Barack Obama In Canada Ihsi Zineen Lak Lut Nak Ding Lamzin Tuah A Duh Lo

AP, AFP | January 21

US President, Barack Obama cun  Canada ram ihsi Zineen laklut nak ding Pipe tumpi phumnak lamzin tuah dingih timtuah nak an neihmi thucu a pawmlo thu a puang.

Himi Zineen laklut nakding lamzin Km 2.700 ih hla Keystone XL an timi  hi TransCanada Company ih tuahmi a siih, ramngaw leh ramsa pawl,kilhimtu pawlcun hiti vekih  lamhla zet Zineen laklut nakding Pipe tumpi fehter dingcu rawmngaw leh ramsa pawl an ti cereu thluh ding tiah an dodal ciamco.

Himi laiah Zineen zuarsuak duhtu Company pawlcun  himi ruahman nakhi sumpai dinhmun tuahtthat nak ding leh hna ttuan ding neilo pawl hrangih hna ttuan ding an hmuh phah nakding a siih  ruahman nak thazet a si tiah an simve. Republican Party pawlcun  President, Barack Obama cu Party pahnih duhdan leh ngiahdan  theifiang ih thutluknak tuah dingin an nawr rero hnu ah President, Barack Obama cun  hi thu ruahman mihi a pawmlo thu a puang.

Famkim Siarbet

Nigeria Ramih Kristian Biak In 3 Ah Bomb A Puak

Krismas ni December ni 25 ah khan  Nigeria ramih Kristian  Biak In 3 ah Bomb a puakih minung 40 an thiih midang tamzetin hriamhma an tuar.

Hmi Bomb puahtu hi Muslim biaknak sakhua danih kaihhruai awknakdan  Nigeria ramih hman duhtu Boko Haram Tapung pawlcun an mai puahmi a sithu an simih, an khawpi Abuja ihsi Km 40 hrawngih hla Madala khua ih St Theresa Catholic Biak In cu bomb ih puah hmaisabik a siih, cumi hnu nizi 1 hrawngah Jos khua ih Biak In pakhat Kristian pawlih tonkhawm awknak hmunpi Mountain of  Fire an timi ah Bomb dang puah lehsal a siih, himi hnute ah an ram saklam Yobe State ih Godaka khua ih Biak In pakhat khal Bomb ih puahbet a siih, Madala khuaih Catholic Biak in Bomb puak hin Biak In a tisiat nasa ih a kiangkap ih Motor ziangmaw zatkhal a ti siat.

Bomb Ram Hnih Ah Puak

Himi ruangah mipi thinheng pawlin an khawpi Abuja ihsi Muslim pawlih um tamnak hmun  an ram saklam fehtlang nak lamzinpi pawl an kham pitih, hi mipi pawl dawidarh tumtu Palik leh ralkap pawl leh mipi karlakah buainak khal a suak. Krismas ni thotho ah khan an ram saklamih Damaturu khuaih ralkap umnak hmunpi cu Tapung pawlin an siim ih ralkap 4 an thi.

Krismas ni ngelcel ih hiti vekih buainak a suah ruangah  Muslim leh Kristian karlak ah buainak sosang a suah phangin UN General Secretary, Ban Ki-Moon cun  bomb puahih misiatsuahtu misual pawl a mawhthlukzet thu  asimih, an ram President, Goodluck Jonathan khalin Boko Haram Tapung pawlcu kumkhua an um lo dingih cemral caan an nei leh koding tiah a sim.

Iraq Ah Bomb A Puak

Iraq ram khawpi Baghdad ih thihcilh bomb puakah minung 5 an thiih midang 27 ih hraimhma an tuar. Cozah lam thu neitu pawlin an sim nakah  an khawpi laili Interior Ministry In sawng tlunta ih a thlunkhuh thawmtha tuding hnatuan pawlin himi Office Gate sangka an luh zawngah himi Bomb puahtu khalcun a bomb phurh micu Motor thawn a tlanlutpi ih, a bomb a tipuakcih tiah an sim.

Baghdad khawpi ah hin kandung zarh tlangkai ni 5 khalah thihcilh bomb  a puakih minung 68 an rak thizo tui naite hrawngih bomb puak mipawlhi zohman in an puahmi a sithu an simlo ruangah Shia miphun Prime Minister, Nouri Maliki ih hruaimi Cozah in  Sunni miphun  an ram Vice President, Tariq al- Hashemi kaih nakding thu an tisuak ruangah Sunni miphun leh Shia miphun karlak ih  boruak sezet ih hrinsuak mi buainak a si an zum.

Afghanistan Ah Thihcilh Bomb A Puak

Mizansun ah khan  Afghanistan ram  Talaqan khuaih  mithi phumnak hmunih mipi lakah thihcilh bomb a puakih minung 19 an thiih midang 40 lenglo in hriamhma an tuar. Interior Ministry thusuah mi in a tarlang nakah an khawpi Kabul saklam Km 250 hrawngih hla Talaqan khua ih mithi phumnakah  bomb puah tuihin  mithi phuntheh mipi lakah a bomb paimi a tipuak ih mithi lakah an ram Parliament Member 1 khal a thitel tiah an tarlang. himi bomb puakhi zopawl hmanin an puahmi a sithu an simlo nan Cozah mi pawimawh pawl  thahtum ttheutu Taliban pawl an si an zumthu khal an  sim.

Leitlun Ih Sundawm Nak Hmun Thangcak Bik Hong Kong

World Economic Furum in leitlun  ram 60 sung ihsi sumdawn naklam ih thangcakbik ram a hril nakah  Hong Kong cu pakhat nakah a puang. tuihlan ah cun US leh UK hi sumdawn nak lamah an rak saangzetih a hlaih theitu an rak um dahlo nan tu ah cun Hong Kong in an  hunn hlaih suakzo.

Hiti vekih sumdawn nak lamih Hong Kong a thanso nak sanhi  Insurance leh Initial Public Offring (IPO) ih an cah ruangah a siih, sundawm nak thancak nak lamih 4 nak rak sitheutu Hong Kong cu tuah 1 nak a siih,  2 nakcu US a siih 3 nakcu UK a siih  4 nakah Singapore cumi hnuah Australia, Canada,  Netherlands , Japan, Switzerland leh Norway pawlin an sang.

Israel in West Bank Ah In Sak A Tumsal

ih,  himi laiah leitlun boruak tise biktu US leh China in himi ah telve an tum silo ih  curuangah Canada cun a pawmlo a si tiah a sim.

Israel in West Bank Ah Inn Sak A Tumsal

Israel Cozah cun Palestinian  pawlih umnak  West Bank ah Juda pawlih umnak ding In 40 sakbet a tumthu a puang salih, Israel pawlih umnak ding In saknak tawlreltu Efrat Council hotu, Odel Revivi cun  hi thuhi Defence Minister, Ehud Barak khalin a pawmzo thu a simih, In saktu dingkhal tuizarh sungah Tender an tisuak dingthu khal a simih, Defence Ministry khalin  himi thuhi a liamcia thla ziangmawzat ihsin Defence Ministry in a rak pawm zomi a si thu an simve.

Palestinian  pawlin an mai umnak ding ramih an salmi sungih Israel Cozah in In sakbet vivo a tum ruangah  Israel leh Palestinian karlak buainak tireh dingih biakawk nak lamzin an hawl mikhal a rak sukuk phah zoih, Himi cingin kan dung naite kahlah Israel Prime Minister, Benjamin Natanyahu cun West Bank ih Juda pawlih umnak ding In 2000 an sakding thu a puangzo. himi ruangah leitlun ram tampi cun Israel hi Palestinian pawlthawi an karlak rualrem nak lamzin tibuai tu ah an puhih an mawhthlukzet. tui ttumih In 40 sakbet an tumthu an puangsal  ruang khalah Israel hi leitlun  ram dangdang pawlin an mawhthluk leh zum a asi.

Belgium Ram Ah Misual in Mipi Kap

Belgium  ramih khawpi pakhat Liege ah misual pakhat, Nordine Amrani kum 33 micun  meithal leh bomb hmangin mipi a kap ciamco ih minung 4 an thiih midang 125 in hraimhma an tuar. Palik hotu  pawlin an sim nakah hi misualpa hin  Liege  khua ih Bazar mipi tamnak Place Saint Lambert ih feh Bazar Bus bawhih ding minung pawlcu Grenade bomb pahnum in a dengih bomb puakih mipi thinphang zuangzam pawlcu rifle leh revolver in a kahbet ciamco hnuah a mahkhal a kapthat aw cih tiah an  sim. Palik pawlin hipa ih ruang an zohfiang nakah a taksa parah grenade bomb ziangmaw zat an pailai tiah an simih mithi pawlhi mipa kum 15 kum 17 mi leh piter kum 75 mi leh nauhak thla 18 mi an sih.

Hi ,misual Amrani hi kum 2008 September thla ah khan ralthuam meithal leh rit theihthil zuarih puh zomi a siih Court in thla 58 sung thawngIn ih khum dingin an rak relzo mi a sinan Court in lenglamih um theinak a pesalih,tihni sun kha Court hmai ih a dinsal dingcan a sinan Court ah fehlo in hivek thilsual a tuahsawn thung a si. himi hnuah hipai umnak In kiangkap cu Palik pawlin an zohfiangih  an In hnen tei umpi nu kum 45 mi ih ruangcu hmuhsuak a sibet.

Belgium  Prime Minister, Elio Di Rupo cun  an ramih hivek buainak rapthlakzet a thlengcu pawi a tithu a simih himi buainak ah  Terrorist pawlthawn pehtlaih awknak an neih a zumlo thu a simih, himi buainak hmunhi an ram Lal. King Albert leh Queen Paola II khalin an panih mithi sungte pawl an tuarpi thu an sim.

Egypt Ram Politics Din Hmun

Egypt ram Parliament seat 498 umnak hrilawknak vote thlak a voi 2 nak cu mizan sunah  mipi in an thlaksalih tuithla tirte ah khan a voi 1 nak vote cu an rak thlazo.

khami ttumah Muslim  Brotherhood hnuaiih Freedom and Jusitice Party cun  seat tamsawn an ngahzo thu an rak puangzo ih hi Parliament seat 498 umnak People’s Assembly hrilawk nakhi hnakum January ni 10 ah a netabik vote an thlaksal lehding.

Thuthang Dang Siar Bet : Hmet Aw

Himi hrilawk nakih tling pawlhin Egypt ram danpi an tuah dingih ruah ansi laiah ralkap Cozah cun  vote thlak hmaisa ah mipi pawlin an duhmi an hriltling theilo tiah puhmawh hawlin  People’s Assembly ih hriltlinmi pawlin ram danpi tuahlo in  Constituent Assembly Member pawlin ram danpi tuahtu dingcu  an ruatsal ding tiah an tivethung Opposition  pawlcun leitlunah  ralkap danpi tuahmi hnuaiih hrilawknak tuahmicu mipi thu neihnak Democracy a si theilo ih, mipi ih hriltlinmi Cozah in ram danpi a tuahih cumi ih ukawknak cu Democracy ram a si tiah an sim.

Iran in US Hnen Ah Vanzam Pek Kir A Tum Lo

Theihcia zo vekin Iran in US Vanzam Pilot umlo Drone RQ 170 Sentinel a kaihsak micu US President, Obama in US hnenih pesal dingih  Iran Cozah hnen ah dilnak a thlenih, Asinan  Iran Cozah cun hi Vanzam hi US hnenih peksal a tumlo thu a puang.

Himi thuah Iran Defence Minister, Ahmad Vahidi cun hi US Vanzam Drone hi Iran ram zohthup leh thlingthla tu a si ruangah  Iran Cozah in a kaihsakih Iran ta a sizo ih Iran Cozah in a duhduh in a tuah thlangding tiah a simih, US in Iran mipi hnenih ngaidam dilhman tumlo ih an Vanzam ruak an dil salcu ningzah thlakza a si  ati.

Canada in Kyoto Protocol An Suah San

Leitlun boruak sik leh sa thlengdanglam aw caktuk kilhim nak ding ih hnatuan tlangdingih leitlun ram tinkim kawmkhawm awknak Kyoto Protoco ihsin Canada cu a hnukdawkaw a suak. kum 1997 ih Japan ram Kyoto khua ih leitlun boruak sik leh sa kilhim danding relkhawm nakih  ram dangdang aiawhtu pawl an tonkhawm awknak ah  himi thu ih lungkimlo nak neitu cu hnuhdawh awk sian a si tiih an rakrelzo ruangah  Kyoto Protoco ihsin Canada hi a suak hmaisa bik a si.

Canada Environment Minister, Peter Kent cun  Kyoto Protoco hnuai ih leitlun boruak sik leh sa kilhim nak dingih paisa thawhdingmi ah Canada paisa thawhding zatcu a tamhleihluat tukih himi hrangih Canada in sumpai a thawhding zatcu dollar Billion 13 leh Million 600 a si tikah Cadana ram minung thawi zohin a tamtukih  In sangkhat in dollar 1.600 ciar an thawh a tuldingtluk a si.

Iran in Rel Fiang Aw Dingin US A Nawr

Tuithla ni 4 ih  Iran ralkap Electronic Warfare Unit pawlin  Afghanistan ramri ihsi Km  140 hrawngih hla Kasmar khawsungih an kahthlak mi US Vanzam Pilot umlo Drone RQ 170 Sentinel Vanzam zukcu TV ah an pholangsuak. New York Times  thuthangca in a tarlang nakah hi Vanzam hi Iran Nuclear tuahnak hmunpawl thlingthla ih zohthup tu dingih thlahmi a si tiah a tarlangih, Asinan NATO ralkap hotu pawlcun  hi Vanzam hi Iran Nuclear tuahnak leh an ram zohthuptu dingih thlahmi a silo ih Afghanistan ram thlanglamih Tapung pawl kap dingih thlahmi a siih, leilung ihsin a fehnak ding leh a hnatuan dingmi khihhmuh tu in an thunun theilo mi a si tiah an simve thung.

Iran ralkap hotu Brig General, Amir-Ali Hajizadeh cun  hi Vanzma hi ceet hmangih tibuai a si hnuah selo dingin leilung parah tlakter a si tiah a simih, hi Vanzam hi Iran ralkap kutsungah a um tiih rel a sinan  theihfiang nak ngaingai a umlo tiih rel a si ruangah Iran Cozah cun TV ah a zuk an tilang nak a si.

Thuthang Siar Bet: Israel Ralkap Pawlin Palestinian Pawl An Kap

Iran Cozah cun himi Vanzam hi an ram zohthup tu leh thlingthla tuih an puh ruangah Iran in US a dawrduh caanih biakpop nakih a hman theumi Tehran ih Switzerland ram palai cu Iran Cozah in a ko ih, himi Vanzam  an ramih a zuanlut naksan relfiang dingin leh zaangna dawmnak pe dingin US an nawrthu an sim.

US ralkap hmunpi Pentagon cun himi Vanzam hi Iran ralkap pawl kutsungih a um ringring ah cun a sungih ceet umdan leh an tuahdan pawl an theisuak ding ti an phangzetih a sinan mi hrekkhat cun cuti maimai cun an theithei loding tiah an simve thung.

Israel President Hlun Thawng An Thlak

Israel President hlun Moshe Katsav kum 66 micu nunau sualpi thubuai ih thiamlo coter a si ruangah kum 7 sung thawngtla dingin Tel Aviv kiangih Maasiyahu thawng In ah an khum.

Moshe Katsav hi kum 1990 hrawngih Cabinet Minister a si laiah a hnatuanpi nunau pakhat duhlo cingih sualpi leh midang pahnih khal sualpi tumih puh a siih, nikum ah khan thiamlo coter a si zonan a thubuai hi Court ah taza a cuaisal ih kum khatsung zalen zetih lenglam ih an tlanter hnuah a thubuai taza cuainakih thiamlo coter a sisal ruangah mizan zingah a umnak Kiryat Malachi khua ih a umnak In ihsin kaih ih hruaisuak a si hnuah thawngIn ah khumcih a si.

Internal Security Minister, Yitzhak Aharonovich in a sim nakah Moshe Katsav hi thawngtla dang pawl vekih ret a si dingthu a simih, Prisons Servise hotu, Aharon Franco cun thawngIn sungih a mahte a thah awklo nak dingah a mah kiltu a hranten ret a si ding a ti. Moshe Katsav ih tlaknak thawngin hi Maasiyahu thanwg In a siih, himi sungih thawngtla pawlhin an tikcu tamsawncu an biaknak sakhua zir nakah an hmangih zing tinten thlacam ih feh ringring a ttulih hleiah TV zohkhal an sianglo ih Moshe Katsav khalin himi danhi a thlunve a ttuldiung, a thawngtlak ding caan hmunli thenih hmunkhat a tlak hnu lawngah hremnak demdeuh pe dingin Court ah a dil thei ding.

 China Ralkap Ralring Ding

China ralkap hotulu pawl telnak Central Military Commission hmaiah China President, Hu Jintao cun an ram ralkap pawlcu do awk man ringringih ralring dingin a cah ih, Lawng ralkap pawlcu tulai ram thangso dinhmunih thiamnak neiih ram kilhim nakah hmainawr theiih thiamnak zir dingin a cahbet. Hi thuhi US leh tui naite hrawngih South China Sea tipi ramri thuhla ruangih dan pahbalih China puhtu Philippines leh Vietnam a hro nakih ruah a si.

 Himi thu ah US ralkap hmunpi Pantagon thupuangtu Admiral John Kirby cun China president, ih thusim mihi raklak kawisak an tum lemlo thuleh ziangram khalin mairam kilhim nakdingah cun thil pawimawh cu an tuah theicio thluh a si a ti. China hi ralkap ralthuam neihnak lamah a thangcak zetnan Lawng ralkap rori ah cun US cu a tluk hrihlo nasa tiah theih asi.

US President, Obama in kandung naite ih Australia ram saklam ih lawng ralkap ret an tumthu a puan ihsin China khalin Lawng ralkap thuamthat a tum tiah theih a siih, kan dung thla khalah China Prime Minister, Wen Jiabao khalin an ram In hnen leh South China Sea tipi thuhla ruangih tithiam lo awknak ruangah lenglammi rak rolh aw lo dingin a simzo. South China Sea tipi kiangkap thuhla ah himi kiangkap ramdangdang pawlthaw hin thuhla puh awknak leh sawisel awknak a tam zetih, China Taiwan leh Asia ram saklam ram pali pawlcun neitu an si thu an rel thluhih, Vietnam leh Philippines tlacun himi thuah China ralkap pawlcu puarthau zetih duhtawkih tlanglengah an rak puhzo.

US in Burma A Hrem Nak Hlih A Tum Lo

Fox News in a komnak ah US Secretary of State, Hillary Clinton cun  US in Burma ram Cozah hremnak a pekmi hlih tumnak a neihrih cuanglo tiah a simih, Hillary Clinton cun Burma ramah Cozah thar a dingsuakih thil thlengaw danglam  tampi a um nan  tuahthat tulmi thil tamzet a umlai ih, US cun Politics ruangih thawngtla pawl suahzalen thluh dingin leh  miphun thleidan nak ruangih raltlan dinhmun ih thlengpawlih dinhmun tuahtha dingin leh mipi in an ram hruaitu duhmi zalen zetih an hrilsuak theinak dingih zalen nak pe dingin US cun Burma Cozah cu a nawr ringring a si a ti.

Thu Hla Pehparawmi Pawl Sar Bet: In Hmet Aw

Theihcia zo vekin Hillary Clinton cun hmaithla December ni 1 ah khin  Burma ram a tlawng dingih himi ah Aung San Suu Kyi leh  Party dangdang hotu pawl  ton tengteng a tumthu asimih, Burma ramih mipi rorel nak dikzet a suahthei nak dingah US cun bawm a duh ringring a ti.

Aishwarya Rai In Fanu A Nei!!!

Kum 1994 ih leitlun mimawi hmeltha Miss World ih hrilsuakmi India ram Film Star langsar Aishwarya Rai kum 38 micun  mizan sunah Mumbai khawpi ih  SevenHills Hospital ah fanu naute a neiih, Ashwarya Rai leh a pasal Abihishek Bachchan tehi Film Star leh mi langsar tamzetin lungawipi nak an kuat ciamco.

Aishwarya Rai ih pasal Abhishek Bachchan ih pa  Amitabh Bachchan kum 69 mi khalin  leitlunih naute duh umbikih pu a sithu a sim.

Aishwarya Rai leh  a pasal Abishek Bachchan hi kumli lenglo an neih awknak arei zoih, Aishwarya Rai hin tuikum June thla ah khan nau a paithu a rak simzo. Aishwarya Rai ih naute neih hi  a langsar zet ruangah thuthangca latu pawlin an zimbuai nasa ih, a sungkhat pawlcun hi naute leh a nuhi zimbuai tuklo dingin thuthnagca latu pawl an ngenih, Cozah Information & Broad Casting Ministry khalin  thuthangca latu pawlcu Sizung kiangkapih mizuk nak leh Mobile Van pawl hunglo dingin an ngen hai.

TIO, AFP, IANS

America In Australia Ah Lawng Ralkap A Kuat Ding

US President, Obama cu nihnih sung caam dingin Australia ah a tlawngih, mizan sunih Australia Prime Minister, Julia Gillard thawi thuthangca latu pawl an kom nakah US in  Australia ram kiang tipi thuamthum kiltu lawng ralkap 250 a kuatdingthu an sim. US lawng ralkap pawlhi Australia ram saklam ah ret an si dingih,  Australia ih US in ralkap a kuatnak ding sanhi US leh Australia ram pahnih pehtlaih awknak a that sinsin nak dingah leh Australia ram kiangkap tipi thuamthum tluanih misual pawlin thilsual an tuah theumi kilhim nakah thil thahnem zet a si dingthu an sim.

President, Obama cun  Asia Pacific ram pawlthawi pehtlaih awknak tha an neih vivo a duhthu leh China a thanso a lungawipi thukhal a sim. President Obama hi mizan sunah leitlun ralpi a voi 2 nakih US leh Australia ralkap thipawl phumnak thlanah a fehih, tuisunah Australia Parliament ah  thu a simding ti a siih, himi ca nganlai tiangah  Australia Parliament ah ziangthu a sim timi theihman a si hrihlo. himi hnuah President, Obama hin  Australia ihsin Asia ram  dangdang pawl tonkhawm nakih tel dingin  Indonesia a panding.

Next Page »