Aw! Rih Ka Ngai

Aw! Rih Ka Ngai

(Jesuh hmel a lang)

-Pa Bawi Lio

Tiau ih um hmuahhmuah le a thlengmi zumtu, zum lotu zapi ruah dan ah Tiau cu honeymoon fehnak hmun ah an ruat theh, nuam an ti. Zumnak lam ih hruaitu khal hi cuih san lai ah ‘a luar tuk le luar tuk lem lo’ lawng an si. An in, an lam cio ko.

2002 kum thok hrawngah nu pakhat (tar nawn) cu Pathian thuthangtha sim dingin an innsang ihsin a pok ih, thlacamnak in hna a tuan rero a si. Tiau cu nuam cennak cu a rak si nasa na’n kawhhran lam cu a thang lian nasa thlang. Kawhhran hmin nei hi (13) tiang a rak um. Ticun, rawl ul thlacamnak cu an nei rero thlang ih, cuih nu tar nu ih hohanak in Fellowship rawl ul thlacam hi kawhhran pakhat hnu pakhat ah thawn vivo in neih a si ih, kum (1) a kim ahcun Pathain hnatuan a rung lang nasa.

Cu pawlih rawl ulh thlacam dan cu hitin a si: Zinglam nazi 7:30 in biakinn ah an thleng theu ih, tiso (ti sa) lawng in in, zanlam nazi 4:30 tiang thlacamnak le thazang pek awknak thawn, mi hmuahhmuah le Pathian ram hrangah can an hmang theu. Vei hnih khat Birthday tuahtu pawlin rawl ulh thlacam theh hnu ah ‘laphak le sang’ tivek cu anmai’ innsang hmin in an ra do theu. Culai ih hruaitu pakhat cun Crusade tuah a tum ih, “Ka rual, tuah tum rero duh hlah, na thin a heng lak men dingih, na bei a dong sal ding, Tiau na um dah loih, na thei hrih lo” tiah kawhhran hruaitu pakhat cun a rak sim dah.

A si, hitawk ahhin ruah ding tampi a um. Tiau le Laimi ihsin thokin Malaysia ih thleng Laimi tampi in thu ruah khawm ding kan nei. Rawl ul thlacamnak khalah ruah ding tampi kan nei. Kan rawl ei can ‘thawn men’ tla kan si pang ding. Cun, dan le can a rung thlen men ruangih, ‘thlacamnak ih feh men’ kan si pang ding. Kan dilmi hi ‘pek tlak a si maw’ ti hi kan ruah sal a cu zet. Malaysia khal paisa a tamzet kan ti. A kuat/tuan theitu cun thla khat ah Ks 250,000 hrawng a tambik a si ih, kan Laimi pawl hrang ahcun a tam nasa.

Tiau ih, nu tar nu ih thlacamnak neih rero mi cu kum khat hnu kum khat a rei ih, a rah suak thei thlang. A rah suak dan cu, hruaitu tha an ra thleng vivo. Cun, 2003 kum cem lam November thla ihsin 2004 kum sung hmuahhmuah ah Pathian thuthangtha phuannak Crusade hi vei (7) lai a um thei ih, Evangelist tampi cu Pathian in a run thlah thei. Cucu zumtu hrekkhat pawlih thlacamnak ruangah a si.

Cu tivun, zumtu mipi, piangthar khal an ra thleng thar vivo ih, Jesuh hmel cu thuthangtha le zumtu pawl ruangah Tiau khua ih um pawl lakah a runglang vivo. Zu in le sualnak lam ih a fehtu an mal vivo ih, Tiau ih um mipi in ‘Zu thawi’ nuam cennak an neih theu mi khal’ a reh vivo. Thlarau lam thu le biakinn ih khawmnak lam ah taimak an suah vivo. 2005 hrawng ihsin ‘zu ngawl vei’ pawl tla ‘zu an in nan, dawr ah to nawn loin,.. “mi dangin in hmu pang ding!” an run ti ve thlang. Minung puaisa khal an mal vivo. An cem theh tinak cu a si lo nan,.. ahlan dinhmun thawn tahthim cun, mangbangza ngaingai in an mal a si.

Cun, Tiau mipi cu cubangtuk ih an that soh vivo lai ah, sumdawng vak sukso pawl cun zu cu an run cen. Ahlan ahcun Tiau ih um pawl cun ‘nuamnak ah’ an hmang na’n tu ahcun ‘sumdawng pawl’ lawng in zu innak le nuamnak hmun ah an run hmang. Jesuh lawng a um lonak (thil dang hmuahhmuah umnak) hmun ah 2003 ihsin Jesuh hmel a rung lang ih, khualtlawng le sumdawng pawl dinhmun zoh in, Jesuh hmel keng lotu an tam lai nasa ti thei a si.

Laimi kan dinhmun hi khaisang uh si. Malaysia kan khualtlawnnak ah teh ziang kan bang pei? Nitin kan um dan hi zohman in kan hmuh sak aw thiam lo na’n Jesuh hmel keng lotu pawl vekin kan nung pang maw? (Hmai zarh ah ‘San ti luan le Laimi’ ngan a si ding)

LCF Thuthang

# May 30, 2010 (Nipi ni) khawm theh nazi 2:30 pm ah LCF member Salai Tha Thawm Luai le Mai Van Iang Mawi cu LCF biakinn ah a thianghlimmi thit umnak nei ding an si. LCF member zapi’n in sawm ih, Hruaitu thuthang cun ‘kan lungawipi zet a si.

# LCYF hohanak in tuni May 30, 2010 (Nipi ni) khawm theh ah ‘Tea Party” tuah a si ding ih, ticket leitu hmuahhmuah cu ‘Tea Party’ hmang cio dingin sawm an si. Ticket pakhat ah RM 5.00 ih zuar a si ih, a lei hrih lotu khalin tuni ah lei thei a si ding.

# LCWF cun bungbel san ding an neihmi cu mi hmuahhmuah hrangih san thei dingin LCF Quarters ah an ret. Thilri pakhat asilole pakhat hnakih tam sannak dingah RM 50 lawng an dil. Thilri sangtu cun ‘faizet ih kholh hnu ah ap sal ding’ a si.

#May 27, 2010 ah Rev. Run Cung Mang le Pastor Sui San Lal cun Genting Klang ih kan unau LCF innsang pawl vehvaihnak an nei ih, himi ni ahcun innsang (14) hnenah thlacamnak can an hmang thei.

Nitin Thufim

+Mi hrekkhat cu hamtamzet, puarzet le huatsuak le hngalzet in an um ding na’n, ngaidam theitu si tum hram aw.

+Midang zawn ruahpinak na nei a si ahcun midang in ‘hamtam, thu duhzet’ ti’n an lo sawisel ko ding na’n, midang zawn va ruahpi ringring ko aw.

+Na hlawhtlin tikah, rualpi tha lo le dodaltu mithiam khal na tong tengteng ding, asinan ‘hlawhtling lan ta’ ko aw.

+Zuam tunto le dingfelzet ih na um khalah midang cun bumnak in an lo hnaihnok thei, asinan dingfelzet in zuam tunto ko aw.

+Kum tampi sung thil tha na tuahmi le na hlawhtlin zo mi pawl cu hrekkhat cun zan khat sungah an siatsuah men can khalah ‘tuah’ vivo hram ko aw.

+Hnathiangzet le lungawizet ih na um lai ah hrekkhat cun an lo hnasikzet ding na’n ‘lungawizet in’ um men ko aw.

+Tuni ih thil tha na tuahmi cu zohman in an lo theihpi lo khalah, thil tha cu tuah vivo hram ko aw.

+Na tuah thei tawkin thil tha na tuah khalah, ziangtik lai hmanah ‘a tha tawk lo men thei, asinan thil tha cu tuah tunto hram aw.

Neta ahcun Nangmah le Pathian kar ih thu a si lai ding….

Ticun, thil tha na tuahmi, na lungput, na zuamnak le na zawnzaihnak hmuahhmuah cu Amah Pathian hrang lawng a si ti na thei lai ding. Nangmah a lo sawiseltu hrangah ‘Na tuar tunto’ tinak a si lo sokhaw.

Theihternak le Sawmnak

Pathian umpi lamhruaitnak zarah Lai Christian Fellowship cun thlarau le taksa lam ah thluasuah kan co vivo ih, thu le hla ih kan pawlkom awknak ah siseh, zarhkhat vei khat thuthangca ih kan pehtlaih awknak khalah ‘Fellowship’ kan sinak hi hngilh loin, zumtu pakhat le pakhat thazang pek awknak ding lamzin ruat sawn dingin kan lo sawm a si.

Hruaitu thuthangca hrangah cahram le sermon siseh, biazai le thufim a phunphun cu tuanvo neitu pawl hnenah kuat thei ringring a si. Asinan, LCF hi ‘Fellowship’ kan sivek in bulpak thu siseh, kawhhran ‘thurin’ thawn pehparmi siseh, pawlkom pakhatkhat thuhla siseh, sawiselnak thu cu ngan sian a si lo dingih, cangantu le calai duhdawttu zapi hnenah theihternak le sawmnak kan tarlang a si. Hruaitu thuthangca ih cahram, biazai le sermon kuat a duhtu cun hruaitulcf@gmail.com ah kuat thei ringring a si.

Laiphun Suahni

Laiphun Suahni (February 20^th)

February 20 ni kan ti cu Laiphun suah ni a si. Hi mi Laiphun suahni kan neih ruangah Laimi pawl pumkhat si nak a lang terih, Unau sungkhat kan tlang leng khawn thei nak a si. Curuangah kan Laiphun suah ni cu Laimi na si ah cun na theih ve a ?ul si tin ka lo sawm duh.

Famkim Siarbet

Mawtaw mawngtu hrang cawhkuannak tam ding: Malaysia

Transport  minister Datuk Seri Ong Tee Keat cun tui’ kum Chinese New Year sungah mawtaw mawngtu le totu pohpoh hrangah daan fekkhauhzet (10) tuah a si ih, cumi lakih pakhat khal a thlun lotu cu RM 300 kuanter a si ding tiah a ti. Mawtaw (bike khal telin) mawng cak tuk, hmailam mawtaw lan duh ruangih zin pialih mawng, mawtaw pakhat le pakhat karah rem lozet ih lut, traffic light upat lotu, emergency fehnak lamzin hmangtu, tihnungzet ih mawngtu, thilri bawr tukih phurtu, lukhum le taikhap hmang lotu pawl cu kuanter an si ding.  Famkim Siarbet

Thla khat sungah Iran mi 34 kai:

Kan dung tlawngkai nikhat ni ah Malaysia Federal Narcotic director Datuk Zulhasanan Nakib Baharudin cun Iran mi 34 cu KL International Airport ah kaih an si. Minung an kaih zat cu mi 39 lai an si na’n (5) cu nauhak (an nu le pa kaih ruangih tel ve) an si. Famkim Siarbet

Malaysia acozah in ramdangmi hnatuantu a ko saal:

2008 ih leitlun pursumleilawnnak a tlaksiat ruangah Malaysia acozah cun ramsung ih ramdangmi hnatuantu (foreign worker) 500,000 hrawng a kuat kir saal na’n cuih hnatuantu pawl aiawh ih tuan dingin ramsungmi tam sawn cun acozah in hnatuan ding a khihhmuh pawl cu an tuan duh lo tiah Human Resource minister Datuk Dr. S.Subramaniam cun a sim.

Famkim Siarbet

Cabu nei lo hnatuantu kaih vivo tum: Malaysia

Malaysia Home minister Datuk Seri Hishammuddin Tun Hussein cun 2009 sungah ramdangmi hnatuantu 1,590,000 hnenah work permit peksuah a si ih, 2008 hnakin 500,000 in a mal tiah a ti. Kan dung 2009 September thla ah 2010 hrang ramdangmi hnatuantu lakbet ding thuhla cu relkhawm a si ih, company hrekkhat pawlih dilnak vekin mi 100,000 hnenah work permit pek saal a si dingih, hmun dangdang ih hnatuantu daih awk lonak cu zoh sak an si ding. Famkim Siarbet

Malaysia hrang Australia ih hnatuan a harsa sinsin:

Kan dung tlawngkai nikhat ni ah Australia Immigration minister Senator Chris Evans cun Canberra (Australia khawpi) in hmailam can hrangah hnatuantu mipum zat bikhiahnak felfaizet tuah a tum ruangah ‘hna thiam ngaingai’ hnen lawngah visa pek a si ding tiah a phuang.

Famkim Siarbet

Malaysia in kum 10,000 ih upa milai ruh hmusuak:

Kan dung February 06, 2010 ah Kuala Berang khua ih Kenyir Lake area sung Gua Bewah Cave ah milai ruh ro tampi le bungbel hlunzet pawl hmuhsuah a si. University Kebangsaan Malaysia (UKM) cun leihnuai 70 cm hrawngah hih ruhro pawl hi an la suak ih kum 8000 ihsin 11,000 tiang ih upa zo a si ding tiah professor Datuk Dr.Nik Hasan Shuhaimi Nik Abdul Rahman cun a sim. 

Famkim Siarbet

Next Page »