Chin ramkheltu in hmin pe tum ve

3 April 2010: Chin mi ramkheltu pawl cun Kawlram khawpi thar Naypidaw ah hmin pe aw ve dingin 29 March ni ah an feh.

Ramkhel party pawl hin Chin National Democratic Party (CNDP) tiih hmin pek an tum. Hi hmin an pom theilo ahcun Chin People’s Party tiih thlengsal ding a si.

‘Chin ramkheltu Naypidaw ih feh, mi pahnih in phone in bia ih tui kum hrilawknak ih hmin an pek tumve thu in sim, an hmin lawngte ka thei lo’ tiin Mr Nahthang, Falam ih an party sungtel pakhat cun Khonumthung thuthang latu pawl a sim.

Hrilawknak ding thuthawn pehpar aw in Chin political hruaitu Yangon ih um le Chin ram khawpi tin ih um mi pawl thawn thuhla relkhawmnak anneih zo thu khal a sim bet. Amahlawng te Chin mi ramkhel tu lak ihsin zobik an hrilsuak ding ti lawngte a fiang hrih lo.

Khonumthung News.

Falam Le A Sehvel Khua Ah Thlisia Hraang

Kan Laitlang hrut le Lairawn sehvel inn kang rapthlak zetzet ih a nuai hnuah tuini March 31, 2010 zinglam nazi 1:00 AM ah Falam sehvelih khuapawl cu thlisia, ruah le rial in a nuai ciamco ih inn pawl an siat.

Zinglam nazi 1 ihsin thli hrang le rial tlapawl cun Falam bawhlungsit zohnak ding ih tuahmi inn pawl an tuah reromi cu a siat ter theh ih bet ah Mahyahkhah innpi cu a kiang ih thing pawl in an nen ngah tiah thu kan dawng.

Thlisia hrang cu cawl lohli thei loin zinglam nazi 5 tiang a hrang ih Falam zato rangva tlap (7) lenglo a hawk ih hleiah inn (5) lai a siat phah a si tiah CT palai pakhat hnen ah Falam khawsung a betu in kan palai hnenah a sim sawng.

Falam kiangkap khuapawl cu nasa zetin hi thilsia hin a nuai ve hai. Laizo ih  inn luanglu (3) lenglo a siat ih bet ah mucyu tlawng tiang in a hawk theh tiah thu kan dawng bet. Zalai khalah inn hnih lai a siat bet.

Kan palai ih a phone daan thu a sim daan vek asile, Laizo ih Mucyu tlawng siat cu tui zing lala ah khaw-hlum teima theipawl in an tuah tha sal tiah thu kan dawng. A then khat inn siat a tuar pawl cu tuiziang lala ah tuahthat a si ko nan, a tuah tha thei lo ziang maw ti zat an um ih a tu ah hmuan ah umnak inn te sak ih khawsa pawl khal an bo cuanglo.

Zalai ah inn (60) lenglo an um ih inn khat ih (5) umnak cu a siat theh. Laizo ah inn (60) lenglo an um.

Laitlang Inn Kang Pawl Thlir Let Nak (Tui Ni Tiang)

Kan Laitlang kan sehherh, kan duh dawt, kan ngai duahdo, kan mang ringring, kan hngilh theilo, Kan Lairam a tthing deuhdeuh ti’h thinnuamlo zet ih kan um lai ah Chinmi mipi hrang ih riahsiatnak tamter sinsintu dingah zumbanlo in sun nidir laifang ah mi 1000 lenglo umnak Laitlang, Hakha khaw nuam Lungkhing cu date 11 March 2010 ah hramlak kangmei innlak a thleng ih khawlciami rawl le neihmi thiri zaten a kang ral theh, cutin riahsiaza zetih mipi rawl ei ding nei lo ih an khawsat vansang lai ah Kawlrawn Kalaymyo ih inn (8) lenglo khal 24 March 2010 ah kangmei in a kangral lala ih mi 47 lenglo in hliam nasa zet an tuar lawnghman siloin mipi thinhar le mangbang in an khawsa.

Ziangah cutin kan Laitlanglam ah inn a kang ciamco tiih kan ruah har rero laiah kan mangbangnak in tamter sinsin dingah March 22, 2010 ah Tamu Myo, Kanaan khua a kang ih inn (10) lenglo a kaang ral ti kan thei lala. Cuti ‘h mangbang ludawm ih kan um lai ah 25 March 2010 ah Lunkhua ih inn (17) lenglo cu meisa alh cun an khawpawh in a khuh lala ih aw! Chin ram ih mipi cu phawk hehe in an um theh. Kan Chin ram ah paam rori a thleng ti’n CT palaipawl cun an sim.

Inn kaang pakhat theihterawknak kan pekawk ttheh man hlanah khaw dang a kang ti’n innkaang thuthangsia kan dawn zawnzawn ruangah Chin mipi group mail laarbik Rihli ah phei cun mipi’h tuarpinak le lungsiatnak an langter. Ni 29 March 2010 ni khalah Zotlang (Min Hlah) Tithim khaw nuam zet cu BPC biak inn hmuancaar ihsin a kang thawk ih inn ziat a kang ti le hliam tuar an um le um lo thu ciangzet in thu kan dawng lo.

Asinan, tuini 29 March 2010 ah CT palai pakhat hnen ah Kalaymyo inn a kang sal lala thu an sim thei. Kalaymyo Aungtitsa veng cu kangmei in zinglam nazi 4 ihthawt lai fang ihsin a kawng thawk ih zanlam nazi 5 ah veng mino pawlih bawmnak thawn an mit thei fangfang tiah kan CT palai cun thu in sim. Kan CT ih palai ih sim daan vek asile, kan dungkum kaikhin in hivek in kan Chinram ah kangmei ruang ah harsatnak a thleng dahlo tiah a sim bet.

Tuini March 29, 2010 Kalaymyo inn kang hi kan dung ih a kang hnakin a rapthlak sawn ih a kang sung caan khal a rei sawn tiah thu kan dawng bet. Hi, innkang a hmutu mipi pawlkhal mangbangvansang in an um theh. Kan CT palai cun phone thawn hi thu a suhfiangnak ahcun candy meisa ruangah inn pakhat a kang fai theh ih hleiah a kiang kap innpawl kang lo dingih mei lamzin an sialnak ah inn pahnih an balsiat theh thu in sim thei bet.

Lunkhua innkang somdawl thu meeting

Ahmun; Pu Hlawn Hre Inn

A ni : 28.3.2010

A tikcu : 1:30 pm
Meeting kaitu pawl
1. Rev. Biak Cawm (Nazareth Children Home)
2. Pu Hlawn Hre Lian(Falam Store)
3. Pu Lian Tin Hre(Tlanglo veng)
4. Saya Lal Ram Mawi(Lunkhua)
5. Pu Lawm Zual(Lunkhua)

24.3.2010(ON Wednesday) niih Lunkhua inn 11 kang tu pawl somdawl le bomnak
lamzin kan ruat khawm.

Lunkhua ah mi 9 somdawl ih tawlreltu committee din a si zo. Communication
a harsat tuk ruangah Falam ihsin bawmtu adhoc committee din siseh la a
tha tiin kan lung a kim. A hnuailam mi pawl kan hril.

1. Pu Hlawn Hre Lian President
2. Rev. Lian Ci Vice President
3. Rev. Biak Cawm Secretary
4. Pu Mang Tin Zul Assistent Secretary
5. Pu Khua Thio Treasurrer (FBC, Treasurrer)
6. Pu LIan Tin Hre Member
7. Pu Bawi Ling Member

Hmundang ihsin sumpai bomnak a um pang a sile Treasurrer Pu Khua Thio hmin
in thleng sehla, committee member pakhatkhat thawn Bank ah an suah theu ding
a si.

Ziang bomnak khal thleng sehla, hi adhoc committee ih lungkim nak vek in
Lunkhua somdawltu committee hnenah theihter in a hun pe theu ding a si.

Zokhal in Lunkhua innkang bomnak pe theitu cun hi adhoc committee ah rak
kuat in Lunkhua somdawltu committee ah thleng dingin a hun pe ding.

Lainatnak thinlung thawn a bawm theitu cun a hnuailam ih adress ah contract
theih a si.

1. Pu Hlawn Hre Lian (Falam Store) 095-070-40158, 40232
2. Rev. Biak Cawm ( falam.nch@gmail.com)
3. Pu Khua Thio (Falam) 095-070-40157 (FLM, 051221)

S/d
Hlawn Hre Lian
Cangantu

Laitlang Ah Khawkhat A Kang Ral

Tui March 11, 2010 ah Lungkhin, Hakha khua pakhat cu hramlak meisa ruangah a kang siat ral theh ih mipi 1000 lenglo inn neilo in an um phah thu Sapte ih website “I Love Myanmar” ah a tarlang.

Chinmi cun kan pasiat le paam tawn phang ah kum khat hrang daih fang kan khawl theu, cuvekih an khawlmipawl khal cu a kangral theh. Lungkhin khua ih um kan pi le pu unau thenkhat pawl cu mithli thawn caan an hmang rero.

Kan Laitlang tluan hotu General Hung Ngai khal hivek thawm a theih tikah um men theiloin Lungkhin khua ah feh in vansiat a tuartupawl hnen ah fangfai bags 40 lenglo a pe. Culo thuamhnaw le neihsianlo thil dang khal pek rero lai an si.

” Ziang tin kan bawm ve thei ding…sumpai a silole thlacamnak thawn, thlacamnak thawn kan bawm theilo asile mipi hnen ah theihternak kan pe cio ding pakhat te tal kan tuah ve ding…A tuah theilo kan um pang a va si hman ah kan thinlungte tal ah Lungkhin khua a kangral ti taang hramseh! In Riantu CT Pawl

Laitlang remthat hna Dr Sapte in ttuan thok

I Love Myanmar, Chairman Dr. Levi Sap Nei Thang cun Prime Minister Thein Sein cu February 24 ni ah ton nak a nei ih Lailtang, lotuahnak lam, lampi le fimthiamnak hrang thansohnak ding thuhla an rel thu KNT thuthang latu pawl hnenah a sim thu KNT thuthang cun a tarlang.

Dr. Levi in Khonumthung thuthang latu pawl hnenah Chin ramkulh cu Kalay ram le Sagaing ram tthen pawl thawn tthen felfai aw dingin le “ Chin State in kan lo hmuak” timi catar fiang zet ih tar ding thu pawlle lamtluan ah Zaizawng kung phun ding thu khal a sim.

Famkim Siarbet

Laitlang Hotu le Sapte Tawng Aw Ding

Levi Sap Nei Thang tei’ sungkawza ram sung ih mipi hrang an hnatuannakpawl cu an hlawhtling vivo ti’n thu kan dawng. Yangoon childrent hospital hrang ih US$30,000 an hlu theh hnuah date 24 Febuary 2010 ahkhan Naypyidaw ah ‘Chin state development’ nak ding thuhla reltlang khawmnak bawi upapawl thawn nikhat sung an nei.

Tuini ih thu kan dawn daan vek asile, mipi hrang ih a hnatuanak cu zamrangten’ pitlin suah lohli ding duhnak thawn thaisun date 4 March 2010 ah Laitlang hotu Bochouk Hung Ngai thawn Kalay Myo ah thurel tlangnak an nei bet ding. Culawngsiloin, ramsung bawiupa dang pawl khal phone thawn kan Laitlang thansohnak ding hrang thu pawl relpinak a nei rero lai a si.

Kan CT palai cun, ram sung hmun dangdang ih a feh suksonak ah nuam le nuam tlang, har le har tlang ti’n a innsangpa Daniel le a fapa Samuel Sim Thli Hran Thang in an thlun vivo tiah a sim. Tluangte ih hnatuan an theh thei a si ahcun hmaizarh sung ah US lam pan in an sung zaten’ an zam kirsal ding.

Hla Thar Suak Ding

Kan Laitlang tluan ih mikual lo emem, Lairawn sehvel khalih rel celcel, zuri lung aapawl hman ih hngilhtheilo khawpih hlasakthiam hminthang ‘BJ BJ BJ’ tiih mipi pawlih auh reromi le Mai Ngun Hlei Tial @ ANgun cun Falam le Hakha in ‘Zun Hla’ mawi zetzet an sak ih cucu a rei hlanah himi thuthang duhnungte a siartupawl hnenah Tape, CD, VCD in a thleng ding tin CT tuanvoneitupawl hnen ah thu in sim a si.

Kan Chinmi in hla tampi kan neih sinsin theinak dingah hlasakthiam le hla phuahthiampawl in mawi sin le nasa sawn ih suah an tum vivo ti thu kan theih tikah CT pawl in lungawithu kan sim hai.

BJ le ANgun khal cun ‘kan aw a suah thei sung cu kan ram le kan mipipawl zaihla thawn kan awi ding’ an ti ve ding kan zum.

A tui BJ le A Ngun ih sakmi hlapawl hi a mawi ngaingai, ‘mi thinlung a neih nasa, a hla thu le a zaihla feh daanpawl a mawi tuk’ tiin BJ rualpipawl le ANgun ih rualpipawl cun CT palai hnen ah an sim.

Hi, hla phuahtupawl cu:

• BJ
• Zunphir
• Herh Lian
• Salai Lal Hu Lian

Studio: Por

Mixing: Kyaw Zay Yah

Falam Peng ah Inn An Cim

NiNU SENHRi | November 17, 2009

Falam Peng ah kan dung October kar khatnak sungah ruah a cen ciamco ruangah lei min, inn cim, inn siat le mithi an um hnuaihni ti thu kan thei.  Falam Khawpi sungih Mai Lal Rin Thang @ Nu Thang tei inn cu Oct. 05 zing, 04:30zg hrawngah cang cim in a nen ih, an inn cu zinpi parah a tlu, a sawprawp thluh.  An insang ah mi 6 an um ih, mi 3 cu damten an um ih, a dang 3; Pi ?ha Lian Kai, Nu Ro Thang Mawi le Cung Len Thang cu sizung an kai, nan tu ah cun sizung ihsin an suaksal zo.  Hiti ih inn a cim pekah an innhnenpawl cun an rak thei lohli lo, ruah a tah tuk ruangah ?ek tla ah an ruat men hai.  Sathatpawl vak in an hmu ih, an innhnenpawl cu an sim.  Chin Ram uktu General Hung Ngai le Bawi upapawl, le Falam Khawnu Khawpa pawl khalin an veh hai.  Cun Falam Khawsung, Pu A Ving tei inn thlang Hrang ?hio bualrawn zin tla lei min in a khuh thluh ih, Falam khawpawh in tlang hna an ?uan ciamco.

Famkim Siarbet

Next Page »