Russia Ram President Ah Vladimir Putin Lak Lut

Mizan sunah khan  tuikum March thla ih Russia ram President hrilnakih hriltlin mi  Vladimr Putin cu an ram khawpi Moscow ih  Grand Kremlin Palace ah rin umnak thutiam tuah terih laklut a si. Vladimir Putin hi Russia ram President term hnih rak ttuanzotu  a siih, an ram daanpi ih um vekih term hnih hnuah pehzawmin President a cuh sunzawm theilo ruangah  a cawlih kum 4 sung Prime Minister a ttuan hnuah  tuikum March thla ih an ram President hrilnakih a cuhsal ruangah hriltlin sal a si.

Tui President, term hi kum 6 sung a siih, tluangtei kum 6 a ttuansuak thei a si len Josept Stalin ih hnuih Russia ram President ttuan reibik a si ding. Vladimir Putin President, ih laklut a si laiah Opposition lam mipi pawlcu  Grand Kremlin Palace kawtka ah an pungkhawmih Vladimir Putin President ih laklut an duhlo thu leh President laklut nak khawmcu baang dingih an duhthu an aupi ciamco haiih Palik pawl thawi an buai ruangah mi tamzet kaih an siih, an kaihmi sungah Opposition lamih hotu mi langsar zetzet khal an tel.

President, Vladimir Putin laklut nak khawmhi ropi zetih tuah a siih Soviet President hlun  Mikhail Gorbacher, Italy  Prime Minister hlun, Silvio Berluslomi, Russia President hmaisabik, Boris Yeltsin ih nupi Naina Yeltsin leh  President, hril nakih cuhtu tling banlo minung 4 pawlkhal an tel.

President laklut khawmnak hi ropi zetih tuah a si ruangah  Russia tangka rouble Million  20 hrawng an cemih ruah a siih, hihi dollar cun 6.64.000 hrawng a si ih, himi ih hleiah President lawmnak zanriah  i khawmnak an tuah leh dingmi ah   rouble Milliion 12 hrawng an cembet laiding.

Institute Of Chin Affairs Din Asi Zo

Global Chin Affairs Conference cu May 4- 6, 2012, ni 3 sung USA ih Chin khawpi Indianapolis ah hlunghlaizet in tuah asi. Cumi Conference ah Thailand, Europe, Australia leh US states tampi ihsin rinsanmi mino, upa tampi an ra suak khawm.

Conference ra kaitu mipi lungkimtlangnak in Institute of Chin Affairs cu May 05, 2012 ah dinsuak in a umdahlomi Chin thuanthu cahmai thar on asi zo. May 04, 2012 zaan 8pm ihsin 11pm tiang, Sat May 05, 9am – 11:30pm, tikcu pawlah Chin mipi lungrual ih hnatuan khawm theidan relkhawmnak kan nei.

Sunday zingah Falam Baptist Church of Indiana ah Pathian biakkhawmnak kan neih hnu ah Falam Christian Church of Indianapolis ah Pathian biakkhawmnak kan neisal. Kohhran pawl in hlunghlaizet in mikhual pawl an rak enkol in thusimnak caan thatha tla an rak pe. Lungawinak mithtli luang phah in pakhat le pakhat kan cibai aw. Chin thuanthu ih a umdahlomi cahmai kan ngan thokzo!

Conference hrangah tulsammi zainghman um lo ih ziangkim a tawlrel thluhtu Indiana Chin Community mino, upa pawl parah samcawklo lungawinak kan nei.

Chin mi kan lungruallo tiih thinlung nuamlo ih rak um pawl – Chin mi kan lungrualdan, Conference a ra kaitu mino le upa tampi in atak in an hmuhzo. Chin mi in hruaitu tha kan neizo. Chin mipi lungkhat in hnatuan tlang theinak dingah tawlrel thok rero asi zo.

Chin mi in Chinrampi hruaisal dingah a taphmun in a thok rerozo. Chin mipi pawl an tualrawn ah duhdawtnak khuang tum in kan lampi sal ding. Na hruai ding maw? Na thlun ding? Na hruai duhlo, na thlun duhlo hmanah, va tibuaitu ahcun rak tang hram hlah. Kan thuanthu timawi vivo dingih kekar thoknak ah ra tel ve dingin kan lo sawm duh fawn!

Institute of Chin Affairs (ICA tiin ko lo in Chin Affairs tiin rak ko dingah ka lo sawm) Board of Directors pawl cu:

Salai Nilian
Fung Dun
Hrang Vung
Tha Nei Luai
Van Tuah Piang
Thawm Hlei Mang
Hram Nei Luai
Mai Cheery Zahau
San Hlei Thang
Steven Rualthankhum Sunthang
Salai Tuan Ling Thang

Advisors
Rev. Hre Mang
Rev. David Laisum
Rev. Ngun Hlei Thang

Salai Nilian cu President ah le, Pu Fung Dun cu Vice President ih hril tlin an si.

Steven R Sunthang cu Board of Directors pawl in Chief Executive Officer tuanvo an pe.
Himi hnatuannak a theibet duh nan um asilen chinaffairs@yahoo.com ah zingzoi theih ringring asi.

Kawlram Thuthang Malte

 

• Kawlram cun sumdawng pawl conference cu Rangoon le Mandalay ah tui May 15 sungah ah tuah a tum ih United States, Germany, Britain, Japan, Italy, Australia, Singapore, Malaysia, Thailand le Indonesia pawl ih sumdawnnak le economic thuhla relkhawmnak an nei ding.

• Kawlram ralkap le The Kachin Independence Army (KIA) doawknak daih lam a pan thei lo.  April 29 le May 1 ni khalah nasazet in an kap aw. Tu ah KIA pawl thenkhat in lilawn pawl ah bomb kan kam tiah an phuang ih nasazetin doawknak a um ringring lai a si.

• Hi thuthawn pehpar in Ethnic parties (5) pawl cun tlang par mipawl le Kawlram ralkappawl kahawknak thu ah daihnak tuah dingah party 5 pawlin Kawlram acozah pawl hnenah an dil.

• Kawlram a that vivo thei ahcun 2015 ih rampi hrilawknak ah Thein Sein a cangvaih tum nawnlo thu ramsung interviewnak ah a rel ih tui a theitawk a tuannak ah a lung a kimzet a si.

Kawlram Vice President Bang Tum

Kawlram vice president Tin Aung Myint Oo 61 cu hrilselnaklam ruangah President Thein Sein hnenah suah duhnak ca a theh lut tiah ramsung thuthanglatupawl cun an sim.  Tin Aung Myint Oo hi mipi hmai ih a langlonak caan a rei thlang ti khalin an sim.

Thein Sein hin a rei hlanah top officials pawl khal a cawl ter ding tiah an sim thotho. Thein Sein cun Kawlram a hruai daan remthat a tum zet.

Tui, Tin Aung Myint Oo a ban duhnak san khal hi thuthanglatupawl cun an thei kimcang hrih lo.

Tin Aung Myint Oo hi Singapore ihsi a ra thlen veten damlonak thu ruangah bannak ca a thehlut tiin an sim.

Kan dungthla April 20 ih sumpai hmannak pawl reportnak ah President Thein Sein le vice president Tin Aung Myint Oo hi an hmu aw thiamlo tiah an sim.

Tin Aung Myint Oo hi Kawlram ih zohfeltupawl cun eiru thup nasabikih an ruah mi a si tiah an sim. 2009 ahkhan Than Shwe kut hnuai ah ralkap adviser hna a rak tuan ih Cutin Lower House hna tiang a kai so vivo mi a si.

NLD Cu A Thawknak In Buainak A Tong

Parliament pawl ih thu kamnak an neih mi daanbu (constitution) cafang pawl cu rem ding in an dil nan a net nak ah cun acozah ih a ret cia mi daan pawl vek in thlun in thukamnak (oath) neih ding lungkimnak an neih thu NLD party hotu Daw Aung San Suu Kyi in a sim.

Karlak hrilawknak ih tling ding in me a rak petu pawl mithmai zoh in le Parliament ih an tuan pi pawl ih duhnak thlun in tlawngkai nikhat ni ah lungkim ding in rel cat a si thu hotu bik in thuthang la tu pawl hnen ah a sim.

Parliament pawl thukamnak an tuah ih an siar tel mi cafang ah daanbu cu ‘hum in kan kil khawi ding’ ti hnak in ‘upat in kan thlun ding’ ti si sawn sehla ti ih an dil mi cu dil nawn lo ih an thlah awk mi sawn a si. Tui thukam tuahnak ah hicu daanbu thu lam men a si ih ramthu thawi a pehthlaih awk tuk lo ruangah an thu kan thlun men nak a si a ti.

Karlak hrilawknak an neih lai ih mipi pawl hnen ih an rak tiam ta mi thudik ih uknak (ta ya upadi soe moe yi), mipi hnen ih daihnak thleng ding in le daanbu rem thatsal ding thu pawl kha cu NLD ih U Ong Kyiang in kan ral ring man hrih lo a si ti in Mizzima pawl hnen ah a sim. “Kawlram ih ramthu ah khat lam le khat lam remaw zet tei kan ti awk thei a tha ti in kan ruat. Curuangah Parliament tonawknak ah tel ding in kan relcat nak a si. NLD ih din hmun ah cun kan ralring man aw lo a si bik” ti in a sim bet.

NLD pawl in hi daanbu remthat thei a si ah cun an hlawh tling ti ih ruah theih a si. Nan tu ah cun a tir te ih sin remthat lam si lo in thlun lam ih an thawk.

Falam Times

Ban In Kawl Acozah Le Kachin Donawknak Daihter A Duh

UN Secretary-General Ban Ki-moon in Kachin le Kawl acozah doawknak hi cawl thlang sehla ral umnak hmun ih refugees pawl khal tong theih si sehla ti in dilnak a nei.

“Kachin mipi pawl in doawknak cawlh ding thu can tha hi el lo in ramthu ih lungkimnak neih mi hin daihnak le thansohnak a thlen thei ding” ti in Ban in a sim. Kawl acozah hin tlangpar mi (Taing-Yin-Ta) meithal kai pawl thawn doawknak cawlh ding lungkimnak an nei zo nan Kachin Independence Organization (KIO) pawl thawi an tuah mi cu acozah an rinsan thei nawn lo ruang ah pahbal in tuini an do awk rero nak asi.

Kawl acozah le Kachin Independence Armry (KIA) an kapawk rero nak ruang ah mipi thawng tampi cu umnak kel te ah um thei lo in hmun dang ah thawn an si. Tubaite ah cun U.N. pawl in rawl le thilri mallai cu KIA um nak hmun ih refugee 50,000 pawl hnen ah an zem thei.

“Kachin State ah tu vek ih mi harsa bawmnak hrang kan pan thei hi a lung awi um zet ih peh zawm thei vivo ding khal a si” ti in Ban in a sim bet. 

Falam Times

New Delhi Ih CRO Cu “FRO” Tiah Thleng Sal

Salai Snow
New Delhi
5th May, 2012

New Delhi ih Falam Union (Chin Refugee Organization) tiih thleng tharmi cu Falam Refugees Organization (FRO) tiah vantlang mipi lungkimnak thawn thleng  sal a si thu Delhi ih CT palai in a sim.

Tui, kum sung ih Vantlang khawmpi a veihnihnak  ah mi 47 lenglo in an kai ih Falam mipi thansohnak ding tamzet an rel thu khal kan dawng bet.

Mani 5^th May 2012 ahkhan New Delhi Living Faith Baptist Church ahkhan mipi suak khawm cun New Delhi ih Falam pawlkom hrangah hmin felfai le huapkau sawn nei dingih hmin 3 lakah FRO timi hi an hril sawn ih nemhngehnak khal an nei cih.

Agenda dangdang pawl relfel a si hnu ah Chin beunak hawlpawl bawmtu Donbosco Ashalayam ih hmalaknak zohfelnak neih a si.

Cumi theh ah president hnen ihsin report le sumpai kaitu pawl hnen ihsin sumpai hmannak le dinhmun pawl simfiangnak an nei.  Hruaitu le mipi thusuhnak caan khal tuah a si. Vantlang khawmpi avei 2nak hi 5:30 tiang hlunghlai zet ih hman khawm a si.

Acozah Ralkap le KIA Kap Aw Sal

Tuisun ah tlangpar mi pawl le acozah kawhawknak a thleng sal ih tlangpar mi ziangmawzat le acozah ralkap pahnih an thi ih midang pawl in hliam an tuar.

April thla ihsi kahawknak ah Kachin Independence Army (KIA) mi 29 lenglo an thi zo ih acozah ralkap 2 an thi ih mi 12 lenglo in hliamhma pu in an um.

Ram hnuai ih tlangparmi pawl cun khawte 345 lenglo pawl hnenah an thilri phurhsaktu dingah hramhram in an fial ruangah acozah cun an mawhthlukzet a si.

Tuitum UN chief Ban Ki-moon le Thein Sein an tawnawk lai khalah Thein Sein cun tlangparmi pawl thawn rualremnak le daihnak tuah dingih a duh ringring thu a sim.

Chinese Mitcaw In Hillary Clinton Biak A Tum

Chinese ramkhel mitcaw Chen Guangcheng cun U.S daan tuahtupawl hnenah Hillary Clinton tawng dingah a dil ih China ram a rangtheibikih a suahsan theinak dingah bawm a dil hai.

Chen cun China ram ih a him nawnlo thu le a bawmtupawl ih sungkhat unaupawl tiang an him nawnlo ruangah China ram suahsan ih U.S ih cawlh hahdam a duhthu a sim.

Chen hin refugee si dingah a dil dah lo asinan a nunnak a him nawn lo tuk ruangah bawmnak a dil tiah thuthanglatupawl cun an sim.

Amah hi rorelthiam le ramkhel pakhat a siih a nauhak lai ihsin a mit a caw. 2006 kum ahkhan China ram population control nak ih policy diklo a pholang ruangah kum 4 sung thawng thlak dingah a thuhla an rel sak. Cun, 2010 ahkhan house arrest ah an rak khum ve.

Titanic Lawngpi Titanic II Tuah Sal Tum

Australia ram leilung khursung thil mankhung laihsuak nak lamih sumdawng miliamzet Clive Parmel cun kum 1912 ih lawngpipil Titanic vek cekci Titanic II tuahsuaksal a tumthu le kum 2016  cemzawngih England ihsi New York panih fehsuak ter tengteng man a tumthu a simih, hi lawngpi hi Titanic lawngpi pilvek cekci ih tuahtum asiih,  China ramah tuah a si dingih an tuahthluh ih khual a tlawn khalah China ralkap pawlin an kil ding.

Hi lawngpi hi a fehter nakah lung alh thei hmanglo in diesel hman a si dingih Titanic lawngpi pilzo mivek cekci in Pindan 840 leh tlanlennak tualrawnpi 9 a nei ding.

Clive Parmel hi Australia ramih milian 5 nak hrawng a siih, paisa a neih zat fiangte in theih cu a silo nan Pound Billion 3 hrawng a nei dingih ruah a si.

Hi lawngtuah a tum mihi pil maimai theilo dingin tulai thiamnak  sang phunphun hmang ih tuah tum a si. Clive Parmel hi mimak danglamzet a siih tuihlan khalah a sum dawnnak a tluanthat laiah a hnatuan tupawl minung 55 pawl cu  Mercedes Benz Car man khung tha zetzet a rak leisak thluh zo hai.

New Delhi Ih Chin Fala Hlo Hmuh Sal

New Delhi ih Chin Fala kum 17 mi hlo cu mani ahkhan hmuh sal a si.

Mai  Van Lal Sung cu a hlohnak ah Vai rickshaw mawgtu thawn an tawngaw ih Vai pa zangfah in an inn ah zan khat sung a riah ter.

A thaisun ah Vaipa cun tlangleng hmunpi ah a thlah sal.

Mai Sungte cun Chin hmuihmel keng hmuhzuam ih thinlung thlacamnak a nei lai ah Vung Boih (Tedim) cu a tawng ngah.

Vung Boih tei inn ah zankhat a riah hnu ah Rev. Thuah Za Thil hnenah an simthei ih cumi hnu ah a hawltupawl pawl thawn an tawngaw ngah.

New Delhi ih mino 40 lenglo tawngaw khawm in hmun dangdang ih tlangleng hngahnak pawl ah nikhat sung an rak hawl.

New Delhi ah nauhak le tleirawl an hlo theu ih palik pawl ih hmuh sak asilole Laimi pawl ih hmuh sal an si tlangpi theu.

Obama In A Fala Hlun Hnenah Sex A Rak Hmang

Barack Obama ih a fala hlun pahnih cun Obama thawn an rak duhawk ih nulepa sinak tiang an rak hman zo thu an sim. David Maraniss hnen ah Obama thu ngan dingih an ca an kuatnak ah Obama in Genevieve Cook le Alex McNear a rak duhdawt thu le nulepa sinak tiang an rak hman zo thu khal an ther tel.

Obama le Genevieve Cook hi kumkhat sung lenglo an rak duh aw tiah an hmu suak. February 1984 ih cakuatnak vek asile Ms Cook cun Obama thawn an rak ihtlang ih nuamzetin ihkkhun pakhat ah an rak um tlang thu khal cipciarzet in a tarlang.

Obama le Cook hi duhdawtnak zalam tluan ah reizet an rak feh tlang ih 1985 hrawngah an rak then aw. Cutawkih an rak thenawknak ah “Thil umzia a theithiam ding…tikcucan tla a herliam vivo ding…a duhawtnak ah I hruai lut sal ko ding” tiah Cook ih dairy ih ngan mi pawl tla hmuh sal a si.

Cun, Obama ih fala pakhat leh cu McNear a siih Occidental University, California ah an rak tawng aw ih class khat ah ca an zir tlang. 1982 kum ahkhan New York ah an pahnih ten tlawngpih sung hmuahhmuah nuam takin an um tlang.

« Previous Page — Next Page »