South Korea Ah Laimi Champion Ngah

- Richard Van Bawi Lian

May 13 (Sun)- Myanmar Association (Korea) ih hohat nak ih tuah mi “Myanmar Open Cup” bawhlungsit zuamawknak ah Chin Community Korea in pakhatnak champion laksawng a ngah. Hi zuamawknak hi South Korea ram Bucheon City ah tuah a si ih Kawlram mi Footbaal team 11 rori tel in nuam tak le sunglawi ropi tak ih hman a si.

Kum tinten kan laimi pawl cun thatho tak le ttangrual zet in Football zuam awknak ah Champion si ve dingin an rak zuam ve nan Semi-Final tiang hrawng lawng thleng thei in leh  kum 2011 a voi 11nak “Myanmar Presidant Cup”ah  2nd prize cu an rak ngah ve dah.

Korea ram ah kawlram mi kan tam vi vo ruangah tu kum thawk in “Myanmar Open Cup” thawn kum khat ah zuam awk nak voi hnih nei dingin Myanmar Association(Korea) cun ro a rel ih, hih “Myanmar Open Cup” hi a voi khat nak asi. Laimi pawl cun Champion si ve thei dingah na sa zetin an zuamih kum dang kan rak si ban dah lo leh kan rak sithei dah lo mi Champion cu final ah Ansan FC thawn 3-1 in football match a zoh tu kawlmi/mi pi 4000 hmai ah duai ve lo takin kan rak ngah a si. Laipa pakhat tla cun Kawlram/Myanmarah cun laimi pawlin hi ti vekin kawlmi leh hnamdang lakah Champion ti vek cu kan mang hmanah kan mang ban lo tiin lung awi in a au na sa. Tu ni ih sin thawkin Korea ramah laimi pawl in men men saw ling kan si ve lo zia leng tar in thuanthar thar mawi cu ngan khum a si thlang.

Institute Of Chin Affairs Din Asi Zo

Global Chin Affairs Conference cu May 4- 6, 2012, ni 3 sung USA ih Chin khawpi Indianapolis ah hlunghlaizet in tuah asi. Cumi Conference ah Thailand, Europe, Australia leh US states tampi ihsin rinsanmi mino, upa tampi an ra suak khawm.

Conference ra kaitu mipi lungkimtlangnak in Institute of Chin Affairs cu May 05, 2012 ah dinsuak in a umdahlomi Chin thuanthu cahmai thar on asi zo. May 04, 2012 zaan 8pm ihsin 11pm tiang, Sat May 05, 9am – 11:30pm, tikcu pawlah Chin mipi lungrual ih hnatuan khawm theidan relkhawmnak kan nei.

Sunday zingah Falam Baptist Church of Indiana ah Pathian biakkhawmnak kan neih hnu ah Falam Christian Church of Indianapolis ah Pathian biakkhawmnak kan neisal. Kohhran pawl in hlunghlaizet in mikhual pawl an rak enkol in thusimnak caan thatha tla an rak pe. Lungawinak mithtli luang phah in pakhat le pakhat kan cibai aw. Chin thuanthu ih a umdahlomi cahmai kan ngan thokzo!

Conference hrangah tulsammi zainghman um lo ih ziangkim a tawlrel thluhtu Indiana Chin Community mino, upa pawl parah samcawklo lungawinak kan nei.

Chin mi kan lungruallo tiih thinlung nuamlo ih rak um pawl – Chin mi kan lungrualdan, Conference a ra kaitu mino le upa tampi in atak in an hmuhzo. Chin mi in hruaitu tha kan neizo. Chin mipi lungkhat in hnatuan tlang theinak dingah tawlrel thok rero asi zo.

Chin mi in Chinrampi hruaisal dingah a taphmun in a thok rerozo. Chin mipi pawl an tualrawn ah duhdawtnak khuang tum in kan lampi sal ding. Na hruai ding maw? Na thlun ding? Na hruai duhlo, na thlun duhlo hmanah, va tibuaitu ahcun rak tang hram hlah. Kan thuanthu timawi vivo dingih kekar thoknak ah ra tel ve dingin kan lo sawm duh fawn!

Institute of Chin Affairs (ICA tiin ko lo in Chin Affairs tiin rak ko dingah ka lo sawm) Board of Directors pawl cu:

Salai Nilian
Fung Dun
Hrang Vung
Tha Nei Luai
Van Tuah Piang
Thawm Hlei Mang
Hram Nei Luai
Mai Cheery Zahau
San Hlei Thang
Steven Rualthankhum Sunthang
Salai Tuan Ling Thang

Advisors
Rev. Hre Mang
Rev. David Laisum
Rev. Ngun Hlei Thang

Salai Nilian cu President ah le, Pu Fung Dun cu Vice President ih hril tlin an si.

Steven R Sunthang cu Board of Directors pawl in Chief Executive Officer tuanvo an pe.
Himi hnatuannak a theibet duh nan um asilen chinaffairs@yahoo.com ah zingzoi theih ringring asi.

New Delhi Ih CRO Cu “FRO” Tiah Thleng Sal

Salai Snow
New Delhi
5th May, 2012

New Delhi ih Falam Union (Chin Refugee Organization) tiih thleng tharmi cu Falam Refugees Organization (FRO) tiah vantlang mipi lungkimnak thawn thleng  sal a si thu Delhi ih CT palai in a sim.

Tui, kum sung ih Vantlang khawmpi a veihnihnak  ah mi 47 lenglo in an kai ih Falam mipi thansohnak ding tamzet an rel thu khal kan dawng bet.

Mani 5^th May 2012 ahkhan New Delhi Living Faith Baptist Church ahkhan mipi suak khawm cun New Delhi ih Falam pawlkom hrangah hmin felfai le huapkau sawn nei dingih hmin 3 lakah FRO timi hi an hril sawn ih nemhngehnak khal an nei cih.

Agenda dangdang pawl relfel a si hnu ah Chin beunak hawlpawl bawmtu Donbosco Ashalayam ih hmalaknak zohfelnak neih a si.

Cumi theh ah president hnen ihsin report le sumpai kaitu pawl hnen ihsin sumpai hmannak le dinhmun pawl simfiangnak an nei.  Hruaitu le mipi thusuhnak caan khal tuah a si. Vantlang khawmpi avei 2nak hi 5:30 tiang hlunghlai zet ih hman khawm a si.

New Delhi Ih Chin Fala Hlo Hmuh Sal

New Delhi ih Chin Fala kum 17 mi hlo cu mani ahkhan hmuh sal a si.

Mai  Van Lal Sung cu a hlohnak ah Vai rickshaw mawgtu thawn an tawngaw ih Vai pa zangfah in an inn ah zan khat sung a riah ter.

A thaisun ah Vaipa cun tlangleng hmunpi ah a thlah sal.

Mai Sungte cun Chin hmuihmel keng hmuhzuam ih thinlung thlacamnak a nei lai ah Vung Boih (Tedim) cu a tawng ngah.

Vung Boih tei inn ah zankhat a riah hnu ah Rev. Thuah Za Thil hnenah an simthei ih cumi hnu ah a hawltupawl pawl thawn an tawngaw ngah.

New Delhi ih mino 40 lenglo tawngaw khawm in hmun dangdang ih tlangleng hngahnak pawl ah nikhat sung an rak hawl.

New Delhi ah nauhak le tleirawl an hlo theu ih palik pawl ih hmuh sak asilole Laimi pawl ih hmuh sal an si tlangpi theu.

New Delhi Ah Chin Fala Hlo Hawl Rero

New Delhi, India ih suakthuan pakhat cu a hnatuannak hmun ihsin innlam pan ih a tlung cu inn thleng lo in a hlo ih a sungkhat unaupawl an mangbangzet tiah thu kan dawng.

Mai Van Lal Sung 17 cu Noida ih a hnatuannak inntek a celh nawnlo ruangah New Delhi ih an inn lam pan in April 30, 2012 ihsin a poksuak. A ra thlennak ding tlangleng hmunpi ihsin an rak hmuak nan a thleng thei dah lo.

Curuangah mi hlo tiin a cangthei tawkin hmun dangdang ah ngaihven a si. Facebook le phone pawl thawn hi thu hi thehdarh vivo a si.

Tuini May 2^nd ah Delhi ih DBCF mino pawl cun hmun dangdang ah thenaw in hawl suah an tum thu Salai Thang Kolh in a sim. Amah hi mithlengthar a siih Mirang tong le Hindi tong a harsat zet lai asi.

Mai Van Lal Sung hi Pastor Sawm Tual ih fanu a siih Kawlram ah Aungzua Kalay Township ah an um.

Aizawl Ah CCYI Conference Avei(2)nak Hmang

Mizoram, Aizawl ih CCYI pawl cun tui baihte April 28-29, 2012 tiang kha a vei(2)nak Conference hlunghlai zetin an hmang.

Hi, Conference nak ah Mizoram ih Chin mi Kawhhran hmun dangdang ihsin mino ziangmawzat suak khawm in hlarem le solo a phunphun Pathian cawngawih khawmnak an nei.

Ni 28 zan ah FCL Pastor Run Tin Ceu in Zunnak, Ruahsannak, Duhdawtnak ti thupi hmang in sermonnak a nei ih, ni 29 Nipi sunah Pu Dr, Za Hlei Thang in mino hrang forhfialnak le Sermonnak in caan a hmang ih, Khawm ban hnuah Aizawl (CCYI) ih tawlrel mi The Chin Times Journal cu tlangzarnak an nei bet tiah Salai Bawite cun a sim.

Ni 29 zan ahkhan Mobile Phone in Santhar nun a siatsuah timi thupi hmang in debate nak nasaten an tuah thu khal an sim.

Wesley Bawi le Lily te innsang Australia ram an tlung

Falam Times, Malaysia (April 28 2012)

Malaysia ih ummi Chinmi beunak a hawltu pawl hrangah ti thei tawk in pum pe aw in kum tawkfang sung international interpreter (tonglettu) dinhmun in UNHCR tangah hna a rak tuan tu Wesley Bawi le Lily Sui Zahau cu Malaysia ram tanta in an umhmun khuarnak ding Australia ram ah April 28 ni ah an feh ding tin thu don a si.

Wesley Bawi cu UNV (United Nations Volunteers) program in UNHCR ah 2008 kum July thla ihsin 2011 kum December tiang hna a tuan. Pehzom in 2012 January ihsin April tiang IRC program in hnatuan a peh bet. Wesley Bawi ih nupi Lily cu 2008 May ihsin 2010 February tiang UNHCR ah tonglettu hnatuan a tuan hnu ah Australia ram ah a va um lawk. Cutheh in 2011 April ihsin 2012 April tiang UNV program in Malaysia ih UNHCR ah international interpreter dinhmun thawn pehzom in hna a ra tuan sal tu a si.

Wesley le Lily cu 2010 kum August thla ah khan Malaysia ah thitumnak an nei ih fate mipa Nicholas an nei ih tu ah thla 7 a si zo. Chinmi, a hleice in Falam mi, hrangah a phunphun in hna a tuantu le pum a petu Wesley le Lily te innsang cu Malaysia tansan thlang ding an si ruangah hnatuanpi, rualpi le sungkhat dangdang pawl in an ui zia le feh an sian lo zia an sim.

Bio-data collecting tuahmi ah FRO zung ih hnatuanmi pawl

UN ih bio-data hmin cazin lakkhumnak ah Malaysia ramsung beunakhawl ih umtu Falam mi le sa pawl hmin cazin lakkhum theh a si theinak dingah FRO co-ordinator Reuben Van Lian cu state dangih khualtlawnnak a neihzo vekin April 21 ihsin 25 tiang Cameron Highland lamah khualtlawnnak a nei lala.

FPM-FRO assistant secretary Mang Oo Lian khal April 25 ihsin 26 tiang Kuantan lam ah khualtlawnnak a nei ve. FRO ih co-ordinator khualtlawnnak a neih tinten FRO co-ordinator ai-awh in Saya James Pek Muan cu FRO zungah mipi hrang hnatuan nak a nei rero.

Falam mi le sa pawl bio-data hmin cazin lak theh an si theinak dingin FRO zungah FPM-FRO president Paul Za Nei Bil ih hohatnak thawn secretary David Luai  le Office staff pawl cu nitin hna an tuan rero.

Malaysia ramsung um UN card ngahhrihlo beunak hawltu Falam mi mipum 1200 luan um ding tin zum asi nan 2012 kum April 28 ni tiang FRO zungih bio-data form a phihtu mipum cu 800 hrawng lawng a si lai. Himi bio-data thu thawn pehpar in thu theih fianglomi a um le FRO zung (03 9222 0059) ah le FPM-FRO secretary (012 923 0921) thuhla suhhlam theih ringring a si.

Falam Times

UNHCR in beunak hawltu pawl ih bio-data pehzom in a la rero

Falam Times, Malaysia (April 28 2012)

UNHCR cun Malaysia ramsung um beunak hawltu pawl ih bio-data cu 2012 kum April 9 ni ah Alor Star state in lak a thokih April 23 ihsin 26 tiang khalah Cameron Highland ah pehzom in a lak rero. UN ih hnatuannak le Community tuanvo neitu pawl ih hnatuannak acah vivo ruangah tuihlan simthan ciami state tinkim ih bio-data lak ding ni pawl hnak ih tuan deuh ah theh thei ding zum a um. Kuala Lumpur lam le a dang state pawl ih bio-data lak ding ni khal zumnak hnakin a tuan thei ti asi. Curuangah Malaysia ramsung um Falam mi le sa pawl FRO zungih bio-data form hmin cazin pekzotu zozo khal FRO zung lamih simthan dingmi thuhla ngaihvennak nei cio dingah sawm a si.

 

FRO zungih theihpimi UN ih bio-data hmin cazin a lakmi sungih a tel zotu Falam mi pawl cu Alor Star State in mipum (1), Penang ihsin mipum (7), Ipoh ihsin mipum (10) le Cameron highland ihsin mipum (15) pawl an si. FRO zungih theihpimi siloin community dangdang/bulpak tvp in UN ih hmin cazin a pektu Falam mi pawl cu FRO ih member an si lo ruangah FRO cun thuhla zianghman a buaipi lo ding.

UNHCR ih bio-data hmin cazin laktultu pawl cu beunakhawl in UN card ngahhrihlo Malaysia ramsung ummi mipumpak (fala, tlangval tvp), UN ah innsungsang ben-awk ding a hngak nan kum (18) a luan zotu pawl an si. UN ih bio-data hmin cazin lak atultu zozo khal FRO zungah bio-data form a phih hrihlotu cun nitin FRO zung on caan ah form ra phih dingin sawm a si.

Nunthuleng Lalnu Mai Sokhlei Par Chin Ram Tlawng

Nunthuleng Lalnu Mai Sokhlei Par cu Chin National Party (CNP) pawl ih sponsor nak thawn Chinram pawl ah a tlawng ding.

Mai Sokhlei Par hi Chin minu, nunthuleng nganthiambik pakhat asivekin a nunthuleng ngannak le cahram dang pawl a ngannak ah Chin thuanthu tampi a theih tul ruangah Chin ram hmun dangdang ih a feh tumnak khal a si.

Tui thuthang na siar rero lai ah Mai Sokhlei Par le CNP General Secretary Salai Ceu Bik Thawng cu Pyin Oo Lwin ihsin Chin khawpi Hakha lam pan in an feh rero lai a si ding.

Mai Sokhlei Par ih sim dan vek asile “Tuini April 20, 2012 ah Hakha lam ah kan feh ding ih cutin Thantlang, Falam khawpi lam ah kan feh vivo ding” tiah a sim.

Mai Sokhlei Par cun Chin thuanthu le a hmunram pawl nasazeten zingzawi vivo a tum thu pawl khal CT palaipawl hnenah a sim thei. Kan dung baihte khalah Malaysia ah feh in Nunthuleng ih ngan dingmi thuhla pawl nasazet in zingzawinak a nei zo.

Tanglam Zin In Malaysia Ra Pawl Harnak Tong

Falam Times, Malaysia
April 19 2012

Tanglam zin (Thailand ram kaan in) in Kawlram ihsin Malaysia a ra mi Chinmi tampi hrang ahcun thil hi an tumtah vekin a can lo hlei ah harsatnak tampi an tong bet a si tin thu don a si.

Yangon ih ummi puaisa Pa Thang (hmin ngaingai si lo) cun Malaysia a feh duh nan tangka a harsa tu pawl cu Ks. 150,000 lawng dil in Malaysia ram feh thei dingin ka lo bawm ding tin a ti. Hi Pa Thang ih lemnak ruangah Falam mi tel in Chinmi tawkfang lai cu tanglam zin zawh in Malaysia ah an ra.

Asinan hi Chinmi pawl hi Thailand ramri lan in Malaysia ramri sung an luh veten Malaysia ram ih ummi Kawl/Malay puaisa (mi-hmuak puaisa) pawl cun an rak hmuak ih puaisa dang (mi-tlen puaisa) pawl hnen ah tangka thawn an zuar. Hi mitlen puaisa pawl cun cui an leimi Chinmi pawl cu mi pakhat ah tangka RM 2,500 (Ks. 650,000 lenglo) thawn an tlen aw ter, asilole, an mah a tlen theitu ding sungkhat unau pawl hnen ah phone an set ih an tlen ter.

A liamcia January thla ah Chinmi pakhat Cung Cung (hmin ngaingai si lo) cu puaisa Pa Thang ih bomnak thawn tanglam in Malaysia a ra ih Malaysia ramri a thlen veten mi-hmuak puaisa pawl cun an rak hmuak ih mi-tlen puaisa pawl hnen ah tangka thawn an zuar. Cun, mi-tlen puaisa (Chin mi thotho) cun cui Cung Cung cu tangka thawn a tlen aw ter nan tangka a nei lo. Mi-tlen puaisa cun Cung Cung ih sungkhat pawl hnen ah phone set ih tangka thawn tlen dingin a dil nan zohman in an tlen thei lo. Curuangah cui puaisa cun Cung Cung cu sal vekin hna a tuan ter ih a hlawhmi tangka cu amah in a laksak theh.

Thlahnih hrawng a rei hnu ah cui mi-tlen puaisa ih a rak lei mi Falam mi minung pali cu a thup ten an tlan ruangah cui puaisa cu a thin heng ih Cung Cung riangri cu innsung ah zarh hnih lenglo lai a kharhkhum. Cui puaisa cun a thupten a tlan tu Falam mi pali hrangah Malay tangka RM 12,000 (mi pakhat ah RM 3,000 zin in) in pek a tul tin Cung Cung ih sungkhat pawl cu a ti. Tangka in pek thei lo ahcun ka that ding, asilole, Thailand ramri ah ka zuar sal ding tin a hro.

Cung Cung ih sungkhat pawl cun a cang theitawk in cui mi-tlen puaisa thawn rualrem dingin caan tampi lak in an zuam nan puaisa pa sawn in a duh lo. A neem zawng in thil ti a theih nawn lo ruangah hi thu cu March 29 2012 ni ah Kuala Lumpur ih palik zung tumpi pakhat a simi Bukit Aman Police Station ah thuhla than a si. Palik pawl in hi thu cu ni kua sung lai felfai zet ih zingzoinak an neih hnu  April 6 ni ah cui mi-tlen puaisa pa cu a mai umnak inn ah hmakhat ten an va nam in an va kai. Puai-sa pa ih a kharhkhummi Cung Cung le mi dangdang pawl khal, an zaten minung 13 kaih an tuar ih thawnginn sungah kharhkhum an si.

April 18 2012 ah hi minung 13 pawl ih thu cu thuthennak zung (court of law) ah rel a si ih tu ahcun an zaten immigration camp ah kuat an si zo. Hi kaihmi pawl sungah zohman passport le visa nei an um lo ruangah an zaten Kawlram ah kuat kir an si ding tin himi thu ah tuanvo a neitu  Malaysia rammi palik bawinu (bo thum) cun a sim.

Cung Cung vek in tanglam zin zawh in Malaysia ra thlen hnu ah puaisa pawl ih kharhkhum le zuar a tuar tu Chin/Falam mi tampi an um lai. March 24 ni khal ah Thailand ihsin tanglam zin zawh in Malaysia a ra luttu Chinmi minung 15 cu Malaysia ram sung an luh veten palik pawl in an kai ih thawng inn ah an khum.

Tuvek in tanglam zin in ra tahratin puaisa pawl kut sungah zuar a tuartu le harsatnak a tongtu pawl cu Malaysia ih ummi Chin/Falam pawlkom pawl khal in bomnak pek daan ding a har zet. Palik pawl hnen ah an thuhla thlenpi ding lawng hi pawlkom pawl ih ti theimi a si. Tanglam in daan lo ih ram sung ra luh le minung zuar awk hi tih a nung zetmi thil a si ruangah Malaysia ram ih ummi Falam Refugee Organization (FRO) cun pawlkom hmin in hivek thuhla cu zianghman a buaipi thei lo. Kaih le zuar a tuartu pawl ih sungkhat unau pawl sawn hin anmah ten palik pawl hnen ah bomnak an dil a tul a si. Curuangah tanglam zin hmang in Malaysia a ra tumtu zozo khal nasa zet ih ralrin a tul tin FRO ih tuanvo neitu pawl cun an sim.

 

Malaysia Feh Tum Pawl Puaisa Ralrin Tul

Falam Times, Malaysia
April 19 2012

Kawlram ihsin Malaysia ram ah tumtahnak a phunphun thawn a ra/feh tu minung hi nitin an um ringring. Chinmi tawkfang lai khal tu ni tiang ah mah le tumtahnak thawn Malaysia lam ah an ra thleng rero lai.

Ram pakhat va tlawn dingah sumpai tam pi a cem ruangah Chinmi tampi hrangah ram leng khual tlawn hi a ol lo na sa. Curuangah Malaysia a feh tumtu le a fehsuaktu Chinmi tawk fang lai cu puaisa tha lo pawl ih kut sungah harsatnak an tong theu.

A liam cia thla tawk fang lai ihsin Yangon ih um puaisa hrek khat le Malaysia ih puaisa hrekkhat pawl cu kom aw in Malaysia feh a duhtu Chinmi pawl cu tanglam zin (Thailand ram kaan in) ihsin Malaysia ram ah an luhpi. Tanglam zin ihsin ram pakhat va luh hi thil ol lo zet le tihnung zet mi a si. Lam lak ah accident a phunphun le acozah tuanvo neitu pawl ih kaih le khih ton a ol zet. Mi hrekkhat hrang ahcun khual tlawn lai fang hi a harbik lai caan a bang nan Malaysia an ra thlen ngah hnu lawng ah kan harsatnak hi a thok lawng a si lai ti an thei aw. Cucu thinlung tha lo le tangka a duh luar tuktu puaisa pawl an va zum ruangah a si. Famkim Siarbet

Next Page »