Vanzam To Mi 127 Thi Thluh

News Core

April 21, 2012 7:14AM

Pakistan Vanzam ih to mi 127 pawl cu an vanzam in nimthlakau a pah ngah ruangah an zaten an thi thluh tiin thu dawn a si.

Hi vanzam hi Islamabad’s international airport ih ttum tum a sinan ttum ngah loin an vanzam a siat bal thluh tiin AFP thuthang latupawl cun an phuang. Mi 118 ih ruangpawl an hmusuak zo tiin FOX News Channel ih thupuang tucun a phuang. Hi vanzam Bhoja hin nimthlakau a pahngah a si ding tiin an zum.

Pakistan Navy Captain Arshad Mahmood ih a sim nakah cun a tum zik leilung a pal hlan te ah nimthlakau a pahngah a ti ve.

Brigadier Sarfrz ih a sim danah cun ruang an sarngah mi pawl khal zo an si ti cekci theihthei an si lo tiin a sim. Bhoja vanzam Boeing 737 hin upa 121 le nauhak 11, vanzam ih hnatuan pa 6 pawl a phur.

GEO television ih a sim danahcun hi vanzam hi kum 27 tluk ih rei a si tiin a phuang. Islamabad vanzam tum hmun ah zanlam 6:50 ih tum ding asinan 6:40 ihsin an biakawknak a cak cutin siatralnak an tawng.

US Ralkap Leh Phillipine Ralkap Raldo Zir Tlang

US leh Phillipine ram pahnih ralkap pawlcun  South China  Sea ah raldo an zirtlangih hihi China cun a ngai thiamlozet tiah theih a si. hi ram pahnih ralkap raldo zirtlang mihi Balikatan tiih a hmin pek a siih tuithla ni 27 thleng an awhding.

ram pahnih ralkap pawlin raldo an zirtlang nak hmunhi China leh Phillipine ram pahnih in ram an cuhawk ringring nak hmun kiangte Palawan a siih, himi kiangah China khalin a raldo nak lawng 2 a thlahveih, US leh Phillipine ralkap pawl raldo an zirtlang mihi China cu a mah hro nakah a ngaiih, Asinan Phillipine ralkap thupuangtu Major, Emanuel Garcia cun  Chian thawi an  karlak boruak leh tui US ralkap leh an ram ralkap raldo zirtlang mihi kungkaih awknak zianghman a neilo tiah a sim.

Pakistan Ram Thawng In Ihsin Thanwgtla An Tlan Suak Tam

Kabul Siimtu Tapung Pawl Kahthat Thluh An Si Zo

Theihcia zo vekin tihni zingah khan  Taliban leh Al-Qaeda Tapung pawl kawmkhawmaw Haqqani Tapung pawlcu Afghanistan ram khawpi Kabul khawpi laili sungah lutin  ram dang embassy leh NATO hmunpi pawlih heliah Parliament pawlcu  ralthuam meithal leh rocket bomb hmangin an kap ciamco ih, Tapung pawlhi Afghanistan ralkap leh NATO talkap pawlin do let ve in nazi 18 sung an kah awk hnuah  Afghanistan ram tikcu ih mizanzing nazi 6:30 ah khan NOTO leh Afghanistan ralkap pawlhin Tapung pawlhi an kapthat thluh.

Hi Tapung pawl leh ralkap pawldo awknakah  hin minung 47 an thiih mithi pawl lakah Tapung 36 ralkap 8 len Civil mi 3 an thiih,  midang 65 in hriamhma an tuarih hriamhma  tuar lakah Civil mi 25 an telih, Kabul khawpi siimtu Tapung pawlhi an zaten kahthat thluh an si tiah Interior Minister, Besmillah Mohammadi cun a sim.

Tapung pawlhi Kabul khawpi sung laili ih In pakhat sungah an umkhawmih an umnak In ihsin  ralthuam rocket leh bomb hmangin hmun pawimawh pwlhi an kapciamco ih hihi ralkap pawlin kulhin an luhcilhih NATO ralkap pawlkhalin tlunlam ihsin  Helicopter hmangin Tapung pawlhi an kapve Tapung pawl thupuangtu, Zabihullah Majahid in a sim nakah Kabul  khawpi an siim naksan hi tui naite hranwgih NATO pawlin Tapung pawlin dimhmun  a tlasezet thlang tiih an puansuak ruangah an tlaksiatlo zia leh an cahzia langter naka si thu a sim.

Himi an buainak ih hleiah Second Vice President, Mohammad Karin thihcilh bomb hmangih thah tumtu minung 2 khal kaih ngah an siih hiti vekih khawpi laili sungih Tapung pawl duhtawkih an um theiih  thil an siatsuah thei ruangah mi tampi cun Afghanistan Cozah in a ram a kilhim theilo zia a langfiang tiah an ruat.

Pakistan Ram Thawng In Ihsin Thanwgtla An Tlan Suak Tam

News International in a tarlang nakah Pakistan ram Khyber Pakhtum khwa Province ih Bannu ThanwgIn  cu Taliban pawlin  ralthuam tha zetzet hmangin an siim ruangah  thawngtla minung  384 an tlansuak tiah a tarlang. Taliban pawlhin ThawngIn luhnak sangka gate tumpi pahnih cu Bomb in an puahsiatih cumi hnuah ThawngIn kiltu Palik pawl leh Taliban pawlhi Nazi 2 sung an kapawih  Thawngtla kiltu Palik pawl hnakin a siimtu Taliban pawlhi an tamsawnih an ralthuam khal a thatsawn ruangah Palik pawlin an nehlo ih Taliban pawlhin ThawngIn siatbalin a sungih Thawngtla pawlhi an tlansuakih Taliban pawlhin Thawng In pindan ziangmawzat laikhal meisa in an urkang tiah News International cun a tarlang.

Taliban pawlhin Afghnaistan ram Kandahar ramkulh ih Thawngin khal nikum ah khan an rak siim zoih  Thawngtla tamzet an rak lasuakzo ih hiti vak a si ruangan Taliban pawlhin ThawngIn dangdang khalhi an siimbet vivo ding tiphan a umzetih, tui thawngtla tlansuak pawlhin Taliban pawl an bawmih an ticak khal zum a um.

Thawngtla tlansuak lakih minung 23 pawl tlacu misual ruhkol mi ttihnung zetzet an  siih, cumi sungih minung pakhat Adnan Rashid an timi tlacu Pakistan President, hlun Parvez Mushraf thah tumtu a siih  a mah hi thah dingih  Cozah Court in thu a relsak zomi a si. Taliban pawlhin ThawngIn sung an luh ihsin hi thah dingih an timi Adnan  Rashid leh midang thi dingih an thu an relsak zomi minung 20 pawlih umnak hmunhi an pancih ih cumi laiah Thawngtla dangpawl khalin tikcu remcangah rak lo in minung 384 pawlhi an tlansuak humho cih .Himi thawngIn sungah Thawngtla minung 944 an um.

Brad Pitt & Angelina Jolie Nei Aw Ding

Leitlun mipi ih thlirmi Brad Pitt 48 le Angelina Jolie cu hmun khat ih um tlang dingah lungkimnak thuthlung an tuah thu leitlun thuthang 10 lenglo ah an tarlang.

Tui tlawngkai nithum ah Bard Pitt cun a innsangnu ding Jolie 36 ih kutzung no hnianghni te ah mankhungzet ngun zunghruk a bun sak ih an neihawknak ding ni cu an sim thei hrihlo nan a rei nawnlo ding tiah an sim.

An thuhla theitu an fanau pawl khal lungawi aipuang in an um tiah USA Today cun a sim. Jolie le Pitt hi kan dunglam 2005 ihsin an rak uar aw zo. An pahnih in fa paruk Maddox, Pax, Zahara, Shiloh, Knox le Vivienne pawl an nei zo.

Tiger Wood Mualpho Sal Ding

Leitlun golf thawithiambik Tiger Wood ih kawppi fala taksa zuaraw 3 pawl cun Tiger Wood an rak ihpi daan pawl film (zuknung) in an cang ding thu an tarlang ih Tiger Wood cu a let in a mualpho sal ding an ti.

Tiger Wood cun fala zuaraw (porn actress) pathum hmun dangdang ah a rak kawp timi thu fiang sinsin dingin film thawn an lang ter ding. Himi ruangah a hminthannak tamzet a hloh ding an zum. Kum 2005 ahkhan hivekih fala a rak kawp ruangah a golf thawinak khalah a rak hlawhtling lo phah theh tiah an sim.

Hi, zuknung ih a langter ding mi cu fala pathum hmun dangdang ih a rak kawp mi pawl cun Tiger Wood ih zeizia pawl an rel theu ih an kawpmi cu mipkhat a rak si thu an langter ding. Fala pathum cun Tiger Wood an ihpi caan a umdaan pawl an pholang ding.

Cancer A Hrek Tluk Dam Thei

Natnak tihnungumzet cancer natnak bang pawl hi a tuartu thinlung pacang tak ih an um ahcun a hrek khat tluk a dam thei tiah US scientist pawl cun an sim. US ziangzawitu pawl cun cancer tuarpawl cu hrilselzet ih an um a tul ih hlei ah pacangzet ih an um a thupit thu an sim tam cuang.

Kuakfawn ruangih cancer ngah hi an tamzet ih thau ruang khalah cancer ngah an tam tiah an sim bet. Cancer tuartu hrek khat pawl cu kuakfawp mi rak si hlah haisehla a hrek tluk an dam ding nan tiah an sim bet.

Cancer le natsia dang tuar lo dingah ka-kuai-si pawl hmang in a hrek tluk a venghim thei ti khalin US zingzawitupawl cun an sim bet. Lian cia kum ziangmawzat ih cancer natnak thawn rak thi zo pawl 577,000 hi rawl thaten ei in le kuak rak fawp hlah haisehla an rak thi tuan lo ding nan ti a si.

Kum 1998 ahkhan leitlun pumhuap cancer natnak 1.3 tluk a si ih 2008 ah 1.7 in a karh asinan 1996 ihsin 2006 karlak pawl zoh tikah malten a tla niam ih 2006-2008 a mal vivo ti a si.

Hlawh Sang Messi

(CNN) Lionel Messi hi leitlun bawhlung lek thiambik tiih phuan a si rero thlang. A rualpi dang pawl khalih thiik ding rual a si nawn lo. A hlan ih sumpai rak hlawh tam Ronaldo le  David Beckham khal pawl khal in an bang thei nawn lo ti theih a si.

Tui zarh ih France Football Magazine cun Messi ih a hlawhsang bik thu a tarlang. Goal 51 lenglo a thun zo ih ruangah a hlan ih rak larzet David Beckham le Ronaldo pawl ih hminthannak pawl a khuh thei.

Bawhlung leh tinten Messi cun thil danglam le mak a tuah ringring ih a rualpipawl khalin an uar zet fawn a si. Messi hin $52 million a hlawh ih Beckham hin $50 million a hlawh ve. England striker cakbik Wayne Rooney cun $32.6 million a hlawh ve ban.

Lady Gaga Leh Korea Zumtu Thlacam Au Aw

Salai Richard Van Bawi Lian, South Korea

Tulai leitlun mino pawlin K-Pop(Korean Pop) hi an atcilh rero mi a si. Korea ram hi Pop awnmawi lamih a thangso zetmi ram a si. Cui hleiah a ram ih ttosuak hlasak thiam pawl uar zet leh cawisang zettu ram khal a si.

Midang thawi bang aw lo leh ceiawk dan dang lam thei zet Lady Gaga cu April thla ah Korea ah a tlawn ding thu a sim ih mino pawl cun a mah zohcak in a hiarhal zet. Asinan, Korea zumtu pawl cun Lady Gaga a ram sung ra pal ding hi Satan ih tirh koh ra ding vekah ruat in nasaten an duh lo. Lady Gaga cu Satan betu minung a siih, a concert ih ra tu minung pawl lam zin hlo leh hell ram feh ding ah khih hmuh tu a si ding ti ah an zum.

A liam cia kum 2008 ah Marilyn Manson in Korea ramah concert a rak nei dah ih, a performance theh-ah “Minung pa ziang zat nan thi ding tih ka rak zoh ding” tin tawng kam tan ta in Korea ram cu a rak suak san. Cun hnu in Korea ram ah mah leh mah that awk (suicide) a tam vivo ih mi hmingthang (celebrities) pawl tiang an that awk rero ti a si. Organisation for Economic Co-operation and Development(OECD) member ram ah cun Korea hi 2009 tiang suicide tam biknak ram a si hngehnge.

April thla hi Korea ram ah a thu pi zet mi thla a si. General Election tuah ding thla a si bet hlei ah  Lady Gaga a rat tum thla a siih ziangmi duhsan ruangah hi thla a hril kherkher ti cutheih a si lo nan hivek thla thupi a si ruangah concert tuah a tum kherkher a si ding tiin zumtu pawl cun zumnak an nei. Curuangah Korea ram zumtu pawl cun thazaang pek aw in leh Lady Gaga tlawng tumn mi a cancel theinak dingah nasa zetih thlacamnak khal an nei.

Israel PM Le Obama Tong Aw Ding

Israel in Iran Nuclear hmun kah siatsak a tum nak thuah Israel  Cozah duhdan leh ngaihdan  America Cazoh hnenih simfiang dingin  kan hmaizarh tlawngkai ni 1 ah khin Israel Prime Minister, Benjamin Natanyahu leh US President Obama cu Washington ah an tongaw dingih, himi an tonawk nakah Israel cun US cu Iran in US duhdan pahbal zawngih a feh a si ah cun  US in ralthuam  hmangmai dingin Iran hi hro seh ti a duhthu  a sim dingah zum a si.

Jerusalem leh Washington  Cozah thu neitu pawlcun  Israel in Iran Nuclear kah a tumnak thuah Israel leh America hi an duhdan a bangaw thei ciahlo tiah an simih, Asinan Israel PM, leh Obama an tonawk nakding sanhi himi thuih an duhdan a bangawk theinak  dingah a si ding tiih ruah a siih Asinan ziangthu an reltlangding timi thufiang cu theihnak a um hrihlo.

Israel Prime Minister, Benjamin  Natanyahu cun US hin ralthuam  hmangih Iran kahmai hi a duh hrihlo  ruangah himi thu in Israel mipi pawlih thinlung nehter a tum asi tiah a simih, himi laiah US mipi pawlcun  President hrilawk nakding tikcu a naithlang ruangah Israel in US Congress leh Republican Candidate pawlcu  ralthuam hmangih Iran kutthlak duhmai dingih President, Obama hi nawrter an tumnak a si tiah an ruat ve.

US Secretary of State, Hillary Clinton cun  Iran  hremnak dingah US cun nasa zetin  ttan a la ih, Iran hi a luhlul tuk ruangah hremnak pekdingcu a siko nan ralthuam hmangih kahmai hnakin  a siraw nakding lamzin hawlsak nakdingah  khua a tlai hrihlo a ti.

Syria Ram Buai Nak Bese Deuh Deuh

UN in a sim  nakah  nikum March thla ihsi Syria ram buainakih mithi cu 7.500 lenglo an kimzo tiah a tarlang. UN  Under Secretary, General Lynn Pascoe in a sim nakah Syria ram buainakih Cozah ralkap kut tuarih Civil mi thipawl lakah nauhak leh nunau khal an thitel tamzet tiah a sim.

Himi laiah Syria Cozah cun an ram buainakih mithi zatcu 2.493 an siih, President, Al- Assad hlawnthlak tumtu Tapung pawl leh Cozah ralkap do awknakih mithi cu 1.345 an si tiah Cozah lamcun an tarlangih, mizan sun khalah Cozah ralkap kut tuartin  minung 67 an thibet. US Secretary of State, Hillary Clinton cun   Syria ram President Al- Assad cu minung tamzet thihnakih mawhphurtu a si ruangah  Tazacuai ih thubuai ritzet phurter a si ding a ti.

Syria ram buainak thuhi UN Security Council khalin voi tampi UN rolh aw dingin an rel khawm rero zonan Russia leh China in  Veto Power hmangih UN thu an hlawnthlaksak ruangah  Syria ram buainakah hin tutiang UN a rolh aw thei hrihlo ih hiti vekih Russia leh China in an run ruangah  Syria Cozah hi a puarthau sinsin mawsi tiding khawpin  an ralkap pawlhin Civil mihi an that tam sinsin.

Thailand Ih Raltlan Umnak Hmun Ah Kangmei Suak

Umpiem Mai Refugee Camp ih meikang ruangah beunak hawl mi ziangmaw tizat cun rawl, thuamhnaw, umnak hmun neinawn lo in an um. Bawmnak a pe duhtu hrangah http://www.tbbc.org/donate/donate.htm ah bawmnak pek theih a si. Thailand-Burma Border Consortium(TBBC) pawl ih an sim danah hi meikang ruangah mithi cu an um lo tiin an sim nan nauhak pakhat cu a hlo tiin thu dawn a si.

Hi meikang hi TBBC ih an ngandan ahcun February 23, 2012 Tlawngkai nili sun, sundir sml 12:15 zl ah quarter No. 9 ihsin a kang thok tiin an hmu ih a rei hlanah meikhu cu section 6, 7, 8, 9 leh 10 (Muslim Community) pawl ih umnakah a kang vivo tiin an tarlang. Hi hmun ah Inn 3019 a um ih milai 4410 an um tiin TBBC cun an sim.

Zanlam 2.30  ah meikang kham mawtaw a ra thlengnan meikang cu a sosang tuk zoih kham theih a si nawn lo.  TBBC cun inn 566 tluk a kangral ih inn 257 tluk a siat suah tiin an sim. meikang mit tum ruangah mi 20 pawl cun hliamhma fate an tuar ti khal cun thuhla dawn a si.

Leitlun Mi Tawibik Lukhum Khumtu Chandra Bahadur Dangi

Leitlun bik pawl ngan khumtu Guiness World Record pawl cun Nepal mi kum 72 ih upa cu leitlun ih miniambik ti’n an hminsin. Amah tlukih miniam cuangce cu an um hrih lo.

Chandra Bahadur Dangi hi a Sanlam 54.6 cm lawng a si ih Filipino Junrey Balawing netabik leitlun miniambik hminsin hnakin 5.3 cm in a niam sawn.

A nih hi mi niambik tilawng men silo in leitlun miniambik lakih kum upabik hminsin khal a ngah cih bet. Mr Dangi hi kum 72 mi a siih kg 12 lawng ih rit a si. Nepal ram khaw fate ih um mi a siih a Sanlam tah dingih Nepal khawpi Katmandhu ih an hruainak hi khawpi ih a vei khat fehnak lawng a si. Nupi neinak ding ah a kum cu upa zet zo hmansehla nupi neih ih leitlun hmun tin ih vah a duh thu khal hminsinnak capi an pek nakah a sim.

Nepali mi Khagendra Thapa Magar khal in 2010 ah leitlun miniam bik hminsin a rak ngah ve dah zo. A nih hi 67 cm ih sang a si.

« Previous Page — Next Page »