Malaysia ih Refugee zaten kutzung nam sal ding

Kuala Lumpur, November 12 2011

Malaysia ram sungih ummi refugee le beunak hawltu pawl (asylum seeker) hi tu hnak ih tha deuh in humhim an si theinak ding tumtahnak thawn Malaysia acozah le UNHCR cun hi pawl hi a thar in hmin cazin laknak le kutzung namternak an nei sal ding. A thar ih tuah ding mi hi hmin cazin ngankhumnak hi 2012 kum, January ihsin thok asi ding ti zumnak a um. Hi hmin cazin ngankhumnak hi UNHCR card a nei cia zo tu pawl hrang lawngah a si dingih mipum 94,800 lai cu kutzung nam ter an si ding. Hi kutzung nam ding hi August thla ah Malaysia acozah ih a rak tuahmi 6P Program thawn zianghman pehtlaihnak a nei lo.

Refugee pawl ih hmin le an thuhla (bio data) dangdang pawl hi acozah ih thuhla ngan khumnak bu (data base) sungah ret a si ah cun tu hnak in himnak tha deuh an ngah thei ding a si tin UNHCR ih country representative Mr. Alan Vernon cun a phuang. Acozah hin refugee pawl ih hmin cu olsam zet in a cek thei thlang ding ruangah kaih le khihnak ihsin himnak tha deuh a pek thei ding ti zumnak a um. Cun tuvek ih thil tuahnak hin refugee pawl ih UNHCR card an hmanmi hi a lem maw a ngaingai a si tikhal ol zet in theihthei a si thlang ding tin Vernon cun a sim bet.

Refugee pawl hin daan ih a onmi hnatuan (legal work) an hmuh theinak dingah siseh, fimzirnak (education) le harhdamnak (health) lam khal ah tu hnak ih tha deuh in covo an ngah theinak dingah siseh pehzom in acozah thawn thu le hla relkhawmnak neih thei ding a ruahsan thu khal Vernon cun a phuang.

Hi January ih thok dingmi kutzung namnak cu refugee pawl umnak khuapi tum deuhdeuh ihsin nuam teten thok hmaisa a si ding ih Home Ministry, Foreign Ministry, Immigration Department, National Security Council le UNHCR ih tuanvo neitu pawl an tel ding.

Kutzung Nam Ding Thu NGO Pawl Lungawi Pi

Kuala Lumpur, November 12 2011

2012 kum, January ihsin tuah thok a si ding mi hmin cazin ngankhumnak le kutzung namnak hi UNHCR card a nei cia zo tu pawl hrang lawng ih tuahmi a si ih acozah ih a rak tuahmi 6P Program thawn pehzom awknak an nei lo tin UNHCR palai Mr. Alan Vernon cun a sim. Tui tum thil hi acozah le UNHCR karlak ah voi tawkfang lai relkhawmnak neih hnu ih a hung cangsuakmi a si.

Malaysia acozah ih a tuahmi 6P Program cu daan lo ih umtu ramdangmi (illegal immigrant) pawl hrang lawngah a si ih refugee le beunak hawltu (asylum seeker) pawl hrang ah tumtah a rak si lo.

“(Kan ram ah) refugee mipum ziangzat an um ih khui ram pawl in an ra ti kan thei duh,” tin Malaysia Deputy Foreign Minister a simi A. Kohilan Pillay cun a phuang. Hi thil thar tuah tummi hi tikcu caan thawn mil aw ih tuahmi thil tha a si tin Kohilan cun a sim bet. Ram sungih milai pianvo hnatuantu NGO pawl le Bar Council khal in refugee pawl kutzung nam ding hi thil tha a si thu an lungkimnak an lang ter ve.

UNHCR card a nei cia zotu mipum 94,800 sungah Kawlram mi hi an tambik ih mipum cun 87,000 an si ruangah Malaysia ram sung um refugee mipum zate ih zatek sawmkua (90%) lai an kim ti a si. Refugee dang pawl cu Sri Lanka mi (4,200), Somalia mi (1,000), Iraq mi (720) le Afghanistan mi (440) pawl an si.

Ram sung refugee mipum zate kom ih zatek sawmsarih le pakhat (71%) hi mipa an si ruangah nunau cu mi mal sawn an si. Refugee mipum sungah 19,200 cu nauhak an si tin thu don a si.

Mipi Theihtulmi Thil Thupi

UNHCR Card Nei Zo Pawl Hrang Kutzung Namnak Tuah Sal Ding

1. UNHCR card a ngah zotu hmuahhmuah kutzung nam sal an si ding tin Malaysia acozah le UNHCR in November zarhkhatnak (2011) ah thusuahnak an nei.

2. Hih kutzung nam sal ding hi UNHCR card neicia zotu pawl hranglawng ah a siih 2012 kum, January thla ah thawh a si ding ti zumnak a um.

3. UNHCR ih theihpitmi refugee pawl kaihkhihnak sungih sin tu hnakih him deuh ih an um theinak ding tumtahnak thawn tuahmi a si ruangah thilthazet a si tin zum a um ih UNHCR card nei ciatu hmuahhmuah cun kutzung nam theh ding.

4. Kutzung nam ding ni le caan cu UNHCR le FRO in felfai ten thuthannak an nei leh ding.

5. Refugee le UNHCR thawn a pehpar aw mi thil thupi pawl cu FRO hin Falam Times journal ah thuthannak a neih ringring ruangah ah hih journal hi siar ringring ding.

Community Card Lawng A Neitu Pawl Hrang Thuthan

1. Community card lawng nei ih 2011, August thla sungih 6P Program ah kutzung a nam zotu pawl khal UNHCR ih refugee shioh dingah kutzung namnak hin ziang hman a dawn kham lo.

2. Community card lawng a neitu pawl cun hman a theih lai mi (valid) FRO card felfai ten neih tengteng ding.

3. UNHCR ih refugee shioh a tumtu cun mai thuhla (case) kha a hlankhan in felfai ten timtuahnak neih cia ding.

4. Palik le immigration pawl ih kaih a tongtu cun a rangtheibik in community ih tuanvo neitu pawl hnen ah sim than ding.

5. Kaih a tuartu cun community tuanvo neitu pawl hnen ah kaihtuar caan, kaihtuarnak hmun le palik zung hmin pawl felfai ten simthan ding.

6. Community card lawng neiih kaih a tuartu cu UNHCR in thawng a tlaknak hmun ah feh in interview a nei ding. Refugee a shioh tumnak thuhla (case) hi zumtlak a si ah cun thawng inn ihsin a suah theinak dingah UNHCR in a tawl relsak ding.

Falam Refugee Organization,­
Kuala Lumpur, Malaysia
November 2011…..

Falam Mi 30 In Thlakhat Hlawhman Ngah Thei Sal

Kuala Lumpur, November 12 2011

Chera Batu -3, Kuala Lumpur ih ummi company pakhat ih hnatuantu Falam mi minung 32 pawl cu hnatuan neitu an boss (Malay-Indian) in hnatuan a colh ter nan October thla hrangih an thlakhat lakkha cu pek dingih a tinni October 31 ni ah pe lo in a um ih November 5 ni ah ra hlam sal uh tin a ti san. Hi Laimi minung 30 lenglo pawl cu tinni November 5 ni ah cuih an hnatuannak hlun ahcun hlawhman hlam dingin an va feh nan kut lawng in kir ter an si  lala. An boss pa cun November 10 ni ah ra sal uh tin a ti san lala.

Curuangah hi hnatuantu pawl cun an thuhla cu FRO zungah November 5 ni thotho ah thlenpi in bomnak an dil. FRO tuanvo neitu pawl cun hi hnatuantu pawl ai-awh in company boss cu thuhla simfengnak le hlawhman dilsaknak a nei. Caan tawkfang biak awk a si hnu ah cui boss cun ka tinni ah ka pe tengteng ko ding tin voithum rori a ti.

Tiamkam ni November 10 ni ah hi hnatuantu pawl cu sumpai hlam dingin an va pok lala nan an boss pa cun a rak pe cuang lo. November 11 ni ih ra hlam sal dingin a cah sal lala. Hi thu cu FRO zung ih tuanvo neitu pawl in an theih tikah company boss cu phone thawn ko in ngennak le ralrin peknak kop aw in thil umdaan simfengnak an nei. Cucing cun boss pa cun hlawhman ka pe tenteng ding tin zianghman a ti cuang lo.

Asinan November 11 sun ah hi hnatuantu zate sungin minung 30 cu thlahlawh lak dingih an va feh tikah an boss pa cun an hlawhman cu felfai ten a rak pe theh. A hlam thei hrih lotu mi 2 khal anmah rori an va hlam thei tikah pek an si ding tin hlawhman a ngah zo tu sungin mi hrekkhat in FRO tuanvo neitu pawl cu an sim.

Falam Times
Falam Refugee Organization (FRO)
KL, Malaysia

6P Program pehzawm in tuah vivo ding

Hishammuddin

Kuala Lumpur: Malaysia acozah in July 11 ni ihsin a tuah thawkmi 6P program hi tthen ruk in tthen a si ih cu pawl cu; 1). hmin cazin peknak (registration). 2). daan vekih canter salnak (legalization). 3). pumhuap sual thlahnak (amnesty). 4). thlingthla zohkhennak (supervision). 5). daan vekih tuahsuaknak (enforcement) le 6). ratnak ram ih kuatkir salnak (deportation) pawl an si.

A tthenkhatnak a simi kutzungnam (biometric finger printing) ih hmin cazin peknak cu August 31 ni ah khan tuah thluh a si zo ruangah a tthenhnihnak le a tthenthumnak asi mi legalization le amnesty hi vawikhat tuah ah tuah tlang a si ding tin thu dawn a si.

Cun amnesty hi tthenhnih ih tthen bet a si: registration tuah lai ah kutzung nam tahratin mai ram ih tlun a tum tu le kutzung nam lo nan acozah hnen ah mah le mah ap aw in mai ram ah tlun a tum tu tin phunhnih in tthen a si.

Amnesty program sungih a um vekin daan lo ih umtu ramdang mi pawl cun anmah te Immigration Department ah feh in tlun siannak ca (Exit Inspection Memo) an lak hmaisa a si ahcun zianghman cawh kuan pek an si lo ding tin Home Minister Datuk Seri Hishammudin cun  a sim.

October 31 ni tiangah amnesty ngah in mai ram ih a tlungzo tu ramdang minung hi 25,561 an si zo ih himi sungah mipum a tambik mi ram nga pawl cu Indonesia (15,901), India (2,501), Nepal (1,048), Kawlram (1,040) le Vietnam (930) pawl an si. Hi pawl hi acozah in tlunnak ding thu ah sumpai lam  in zianghman a bawm lo ruangah mai tangka liam in a tlungtu pawl an si.

October 30 tiangah hin daan vek ih canter sal (legalization) a simi mipum hi 27,514 an si ih hi pawl hi dawr neitu (boss) 2,208 pawl hnen ih hna ttuantu ding pawl an si tin Home Minister cun a sim bet. Biometric system hmangin kutzung a nam tu minung zate kom hi 2,320,034 an si ih himi sungah daan vek ih a umtu mipum 1,016,908 le daan lo ih a umtu mipum 1,303,126 an tel tin thu don a si. ((Falam Times, November 6)

UNHCR Employment Team le community hotu pawl tongkhawm

UNHCR ih Employment Services Team (EST) (hnattuan hawlsak tu) le refugee community tinkim ih hotu pawl tonkhawmnak cu November 3 ni ah UNHCR zung umnak hmun ah zaan lam 2:40pm ihsin 4pm zik tiang tuah a si ih community hruaitu mipum 30 kiangkap in meeting an kai.

Hih meeting ah EST lam ih ttuanvo neitu pawl cun EST hin refugee pawl hrangah a cang thei tawk in a himmi, rei a daihmi le hmunnuam mi hnattuan pawl hawl a bom rero thu, community cio hin hnattuan a duhtu mai member pawl felfaiten cazin la in hnattuan hawlsak tu EST pawl hnen ah punghman in ap a ttul thu, company neitu (boss) hrek khat in community card kaitu pawl hnattuan an pek duhlo hman ah EST cun community card cohlang in hnattuan a pe duhtu boss dangdang hnen ah hnattuan a hawlsak ding thu pawl simnak an nei.

Malaysia um refugee pawl ih nihlawh hi thlakhat ah a malbik RM900 si ding in UNHCR hin Malaysia acozah thawn relkhawm a si zo ruangah EST ih hnattuan a hawlsakmi pawl cun thlakhat ah a malbik RM9,00 ngah ding an si thu le hnattuannak thu thawn pehparawin a ra cangmi thubuai pawl khal EST cun a cang thei tawkin rem a tumsak thu pawl khal EST ih ttuanvo neitu pawl cun an sim bet.

A ra suaktu community hotu pawl khal in hnattuannak thuthawn pehpar aw ah vawi tampi cu hmun, caan le hlawhman hi hnattuan hawl tu member pawl ih duhdaan thawn a mil awk lo ruangah EST ih hawlsakmi hnattuan hi la lo in mahte hnattuan a hawl tu member tampi an um thu le community sungih an tonmi hnattuannak lam ih harsatnak thu pawl sim fiangnak an nei ve. ((Falam Times, November 6).

Falam Times

6P Program le UNHCR

Malaysia: UNHCR Malaysia ih Country Representative (hotu bik) Mr. Paul Alan Vernon le Malaysia ram sungih ummi refugee community tinkim ih hotu pawl tawnkhawmnak cu November 4 ni, zanlam nazi 2pm ihsin 4pm tiang Jalan Kuching ih ummi Chinese Assembly Hall ah tuah a si ih mipum 160 kiangkap hrawngin meeting an kai thei.

 

“Australia-Malaysia Arrangement and 6P” ti in thulu bun ih tuahmi hi meeting ah Mr. Vernon cun Australia le Malaysia karlak ih tuah tummi refugee pawl thlengawk ding thuhla le Malaysia acozah ih tuahmi 6P program thu pawl simfiangnak a nei ih a ra suaktu pawlin an theihlo mi le an theihduhmi pawl thusuhnak an nei ve.

 

Mr. Vernon ih simnak ah, Australia-Malaysia refugee thlengawknak program hi Australia ram ih High Court pi hin a nam thlaksak ruangah tu ah cun pehzawm in tuah a si lo ding nan lehhnu ah tuah lehsal a si ding maw, cuti a silole colh lan ta a si ding maw ti zohman ih sim theih a silo thu a sim.

 

6P pgrogram thawn pehpar aw ih a simnak ah Mr. Vernon cun 6P program hi refugee le beunak hawltu (asylum seeker) pawl hrangih tuahmi si loin daan lo ih umtu ramdangmi (illegal or undocumented migrants) pawl hrang lawng ih tuahmi a si thu, 6P program ruangah a hleice in UNHCR card nei zo tu pawl cun zianghman thinphan ding a um lo thu, cahnah (form) an nganmi par ih “Mai ratnak ram ah kuat kir sal ding” ti ngan mi cu refugee pawl hrangah a hran te ih tuahmi form a um lo ruangah daan lo ih umtu pawl hrangih tuahmi form kha hman cih a si ih himi ruangah refugee le beunak hawltu pawl mai ram ah kuat kir an si lo ding thu, refugee pawl cun 6P program ah kutzung nam lo khal le a pawinak a um lo nan kutzung namnak hin kaih le khihnak ihsin himnak (safety) ttha deuh a pek thei ding thu, kutzung namnak hin UNHCR ih refugee sinak tuah ding thu ah zianghman a dawnkham lo thu, cahnah (form) par ih nganmi mai thuhla (personal information) pawl khal Malaysia acozah hin refugee pawl ratnak ram ih acozah pawl hnen ah a pek lo ding thu pawl simnak a nei.

 

UNHCR card a nei hrih lo nan UNHCR card nei cia zo tu pawl hnen ih ben a tumtu innsang member pawl khal a rang theibik ih card an ngah theinak dingah UNHCR hin tuah sak ding a zuam rero thu, UNHCR card khal nei lo, innsang ben ding khal nei lo ih community card lawng a nei tu pawl cun kaih le khih an ton pang le mai community cio le UNHCR ah an contact a si ahcun UNHCR hin an thuhla (case) a zohsak dingih refugee dingih cohlan tlak ih a hmuh ahcun an thawngtlaknak ihsin luat dingah a cang thei tawk in a zuampit ding thu pawl Mr. Vernon cun simfiangnak a nei.

 

Mr. Vernon in pehzawm ih a simnak ah Malaysia ram sungih um beunak hawltu (asylum seekers) pawl hi UNHCR cun a rang theibik ih hmin cazin lakkhum (register) a zuam rero thu, thawngthlak a tuartu pawl ih an dinhmun zohfelnak nei in refugee ih cohlantlak a si mi pawl cu a rang theibik ih luatnak an ngah theinak ding a zuam ding thu pawl tla a tel.

 

UNHCR hin ziangtik ah mobile registration a tuah sal ding ih minung ziangzat a la ding ti thusuhnak par ah Mr. Vernon cun mobile registration cu tuah dingin khuakhan a si ko nan ziangtik ah tile mipum ziangzat lak an si ding ti cu sim theih a si lo tin a let.

 

Ramsung thuthangca pawl ih ngannak ahcun 6P program vek in feh vivo a si dingih a rei hlan ah acozah hin minung million 4 (ting sawmli) lai hmang in operasi a tuah ding ti a si. Asinan Mr. Vernon cun 6P program tang ih tuahmi hih kaih le khihnak cu tui kum sungah si lo in hmai kum 2012 January ihsin nuam teten thok a si ding ti zumnak a um thu simfiangnak a nei.

 

2011 kum, September tiang ah hin Malaysia ram ah refugee le beunak hawltu mipum 95,000 lai an um ih him sungah zatek 92 (92 %) cu Kawlram mi pawl an si. Hih Kawlram mi pawl sung lala ah mipum tambik cu Chin mi le Rohingya pawl an si. Malaysia ram pumpi ah hin ramdang mi hna`uantu mipum 4 million (ting sawmli) an um ih himi sungin a hrek cu daan lo ih umtu pawl an si tin Mr. Vernon cun a sim fiang. (Falam Times, November 6)

Mipi theih ttulmi thil thupi

-6P Program hi refugee le asylum hawltu pawl hrang ih tuahmi a si lo.

-6P program hi daan lo ih um pawl hrang tumtah ih tuahmi sawn a si.

-UNHCR card neitu pawl cun kutzung nam zo khal ah, nam hrih lo khal ah phan ding a um lo. Ralrin ringring cu a ttul thotho.

-Community card lawng nei ih kutzung a nam zo tu pawl khal UNHCR ih refugee shioh dingah kutzung namnak hin zianghman a dawn kham lo.

-Community card lawng a neitu pawl cun hman a theih lai mi (valid) card felfai ten neih tengteng ding.

-UNHCR ih refugee shioh a tumtu cun mai thuhla (case) kha a hlankhan in felfai ten timtuahnak neih cia ding.

-Palik le immigration pawl ih kaih a tongtu cun a rang theibik in community ih tuanvo neitu pawl hnen ah sim than ding.

-Kaih a tuartu cun community ttuanvo neitu pawl hnen ah kaih tuar caan, kaih tuarnak hmun le palik zung hmin pawl felfai ten simthan ding.

-Community card lawng nei ih kaih a tuartu cu UNHCR in thawng a tlaknak hmun ah feh in interview a nei ding. Refugee a shioh tumnak thuhla (case) hi zumtlak a si ahcun thawng inn ihsin a suah theinak dingah UNHCR in a tawlrel sak ding.  (Falam Times, November 6).

 

Falam Times

 

CPP President Dr. No Than Kap Falam Ah Tlawng

CPP President leh Chin Affairs Minister Dr. No Than Kap in Chin ram, Falam ah October 04, 2011 ah an tlawng ih Falam Town-hall ah ni 15 inrinni ah mipi hnen ih thusimnak a neih thu CT palai Salai Zilthli hnenah thutheitu in a sim. Hi Town-hall ih thu a simnak ah a thulu cu zalennak(Democracy) le mipi ti a si ih a ngaitu mipi khal an tam in an hlawkpi zet tiah khal thutheitu cun a sim tel bet.

A thusimnak ih tel mipi cun Dr. No Than Kap ih thusim cu an hlut in an thlawp lo nasa ih an ngai khawp lo ruangah Dr. No Than Kap cu Falam ih tlawng leh dingah khal an dil a si. Vuanzi a si ruangah Kawlram acozah in a sahimnak(security) tuanvo an la ih a saduhthah vek ih a duhnak hmuh ah thlenter loin acozah khualbuk Taungzalat ehzikta ah an thlen ter a si.

Pu Than tawng dingah Chinram khawpi, Hakha ihsin Mineral and Forest Mnister Pu Kyaw Ngein khal a ra tlawng ih Pu Than thawn Kawlram in zalennak an neih theinak ding thu le Chinram thansoh theinak ding thu pawl reltlannak an nei a si. An thu relmi ah Chinram hrangih lungawium thu pakhat cu Kawlram acozah in Chinram cu Kawlram ih harsabik le farahbik state pakhat a si ruangah bawm a duh thu le Special Area ah Chinram cu a ret zo thu hi a si.

Hi thuthawn pehparawin kandung nai te ah Central lam ihsin Forest Minister cun Chinram ah a tlawng ih ram bawmnak ah tiin a tulnak ih hman dingah sumpai ting 7500 a pe ih cuhleiah Kanpalet lam khal in ting 4000 lenglo khal an dawng bet.Cuhleiah Rihli hrangah khal sumpai tamtak pek an si thu khal vuanzi Kyaw Ngein a sim thu thutheitu cun CT palai Salai Zilthli hnenah a sim thei bet. Vuanzi Kyaw Ngein cun Falam cu bawmnak an dillo ruangah bawmnak an dawnmal thu le a diltu hmuahhmuah pek an si thu khal a sim.

Pu Than hi Falam ah ni 2 a cam ih tuini 16(Pathianni) ah Pu Khaw Tuah Lal, driver Pana, Pahre leh a mah kilhmintu pawl thawn Lairawn lam pan in a tlung ih acozah lam ihsin Falam DC dinhmun kai rerotu le MLA No Sun le a party tuanvoneitu pawl in an thlah thu khal thutheitu cun a sim tel bet.

Falam Ah Chin Violin (Orchester) Group Din

The firstmelody (Orchester ) timi violin group cu 1 June, 2011 ni ah Falam, Chin ramah an dinsuak thu dawn a si. Hi, the firstmelody (Ochester)  violin group hi kan Chin miphun ih kan neih hmaisabik violin group a si ih mipum 25 thawn din suak mi a si.

Kan  Chin miphun awnmawi thuanthu ah Band le group hi a um phah zet nan, violin group hi a rak um dah lo. An group hotu pa’h simdan ahcun “Laimi in tuhlaanah Violin hi group in kan rak tum dah lo, asina’n a tu cu, Orchester  dinhmun thleng thei ding tiangin tumtahnak kan nei hrangah tha in pek cio dingin le, thuhla lam in siseh, sumpai lam in siseh  ruahnak thatha khalin siseh  in bawm le, in tanpi cio dingah kan lo sawm” tiah Falam thuthagca pakhat ah a tarlang thu CT palai hnen ihsin thu kan dawng bet.

The firstmelody (Orchester ) ih tumtah mibik cu – Orchester  classical music in Pathian thangthat nakah hmang thei ding, kan faalenau (Talent) a neitupawl phorhsuak ding, staff note  hi kan Chinmi pawl ih thiamthluh thei kan zuam ding le Laimi awnmawi (Music) thiam pawlin pumcomnak tiangin kan hmang thei nak dingah ti hi kan hmuitin bik mi a si  tiah an hotu pakhat cun a sim bet.

30.5.10, Falam Times

Kawlram thuthang

Ragoon Mingalar Zii a  kaang

27.5.10, irrawady. Ragoon khawpi sungih a larzet mi Mingalar Zii pi cu May 24 ( Monday) ni ah Meisa in a kaangral theh. Zinglam 8:20 AM ihsin a kaang thokih  a thaizing zingpit lawng ah felfai ten an mit suak thei  thu an sim. Dawr nei tu pawl ih  daitlannak ruangah tisa bel ihsin a alh thok mi a si ti ah taunvo neitu pawl in an  sim.   Ramsung le ramleng ih suakmi thil tampi zuarnak a siih thilri mankung tampi a siatsuah theh. Famkim Siarbet

25.4.10 Falam Times

Kawlram thu

Chin Nu Raltha

18.4.10 Falam Times

Chin Party Pahnih Hrilawknak teltum

13.4.10 CW/Net/FT. Burma ram  hrilawknak ah Chin mipi aiawh ih MP cuh tu ding party a pahnihnak Chin Progressive Party (CPP) timi cun 9.4.10 (friday) ah khan Nay Pyi Daw ih Election Commissionner hnen ah register an tuah fel zo a si.

Tu dinhmun ah CPP hi register tuah nak dingah temporary ih committee din sung mi a si. An party, kumpi in hrilawknak ah tel thei dingih a pom fel hnuah Party hruaitu ding an mai sungah hrilawk nak an nei sal ding. CPP hin Chin State Township (9) aiawh tu ding palai pawl an neih kim theh zo thu khal theih a si.

CPP Party hi Chin upa rinsan um zetzet pawl tangrual ih dinkhawm mi a si ih an party sungtel pawl khal Kumpi hnatuan naklam ihsi Pin-sin lak zo tu officer hlun pawl an tel tam phah tiah thu kan dong.

CNP party hin Chin pumhuap aiawh dingih dinmi a sin an Chinram pengtin palai an tel kim thei lo ruangah tel kim thei dingih CPP party din a si thu ramsung party sung tel hnen ihsin thu don a si. Famkim Siarbet

4.4.10 Falam Times

Lairam thu

Chin National Democratic Party

Or

Chin People’s Party

3.4.10 FT. Kum 2010 rampi hrilawk nak dingah kan Chin ihsin party pakhat cu hrilawk nakih telve dingin ramsung Chin Upa pawl cun ruahman nak an neih thu FT palai in thu a dong.

Tuitum hrilawknak ih tel dingah Chinram pengtin Upa palai le Rangoon ih phunsangtlawng ta ziangmaw zat thawn ton khawm awk nak neih a si ih Chin National Democratic Party ti din a si. Hi CND party hi Famkim Siarbet

28.3.10 Falam Times

Lairam thuthang

Kalaymyo Inn Kang

24.3.10 mizzima/CT. Sagain Division, Kalaymyo khua, Pinlung veng ih Inn-8 cu 24.3.10

ah mei in a kang ih minung 47 in inn le Lo neilo in an um.  Mei kang a thok nak hi U Famkim Siarbet

Falam Times

Falam Times Chief Editor USA ah feh

Salai Francis Lal Uk hi 2009 December thla ih sin  FPM  Committee ih dil nak el siang lo ten Falam Times ah Chief Editor dinhmun in ttuanvo  in lak sak tu a si. A mah hi Calai lam ih thiam zet a si ruang ah a thuthang ngan mi hi sawisel tu nei lo in fak le lawm hlir a co tu khal a si fawn. Hi vek Calai thiam cu a thlen nak ram tin ah kan mile sa hrangah calai thawi miphun cawi sang vivo tu a si thei nak ding ah FPM cun duhsak nak a hlan a si.

Famkim Siarbet

7.3.10 Falam Times

Refugee Pawl in Lairam

An Tlansan Maw??

By. Sui Lian Mang

“Lairam ka duhdaw titu le Lairam duhdawtnak thu reltu pawl in Lairam an tlansan” ti tongkam hi nan thei ve cio ding ka zum. Lairam ( Chin State) tlan santu kan ti ahcun Kalay myone le Tamu myone ih um Laimi hmuah hmuah le Yangon le Kawlram hmun tin ih um Laimi pawl teh Lairam an tlansan maw ti thusuh ding a um. “Tlansan” kan ti tikah ruah ding tam pi a um. Tah thimnak pakhat thungai ka tarlang duh. Cicai khua Mino Pawlkom ( CMP) kum 25 kim Silver Jubilee an tuah ah Cicai khua in vai zo tu Pu Lian Cung Nung le a naupa Pu Tuan Ceu in an Jubilee rawl an dar. Pu Tuan Cung Nung tei unau in Cicai khua an tlansan maw? Cicai khuami pawl in the In tlansan an ti kem? Famkim Siarbet

« Previous Page — Next Page »