NLD Party In Siatserh Thukam Tuah Duhlo

YANGON (AFP) – Aung San Suu Kyi le a party pawl cun rampi danbu kengih siatserh ding an duh lo tiin thu don a si. Rorel innpi ih thurelnak an neih hlan ah Ralkap acozah ih an tuahmi daan bulhrampi pompi ih siatserhnak thawn thukam lak ding cu an duh lo.

An siatserh dingmi ih danbulhram cafang ‘himdamih kilhim’ timi ‘tihzahupat’ tiih thleng dingin dilnak an ngan nan thuneitu pawl in an pomsak lo.

President Thein Sein hnen ah dilnak tuah salih hi thu hi rak ruatsal dingih an duh thu khal kuat an tum tiin an party thuphuangtu Nyan Win cun thuthang latu pawl hnenah a sim.

NLD party pawl in lailak hrilawknak April 1, 2012 ih an neihmi ah tohkham 44 ah 43 rori ngahin nehnak an co.

Kawlram Ih $3.7 Billion Leiba Japan In Ngaidam Ding

AFP | April 20, 2012

President Thein Sein cu Japan Prime Minister Yoshihiko Noda thawn thurel tlang dingin Kawlram ihsin a zam suak zo.

An thurel dingmi ahcun Kawlram in Japan hnenih a leiba $ 3.7 billion a ngai dam ding thu leh sumpai ih a bawmnak pawl ruatsak sal ding thu pawl a si tiin thu dawn a si.

Tui tum ih Thein Sein a tlawnnakah ninga sung a cam dingih pursumnak lamih hruaitu pawl le meisatha tuahnak hmun pawl khalah a lengvak ding.

Japan leh Mekong Delta tiih kawhmi – Combodia, Loas, Myanmar, Thailand leh Vietnam pawl thurel khawmnak khalah a tel cih ding.

EU In Kawlram Tlunih Khamnak Hlit Ding

BBC | April 20, 2012

European Union pawl cun Kawlram tlun ih khamnak an tuahmi 27 pawl an lungkimtlangnak ih an tuah dingmi pawl an tuah tiih an hmuh ruangah hlit dingin EU ram palai cun a sim.

Hmin ngai nganlang duhlo rampi palai pakhat ih a simnakah cun hi an hlihsaknak cu kumkhat lawng a si dingih cutin an zoh bet vivo ding tiin a sim. An hlihsak dingmi ah hriamnak thawi bawmawknak lawngte a tel hrih lo ding.

US leh Australia khalin Kawlram tlun ih khamnak an tuahmi ziangmaw tizat an hlihsak ve zo. EU foreign minister cun lungkimnak hrang thureltlangnak tuah in rel a tul a si a ti.

Suu Kyi Norway le Ram Dang Tlawn A Tum Thlang

Suu Kyi cu kum 24 sung Kawlram suahsan lo ih a um hnu ah tuikum June thla sungah Norway lam a tlawn tum thu ramsung ih thuthanglatupawl hnenah a sim.

Suu Kyi hi 1988 ihsin Kawlram suahsan in khual a tlawng nawn lo. Norwegian foreign minister spoke cun, June thla sung ah Aung San Suu Kyi, Norway ah a ra tlawng ding ih lungawi soparten kan rak dawngsawng ding tiah a sim.

Kan dung baihte ih Prime Minister David Cameron ih sawmnak thawn Suu Kyi hin Norway lawng siloin England khal a tlawn cih ding an zum thu NLD rualpi pawl cun an sim. Asinan, ram dang pawl a tlawn hlanah Norway a tlawng hmaisabik ding tiah NLD thuhla simtu Ngo Myint cun a sim.

Suu Kyi cun Kawlram thatnak dingih thazang petu Norway ram cu a fakzet, lawng siloin Noble Peace Prize 1991 kum ih ngah ding tiang, thuhla in bawmtu an si ruangah tlawn ding ka hiarzet a si tiah a sim bet. June 25 hrawng ah Norway a feh ding zum a si.

Lailak hrilawknak ih an nehnak tokham sang cu April 23 ihsin an to thlang ding.

Australia In Kawlram Tlunih Khamnak Hlit Ding

Australia Foreign Minister Bob Carr cun tuini ah Kawlram hruaitu upa 392 pawl khualtlawn sianlonak le sumpai thu ih khamnak an pek mi pawl hlihsak an si ding thu a sim. Asinan mi 130 pawl – hruaitu hlun pawl cu hlihsak mi ah an tel hrihlo ding tiin Australian Broadcasting corporation thuthan tu pawl hnenah a phuang.

Hi khamnak hlilhsak ding hi Suu Kyi le kawlram hruaitu upa pawl thawi kan biak awknak ihsin kan tuah mi a si tiin Carr cun a sim. An hlihsak dingmi pawl lakah President  Thein Sein khal telin zung sang ih tuan nawnlo khal ziangmaw tizat an tel.

AFP –

British Prime Minister, David Cameron le Suu Kyi Biakawknak Nenawi

British Prime Minister, David Cameron cu Kawlram a suahsan hlan ah Aung San Suu Kyi thawn British ambassador Andy Heyn ah cabuai pakhat hil tlangin rawl ei tlangnak an nei. David Cameron, Kawlram ih a tlawn laican hi Kawlram ih tidaipuai hman laifang caan a rak si. David Cameron cun British in Kawlram a hremnak a hlih ding thu khal a sim ta.

David Cameron cun Asung San Suu Kyi thawn an tawnawk hlan ah Kawlram president Thein Sein thawn thurel tlangnak an nei hmaisa. Zunglam thuthawn pehpar lawngsiloin David Cameron cun Kawlram ih torist pawl mit la zettu Buddhist pagoda tualrawn ah a leng ve.

Kawlram hi a thuhla a tamzet. Mipi tamzet sekhaazet ih uknak hnuai ah an um ih miharsazet ah an cang theh, hivek ding a si lo tiah David Camdron cun Naypyidaw khawpi ah a sim. Tu acozah in thansonak karbak tuah vivo a tum cucu tha pektlak a si. A lungawiumzet. Cun, Suu Kyi hi kei cun zalennak duhtu pawl hrangah cun zamthimtlak tleu mawizet a si tiah David Cameron cun a sim bet.

“Zalennak ding hrangah peng le tlang tamzet kan feh a tul lai ruangah acozah hin diklozetin hivek lamzin hla pi kan neih lai ah a cangvai ding a si lo, culawngsiloin zalennak lamzin ah kan feh rero a si timi acozah khalin a langter ringring a tul” ti khal in David cun a sim bet thotho.

Sawmnak:

Mipi tamzet hmai ah David Cameron cun Aung San Suu Kyi cu London ah June thla ahkhin tlawng dingah a sawm ih cuican ah a duhzetmi Oxford pawl tla haal cih dingah a sawm. Aung San Suu Kyi cun “Kan dunglam kum hnih ahcun in sawmnak parah ka lungawi asinan ka feh theilo ding ka ti. Asinan tu ahcun ka tlawngvak men thei a si” tiah hnih phah in a sim.

Riahsitpinak:

Prime Minister David Cameron cun ralpi veihnihnak ih Kawlram ralkap nunnak rak liamtupawl le ramdang ralkap phumnak hmunpi Commonwealth Cemetery ah feh in riahsiatpinak a va nei. Ralpi veihnih buai ahkhan British ralkap le leitlun hmun dangdang ih ralkap 70,000 ih nunnak an rak cem. Kawlram cun 1948 ahkhan Britain uknak ihsin zalennak a rak hmu ih Myanmar tiah 1989 ah a hmin a rak thleng.

British PM Burma Ram A Tlawng Ding

British Prime Minister, David Cameron cu tuisun ah Burma ram a tlawng dingih President, Thein Sein thwnkawmawk nak an neiding ih Burma ram Cozah fehdan ding an reltlang dingah zum a siih. himi hnuah  Aung San Suu Kyi thawn kawmawk nak an neisal ding.

British Prime MInister David Cameron hin Burma ramih hleiah Japan,  Indinesia, Malaysia , leh Singapore pawl a tlawng ding, Indinesia thuthangca latu pawlthawi an kawmawk nakah British Prime Minister, David Cameron cun  British Cozah in Burma ram hremnak a pek micu hlih a tum thlangthu a simih, Burma ram Cozah in mipi duhdan ih feh a tum ruangah lungawi um a tithu khal a sim.

South Korea Ram Hril Awk Nak Ah NFP An Cak

South Korea ram Parliament hrilawk nak National Assembly seat 300 umnak ah Cozah nak kailaitu New Frontier Party cun  seat 152 la in Cozah nak an cosalih, Opposition Party tumbik Democratic United Party (DUP) in seat 127 an la.

Acozah nak kailaiti NFP pawlhin kandung hrilawk maisa ah khan seat 300 sungah seat 165 an rak la ih tuah an tla niam deuh nan Cozah nakcu an cosal thotho.

NFP hotu leh  tui President tuan laitu Lee Myung Bak cun  an ram mipi in an parih rinsan nak an nei ruangah lungawi thu  asim ih, Opposition Party  DUP hotu Park Sun -Sook cun hrilawk nakih an Party an cahlo ruangah a lamtang mipi pawl hnenah ngaidam a dil.

Kawlram Hmailam Thlirsung Nak (Pu Thein le Pi Suu)

By: Lung Bawk

Kawlram pi a thlengawknak Kum 2 a ti cuarco thlang. Lailak-hrilawknak khal felfaite’n an theh thei. International Observers pawl in a ‘fair’ pam tiin an pom. Than Shwe hmin khal a lang mal deuhdeuh ih Thein Sein ti lawnglawng a si thlang. Time mekazine ih leitlun mi langsarbik zakhat an hrilmi lakah Thein Sein khal a tel ban ve. Kawlram mi lawng si loin leitlun pi khalin kan Uktu thar hi an ngaihven a si ti a fiang. Curuangah, kan Kawlram ah khawvelpi theih banin Pi Suu le Pu Thein kan nei thlang tinak a si.

Kan president pa ih tuni tiang a hnatuan mi cu mipi lungawi tertu rel ding a nei tam zet. A hnatuan ah a hlawhtling kan ti pei. 2010 hrilawknak ih telduh lo NLD pawl le Aung San Suu Kyi hman hrilawknak ih tel ko a sawm thei mi cu, mi menmen a si lo ti a fiang.

Culawng si lo, ramuktu khalah a tling zetnak a um. Rampi a that ding cun politics ah zalennak a um vekin, economic khalah zalennak a um tul ih a thangso tul timi a theifiang tuk. Party politics siseh, Ethnic arm groups issues pawl a buaipi thluh vete’n economic buaibainak zamrang te’n a tuah tha tum. Labour law a tuah thasal ih ramleng ihsin sumtuahtu (investors) pawl khal a sawm rero. An sum dawndan khalah danglamnak a tuah. A hlanah kawlram mi pakhat khat thawn tuantlang lo ahcu kawlram sungah ramdang miin sum an dawng thei lo, timi daan tla a um nawn lo. A fehdan step hi a hman tuk.

Himi pawl ruangah a hmin a thangih Time megazine khalih a telban nak a si ding. ASEAN meeting Combodia ih an tuahnak khalah Kawlram palai an hmai a hngal vivo tiin Irrawady thuthangca in an sim. A hlanah cun kawlram palai cu, ramdang palai pawlin an tongsan theu, culole an dem theu nan, tuitum cu, cuvek a um nawn loih, kawlram palai khal hmaihngal zetin a to hmiarhmiar thei thlang, tiin an ngan.

Cumi cingin, mipi cun Ralkap hlun cozah tiin an zum taktak thei hrih lo. Pi Suu hi an zum sawn lai. Thungai ti ahcun Pi Suu hnakin Pu Thein ih hmuhtheih le thamtheih thil a tuahmi hi a tamsawn nan, mipi tamsawn cun Pi Suu ah ruahsannak tamsawn an nei a bang. Lailak hrilawknak hrangih an campaign lai zoh tikah mipi in an rinsan tuk. Mi thenkhat cun Suu Kyi parah ruahsannak an nei tam deuh a bang, Sialkaringcin neitu ah ruat tu tla an um hmang ding. Uktu a tuan vete’n kawlram pi zankhat ah thleng danglam thluh ding vekin ruat tu tla an um.

Cupawl hrangah cun beidong thlak zet ding. Pi Suu hi thil tampi tuah thei dinhmun ah a ding hrih lo timi an theihsak lo. An rinsan vekin thil a tuah thei taktak pei maw, timi an ruat tel a tul. A rangbik ah 2019 lawngah Pi Suu in rampi a uk thei lai ding. Tuih kan neih mi 2008 ih nganmi Daanhrampi vek a si le President tuan dingah ralkap lamih hnatuan nei dah tu asi atul. Curuangah, ralkap tuan dah lo Pi Suu Kyi President tuan ter ding cun himi Daanhrampi thleng hmaisat a tul. President a si lo cun a tuah theimi khal a mal deuh ding tinak a si ko.

President a si theinak ding cun tuhnu hrilawk (2015) ah a um sal dingih, cumi ah MP tampi thawn tangtlang in Daanhrampi an thleng hmaisa a tul ding. Asinan, daanhrampi rem, hlon, le bet thei ding cun Hlutdaw ih zatek 75% ih an lungkim lawng si loin, mipi duhnak tla lak ta a tul, cu hnu lawngah thleng theih a si tiin U Aye Tar Aung in  Irrawady news pawl hnenah a sim. 

Pi Suu hi tu ah kum 66 a kimih, 2015 ah Daanhrampi an thleng thei hmanah, cuhnu hrilawksal 2019, kum 73 a kim lawngah President a tuan thei ding tinak a si. Cuhmanah, hrilawknak a tikcu hman te’n an hmang thei lawngah a si lai ding. Cutik ahcun, president a tling pei maw? Timi thusutnak tla a ra lai ding. Curuangah, Pi Suu par lawngih ruahsannak tumpi nei pawl cu thinsau te’n an hngak a tul ding.

Cuhleiah, Suu Kyi hi hlanlai Suu Kyi a si nawn lo. 1988 laiah cun ram le miphun a duhdawt ruangah le ram mipi zawn a ruat ruangah NLD ah telin ramkhelnak lamah a cangvai ciamco. Asinan, kum 22 a rei hnu ahcun a nih khal politician a si ve thlang.

Tuitum hrilawk an neh vete’n Suu Kyi cun mipi hmaiah thu a sim mi cu: daanih uknak, ramsung daihnak le daanhrampi tuahsal ding thu pawl an si. Hlanih a rak sim mi Second Panglong Agreement tuah ding cu a sim tel nawn lo.

Cutin, Pi Suu le Pu Thein cu politicians veve an si thlangih, tuhnu kum reiloteah tufang ih mipi ruahnak pawl cu an danglam thluh lai ding, ruahnak thar, hmuhdan thar pawl an nei vivo ding. Cutikah Pu Thein maw Pi Suu, Pi Suu maw Pu Thein, an ti rero lai ding.

Suh Kyi Ih Nunnak Ka Rak Runsuak Dah Tiah Khin Nyunt In Sim

May 30, 2003 ih Dipeyin buainak ah Daw Aung San Suu Kyi cu thihtheinak lak ihsin a nunnak ka rak humhim dah a si tiah U Khin Nyunt in Bangkok Post thuthangca thawn thusuhnak ah a sim.

Acozah ralkap ih thapek mi mibur hmangin Daw Suh le NLD hotupawl khual an tlawng lai that ding an rak bawh ih mi tampi in an nunnak a can phah. Cumi lak ah Suh Kyi ih nunnak humhim dingah a naihnak ralkap sakhan ah hruaisuak dingah a kuthnuaipawl a fial thu Sungtthauh hotu U Khin Nyunt in a sim. Kum tluan in ral a tho mi tlangpar mi pawl thawn remdaihnak a tuah ruangah le Aung San Suu Kyi parah ka farnu vekin thinlung ka nei ka ti ruangah thlawng in thlaknak khal a si tiah Bang Kok Post thuthangca hnenah a sim bet.

Himi thuhla thawn pehpar aw in thudik zingzawi le theihgfiang a tul hrimhrim ih nunnak a rak liamtupawl hrangah sumpai pek an tul tiah NLD lukai U Tin Oo in a sim ve. Hmasehla thudik theinak hrangah a thupi nan, a tuahtupawl hremnak pek ding tinak cu a si cuang lo tiah a sim.

BBC

Lailak Hrilawknak Ah Suu Kyi Hlawhtling

April 1, 2012 ih Kawlram lailak hrilawknak ah Aung San Suu Kyi party cun nehnak an hmuh thu an phuang.

Seat 45 ah NLD cun seat 40 lenglo a ngah ruangah tuitum lailak hrilawknak ah Suu Kyi le a party cun ruahsannak tamzet an nei a si.

Suu Kyi cun mipi pawl hnen ah “Hivek ih kan nehnak hi kan zate tanrual ruangah a si” tiah a sim ih hleiah “Tuhi kan thoknak lawng asi lai” tiah a sim bet.

Suu Kyi le a party pawl cun parliament ih thurelnak ah thil tamzet thlengdanglamnak an neih thei ding an zum thu khal an sim.

YouTube Ah Kan Ram Lailak Hrilawknak Lang Ding

Tuitum hrilawknak cu Google Ideas pawl ih bawmnak thawn vote ngahzat le vote siar daan pawl Burma Election news Chanel (You Tube) ah langter a si ding.

Kawlram thuthanglatu le theihternak petu pawl cun hrilawknak thuhla pawl nitin kimcangzetin You Tube hmang in langternak an nei ringring ding.

Kan dung kum tiang cu Kawlram ah website tamzet on theihlo in a um ih thuthang pawl siar theih lo in a um asinan tuikum cu website dangdang ih thuthang pawl zalenzetin siar a theih a si.

Kawlram Hrilawk Zoh Bawmtu 159 Nei Ding

By Alex Johnston

April 1, 2012 ih hrilawknak ding hrangah leitlun ram dangdang ihsin hrilawknak zoh bawm dingah palai 159 lenglo an thleng ding.

Hrilawknak hotu pakhat Tin Aye cun palai hi Yangon embassy, US, European Union le hmun dangdang ihsin an si dingih tui tlawngkai ni thum ihsin a then cu an thleng thok rero tiah a sim.

Tuitum hrilawknak dingah Kachin state pawl ahcun vote thlak a thei lo ding tiah hotupawl cun an sim.

Kachin le Kawlram ralkap kahawk rero lai a si ruangah kilhimawknak lam tlaksamnak a um ding an zum ruangah Kachin state ahcun hrilawknak thu a dai ding.

Apirl 1 hrilawknak ding ahhin seat 45 luah ding a si. Cumi hrangah Suu Kyi khal nasazetin a zuam, asinan kan dung baihte ahkhan damlonak ruangah pawl sawm ih a vah suksohnak pawl a langten a cawl lawk.

« Previous Page — Next Page »