South Korea in North Korea Hnen Ih Ngaidam Dil A Tum Lo

Theihcia zo vekin North Korea Cozah cun an ram hruaitu hlun Kim II Sung ih suahni campha voi 100 kimnak lawmnakih rocket a kahsuak micu  South Korea in zianghman ih relsak duhlo leh zahsak duhlo ah a puhih. cu ruangah North Korea cun South Korea in ngaidam in dil a tulih  South Korea in himi thuih North Korea hnenih ngaidam in dil duhlo a si le doawk mai ding khal kan pawi tilo tiah an phuangcih.

North Korea ih rocket kahsuak mikha an tumtah vekin an kapsuak hlawhtlinglo ih a sinan  ram dangdang in UN thu pahbal naka si tiin an mawhthluk zetih  South Korea khalin North Korea thilti danhi a mawhthluk zetve ruangah  North Korea cun South Korea cu an hnenih ngaidam dil dingih a phut a si.  Famkim Siarbet

US Ralkap Leh Phillipine Ralkap Raldo Zir Tlang

US leh Phillipine ram pahnih ralkap pawlcun  South China  Sea ah raldo an zirtlangih hihi China cun a ngai thiamlozet tiah theih a si. hi ram pahnih ralkap raldo zirtlang mihi Balikatan tiih a hmin pek a siih tuithla ni 27 thleng an awhding.

ram pahnih ralkap pawlin raldo an zirtlang nak hmunhi China leh Phillipine ram pahnih in ram an cuhawk ringring nak hmun kiangte Palawan a siih, himi kiangah China khalin a raldo nak lawng 2 a thlahveih, US leh Phillipine ralkap pawl raldo an zirtlang mihi China cu a mah hro nakah a ngaiih, Asinan Phillipine ralkap thupuangtu Major, Emanuel Garcia cun  Chian thawi an  karlak boruak leh tui US ralkap leh an ram ralkap raldo zirtlang mihi kungkaih awknak zianghman a neilo tiah a sim.

Pakistan Ram Thawng In Ihsin Thanwgtla An Tlan Suak Tam

Kabul Siimtu Tapung Pawl Kahthat Thluh An Si Zo

Theihcia zo vekin tihni zingah khan  Taliban leh Al-Qaeda Tapung pawl kawmkhawmaw Haqqani Tapung pawlcu Afghanistan ram khawpi Kabul khawpi laili sungah lutin  ram dang embassy leh NATO hmunpi pawlih heliah Parliament pawlcu  ralthuam meithal leh rocket bomb hmangin an kap ciamco ih, Tapung pawlhi Afghanistan ralkap leh NATO talkap pawlin do let ve in nazi 18 sung an kah awk hnuah  Afghanistan ram tikcu ih mizanzing nazi 6:30 ah khan NOTO leh Afghanistan ralkap pawlhin Tapung pawlhi an kapthat thluh.

Hi Tapung pawl leh ralkap pawldo awknakah  hin minung 47 an thiih mithi pawl lakah Tapung 36 ralkap 8 len Civil mi 3 an thiih,  midang 65 in hriamhma an tuarih hriamhma  tuar lakah Civil mi 25 an telih, Kabul khawpi siimtu Tapung pawlhi an zaten kahthat thluh an si tiah Interior Minister, Besmillah Mohammadi cun a sim.

Tapung pawlhi Kabul khawpi sung laili ih In pakhat sungah an umkhawmih an umnak In ihsin  ralthuam rocket leh bomb hmangin hmun pawimawh pwlhi an kapciamco ih hihi ralkap pawlin kulhin an luhcilhih NATO ralkap pawlkhalin tlunlam ihsin  Helicopter hmangin Tapung pawlhi an kapve Tapung pawl thupuangtu, Zabihullah Majahid in a sim nakah Kabul  khawpi an siim naksan hi tui naite hranwgih NATO pawlin Tapung pawlin dimhmun  a tlasezet thlang tiih an puansuak ruangah an tlaksiatlo zia leh an cahzia langter naka si thu a sim.

Himi an buainak ih hleiah Second Vice President, Mohammad Karin thihcilh bomb hmangih thah tumtu minung 2 khal kaih ngah an siih hiti vekih khawpi laili sungih Tapung pawl duhtawkih an um theiih  thil an siatsuah thei ruangah mi tampi cun Afghanistan Cozah in a ram a kilhim theilo zia a langfiang tiah an ruat.

Pakistan Ram Thawng In Ihsin Thanwgtla An Tlan Suak Tam

News International in a tarlang nakah Pakistan ram Khyber Pakhtum khwa Province ih Bannu ThanwgIn  cu Taliban pawlin  ralthuam tha zetzet hmangin an siim ruangah  thawngtla minung  384 an tlansuak tiah a tarlang. Taliban pawlhin ThawngIn luhnak sangka gate tumpi pahnih cu Bomb in an puahsiatih cumi hnuah ThawngIn kiltu Palik pawl leh Taliban pawlhi Nazi 2 sung an kapawih  Thawngtla kiltu Palik pawl hnakin a siimtu Taliban pawlhi an tamsawnih an ralthuam khal a thatsawn ruangah Palik pawlin an nehlo ih Taliban pawlhin ThawngIn siatbalin a sungih Thawngtla pawlhi an tlansuakih Taliban pawlhin Thawng In pindan ziangmawzat laikhal meisa in an urkang tiah News International cun a tarlang.

Taliban pawlhin Afghnaistan ram Kandahar ramkulh ih Thawngin khal nikum ah khan an rak siim zoih  Thawngtla tamzet an rak lasuakzo ih hiti vak a si ruangan Taliban pawlhin ThawngIn dangdang khalhi an siimbet vivo ding tiphan a umzetih, tui thawngtla tlansuak pawlhin Taliban pawl an bawmih an ticak khal zum a um.

Thawngtla tlansuak lakih minung 23 pawl tlacu misual ruhkol mi ttihnung zetzet an  siih, cumi sungih minung pakhat Adnan Rashid an timi tlacu Pakistan President, hlun Parvez Mushraf thah tumtu a siih  a mah hi thah dingih  Cozah Court in thu a relsak zomi a si. Taliban pawlhin ThawngIn sung an luh ihsin hi thah dingih an timi Adnan  Rashid leh midang thi dingih an thu an relsak zomi minung 20 pawlih umnak hmunhi an pancih ih cumi laiah Thawngtla dangpawl khalin tikcu remcangah rak lo in minung 384 pawlhi an tlansuak humho cih .Himi thawngIn sungah Thawngtla minung 944 an um.

North Korea Rocket A Tla Kek Kuai

Relzo vekin  ram dangdangih dodal nak leh mawhthluk nak ngai pawimawh duhlo in North Korea cun  an ramhotu hlun Kim Il  Sung ih suahni campha voi 100 kim lawm nakih  an ram thanso nakding ih a timi Vansang ih Satellite hunret tuding ih a relmi Rocket cu mizan zin an ram tikcu caan ih zinglam nazi 7:39 ah khan a kapsuak thotho ih, a sinan an rocket kahsuak mihi hlawhsamin a tlawlh ih South Korea ram khawpi Seoul ihsi km 165 ih hla tipi sungah a tla kekkuai.

North  Korea Cozah khalin an rocket kahsuak mi a tlawlh ih an hlawhsan thuhi an puangih North America Aerospale Defence Command (Norad) in thu an suah nakah  North Korea rocket kahsuak mihi a zuansuak ihsi reilo te ah a tla tiah an simih Rocket puakkuai parh themnawi hi khawmual leipar ah a tla a umlo tiah an simbet. Japan Defence MInister, Naoki Tanaka leh South Korea  Foreign Minister, Kim Sung Hwan khalin  North Korea rocket a tlak thuhi an simih  hmun 20 hranwgah a kekkuai ih a parh tiah an sim.

North Korea rocket  a tlak kekkuai nak sanhi ziangruang bikah a si timi fiangtei theihnak a umlo ih a tthatlo ruangah maw  midangin an kahthlaksak timi thufiang theihnak aumlo ih North Korea Coah cun an rocket tlaknak sanhi mithiam pawlin an zingzawi ding tiah an sim. US cun North Korea in  ram dangdang ngen nak leh dilnak ngai pawimawh duhlo ih rocket a kap suak thotho hi a mawhthlauk zet thu leh  an ram In hnen pawl thawi an karlak pehtlah awknak boruak tise tu a si ih hleiah  leitlun ram dangdang  kilhim awknak ding lamzin tuahmi pahbal a si thu a simih himi thu ruangah UN  Security  Council tonkhawm awknak khal kawhcih a si ih, China cun North Korea rocket kahsuak ruangah boruak thalo dang thlenglo hram sehla a duhthu a sim.

British PM Burma Ram A Tlawng Ding

British Prime Minister, David Cameron cu tuisun ah Burma ram a tlawng dingih President, Thein Sein thwnkawmawk nak an neiding ih Burma ram Cozah fehdan ding an reltlang dingah zum a siih. himi hnuah  Aung San Suu Kyi thawn kawmawk nak an neisal ding.

British Prime MInister David Cameron hin Burma ramih hleiah Japan,  Indinesia, Malaysia , leh Singapore pawl a tlawng ding, Indinesia thuthangca latu pawlthawi an kawmawk nakah British Prime Minister, David Cameron cun  British Cozah in Burma ram hremnak a pek micu hlih a tum thlangthu a simih, Burma ram Cozah in mipi duhdan ih feh a tum ruangah lungawi um a tithu khal a sim.

South Korea Ram Hril Awk Nak Ah NFP An Cak

South Korea ram Parliament hrilawk nak National Assembly seat 300 umnak ah Cozah nak kailaitu New Frontier Party cun  seat 152 la in Cozah nak an cosalih, Opposition Party tumbik Democratic United Party (DUP) in seat 127 an la.

Acozah nak kailaiti NFP pawlhin kandung hrilawk maisa ah khan seat 300 sungah seat 165 an rak la ih tuah an tla niam deuh nan Cozah nakcu an cosal thotho.

NFP hotu leh  tui President tuan laitu Lee Myung Bak cun  an ram mipi in an parih rinsan nak an nei ruangah lungawi thu  asim ih, Opposition Party  DUP hotu Park Sun -Sook cun hrilawk nakih an Party an cahlo ruangah a lamtang mipi pawl hnenah ngaidam a dil.

Aung San Suu Kyi Parliament Ah A To Thlang Ding

Burma ram Cozah Opposition Party tumbik National League for Democracy (NLD) hotu Aung San Suu Kyi cu tuithla ni 23 ihsin Parliament tokhawm nakah a telve thlangding tiah NLD  Party cun an puangsuak ih, Aung San Suu Kyi hi Burma ram Parliament tokhawm nakah a voi 1 telnak a siding.

theihcia zo vekin tuithla ni 1 ih  Parliament by election ah khan NLD cun seat 45 sungah seat 43 an la ih a sinan  Parliament ah 6.4% hrawnglawng fang an si ruangah Parliament ah  an duhdan hi an fehtlangpi thei leh umzia an neih a zum um tuklo.

Kristian Biak In Ah Bomb A Puak

Tihni sun Easter Sunday ah khan  Nigeria ram saklam Kaduna khuaih  Kristian  Biak In hmaiah bomb a puakih minung 38 an thiih midang tamzetin hriamhma an tuar. Palik bawipa in a sim nakah Easter Sunday khawmnak Biak In hmai Motor sungah bomb pahnih kam a siih  mithi pawl lakah  leeng kehnih nei hmangih ei leh in hawltu  pawl in  khawmbangpawl phurhding bawhih an hngah laifang a siih, mipawl an thitam tiah a sim. Bomb puakhin Biak In pahnih All Nations Christian Assenbly Church leh ECWA Good Church khal a tisiat.

Bomb puahtu pawlhi Kristian pawl raksiatsuah tum ttheutu Boko Haram Tapung pawl an si ding tiah zunnak a umih, hi pawlhin Nigeria ram in tlawng leh zirnak tinkim cu Muslim sakhua biaknak danih fehter an tumih an thiltum mi ti hlawhtlin nak dingah Kristian pawl parah suahsual an tuah theu ih Palik leh ralkap pawlkhal an do in an siatsuah ringring.

Nikum Krismas lai khalah an khawpi Abuja  ih Kristian biakin khawmlaiah bomb an puahih minung 44 an rak thizo ih, kum 2009 hnulam ih an suahsual tuahnak ruangah minung 1,000 lenglo an thi zo.

Pakistan Ralkap Pawl An Hawl Rero Lai

Theihcia zo vekin kandung zarh- zarhte ni ih  Pakistan ram ralkap 124 leh Civil mi 11 pawl Siachen kiangih Vurtlang tawlhciim in an silh mi pawlcu tutiang hawl rero lai an siih, Asinan ni 3 lai a liamzo ruangah nungdamih runsuah leh hmuhsal dinghi zum an umnawn  tuklo. hi Vurtlang ciim hin Pakistan  ralkap battalion  hunpi a silh thut thi ih, Vur sahzawnghi feet 80 lenglo a siih Vur ih silhnak hmun kauhzawnghi kilometre khat hnakih kau a si.

Himi hmunhi leitlunih umnak hmun harsa leh hrehum bikih ruah a siih India leh Pakistan in ram an cuhawkih an doawk nak ttheu hmun a si ih, feet 15.000 hanwgih sang a siih India khalin himi kiang kapah ralkap tamzet a retih Pakistan khalin himi kiangah ralkap Post 150 hrawng a retve. tuah himi  Vur in a silhmi ralkap leh Civil mi pawlhi Helicopter leh uico fim hmangih hawl rero lai an si nan  nungdamih hmusuak ding an zum umtuk nawnlo.

Tuikum January thla ah khan Arab League aiawhtu pawlin Syria ram buainak umdan an zohfiang ttumah khan  Syria Cozah cun an khawpi hmun dangdang ihsin an ralkap leh an ralthuam pawl an rak hnukkir salzo ih,  khakha tikcu remcaangah rak la in Opposition pawlin Cozah ralkap suahsan mi hmun pawlcu ralthuam thawn an luh cilhih umhmun  khuar nakah an hman ruangah  Syria Cozah cun tuitum khalhi khavek thil a thlensallo nak dingah Opposition pawlhin an ralthuam an rekthu ca ih felzetih an nganta lo cun Cozah ralkap pawlhi hnuhkirsal an tumlo thu an puangsalih tutiangah  an dinhmun hi thu felfai a um theilo.

Tihni sun khalah Syria Cozah ralkap kut tuarin Civil mi minung  72 lai an thibetih hiti vekih  ralkap pawlin Civil mi kut an thlak ringring thotho ruangah remnak palai tuahtu UN Secretary General, Kofi Annan khal a beidawngzet thlangih theih a si.

Syria Ram Buainak in Zia Umlam A Pan Lo

Theihcia zo vekin  Syria ram President, Bashar Assad hlawnthlak tum ruangih buainak cun nikum March thla ihsin tutiang zia umlam a pan theicuang hrihlo ih, himi buainakih mithi cu theihfiangzomi cinah minung 9.768 an kimzo. Syria ram buainak tireh tumin voi ziangmawzat UN  Security Council cun rolh aw dingin tumtah nak a neizo nan Russia leh China in UN rolh awk an duhlo ruangah veto Power hmangin UN thu an vuakthlaksak theu ruangah tutiang UN a rolh aw thei hrihlo.

Syria ram buainak tireh dingih UN a rolh awk theilo ruangah Arab League cun Syria ram buainak tireh dingih hnatuan dingih UN Secretary General hlun, Kofi Annan cu an thlahih  Kofi Annan ih thuput lutmi  ah Syria ram sung khawpi dangdang ihsin Syria Cozah cun an ralkap pawl leh an ralthuam pawl an hnukkir thluhding a timi  khal Syria Presidnet, Bashar Assad khalin a pawmthu a rak simzo.

Himi Syria Cozah in an khawpi dangdang ihsin an ralkap leh an ralthuam pawl an hnuhkir salding tikcucaan cu tuisun hi a siih. Asinan Syria Cozah in mizan sunih thu an  suahsal nakah  Opposition pawlin an ralthuam pawl an ret thluh hmaisat lo ah cun   an ram khawpi dangdang ihsi an ralkap leh an ralthuam pawl hnuhkirsal an tumlo thu an puangsuak salih, hiti vek a si ruangah Opposition pawlin an ralthuam an retduh velo ah cun  Syria Cozah in an khawpi dangdang ihsi an ralkap leh an ralthuam pawl hnuhkir sal dingih thutiam a rak neihzo mihi a ti hlawhtlin zum a  umlo.

Japan in North Korea Rocket Kah Thlaksak A Tum

Japan ram Defence Minister, Noaki Tanaka cun  North Korea in  hmaithla sungih rocket kahsuak a tummi cu  Japan ram sungmaw tipi lam hawiin maw  a kapsuak a si ah cun Japan in a kahthlak sakding tiah mizan sunah Tokyo khawpi thuthangca latu pawl hnenah asim.

Relzo vekin North Korea cun hmaithla ah khin Vansangih Satellite rettu ding rocket kahsuak a tumthu a rak puangzo ih, hihi US leh ram dangdang ziangmaw zat cun North Korea thiltum mihi United Nations daan pahbal a si tiah an puh.

Japan Defence Minister, Naoki Tanaka cun North Korea rocket  kahthlak sak dingih an ralkap pawl thu an pekding thukhal Parliament ah a simih, Asinan himi thu hi Prime Minister in a pawmpi hmaisat a ttul dingih, Japan Cozah hin a duh ah cun North Korea Rocket hi  raldo nak lawngpi PAC-3 Patriot Missile hmangin a kahthlak sak thei ringringih ruah a si.

Japan Cozah hin  North Korea ih Rocket kahsuak a tumthu hi  International Maritime Arganisation hnen khalah a simzo.  North Korea in rocket kahsuak a tum mihi  South Korea ram thlanglam tipi sungah a tla dingih ruah asiiih, pakhat sawncu Phillipines ram saklam ah a tla ding tiah zum a si.

Russia in A Ralthuam Meithal Hlun Pawl A Ti Siat Ding

Izvestia thuthangca in a tarlang nakah Russia Defence Ministry cun kum 2015 ah khin a ralthuam meithal hlun  Million 4 hrawng a tisiat ding tiah a tarlang. Russia in a meithal hlun pawl a tisiat dingmi pawl lakah a tambikcu AK-47 an si dingih, tuah hin Russia Cozah cun ralkap Kudam Inpi sungah meithal Million 16 hrawng a retkhawmih cumi pawl sungah Million 6 leh 5,00,000 hrawngcu a hlun hmantlak tuk  nawnlo ih ruah a si ruangah tisiat a tum nak asi.

First Deputy Defence Minister, Alexender Sukhorukor cun  nikum September thla ah khan  AK meithal hi Million 17 hrawng an neihthu a raksimzo ih, Russai hin ralkap Million 1 hrawnglawng a neiih,  meithal hiti zatzat ralkap pawlih hmancawklo neih hi thil ttulo a si tiah an ruat.AK-47 hi leitlun  ih assault rifle tha langsar bikih ruah a siih, leitlun ram 50 pawlih ralkap pawl leh leitlun ram dangdangih Cozah dodaltu leh Tapung pawl khalin an hman tam bikmi meithal a si.

Tuikum January thla ah khan Russia ramih meithal tuahnak hmun tumbik Izhamsh cun  Kalashnikov  assault rifle a tuahthar micu tui an hman laimi pawl thlakthleng nak dingah a pholang suakih, hi meithal thar Ak-12 timi hi  an hman laimi AK-47 thawn an tuahdan lamzin 20 hranwgin a danglamih Cartridge tumlam bangawlo zetzet pawl khal  remkhawm theih dingih ruahman nak neihmi an si.

Afghanistan Civil Mi Thattu US Ralkap Kuwait Panpi A Si

Kan dung naite ih Afghanistan ramih Civil mi minung 16 kapthattu US ralkap pakhat a hmin pauzar lomi kum 38 cumi Afghanistan ram thlanglam ih an hrennak hmun ihsin Kuwait ram panpi a si. Afghanistan ram Cozah thu neitu pwlcun hi US ralkap pa ih thubuai cu Afghanistan ramsungah  relsak tengteng ding a si tiah an tinan US ralkap hotu pawlcun  Afghanistan ramleng ah relsak a siding tiah Kuwait an panpi nak a si. US Cozah hin an ralkap thubuai hi an ram ralkap dan vekih relsak hi an duhttheu ruangah hipa khalhi US ah an hruaitlun zum a si.

Afghanistan ram danthiam pawlcun hi US ralkap pa ih thubuai cu an ramih relsak an duhthu mizan sunah an simih, Kandahar ramtthen ih MP  Abdul Khaliq Balakarzai khalin  hi thilsual rapthlakzet tuahtu US ralkap pa ih thuhi Afghanistan ramsungih relsak sisehla mithi sungkhat pawlih thinlung khal a damphahdeuh a zumthu a simve. Himi laiah US ralkap hotu pawlcun Civil mi thattu an ralkap hin Afghanistan ram suahsan hman sehla a thubuai hi Afghanistan ramsungah relsak a theihlo tinak a um cuanglo tiah an simve.

Himi thuthawi pehpar awmi thuttul ngaihtuah dingih US Defence Secreatry, Leon Panetta cu mizan sunah Afghanistan ram a thlenglut ih Helmand Province ih  British ralkap hmunpi Camp Bastion  Vanzam ttumhmun a thlen hnuah  Civil mipawl kahthat an si ruangih US parih lungawilo ralkap hrekkhat pawlih forhfialmi minung 1 cun  Vanzam tumhmun lamzinah a Motor cakzetin a mawngih  Leon Panetta leh a mah rakhmuak tu mipi pawlcu ttaihthat a tumih a si nan a tumtahmi a si suak hlanah a Motor a letih a mah khal a thicih.

US Defence SEcreatry, Leon Panetta cun himi ruangah Afghanistan ram ihsi a suahsal nakding tikcu cucaan ti danglam a si cuangloding tiah a simih US ralkap pawlcun Afghansitan ram mipi himnak dingah an hnattuan mi khal an ttuanbet vivo ding tiah a sim.

Aung San Suu Kyi Vote A Thlak Lo Ding

Theihcio zo vekin Burma ram Parliament Member seat 48 lawnglak hnawhkhat nakding hrangih hrilawk nakcu  hmaithla April ni 1 ah hrilawknak neihding a siih, himi hrilawk nakah Aung San Suu Kyi cun vote a thlak theilo ding tiah NLD hotu pawlcun an sim.

Aung San Suu Kyi hin Rongoon  thlanglam  Kawhlu Constitutuency ihsi himi hrilawk nakhi a cuh dingih, Asinan a mahhi himi  district sungih a umlo ruangah vote a thlak theilo dingtiah an thupuangtu Thein Oo cun a simih, Aung San Suu Kyi hin Vote thlakve a duh a si ah cun a umnak Address a thleng hmaisat a ttul ding. Aung San Suu Kyi cun Kawhmu Constutuency ih a umlo hmanah Candidate awk a theih thotho ruangah vote thlaklo hi a hrilsawn. Tui hlanah Aung San Suu Kyi cun a damsungih  zalen zetih vote a thlakthei nak hmaisa bik a si ruangah vote thlak tengteng  duhthu a rak simzo ih a si nan thil buaithlak nak tete a um ruangah a rak simcia mi thucu a sutsal.

England Siangpahrang Tupa in Ngaih Zawng Fala A Tong Lo

England ram Siangpahrang  Queen Elizabeth ih tupa Prince Harry kum 27 micun  a u Prince William thawi midang mizaraan vekih umve an caakcaan a tampit thu a sim.

Prince Harry hi  Carbbean tipi kap leh a kiangkap tluan rampawl tlawngin ni 10 sung a caamih, an ramih a kirsal hnuah thuthangca latu pawlin rak kawmin  Siangpahrang cithlah a sinak hi nuam a ti leh tilo an rak sutih, Prince Harry cun Siangpahrang cithlah a siih tui a dinhmuncu a hrangih vanneih thlakzet thil sihman sehla a mawhphur nak leh a tuah dingmi thil thupi tamtuk a um ruangah  a u Prince William thawi midang vekin umve an duhcan tampi  a um thu a sim.

Prince Harry cun  Siangpahrang cithlah a si ruangah nunau fala pawlin ngaihzawngding zoh in an zohdahlo thu leh  ngaihzawng khal a neihtheilo phah thu a simih, tui dinhmun ah cun nupi dingih fala kawp dingkhal a hmuh fumfe lothu leh tlawmngai ih a mah ngaizawngtu ding fala a mamawh sawn thlang thu a sim.

China Ram Hruai Tu Pawl Thleng Aw Ding

China ram Cozah kailaitu National People’s Congress hotu pawlcun tuikum October thla ah khin China ram hruaitu dingpawl an ngaihtuah tlangkhawm dingih, hnakum ihsin kum 2018 tiang China ram Cozah hruaitu ruatthar dingah hin tui President, Hu Jintao cu Vice President, Xi Jinping in a thlengdingah zum a siih,  Prime Minister, Wen Jiabao khalhi Vice Prime Minister, Li Keqing in a thleng dingah zum a si.

Himi  pawlih hleiah  Party Secreatry, Politburo leh Standing Committee Member pawlkhal tuikum October thla thotho ah a tharih ruat thar an si ding. Prime Minister, Wen Jiabao cun Cozah tharih hotu sinawnlo ding ruangah PM a si sungih China ramin harsat nak a ton mipawl parah  China mipi pawlih hnenah ngaidam a dilih, China ram fehdan ding tuahthat ding tamzet a umthu khal asimih, tuikum sungih China ram sumpai dinhun  7.5% talih  tthanter a tum nakcun  China mipi hrangah rah ttha a suakter a zumthu khal a simbet.

« Previous Page — Next Page »