” (1 John 4:17). Khrih cu kawhhran thlengh awkter dingin a timtuah cia zo a si. Peter in, “Jesuh Khrih cu thihnak in a thoter ih nunnak thar in pe zo. Curuangah a nungmi ruahsannak in kan khat” a ti. Aw, thlengh awk ding a ttul zia cu! Ruahsannak nung in pekmi cu ziangbik so a si?

Paul le Peter cu caan tawite sung lawng an umkhat na’n an nunnak sungah kawhhran hnenih mangbangza vision le thutak a phuang awmi cu thlengh awknak a um ding timi simphuang dingah an Pathian Thu phuan an bang aw. Paul in, “Jesuh hi thosaal lo sehla kan zumnak cu zianghman lo a si dingih kannih tla sualnak sungah kan um hrih ding” (1 Korin 15:17). Sikhalsehla Khrih cu a thosaal ih a hmaisabik rah a si (c. 23) ruangah kannih tla kan thlengh aw ve ding ti’n a sunglawimi ruahsannak kan nei. Kannih hi, “milai menmen kan si nawn lo, Pathian ih minung kan si” (1 Peter 2:10).

Kannih cu siangpahrang phun ah cawisaanmi kan si zo. Duhdawtmi zumtu, Pathian in cuih thutak theithiam ding a lo duhsak. Cumi in na thanaunak pawl a kiangter ding. Bible in, “A mankhungmi keplung a hmuh tikah a neihmi zate a zuar ih cuih lung cu a lei,” tiah a sim (Matt. 13:46). Jesuh in a lei zo, ih kannih cu mankhung lungvar kan si zo. Kan umnak ding cu vanram a si, ih Paul in hih thu in hneem aw dingah in fial.

Siangpahrang hmai ah a baal thei dah lomi, a thlengh aw thei dah lomi, le a mawi sinsinmi kan si ding timi mangbangza thu a um. Pathian cu a zaangfahnak le ziangkim tithei a sinak kan theih fiang lo ahcun ziangtik hmanah kan kai ngah thei dah lo ding. Asinan zumtu thlaraumi pawl cun: tifingriat vekin a tummi a Duhdawtnak le kan hrangah a zaangfahnak hi a tum in a luangliam kan ti thei ding.

Thlarau Thianghlim thawngin Jesuh in tisa a nehter vekin kannih tla Thlarau thawngin Jesuh bangin nehtu kan si ve ding.

@ Smith Wigglesworth

Jesuh hrangah Umnak Khaan

May 17
Tlawngkai Nili

Jesuh hrangah Umnak Khaan

A fatir ah fapa a hringih puan in an tuam hnu ah rannung rawl einak kuang sungah an hlum; ziangahtile riahbuk ah riahnak khaan an co lo.
– Luka 2:7

Bible Siar Ding: 1 Thessalon 4:1-12

Jesuh in, “Cinghnia in kua an nei ih vate in bu an nei; asinan Mi Fapa cun riahnak hmun hman a nei lo,” a ti (Matt. 8:20). Himi hi a dik maw? A si, asinan cumi caan ciah ahkhan cumi cu a dik lo. A duh ahcun ihkhun tampi nei thei a si ko. Cun ziangahso A hman duh lonak san? Zuangruangah timi a fiangbik in kan sim asile mipi in Jesuh an duh ih an ttul cingin an inn ih umter ding cu an ngam lo ruangah a si. A inn ih a tlun a si ahcun A hmurkaa ihsin a suakmi theihternak thutak pawl ruangah a hmai ah an um thei lo ding ruangah a si. An ttulmi cu hih a thianghlim le duhnung Jesuh, a mawimi Nazareth khua mi asinan an duh lo. Curuangah Mi Fapa in a lu retnak hmun hman a neih lonak a si. Curuangah a zaan caan tikcu cu Olive tlang hram ah a hmang liam ta a si cu!

Ralbawi pa in, “Bawipa, cuti cun si hlah she; Nang ka inntang ih luhter dingah kei ka tlak lo. Damnak thu pe awla ka hnen-um cu a dam ko ding,” a ti (Matt.8:8). Ralbawi pa in a zummi le a theih fiangmi cu Jesuh in a minung tisa rori in a hnen-um pa tonghtham tahrat ih damter a ttul lo, a ttongkam in a damter thei, timi hi a si. A zummi cu Jesuh ih hmurkam ihsin a suakmi ttongkam cu a salpa damnak dingah a daihcang timi a si. Himi pa ih zumnak a neih zia cu Jesuh in a theih tikah a mangbang ngaingai. Cule Jesuh in ralbawipa hnenah, “Inn ah va tlung awla na zumnak vekin tuahsak na si ding,” tiah a ti (Matt. 8:13). Jesuh ih a sim vekin a sal pa cu a dam.

Asinan mi hrekkhat pawl cun Jesuh an inn sungih luhter ding cu an duh lo. Cumi cu zumnak maksak an neih ruanah a si lo. Jesuh an innkhaan sungih an luhter duh lonak asan cu an nunnak ah thlengh awk ttulmi a um ding ti an phaan ruangah a si sawn. Jeuh in an thinlung sungah um in hmun a laak asile an nunnak cu a pumhlum in thlengh awk verver a ttul ding ti an thei. Mi tampi in rundamnak hi an el, ziangahtile an nun hlun vekin an duhduh in an nung pehzom thei nawn lo ding ti an theih ruangah a si. Curuangah an inn ah Jesuh ra tlung dingin an sawm duh lo.

Duhdawtmi unau, Jesuh kan hnenih um dingin sawm ding cu ttih hlah uhsi! A zaangfahnak na parih burh dingin Amah kha zaangfah dil in sawm aw. Annih cun kan santlaih lonak pawl a zoh lo ih Amah ih manneihnak thawn kan parih hnattuan ding lawng a zoh. Ka thinlung zate’n Bawipa hnenah ka au, Amah thawn tong aw thar dingah.

Cumi cu Jesuh hnenih kekar tharnak lawng a si.

@ Smith Wigglesworth

Vanlam Nun thawn Khahnak

May 16
Tlawngkai Nithum

Vanlam Nun thawn Khahnak

Rukru cu ru ding, that ding le siatsuah ding lawnglawng ah a ra. Kei cu nunnak an ngah ih tlamtlingzet ih an neihnak dingah ka ra a si.
– John 10:10

Bible Siar Ding: Rom 8:1-17

Natfah a tuar reromi kha dingfelnak thawn thinhengzet ko ka tuah thei lo asile ka bawm thei lo. Zonzaih rethei a tuarmi zate an tuarnak, an natnak, le hih thil hmuahhmuah hi Satan ih hnattuannak a si timi ka theihter thei asile ka bawm thei.

Satan cu na dunglam ah um in a thiltitheinak zate suah in a lo that tum ti na hmu asile Khrih cu na thinlung siangpahrang tokham ah to in Satan ih daan cu a siatsuah thluh ding ti zum aw. Hih thutak hi nei ve aw: famkimnak hmun ih na thlenlai hlan lo saktuah thei zuam aw, ziangahtile Khrih theih cu famkim lungawinak a si. A sungih na um zo ruangah Satan cu ttih nawn hlah. Khrih nunnak thawn khat ding na si ih vanlam huham thawn a khatmi nunnak neitu na si. Khrih sungah thinlung felfai nei ding na si ih tisami sinak (natural) cu cemter in a nasazetmi (supernatural) nun in thok ding na si.

Minung leitisami sinak ih ttihphannak nei nawn loin na nunnak cu vanlam huham thawn thuam dingin Pathian ih nun thlenghnak co dingah na raalring (ready) zo maw? Himi hi ciing ringring aw, “famkim duhdawtnak ah ttihphannak a um lo” (1 John 4:18).

Pathian ih phuanlang awknak nun dot saang deuh ah um dingin kekar thok thlang aw. Na sinak thar cu a siatral thei lomi a si. Kumkhua nunnak timi cu hih lei tisa nun vek a si lo, cem ni a nei lo. Pathian Thu ih hrintharter mi na si, ih cumi cu a siat thei lomi a si. Sual in na nunram ah thu a nei thei nawn loih natnak khal in a lo buaipi thei nawn lo ding. Nunnak thar cu a nungmi Pathian Thu ih huham in a si.

Himi hmun na thlen ahcun mawhphurhnak a um nawn lo (Rom 8:1). Thlarau nunnak ih daan cu a tharmi, kumkhua a hmunmi Pathian ih daan a si. Cuih daan cu Thukham pahra a si lo, thlarau nunnak daan a si. Na nunnak sungah sual huham, natnak le thihnak tla um nawn lo dingin a lo thlenghsaktu daan thar a si.

Rinnak in peng thawngkhat feh na duh ih na thlen dah lonak hmun ih thlen ding na duh asile zumnak in khir mai aw. Khrih thiisen in a lo thianter zo ti zum ngam awla thosaal nun ka nei zo ti zumfek aw. Na thinlung cu vancung ah bun aw (Kolose 3:2).

Pathian cu a siangpahrang tokham ah a um, ih hmakhat te’n na hnenah a lo thlenter thei. Mangbangza a thiltitheinak rin mai aw.

@ Smith Wigglesworth

Satan cu Thianhlimter a Theih Lo

May 15
Tlawngkai Nihnih

Satan cu Thianhlimter a Theih Lo

Zokhal sual a tuah ringringtu cu Satan ih fa a si, ziangahtile Satan cu a hramthok ihsin sual a tuahtu a si. Pathian Fapa a langnak cu Satan hnattuan siatsuah ttheh ding rori ahhin a si.
– 1 John 3:8

Bible Siar Ding: 1 John 3:1-17

A thianghlim lomi thil thianhlimter ding cu thil harzet a si. Thil siava pawl cu an thianghlim thei lo ih an borhhlawh deuhdeuh. Thiamhlim lonak hmuahhmuah le Satan hnattuannak zate cu hlonhlo ding a si. Ziangtikhman ah Satan cu na thianhlimter thei dah lo ding. Anih cu hremhmun feh ding hrimhrim a si ih Pathian ih tleunak a rung thlen tikah Satan cu tawpit lo kua khawthim sungah kumkhua in a um ding.

Mi-aa tthenkhat pawl in Satan cu rundam a si lai dingih a cak vingvo lai ding, an ti. Cumi cu Pathian Thu ttha teih an theih lo ruangah a si. Sualnak khal ziangtik hmanah na thianhlimter thei lo ding. “Mi pakhat minung sinak ih a ukmi cu Pathian ih raal a si, ziangahtile Pathian ih daan a thlun lo; a thlun duh lo lawng si loin a thlun thei lo” (Rom 8:7). Tisami (carnal) sinak cu kan siatralter a ttul. Satan ih uknak cu a hram ihsin phawi hlo ding a si. Pathian ih khawkhan lairelnak cu “Ihinlung thiang le thlarau thar ka lo pe ding,” ti a si. Himi cu Pathian sungih sersiam thar umtu daan a si.

Ziangtivek in na simrel khal le a thupi lo; na minung thlarau cu a thianghlim thei thluh lo ding, ttihnung raapthlakza dinhmun ah a um ringring ding. Cumi cu Satan in na nunnak sungih hna a ttuan theinak dingah caan ttha a si. Curuangah, kannih cu thianghlimnak sungah um ding kan si. Cuti’n thianhlim lonak hmuahhmuah an cemral thluh ih tisa duhnak hmuahhmuah ih huham cu hloralter thluh ding a si.

Nun thianhlimnak sungih um dingin sawm awknak lawngah Pathian thluasuah a um ih a sunlawinak sungah kan lut ding. Pathian ih mithianghlim pawl cu famkimnak le thianhlimnak sungih an lut ding. Thlarau ih thinlung an thei dingih nunnak thlarau ih daan an thei ding, cuticun thluasuah donnak hmun ah hruailuh an si ding.

Cuih hmun cu thianhlimnak, famkimnak, thinlung siangpahrang tokham ah Pathian ih uknak a si. Pathian ih huham sungah thinlung bunnak in a thianghlim, a nung ih a sunglawimi nunnak a um. Thlarau in na thlarau a thianhlimter dingih, “Keimah, Keimah” ti si nawn loin “Khrih, Khrih” ti a si ding. Cuti’n Khrih a sunglawi ding.

Thianhlimnak cu huham a si; sualnak cu a sung. Sualnak cu ttonttaihnak; thianhlimnak cu cahnak.

@ Smith Wigglesworth

Baptism hnu ih Hrem tuarnak

May 14
Tlawngkai Nikhat

Baptisma hnu ih Hrem tuarnak

Puithiam saang le a rualpi pawl hmuahhmuah le cutawk hrawngih a ummi Sadusi pawl cun tirhthlah pawl kha an halhsiktuk ruangah thil pakhatkhat tuah an tum. Tirhthlah pawl kha an kai ih mipi thawng a an thlak. – Tirhthlah 5:17-18

Bible Siar Ding: Tirhthlah 5:12-42

Mipi an tthekdarh aw thluh ih hremnak (persecution) a thleng. Pathian in a thei – cumi cu ttihzah upatnak thawn ka sim – nunnak hi zianghman harsat buainak tong loin a olsamtuk a si ahcun tthansonak ngaingai a um thei lo. Nuamnungtuk in na um asile Pathian ih a maksakmi khawkhan lairelnak na tthelh pang ding.

Mi pakhat cu rundamnak a ngah hnu ah Khrih thuthangtha ruangih tiduhdahnak zianghman thei lo le tong loin kum tampi a um thei men. Zumtu mi pakhat cu hremnak zianghman tong loin nun thianghlimternak tla a co thei men. Asinan zumtu mi pitling cun Thlarau Thianghlim ih baptisma a co hnu ahcun Khrih ruangih hrem tuarnak tong loin a um thei hrimhrim lo ding.

Dungthluntu pawl hi an Bawipa Jesuh thawn an umtlang lai ahcun mangbangza caan ttha hmang in an um. Hremnak an tuar lo, asinan Bawipa cu Nazareth khua mi tampi lakah tlang par ihsin tul thlak tumnak tiang a tong (Luka 4:16-30).

Ziang a va cang khal asile kan parah nasazet ih thutthennak le tuarharnak a um lo zia hmu thiam cio uhsi! Kannih cu nuntermi kan si, hruai suakmi kan si, thuneihnak thar ih thlengh danglammi kan si. A siat theimi sung ihsin a siat thei lomi ah thlengh kan si zo. Thihnak a um lai ah kannih cu vanlam nun neitu kan si, huat-awknak a um lai ah duhdawtnak cotu kan si. Pathian huham in minung sinak a uk, Bawipa in thihnak sungin Pathian huham ih tleunak sungah in luhpi. Bawipa in kan nunnak cu neelrawn ramcaar ih nunnak tiva vek a siternak kha ka hmuh thiam a ttul.

Na nunnak le na hnattuannak a zate hniksak caan a ra thleng ding. Na minung sinak lenglam ih thleng ding, minung sinak ih na ruah thei hnakih saang deuh ruat thei ding, le tisami sinak hnakin saang deuh ih na thlen theinak dingah Thlarau ih nunternak in na zuam ding. Pathan Ttongkam ih a simi vek a si lai ding, “Curuangah atu ihsin Pathian raalthuam kha hruk uhla caan sia a thlen tikah nan raal pawl cu nan do thei dingih a net tiang nan do hnu ah nan ttanhmun cu nan hum ngah ding” (Efesa 6:13).

Hniksaknak na ton caan le a cemnetnak ka thleng thlang maw na ti lai ah, Bawipa in a cahnak huham thawn nunnomnak hmun ah a lo hruai ding.

@ Smith Wigglesworth

Kawhhran sungih Na Telnak

May 13
Zarhpi Ni

Kawhhran sungih Na Telnak

Cuih thuthup cu hi bangtuk in a si: Thuthangtha a um ruangah Gentile mi khal Judah mi thawn Pathian ih thluasuah cotu an si ve thlang; pumkhat sinak sungih a telmi an si ih Khrih Jesuh thawngin Pathian thukamnak sungah covo an nei a si. – Efesa 3:6

Bible Siar Ding: 1 Korin 12:12-27

Khrih ruangpum sungih na tel theinak hmun le na covo um zia lo theihter ka duh. Bawipa ih sinak thawn pehpar awmi ttongfang lakah himi hnakih nasa sawnmi a um lo: “Fapa in Amah ih sungah Pathian sinak famkim ih a neihnak cu Amah Pathian ih lairelnak a si” (Kolose 1:19). Khrih cu milai sinak famkim in a phuanglang aw.

Na sinak langter dingah zianghman ttih hlah. Cumi thlen theinak ding tahfung a um lo. Ciing ringring aw, Johan in a hmu ih zianghman in tahtthim theih rual a si lo ti a fiang. Khrih kan sungah a nung dingih zohman in a sinak le a cangvaihnak an tah thei lo ding. Minung ih tahfung in ziangti te khalin a tah thei baan dah lo ding.

Kawhhran cu a vision sungah a tthang vingvo ih thimnak ih huham kha a siatsuah rero, sualralnak huham pawl lakah uktu a ttuan, ih kan sungih a nungmi sersiam thar ih huham in thimnak kha tleunak ah a thlengh thluh. Kawhhran in himi pawl hi a tuah rero, curuangah kan sungih a cangvaimi huham le thiltitheinak cu kan thei dingih Khrih ih thosaal nun in hna a ttuan ti kan theifiang ding a si.

Kannih cu lennak phunkim in lentermi kan si; mawinak tinkim in tuar theinak thazaang pek kan si; zaangfahnak ih khuh le hupphen kan si; atu cun mangbangza sinak dinhmun ah kan lut dingih Thlarau laksawng cu kan nunnak sungin a phuanglang ding.

Pathian Fapa cu a tthansonak huham thawn na sungah a um. Vanlam zaangfahnak le thiltitheinak thawn lenter le khahter na si hlan lo hih leitlun ah na um dingih leilung ih an lo theih fiang hlan lo Pathian in na nunnak cu zaangfahnak in zaangfahnak ah le nehnak ihsin nehnak ih a lo thlengh sak ding.

Paul in a theihfiangmi cu lei le van hmunkhat ah a kom rero timi hi a si. Annih cu pakhat an si, Pathian hnenah lungawithu ka sim! Kanmah le vanram karlak ah zianghman tthentu a um lo. Leilung ih midirh theinak in in kilhim ding, sihmansehla van le lei cu thiisen pakhat sungah an kom aw dingih tthen awknak a um nawn lo ding. “Hih leilung taksa hi taanta in Bawipa ih inn ih um kan hril sawn ding” (2 Korin 5:8).

Na cahnak in na loram le na thlairawl cu na tah thei men ding, asinan Thlarau nun ih tumtah cu na tah thei lo ding, tah theih a si lo.

@ Smith Wigglesworth

Kan Rocopi

May 12
Zarhte Ni

Kan Rocopi

Kei cu Pathian minung pawl lakih mi nautabik hnak hmanin ka nauta sawn Asinain sim cawk lo tiangin a tummi Khrih ih lennak thuthangtha cu Gentile mi hnenah thlenpi dingah Pathian in ttuanvo i pek.
– Efesa 3:8

Bible Siar Ding: Galati 3:7-29

Tuni ih Thlarau Thianghlim thawn khahnak ih phuanlangnak cu Pathian ih in pekmi thluasuah kha in hmuhter duakmi hi a si. Israel miphun thuanthu ah Abraham ihsin thok an pale pawl a sangsang an nunnak ah Pathian in a hrilmi a minung pawl thawn pehtlaih awknak hleice a nei timi fiangte’n kan hmu thei.

Sikhalsehla khaih sanlai ah Gentile mi pawl cun covo an rak nei thei ve lo. Bawipa in Canaan nunau nu hnenah, “Rawl cu faale pawl kan pek hmaisa pei. Faale pawl ih rawl uico pek cu a dik lo a si,” a ti (Mark 7:27). Jesuh in Gentile pawl cu uico an si a ti duhsan si maw? A si lo, A sim duhsan cu Gentile mi zate in an theihmi, annih cu siangpahrang hrin Israel mi pawl thawn cu tahtthim baan an si lo, an hlat awzet tiih an ruah awkmi a langternak sawn a si. Samaria mi pawl khal ih an tuarnatmi a si ve.

“A si ko, Bawipa! Sikhalsehla faale pawl ih hlahtakmi rawl ttilfuan cu cabuai hnuai ih uico pawl in an ei ve ttheu ko a sisi” timi cu Canaan nunau nu ih thulehnak a si (c. 28). Pathian in rawl ttilfuan hnakih ttha sawn Gentile mi pawl hrangah a nei. Pathian in Gentile mi pawl tla taksa ruangpum nei in a sersiam ih A hrilmi pawl vekin roco theitu dingah a tuah a si. Israel miphun le kan lakah danglamnak zianghman a re lo. Asinan Khrih thiisen ruangih ngaidamnak a comi sungah kannih Gentile mi pawl tla in telh thluh ve a si. Paul in cuih thu cu hiti’n a sim, “Khrih ih taa nan si ahcun Abraham ih tefa nan si ih Pathian thutiam cia vekin a rocotu nan si” (Galati 3:29).

Pathian hnenah lungawithu ka sim. Pathian in A huham nasatak in a phuanglang ih Israel le Gentile khal pumkhat ah in canter, a sunlawinak ttawm aw ding kan si ti ka thei. Pathian ih uknak sungah rocotu kan si ve timi theihnak kan hlawm aw thei.

Khrih ruangpum sungah ummi ka si ti ka theih awk hi mangbangza a si. Profet pawl, a rak fehliam cia zotu tirhthlah pawl, meifar a rak kengtu pawl, nehnak ihsin nehnak a rak cotu pawl thawn kan zate in pumkhat kan si thluh ding. Zumtu pawl cu Khrih in mo dingih a hrilmi kan si! “Cuih thuthangtha riantu ka si hi Pathian ih i pekmi laksawng a si. Cuih laksawng cu a cahnak huham ih hnattuanmi a si” (Efesa 3:7).

Pathian in miphun zate, dinhmun zate le sinak zate ih ttulmi a pe thluh.

@ Smith Wigglesworth

Tisa mi in Thlarau mi ah

May 11
Tlawngkai Ninga

Tisa mi in Thlarau mi ah

Cuih a thuthup cu hi bangtuk in a si: Thuthangtha a um ruangah Gentile mi khal Judah mi thawn Pathian ih thluasuah cotu an si ve thlang; pumkhat sungih a telmi an si ih Khrih Jesuh thawngin Pathian thukamnak sungah covo an nei a si. – Efesa 3:6

Bible Siar Ding: 1 Korin 15:41-55

Pathian hnenah lungawithu ka sim, ziangahtile kan sungah a sunglawimi nun thlengh awknak a umter, a tlusiami kan lei tisa nunhlun kha a laak ih vanlam nunthar sungah in hruai lut ruangah. Zaangfahnak ih a khatmi Pathian in i hmu, i thei; ih ka kiangnai ah i umpi ringring. Amah cu kan parih in khuhtu a si ruangah a thiltitheinak, a sunlawinak le a cem thei lomi lungawinak in tuni ah kan nunnak a cangvaiter a si. Pathian cu a fanu le a fapa pawl in thinlung thiang te’n Amah rinsan ih an um a hmuh hnakin ziangmi in so a lung a awiter thei nawn ding (Luka 8:35). A thusimmi ngaitu, an mit le an hna a thong ringring ih a saannak hmunih umtu pawl parah Bawipa cu a lung a awi.

Tuni ah Gentile mi pawl cu a hlawnthil mankhung sunlawinak sungah hruailut an si zo timi ahlan hnakih kan theihthuk vingvo asile sangvut tthabik thawn cawmmi an si ih a lungawinak tidai a in ngahtu an si ih duhdawtnak Pathian thawn an khah zia cu tahtthim thei rual khal a si lo.

Rinhlelh ding um loin, ziangtiklai caan khal ih khuaruahhar maksakbik cu sersiam caan ihsin atu Khrih cu minung pianhmang ih a rung suahnak tiangah a nasabik miangmo. Kumkhua nunnak cu kumkhua thihnak neh in minung nunnak sungah hna a ttuan timi hnakih a maksak sawnmi thu ziangsaw um nawn? Adam ih sinak kan kenmi kha in thlengh sak ih Khrih sungih sinak thar sungah in hruailutmi vancung Pathian ih sinak phuanlang awknak hnakih nasa sawnmi teh ziangso um nawn?

Mi zokhal in Adam ih cithlah sinak cu kan cosanng thei thluh, curuangah tuni ah vanlam nunnak ih phuanlangnak hmun kan sinak tla Pathian in famkimzet ih theih theinak in pe hram seh. A sunglawimi nunnak kan sungah a ret asile kan nunnak a thlengh aw ding, Pathian ih huham a phuanglang aw dingih kan mizia tla a thlengh aw ding. Pathian ih sinak le a sunlawinak ih dingfelnak cu kan minung sinak sung ihsin a phuanglang ding. Vancungram cu kan sungah a lang dingih mithiang pawl hmunkhat ah an khawm aw ding. Bawipa ih mit-hmai cu a tleu dingih Pa ih sunlawinak cu kan sungah a um ding. Aw, cuti’n vanlam nunnak ih thawthawtmi cun kan nunnak a cangvaiter dingih kan thinlung phurnak in Amah hnen feh ding tla kan timlam aw cia thei ding.

Lei khawvel tisa nun cawn cu hloralnak, asinan nun thlengh awknak cu hlawknak.

@ Smith Wigglesworth

A Sunlawinak ih Lennak

May 10
Tlawngkai Nili

A Sunlawinak ih Lennak

Daihnak in petu Pathian Amah in famkimzet in lo thianghlimter sehla, kan Bawipa Jesuh Khrih a rat saal tikah nan thlarau, nan thinlung le nan taksa, nan ziangzongza in mawhnak nei lo ah lo tuah hram seh!
– 1 Thess. 5:23

Bible Siar Ding: 1 Thessalon 5:8-24

Bawipa ih umpinak in in kulhvel ih phuanlangnak le thluasuahnak thawn kan khat. Bawipa ih lungawinak cu lamdangzet in a lang. Amah in kannih cu a lennak sungah in hruai dingih kannih cu Bawipa ih hrang lawng kan si ding. Ziangtluk zaangfahnak ah so in hruai! Taksa, thinlung le thlarau a pathum in kan Bawipa a ra kirlai hlan lo mawh nei lo dinhmun ah kilveng aw ringring ding kan si (1 Thess. 5:23).

Pathian in Amai’ hmaika ah caan reipi um dingin a nasazetmi duhsaknak a nei a si. Nan hrangah tumtahmi pakhat lawng ka nei: nan thlarau thazaang lo cakter in a thianghlimmi zumnak dinsuah ding, le hnattuan ttha ttuantu dingah lo hman ding. Thlarau in a lo nunter hi hmailam ah na hrangah tumtahnak a neih ruangah a si. Kan minung sinak pianzia cu Pathian hmai ah remsak a si dingih na theih vingvo lai dingmi cu ziangdang a si lo, Bawipa Amah rori theih khi a si.

A cemnetnak ah, minung ih ruah baan lomi a inn sungah ra dingin a lo sawm ding, minung ih ruah baanmi leeng in a lo cawm ding, hman cawk loin a lo pe ding.

Pathian ih sunlawinak na nunnak in a dingfelnak sungih luhpi ding na ralring maw? Leitlun thilri pawl cu na dunglam ah taansan tahrat in a saangbik laksawng ngah dingah hmailam nor vingvo dingin na tim na tuah zo maw?

Pathian ih tawlrelnak cu Pathian ih kutcak na parih um vekin cosaang thei dingah na ralring zo maw? Amah in a lo hril zo, curuangah nangmah cu Pathian hrangah a hmaisabik rah (first fruit) na si ti na thei ding.

Bawipa ih duhhrilnak, duhnak le tumtahnak cu na hrang si ve dingin na ralring zo maw? Pathian in na lei tisami sinak hmuahhmuah a hlonfai dingmi hi na “Amen” thei zo maw? Ahlan ih na rak theih dah lomi Amah le nangmah karlak ih rualremnak nei dingih sawmnak au aw na theih ni le caan a ra thleng ding.

Ziangtluk zumnak maksak na nei timi le Pathian na zum timi a thupibik lo; Pathian in “nunnak tlamtling,” a ti.

@ Smith Wigglesworth

Thlaraulam Zuriitnak

May 9
Tlawngkai Nithum

Thlaraulam Zuriitnak

Mi-aa kan si ngaingai maw? Kan va si khalle Pathian ih ruangah a si. Mifim teh kan si maw? Kan si a si ahcun nanmah ruangah a si.
– 2 Korin 5:13

Bible Siar Ding: Saam 96

Thlarau Thianghlim um theinak hmun pakhat a um ih cumi cu khawvel mi hrangah le Pathian thawn a um tlang lomi pawl hrang ahcun mangbangza a si. Hi tawkah hminsin ding thupizet a um. Kannih zumtu hi Thlarau Thianghlim thawn khat thei mi kan si. Curuangah Amah cu thuamhnaw vekin hruk uh, nan sunglam ah thianghlim seh. Thianglawr hrangah timtuah ringring uhla Thlarau riitpi uh.

Zuri bangih thlarau ka riitmi in soiseltu pawl thawn kan tong aw. Thlarau rii thei kan si. Pathian hmai ah riit theinak hi khuaruahharza taktak a si! Bible in, “Zu ri hlah uh; zu cu a lo siatsuahtu lawng a si. Cuhnakin Thlarau in khat sawn uh” a ti (Efesa. 5:18).”

Himi sungah a nungmi ruahsannak a um, milai cu hmurka kilkhawi lonak in kan khat.
Zuri theizet pawl khi vun ruat hnik uh. Bantthuam an hngauhsan ih an ttong rero. Aat-thlakza le thil cang thei lomi an tlok ribak ciamco ruangah mi in, “A thinlung a fim lo, a ciing aw nawn lo a si hi,” tiah an ti ttheu. Maw Bawipa, Nangmah ka lo rii ih mipi pawl in zuri vekah in ruat. Bawipa hnenah thangthatnak cu hla thawn ka sak.

A tthabik cu Thlarau Thianghlim kha thuamhnaw bangin hruk hi a si. Nun thianghlim neih le huham thawn khah hi a thupituk. Thlarau Thianghlim sungih nun, tlanleen le cangvaih ding a thupi nasa. Himi hi thil cang thei a si ding maw ti’n na ruat men thei, asinan Pathian in himi dinhmun ih thleng dingah in duhsakzet.

Ca Thianghlim in, “Khrih nan sungih a nun ahcun Thlarau cu nan hrangah nunnak a si; ziangahtile sualnak ruangah nan ruangpi cu a thi ding nain nannih cu Pathian thawn remtermi nan si zo” a ti (Rom 8:10). Na thinlung sungih Khrih a um tikah na nunnak a lo uk ding, a lo kilveng dingih sual cu dawisuak a si ding. Cun dingfelnak in na khat dingih Thlarau Thianghlim in nasatakin zalennak a lo pe ding.

“Fa kan si ruangah Pathian in a minung hrangih a ret ciami thluasuah a cotu ding kan si” (Rom 8:17). Nehnak nun ih a saan, a thuk, a sau, le a kauh daan cu thianhlimnak in tah a si. Cumi cu khui ah a um? Na sungah. Zaleennak, thianghlimnak le huham cu kan taa an si ih kannih cu tawtawrawt maksak tum dingin kan tiar aw cia ringring.

Thianghlimnak cu Pathian ih mizia a si.

@ Smith Wigglesworth

Thianhlimnak sungih Lungawinak

May 8
Tlawngkai Nihnih

Thianhlimnak sungih Lungawinak

Ziangahtile hih harsatnak nan tuarmi cu nan zumnak a ngai maw ngai lo ti theihnak dingah a si. A siat theimi sui hman meisa in hniksak a si ttheu. Cubangtuk in sui hnakih a sunglawi sawnmi nan zumnak cu harsatnak a tuar suak theitu si dingah hniksak a ttul ve a si. Cule Jesuh Khrih a lang Ni ah thangthatnak le sunlawinak le upatnak nan ngah ding a si.
– 1 Peter 1:7

Bible Siar Ding: 2 Korin. 4:7-5:9

Na nunnak ah Pathian ih a thlentermi hniksaknak parah nangmah in zianghman idea na nei lo – cumi cu Thlarau ih thianhlimternak a si.

Duhdawtmi zumtu, na zumnak hniksaknak cu a siat theimi sui hnakin a mankhung sawn. Pathian in hniksaknak thawn a lo thianhlimter tikah theih sualnak, hremnak, le tuarnak tivek pawl in mangbangza thutthen vek a si ding. Jesuh in tawhfung a lo pek: cumi sungah na lungawi aw. Na borhhlawhnak le Satan huham zate na nunnak sung ihsin a laak ih A hmuihmel bangnak a hmuh hlan lo a lo thianhlimter ding.

“Jesuh ih nunnak cu kan taksa parah lang hrimhrim seh, tiah catbaang loin a thi theimi kan ruangpum par ahhin Khrih thihnak kan phur ringring a si,” (2 Korin 4:10). Himi a tuah rerolai ahcun lungawiza cu a si lemlo; ziangahtile cumi cu taksa in a cosaang duh lo. Asinan rel zo bangin tisa daan cun Thlarau daan cu a dokalh ringring. Na nunnak zate Pathian huham sungah ap in, a sunlawinak kha langhngan in aupi ding a si. Hiti ih hniksak na si rerolai caan khal ah Pathian hnenah “Amen” na ti thei a ttul. Cumi cu thil hasazet tla a si men thei, sikhalsehla Pathian in a lo bawm ding a si.

Nunsim na ton caan, mi ih ruahsual na ton caan, a harzetmi hniksaknak na tuar caan le dik lozet ih tisiat na ton caan ah Pathian in a lo tong dingih thluasuah a lo pe ding a si. Mipi in cumi cu Satan an ti. A poi lo, meisa bangin lo kaang ko seh, na hrangah thil ttha a si ding. Phunzai rero hlah, thinsau le lungawi te’n tuar thei zuam ttentto aw. Cumi cu theih a ttha, “duhdawtnak cu a thin a sau ih mi zaangfah a thiam” (1 Korin 13:4). Bawipa ih sunlawinak cu lungawinak thawn thangtthat uh.

Amahcu nan hmu dah lo na’n nan duhdawt; nan hmu lo na’n nan zum. Curuangah kaa ih sim thei lomi, a maksakzetmi le a sunglawimi lungawinak nan nei” (1 Peter 1:8).

Duhdawtmi, meisa ih hniksak na si bangin Bawipa in ziangkim lo thianhlimter in na nun ah Amai’ hmuihmel cuang hram seh!

@ Smith Wigglesworth

Next Page »