NLD Cu A Thawknak In Buainak A Tong

Parliament pawl ih thu kamnak an neih mi daanbu (constitution) cafang pawl cu rem ding in an dil nan a net nak ah cun acozah ih a ret cia mi daan pawl vek in thlun in thukamnak (oath) neih ding lungkimnak an neih thu NLD party hotu Daw Aung San Suu Kyi in a sim.

Karlak hrilawknak ih tling ding in me a rak petu pawl mithmai zoh in le Parliament ih an tuan pi pawl ih duhnak thlun in tlawngkai nikhat ni ah lungkim ding in rel cat a si thu hotu bik in thuthang la tu pawl hnen ah a sim.

Parliament pawl thukamnak an tuah ih an siar tel mi cafang ah daanbu cu ‘hum in kan kil khawi ding’ ti hnak in ‘upat in kan thlun ding’ ti si sawn sehla ti ih an dil mi cu dil nawn lo ih an thlah awk mi sawn a si. Tui thukam tuahnak ah hicu daanbu thu lam men a si ih ramthu thawi a pehthlaih awk tuk lo ruangah an thu kan thlun men nak a si a ti.

Karlak hrilawknak an neih lai ih mipi pawl hnen ih an rak tiam ta mi thudik ih uknak (ta ya upadi soe moe yi), mipi hnen ih daihnak thleng ding in le daanbu rem thatsal ding thu pawl kha cu NLD ih U Ong Kyiang in kan ral ring man hrih lo a si ti in Mizzima pawl hnen ah a sim. “Kawlram ih ramthu ah khat lam le khat lam remaw zet tei kan ti awk thei a tha ti in kan ruat. Curuangah Parliament tonawknak ah tel ding in kan relcat nak a si. NLD ih din hmun ah cun kan ralring man aw lo a si bik” ti in a sim bet.

NLD pawl in hi daanbu remthat thei a si ah cun an hlawh tling ti ih ruah theih a si. Nan tu ah cun a tir te ih sin remthat lam si lo in thlun lam ih an thawk.

Falam Times

Ban In Kawl Acozah Le Kachin Donawknak Daihter A Duh

UN Secretary-General Ban Ki-moon in Kachin le Kawl acozah doawknak hi cawl thlang sehla ral umnak hmun ih refugees pawl khal tong theih si sehla ti in dilnak a nei.

“Kachin mipi pawl in doawknak cawlh ding thu can tha hi el lo in ramthu ih lungkimnak neih mi hin daihnak le thansohnak a thlen thei ding” ti in Ban in a sim. Kawl acozah hin tlangpar mi (Taing-Yin-Ta) meithal kai pawl thawn doawknak cawlh ding lungkimnak an nei zo nan Kachin Independence Organization (KIO) pawl thawi an tuah mi cu acozah an rinsan thei nawn lo ruang ah pahbal in tuini an do awk rero nak asi.

Kawl acozah le Kachin Independence Armry (KIA) an kapawk rero nak ruang ah mipi thawng tampi cu umnak kel te ah um thei lo in hmun dang ah thawn an si. Tubaite ah cun U.N. pawl in rawl le thilri mallai cu KIA um nak hmun ih refugee 50,000 pawl hnen ah an zem thei.

“Kachin State ah tu vek ih mi harsa bawmnak hrang kan pan thei hi a lung awi um zet ih peh zawm thei vivo ding khal a si” ti in Ban in a sim bet. 

Falam Times

Wesley Bawi le Lily te innsang Australia ram an tlung

Falam Times, Malaysia (April 28 2012)

Malaysia ih ummi Chinmi beunak a hawltu pawl hrangah ti thei tawk in pum pe aw in kum tawkfang sung international interpreter (tonglettu) dinhmun in UNHCR tangah hna a rak tuan tu Wesley Bawi le Lily Sui Zahau cu Malaysia ram tanta in an umhmun khuarnak ding Australia ram ah April 28 ni ah an feh ding tin thu don a si.

Wesley Bawi cu UNV (United Nations Volunteers) program in UNHCR ah 2008 kum July thla ihsin 2011 kum December tiang hna a tuan. Pehzom in 2012 January ihsin April tiang IRC program in hnatuan a peh bet. Wesley Bawi ih nupi Lily cu 2008 May ihsin 2010 February tiang UNHCR ah tonglettu hnatuan a tuan hnu ah Australia ram ah a va um lawk. Cutheh in 2011 April ihsin 2012 April tiang UNV program in Malaysia ih UNHCR ah international interpreter dinhmun thawn pehzom in hna a ra tuan sal tu a si.

Wesley le Lily cu 2010 kum August thla ah khan Malaysia ah thitumnak an nei ih fate mipa Nicholas an nei ih tu ah thla 7 a si zo. Chinmi, a hleice in Falam mi, hrangah a phunphun in hna a tuantu le pum a petu Wesley le Lily te innsang cu Malaysia tansan thlang ding an si ruangah hnatuanpi, rualpi le sungkhat dangdang pawl in an ui zia le feh an sian lo zia an sim.

Bio-data collecting tuahmi ah FRO zung ih hnatuanmi pawl

UN ih bio-data hmin cazin lakkhumnak ah Malaysia ramsung beunakhawl ih umtu Falam mi le sa pawl hmin cazin lakkhum theh a si theinak dingah FRO co-ordinator Reuben Van Lian cu state dangih khualtlawnnak a neihzo vekin April 21 ihsin 25 tiang Cameron Highland lamah khualtlawnnak a nei lala.

FPM-FRO assistant secretary Mang Oo Lian khal April 25 ihsin 26 tiang Kuantan lam ah khualtlawnnak a nei ve. FRO ih co-ordinator khualtlawnnak a neih tinten FRO co-ordinator ai-awh in Saya James Pek Muan cu FRO zungah mipi hrang hnatuan nak a nei rero.

Falam mi le sa pawl bio-data hmin cazin lak theh an si theinak dingin FRO zungah FPM-FRO president Paul Za Nei Bil ih hohatnak thawn secretary David Luai  le Office staff pawl cu nitin hna an tuan rero.

Malaysia ramsung um UN card ngahhrihlo beunak hawltu Falam mi mipum 1200 luan um ding tin zum asi nan 2012 kum April 28 ni tiang FRO zungih bio-data form a phihtu mipum cu 800 hrawng lawng a si lai. Himi bio-data thu thawn pehpar in thu theih fianglomi a um le FRO zung (03 9222 0059) ah le FPM-FRO secretary (012 923 0921) thuhla suhhlam theih ringring a si.

Falam Times

UNHCR in beunak hawltu pawl ih bio-data pehzom in a la rero

Falam Times, Malaysia (April 28 2012)

UNHCR cun Malaysia ramsung um beunak hawltu pawl ih bio-data cu 2012 kum April 9 ni ah Alor Star state in lak a thokih April 23 ihsin 26 tiang khalah Cameron Highland ah pehzom in a lak rero. UN ih hnatuannak le Community tuanvo neitu pawl ih hnatuannak acah vivo ruangah tuihlan simthan ciami state tinkim ih bio-data lak ding ni pawl hnak ih tuan deuh ah theh thei ding zum a um. Kuala Lumpur lam le a dang state pawl ih bio-data lak ding ni khal zumnak hnakin a tuan thei ti asi. Curuangah Malaysia ramsung um Falam mi le sa pawl FRO zungih bio-data form hmin cazin pekzotu zozo khal FRO zung lamih simthan dingmi thuhla ngaihvennak nei cio dingah sawm a si.

 

FRO zungih theihpimi UN ih bio-data hmin cazin a lakmi sungih a tel zotu Falam mi pawl cu Alor Star State in mipum (1), Penang ihsin mipum (7), Ipoh ihsin mipum (10) le Cameron highland ihsin mipum (15) pawl an si. FRO zungih theihpimi siloin community dangdang/bulpak tvp in UN ih hmin cazin a pektu Falam mi pawl cu FRO ih member an si lo ruangah FRO cun thuhla zianghman a buaipi lo ding.

UNHCR ih bio-data hmin cazin laktultu pawl cu beunakhawl in UN card ngahhrihlo Malaysia ramsung ummi mipumpak (fala, tlangval tvp), UN ah innsungsang ben-awk ding a hngak nan kum (18) a luan zotu pawl an si. UN ih bio-data hmin cazin lak atultu zozo khal FRO zungah bio-data form a phih hrihlotu cun nitin FRO zung on caan ah form ra phih dingin sawm a si.

Kawlram ihsin ramdang fehtu 80% cu Tuluk ram ah umhmun khuar

Kawlram ihsin ramdang fehtu 80% cu Tuluk ram ah umhmun khuar

UNO zung (UNIAP) ih than vekin Lei tlun ah kum tin minung 2.5 mill cu ramdang feh in an um ih Kawlram sungah ramdang fehsuak tu 80% cu Tuluk ram ah umhmun an khuar tin an sim.

Cuvekih kum tin 2.5mill ram dang ih fehtu pawl ih dinhmun a hrek cu mi zuar aw,danglam zet ih nupa sualnak tuahnak,duh lo cingih hnatuan ter nak,lo theih loih sum bur ternak,sal tuan ter nak,ramsa bang ih sawr nak, caw le na bangih hnatuan ter,mi that ter (an sungril phawrh ter),thil zuar nak le hmun hrekkhat ah cun Computer Games dawr ah nauhak pawl nupa sualnak lam ih zir ter nak,nauhak zuar nak,Kalauk zuamawknak,Bawhlung sit puai ih nauhak pawl zuarnak pawl tla an si.

Nitin minung 6800 in ramdang an feh nakah Asia ram sung men lawngah minung 9 mill hrawng an kim.Hi ramdang feh nak thuhla buai hi mai duhhai nak men ih veivak siloin Politics,Pursum leilawn,Khaw pi vangtlang, Thansonak lam, Harsat farah nak, kiangkap tihnun nak le a phunphun ruangih ramdang ah feh le veivak an si ih Ram tin in kham rero hman hai sehla an karhzai thotho a si tin ramtin huap ih theih mi a si.

Kawlram dinhmun ah cun ramdang feh nak hi a phunphun in a rak um ih 1997 ihsi thawkin an rak kham thawk zo. Ram dang fehtu pawl 80 % cu Tuluk ah, 10% cu Thailand ah,6 % cu Malaysia ah le ramsung cu 4% hrawng a si.

Kan dung kum 2011 sungah Kawlram sungih ramdang feh kham nak  upadi vekih cawhkuan an pekmi pawl zaten 136 an si ih duhlo cingih kaihhrem mi 89, hlawhhlang 29, duh lo cingih tuanter mi 14, duh lo cingih cawhkuan ter mi 1,nauhak ru 1, pawl cu Yangon, Mandalay,Pekhu,Tanintazi le ram then pawlah cun Shan ram saklam le nisuah nak lam, Kachin, Mon, pawl ah hi thil pawl hi a cang tin theih a si.

Kawlram kiangkap ih ram pawl ah hnatuan le thlahlawh thansak ih sungkua sawmdawl le cawm dingin tumtah ih feh sihmanseh, mi hrek cu Puaisa pawl ih bum le thlem nak, hlohthlau nak, thutiam pelhsawlhnak, nekrawk ih a miat ngahnak pawl an tawn ruangah ram hnih lungkimnak in ram dang fehsuak ih hnatuan dingin an sersuak a tul thu cu  tuanvo neitu pakhat in a sim.

Tanglam Zin In Malaysia Ra Pawl Harnak Tong

Falam Times, Malaysia
April 19 2012

Tanglam zin (Thailand ram kaan in) in Kawlram ihsin Malaysia a ra mi Chinmi tampi hrang ahcun thil hi an tumtah vekin a can lo hlei ah harsatnak tampi an tong bet a si tin thu don a si.

Yangon ih ummi puaisa Pa Thang (hmin ngaingai si lo) cun Malaysia a feh duh nan tangka a harsa tu pawl cu Ks. 150,000 lawng dil in Malaysia ram feh thei dingin ka lo bawm ding tin a ti. Hi Pa Thang ih lemnak ruangah Falam mi tel in Chinmi tawkfang lai cu tanglam zin zawh in Malaysia ah an ra.

Asinan hi Chinmi pawl hi Thailand ramri lan in Malaysia ramri sung an luh veten Malaysia ram ih ummi Kawl/Malay puaisa (mi-hmuak puaisa) pawl cun an rak hmuak ih puaisa dang (mi-tlen puaisa) pawl hnen ah tangka thawn an zuar. Hi mitlen puaisa pawl cun cui an leimi Chinmi pawl cu mi pakhat ah tangka RM 2,500 (Ks. 650,000 lenglo) thawn an tlen aw ter, asilole, an mah a tlen theitu ding sungkhat unau pawl hnen ah phone an set ih an tlen ter.

A liamcia January thla ah Chinmi pakhat Cung Cung (hmin ngaingai si lo) cu puaisa Pa Thang ih bomnak thawn tanglam in Malaysia a ra ih Malaysia ramri a thlen veten mi-hmuak puaisa pawl cun an rak hmuak ih mi-tlen puaisa pawl hnen ah tangka thawn an zuar. Cun, mi-tlen puaisa (Chin mi thotho) cun cui Cung Cung cu tangka thawn a tlen aw ter nan tangka a nei lo. Mi-tlen puaisa cun Cung Cung ih sungkhat pawl hnen ah phone set ih tangka thawn tlen dingin a dil nan zohman in an tlen thei lo. Curuangah cui puaisa cun Cung Cung cu sal vekin hna a tuan ter ih a hlawhmi tangka cu amah in a laksak theh.

Thlahnih hrawng a rei hnu ah cui mi-tlen puaisa ih a rak lei mi Falam mi minung pali cu a thup ten an tlan ruangah cui puaisa cu a thin heng ih Cung Cung riangri cu innsung ah zarh hnih lenglo lai a kharhkhum. Cui puaisa cun a thupten a tlan tu Falam mi pali hrangah Malay tangka RM 12,000 (mi pakhat ah RM 3,000 zin in) in pek a tul tin Cung Cung ih sungkhat pawl cu a ti. Tangka in pek thei lo ahcun ka that ding, asilole, Thailand ramri ah ka zuar sal ding tin a hro.

Cung Cung ih sungkhat pawl cun a cang theitawk in cui mi-tlen puaisa thawn rualrem dingin caan tampi lak in an zuam nan puaisa pa sawn in a duh lo. A neem zawng in thil ti a theih nawn lo ruangah hi thu cu March 29 2012 ni ah Kuala Lumpur ih palik zung tumpi pakhat a simi Bukit Aman Police Station ah thuhla than a si. Palik pawl in hi thu cu ni kua sung lai felfai zet ih zingzoinak an neih hnu  April 6 ni ah cui mi-tlen puaisa pa cu a mai umnak inn ah hmakhat ten an va nam in an va kai. Puai-sa pa ih a kharhkhummi Cung Cung le mi dangdang pawl khal, an zaten minung 13 kaih an tuar ih thawnginn sungah kharhkhum an si.

April 18 2012 ah hi minung 13 pawl ih thu cu thuthennak zung (court of law) ah rel a si ih tu ahcun an zaten immigration camp ah kuat an si zo. Hi kaihmi pawl sungah zohman passport le visa nei an um lo ruangah an zaten Kawlram ah kuat kir an si ding tin himi thu ah tuanvo a neitu  Malaysia rammi palik bawinu (bo thum) cun a sim.

Cung Cung vek in tanglam zin zawh in Malaysia ra thlen hnu ah puaisa pawl ih kharhkhum le zuar a tuar tu Chin/Falam mi tampi an um lai. March 24 ni khal ah Thailand ihsin tanglam zin zawh in Malaysia a ra luttu Chinmi minung 15 cu Malaysia ram sung an luh veten palik pawl in an kai ih thawng inn ah an khum.

Tuvek in tanglam zin in ra tahratin puaisa pawl kut sungah zuar a tuartu le harsatnak a tongtu pawl cu Malaysia ih ummi Chin/Falam pawlkom pawl khal in bomnak pek daan ding a har zet. Palik pawl hnen ah an thuhla thlenpi ding lawng hi pawlkom pawl ih ti theimi a si. Tanglam in daan lo ih ram sung ra luh le minung zuar awk hi tih a nung zetmi thil a si ruangah Malaysia ram ih ummi Falam Refugee Organization (FRO) cun pawlkom hmin in hivek thuhla cu zianghman a buaipi thei lo. Kaih le zuar a tuartu pawl ih sungkhat unau pawl sawn hin anmah ten palik pawl hnen ah bomnak an dil a tul a si. Curuangah tanglam zin hmang in Malaysia a ra tumtu zozo khal nasa zet ih ralrin a tul tin FRO ih tuanvo neitu pawl cun an sim.

 

Malaysia Feh Tum Pawl Puaisa Ralrin Tul

Falam Times, Malaysia
April 19 2012

Kawlram ihsin Malaysia ram ah tumtahnak a phunphun thawn a ra/feh tu minung hi nitin an um ringring. Chinmi tawkfang lai khal tu ni tiang ah mah le tumtahnak thawn Malaysia lam ah an ra thleng rero lai.

Ram pakhat va tlawn dingah sumpai tam pi a cem ruangah Chinmi tampi hrangah ram leng khual tlawn hi a ol lo na sa. Curuangah Malaysia a feh tumtu le a fehsuaktu Chinmi tawk fang lai cu puaisa tha lo pawl ih kut sungah harsatnak an tong theu.

A liam cia thla tawk fang lai ihsin Yangon ih um puaisa hrek khat le Malaysia ih puaisa hrekkhat pawl cu kom aw in Malaysia feh a duhtu Chinmi pawl cu tanglam zin (Thailand ram kaan in) ihsin Malaysia ram ah an luhpi. Tanglam zin ihsin ram pakhat va luh hi thil ol lo zet le tihnung zet mi a si. Lam lak ah accident a phunphun le acozah tuanvo neitu pawl ih kaih le khih ton a ol zet. Mi hrekkhat hrang ahcun khual tlawn lai fang hi a harbik lai caan a bang nan Malaysia an ra thlen ngah hnu lawng ah kan harsatnak hi a thok lawng a si lai ti an thei aw. Cucu thinlung tha lo le tangka a duh luar tuktu puaisa pawl an va zum ruangah a si. Famkim Siarbet

FRO in bio-data hrang hna a tuan rero

Falam Times, Malaysia |April 15, 2012

FRO coordinator Reuben Van Lian cu Alor Star State le Penang ih um Chin-Falam mi pawl UN in bio-data hmin cazin lakkhum thluh an si theinak dingah refugee community dangdang ih hruaitu pawl thawn April 8 ni ihsin 12 ni tiang khualtlawn nak a nei rero zo asi. FRO ih hnatuan a cah sinsinnak dingah tiin FPM-FRO assistant secretary Mang Oo Lian (012 340 7385) khal coordinator hnatuan bawm dingin April 11 ni ah Penang lam pan in khual a tlawng thok zo. Penang State sung um Chinmi pawl hrang bio-data lak ding cu April 16 ni ti asinan UN lam le community lam ih an hnatuan a cah le a tluan vivo ruangah Penang State ih Chinmi pawl hrang bio-data cu April 14 ni ihsin lak thok a si zo. FRO cun Saya James Pek Muan (016 958 1086) cu April 13 ni ah Penang bio-data thuhla hrangah a thlah bet zo.

Famkim Siarbet

UNHCR In Bio-Data Lak A Thok Rero Zo

Falam Times, Malaysia | April 15, 2012

Malaysia ramsung ah daanlo ih umtu beunakhawl pawl hrang hmin cazin lakkhumnak (bio-data collecting exercise) cu UNHCR in April 9 ni ah Alor Star State ihsin lak a thok rero zo. UN card anei hrihlo tu innsang, mi pumpak (fala le tlangval tvp), UN ah DS ben ding hngak nan kum (18 ) a luan zotu pawl le passport ( work permit ) akai lotu pawl hmuahhmuah cu himi bio-data hmin cazin ngankhumnak ah hmin pek theh ding a si.

Chin-Falam mi bio-data tuah atul tu pawl zaten UN in bio-data hmin cazin lak theh asi theinak dingah FRO cun tithei tawk tan lak in hna a tuan rero asi.UN lam in mah le umnak state tin ah bio-data lak asi hlanah bio-data tuah a tultu Chin-Falam mi le sa zaten FRO zungah bio-data form phih cia tluh theih asi. Fate kum (18) tang a neitu innsang pakhat in bio-data form pakhat lawng phih ding asi. Asinan fate kum (18) tlun lam a neitu innsang cun cui kum 18 tlun lam fale pawl hrangah a hran ten form phih a tul. Form pakhat phih man ah FRO cun FRO zung hnatuannak le mipi hrang a tul daan ih hman ding tiah RM 100 a lak asi. Zozo khal FRO zungih bio-data form a phih hrihlo tu cun a rang thei bikin form ra phih cio dingah sawm a si. 

Australia in Malaysia ih refugee pawl lak a thok rero zo

Falam Times, Malaysia | The Star, April 7

Australia ram cun Malaysia ih ummi refugee pawl, a hleice in Kawlrammi refugee pawl, cu amai ram sungah lak a thok rero zo a si tin Kuala Lumpur ih ummi Australian High Commissioner tuantu Miles Kupa cun a sim.

2011 kum ah khan Australia le Malaysia cun an ramhnih karlak ah lungkimnak an rak tuah. Cui lungkimnak vek a si ahcun Australia hin amai ram Christmas Island ih ummi beunak hawltu minung 800 cu Malaysia ram ah a kuat ding ih, cui minung 800 pawl cu refugee sinak pek tlak an si le si lo Malaysia ram ah zoh an si ding. Cun, Australia cun Malaysia ih ummi UNHCR ih theihpitmi refugee 4,000 cu kum 4 sungah amai ram sungah a laklut ve ding.

Famkim Siarbet

U.S.A Na Thlennak Ding Hmun Na Thei Zo Maw?

U.S.A Na Thlennak Ding Hmun Na Thei Zo Maw?

By Salai David Nun Tho

A hmaisabik ah casiartu zaten keimah David Nun Tho in Indianapolis, USA ihsin nan kut ka lo kai a si. Nan thlacamnak ruangah tum ram U.S ah tluang le damten Oct 19, 2011 zaanlam nazi 5:20pm ka umnak ding hmun ah ka thlengsuak. Hnatuanpi zaten khal hinah ihsin nan kut ka lo kai fawn. Himi ca ka ngannak a san hi U.S lam ih a ra lai ding mi pawl in U.S thlen hnu ih harsat ton ding sian lo ruangih duhsaknak tumpi thawn mipi hrangih nganmi a si.
Biaknak: Chin mi zumtu piangthar kan si tikah kan thlennak hmun ah khrihfa bu tha an um hi a thupizet. Chin mi U.S thlengzo tu mipum 30,000 um ding in ruah a siih Indianapolis lawngah 6,000 lenglo an um. Chin-Falam tong hmang kawhhran pa 3 a um. Cumi lak ah Falam Baptist Church Indianapolis (FBCI) le Falam Christian Community  Indianapolis (FCCI) pawl hi kawhhran pi cang an si. FBCI ah member 450 in pumkhawmnak an nei theu ih FCCI ah member 150 hrawng an um ruangah Falam mi mipum 700 hrawng um ding in zum a um. (Hminsin: A then cun FBCI khawmnak hi USA ih LCF tiah tla an ko).
Hnatuannak: U.S ah Indianapolis hi warehouse le factory (cetzung) tamnak hmun a si. Laimi a tam sawn mirang ca a thiam lole tong …thiam lo kan si tik ah tong thiam lo khal le tuan theicih a si. U.S ah cun mawtaw neih lo cun zianghman tuan le tham theih lo a si. Asinan Indianpolis ahcun Laimi an tam tik ah mithar pawl mawtaw nei hlan sung mihlun pawl thawn tawm aw in hnatuan a theih. State dang hnak in basic hlawh man a tam sawn.

Umnak Inn: Umnak ding inn san man khal state dang pawl hnak in a man a ol deuh. State dang um pawl in kum 3 an um ih inn an leimi cu Indianapolis um pawl cun kum khat kiangkap hrawng cun an lei thei vutvo.

Damlo caan: Minung cu na thei kan siih mikhua mi ram ah mai natnak rori sim thiam a harzet. Cu mi na buainak cu Indianapolis Interpreter zungpi in a lo bawm ding. Kan Chin-Falam mi Mai Kim Te in cui tonglet pawl fingkhawitu dinhmun in hna a tuan ih nangmai  tappi tong Falam in nazi 24 sung tong an lo letsak ding.

Bomnak: Indianapolis ah refugee thlengthar pawl bawmtu dingah Catholic Charity timi le Exodus Resettlement agency pawl an um. A pahnih ah Laimi tonglettu an um veve. Agency pawl ih bawm thei lo mi hmuahhmuah kawhhran a hleice in FBCI senior pastor Rev. Ci Kap in nasa tak in tan a la ringring.

Fimzirnak: Fimzirnak khal ah tlawng inn tin kim ah Laimi pawl tlawng saya bawmtu an um thluh ruangah tong thiam lole ca thiam lo pawl khal cuih Laimi tlawng saya pawl cun an theihtawk in an tanpi fawn.

Pawlkom le Hruaitu Dinhmun: Indianapolis ah kawhhran lawng siloin Indy Chin Pawlpi tiah mipi kaihhruaiawknak an nei bet. Mi bulpak khal in kan Laimi sung ih mifim mi makmak tampi um khawmnak hmun a si. Hruaitu tha le thil tithei an um tam ruangah nitin te State dang ihsin Indianapolis ah a ra thawntu an tam vivo. Indy-Chin Pawlpi hohatnak in mipi pawlkomnak a phunphun neih ringring a si. Malaysia FRO ih tuanhlunpi tampi um khawmnak hmunpi khal a si.
Thiamcia Tulmi: Kawlram ihsin phunsang tlawng theh lo le phunhra onnak certificate ken tengteng ding. A thupibikmi pakhat cu mirang tong thiam tengteng a tul, tong le ca thiam lo cun mi bang ding a harzet. Tong thiamcia pawl hrangah hnatuan tla a tam cuang. Cule tumtah nei in U.S rat hi a thupi zet.

Ralrin Tulmi: U.S hi democracy ram a si ruangah nuamzet in um ding tiih na ruah asi ahcun na sual nasa ding. Rampi acozah hin mipi pawl cu dun le daan thawn a kaihnget thluh. Zuri le thil cangsual a um hnuhnu cun zaten daantattuar a siih U.S ah zangzel ih um huahhi men khal a ngah lo. Pehtlaihnak tuah theih: Cangantu tla cun Indianapolis hi Laimi pawl umnak ding hmun ah a rembik tiih a hmuhfeng ruangah Malaysia um US ralai ding mi pawl cun RSC/RST lam ih address pek tikah Indianapolis hi pek cio sehla a duhsak. State dang thleng hnu ih thawn awk sal cun mai ngah ding mi pawl sunralnak a si ih thil tawlrel ding a harsa zet. Curuangah address pe duhtu cun <davidnuntho@gmail.com> le mobile phone 0013176828819 ah siseh <ci_kap@yahoo.com> ah suhhlam thei ringring.

Falam Times
Falam Refugee Organization (FRO)
KL, Malaysia

Next Page »