Phunhra Result June Thla Zarhkhatnak Ah Suak Ding

Phunhra Result June Thla Zarhkhatnak Ah Suak Ding

Myanmar News Hup

2011-2012 cazirkum ih phunhra Result cu June thla zarhkhatnak ah a suak ding a si tin Ahmat (3) ih ttuanvoneitu upa pawl hnen ihsin theih a si.

Kawlram sung phuhra Result hi kum khat hnu kum khat tuan vivo ih a suahnak  sancu camibuai sung tlawngta pawl hrangah a ra lai dingmi hmaikum Camibuai hrang timlamnak an nei man theinak dingah tuvekih tuantei a suahnak a si tin Tlawng Sayakyi pakhat in a sim.

“Phunhra Aungsayin (result) cu June ni 3 a si dingthu tlunlam pawlin in sim” tin Minggala-Taung-Ngyut ih Ah-Mah-Kah (14) tlawng Sayakyi U Aung Min cun a sim.

Kan dung 2011 phunhra Result cu June ni 4 ah theihternak suah a si.

Fimthiamnak a san sinsin theinak dingah tin Phunsang tlawng cazirmi khal kumkhat tthan bet ding a si ruangah 2011-2012 cazirkum ih Phunhra awngtu tlawngta zate khal Phunsang tlawng kum li kai a si ding thu khal ttuanvo neitu pakhat in a sim.

Kawlram Thuthang Tawi

> Pi Aung San Suu Kyi cun British Prime Minister David Cameron ih sawmnak ngai thupi in June 18 ah Britain ram ah feh in rorelnak innpi ah thusimnak  tawi a nei ding. Kan dung tlawngkai nilini khalah U.S. Secretary of State Hillary Clinton cun US ih Kawlram khuahkhirhnak a pekmi a hlih zo thu a phuang.

> G8 hruaitu pawl cun Pi Suu Kyi le Kawlram President Thein Sein ih hnatuan daan pawl thlirsalnak an nei ih an cangvaihdan hi hminsintlak ih tha a si tiah an sim. Tui kan dung tlawngkai ninga ah Pu Thein Sein cu damlonak ruangah zungkai theiloin Yangon ih an inn ah a cawl.

> Kachin Independence Organization (KIO) pawl cun Kawlram ralkap pawl thawn an doawknak thuthawn pehparin leitlun ram hruaitupawl hnen ih ca an kuat mi cu U.N. chief Ban Ki-moon in a ngah ih tlangparmi le Kawlram ralkap pawl doawk cawl thlang dingah Ban Ki-moon cun a phuang. Kachin le Kawlram ralkappawl dodawknak hi kan dung kum ihsin thok a si.

Facebook Nupi Nei

Facebook (hmaibu) tuah suaktu Zuckerberg 28 cun kum 9 sung lenglo a rak caai mi a fala Priscilla Chan (27) thawn Inn mawizet Palo Alto, California ah an nei aw.  2003 kum ih party nakih rak tawngaw an si.

Zuckerberg hin facebook hi 2004 ah a rak tuah suak. 26 a kim ah Time’s Person of the Year a rak ngah. Zuckerberg hi leitlun milian lakih thuamhnaw hruk thiamlobik lak sawng rak dawng dahtu asi nan an neihawk ni ahcun mawizet in a thuam aw ve. An neihawknak hi Zuckerberg inn dunglam ah a si.

An sawmmi mi 100 pawl cun a nupi Chan ih buaih lak ding puai ah an ruat lawk. An nupa in an neihawk thu an facebook veve ah an tarlang ih minit reilote sung ah like tu 140,000 lenglo an nei cih. Zuckerberg hi Dobbs Ferry, New York ih pitling mi a si.

Mandalay Lakphakdawr Pawlah Internet Wi-Fi Alakin Hmang

Myanmar News Hup

Mandalay khawlipi ih Lakphak dawr pawlah Internet Wi-Fi a lakin hman an sian ruangah dawr tinkim ah mipi an tam sinsin ih khawsung ih sumdawnak tuahtu pawl, thuthanglatu pawl le tlawngta pawl in an hmang celcel tin theih a si.

Ahlanah cun Mandalay lakphakdawr pawlah lakphak ra intu pawl hrang a lakin casiar ding  ding an rak retsak theu bangin tuah cun Internet Wi-Fi a lakih hman theih san ah an thleng a si.

Atu vekin Internet Wi-Fi a lakih hmang thei dingih in pek hi thla 6 hrawng a si thlang. Nuamteten hitin lakphak dawr tinah a karh vivo ih tu-ah dawr 17 tiang a kim zo. Meisa a mih caanah Mii-set (generator) thawn meisa in tuahsakih Mandalay khawpi ah cun a tha bik a si tin an hmin a thang zet.

Hivek Internet hmang thei dingin Mandalay khawlipi ih a dunglam ahcun “Fortune Company” pawlin ttuanvo an lak ih a hmai lam ah cun “Wimax company” pawlin ttuanvo an lak. Thilri tuahsak manah tin paisa  tingriat (800000 kyat) an pek ih 1MB cu thlakhat ah thawng sawmsarih (70000 kyat) , 2MB cu thla khatah tingkhat le thawngkul (120000 kyat) an pe tin theih a si.

Hmundang khawpi ah cun Internet Wi-Fi cu dawr hminthang le dawrpi deuhdeuh lawngah an ret theu. Mandalay ah cun Lakphakdawr menmen ah an ret tikah mipi pawl khal an aipuang zet tin theih a si.

Mandalay suak pakhat tla cun “ka thlennak Yangon hmanah dawrpi deuh lawngah si hivek an ret. Tuvekih Lakphakdawr khuatkhat 200 kyat man, in phah ih Internet duhtawk kan hmang thei cu di a va riam lawmam ve” tin a sim.

Internet Wi-Fi a ngahnak Lakphakdawr ah Mipi burkhawm in an to ih pursum leilawnnak leitlun thuhla lam, mawtaw man pawl, ramkhel thuhla, thuthang website pawl le Facebook pawl an hmang celcel.

“Ahlanah cun hivekin Internet hman a awl lo lawlaw. Dawr ih va feh khalle duhtawkin caan pek a theih lo. Internetdawr feh khalle mah le mah kaih aw lo deuh vek a si lala fawn. Tucu Lakphakdawr pawlah Internet a ngah thlang ruangah Ipad pakhat te lei in zing rawl ei phah hmanin hman a thaih zo” tin hmun umtu pakhat cun a sim.

Tuihrawng Mandalay ih Computer dawr pawl ah cun “Tablet Computer” hi zuarkhawng pawl a si. Tablet computer pakhat hi a phunphun a um nan a malbik tinghnih ihsin tingruk (200000-6000000 kyat) a si tin theih a si.

Mandalay khawlipi sungah Internet Wi-Fi ngahnak Lakphakdawr pawl hi 17 an um. Cu pawl cu :

(1) Yu-Ni-San Lakphakdawr ( Zin 84, 29×30 lak)
(2) Sing- Win-Win Lakphakdawr ( Zin 34, 84×85 lak)
(3) Min-Ti-Hah Lakphakdawr ( Zin 19, 82 zinkel)
(4) Min-Ti-Hah Lakphakdawr ( Zin 78, 31×32 lak Buta tlanglam)
(5) Min-Ti-Hah Lakphakdawr ( Zin 28, 72 zinkel)
(6) Min-Ti-Hah Lakphakdawr ( Zin 32, 77×78 lak)
(7) Man-Myo-Daw Lakphakdawr ( Zin 84, 32×33 lak)
(8) Min-Min-Kyaw Lakphakdawr ( Zin 83, 33×34 lak)
(9) Aa-Ka-Min Lakphakdawr ( Zin 32 x 68 zinkel)
(10) Kaung-Hein Lakphakdawr ( Zin 41, 80×81 lak)
(11) Tthaw-Thaw Lakphakdawr (Zin 80, Ahmat 2 Yesakhan thlanglam)
(12) Top Choice Lakphakdawr (Zin 80 , 31×32 lak)
(13) Ttin-Saw Lakphakdawr (Zin 80×41 zinkel)
(14) Ce-Tta-Ya Lakphakdawr ( Zin 80×41 zinkel)
(15) Ka-Ya-Wek Lakphakdawr (Zin 22, 83×86 lak)
(16) Chit-Nyi-Lay Lakphakdawr (Zin 32, 76×77 lak)
(17) Sing-Win-Win (2) Lakphakdawr (Zin 34×84 lak).

South Korea Ah Laimi Champion Ngah

- Richard Van Bawi Lian

May 13 (Sun)- Myanmar Association (Korea) ih hohat nak ih tuah mi “Myanmar Open Cup” bawhlungsit zuamawknak ah Chin Community Korea in pakhatnak champion laksawng a ngah. Hi zuamawknak hi South Korea ram Bucheon City ah tuah a si ih Kawlram mi Footbaal team 11 rori tel in nuam tak le sunglawi ropi tak ih hman a si.

Kum tinten kan laimi pawl cun thatho tak le ttangrual zet in Football zuam awknak ah Champion si ve dingin an rak zuam ve nan Semi-Final tiang hrawng lawng thleng thei in leh  kum 2011 a voi 11nak “Myanmar Presidant Cup”ah  2nd prize cu an rak ngah ve dah.

Korea ram ah kawlram mi kan tam vi vo ruangah tu kum thawk in “Myanmar Open Cup” thawn kum khat ah zuam awk nak voi hnih nei dingin Myanmar Association(Korea) cun ro a rel ih, hih “Myanmar Open Cup” hi a voi khat nak asi. Laimi pawl cun Champion si ve thei dingah na sa zetin an zuamih kum dang kan rak si ban dah lo leh kan rak sithei dah lo mi Champion cu final ah Ansan FC thawn 3-1 in football match a zoh tu kawlmi/mi pi 4000 hmai ah duai ve lo takin kan rak ngah a si. Laipa pakhat tla cun Kawlram/Myanmarah cun laimi pawlin hi ti vekin kawlmi leh hnamdang lakah Champion ti vek cu kan mang hmanah kan mang ban lo tiin lung awi in a au na sa. Tu ni ih sin thawkin Korea ramah laimi pawl in men men saw ling kan si ve lo zia leng tar in thuanthar thar mawi cu ngan khum a si thlang.

Himalayas Tlang Nini In Sa Vivo

Leitlun ih tlangsang le mawi hminthangzet Himalayas tlang cu a nini in a sa vivo ih tlang dang pawl hmuhhmuah hnakin a sa hleice cuang tiah nikhua zohtupawlin an sim.

A liamcia kum 25 pawl zohkir salin tui a hlum vekin veikhat hman a rak hlum dah lo.

1982-2006 tiangah a hlumlam 1.50 degree Celsius tlukin a cak sinsin.

Himalayas tlang zohfeltu pawl cun khawhlumzet veithum kom tlukin a sa tiah an sim.

Hivekih a sat a luar vivo ahcun a kiangkap ih khua le rampawl sungih sumhnam pawl tiangin an thi vivo ding an zum bet a si.

Barack Obama In Same Sex-Marriage Lungkim

US ih same sex-marriage duhtupawl cun midang bangih pumkhat si thei dingih neihawknak an dilnak cu US president Barack Obama cun a lungkimpi zo. Obama cun “same sex-marriage hi reizet ka ruah hnu ah ka kiangkap rual le pipawl le ka innsangpawl tiang ka suhnak ah in lungkimpi ih curuangah kei khalin same sex-marriage hi a tul a si” tiah a lungkimpinak a phuang.

Hivekih Obama a rorelnak le lungkimpinak ruangah mipi mangbangzet in an um phah. 2008 US president hrilawknak ahkhan a midumpi pawl hnen ihsin vote 95 percent a ngah dingah zum a si. Tui a lungkimnak khal a midumpipawl a ruah tuk ruangah a si ding khalin an zum.

Tui kan dung zarh ihsin same sex-marriage thu ah mipipawl ngaihdaan suhnak an tuah ih cunah Obama in hivekih a lungkimpinak cu a diklo asi tiah mi 67 lenglo in an sim ih mi 27 percent in a thil tuah mi hi at thlak tiah an ruat cuilakah mi 7 percent lawngin hrilawknak dingih a lamzin sialnak ruangah a si ding an zum thu an sim.

Mexico Ram Ah Thah Awk Nak A Tam

Mexico ram saklam khawpi pakhat Monterrey ah mithi ruang lutan bulmi 49 sar a si. ralkap hotu pawlin an sim nakah  lamzinpi kapih mithi ruang sarmi pawlhi mipa 43 leh nunau 6 an si tiah an simih, hi mithi pawl kan thahmi a si tiih  puangawtu rit theihthil ih sumdawng pawlkom  pakhat Zeta pawlih an mithah mi pawlhi an lu an kut leh an ke pawl an tansawm thluhih buridip sungih an khumthluh ruangah zozo an si timi theihsuak a harzet ding tiah an simih, Palik hotu pawlcun hi mithi pawlhi a liamcia nihnih hrawngih thahmi an siding tiah an sim.

Mexico ramahhin ri theihthil zuartu pawlkom dangdang an umhi an do aw in an thataw ciamco ih, tuithla ni 4 khalah khan Nuevo Laredo ah rit theihthil ih sumdawng pawlih thahmi  mithi ruang 23 an sarzo ih hi pawlkhal an lu an ban leh an ke pawl tansawm thluhih buridip sungih khumkhawm an siih hrekkhat pawlih lu tlacu lilawn hnuaiah an tar. cumi hnu tuithla ni 9 an khan  Guadalajara khawkiang Motor 2 sungah mithi ruang 18 sar a si thotho. Mexico ramah hin rit theihthil ih sumdawng pawlkom dangdang an umih an mah leh an mah an do aw ih  an that aw ciamco ih minung tamzet an  tizo.

Syria Ram Buai Nak Zia um lam A Pan Thei Lo

Nikum March thla ihsi Syria  ram President, Assad hlawnthlak tum ruangih an ram buainak cun tutiang zia umlam a pan theicuang hrihlo ih  hi an ram buainak ruangih mithi cu 12,000  an kimthlangih theih a si.

Mizan sun kahlah Syria ram laili Homs Province ih Rastan khua ah  Opposition lam ralkap pawlih Cozah ralkap tomi Motor pathum an kap ciamco ih Cozah ralkap 23 an thiih midang tamzetin hriamhma an tuar tiah Syria  Observatory for Human Rights pawlcun an sim.

Syria ram buainak tireh dingih Cozah ralkap leh Opposition mipi pawlin thutiam kamnak an neih veve mi an thlun  taktakmaw tiih zohfiang tuding UN in pailai minung 189 a thlah lutih, hiti vekih UN aiawhtu pawl umlai rori khalah an buainakin zia umlam a panthei cuanglo ih, tihni sun khalah Cozah ralkap kut tuarin Civil mi minung 30 lenglo an thi thotho ih, Syria ram Cozah in ramdang thuthangca latu pawl an ramih luhter a sianlo ruangah  an buainak leh mithi zat khalhi fiang famkim tei theihthluh theih a silo.

Nepal Ram Vanzam A Tla

Nepal ram khualtlawng phur Agni Air Vanzam  khualtlawng 18 leh a Vanzam hnatuan minung 3  phurtu cu Pokhara ihsi Jomsom panih a zuan nakah  Nepal ram khawpi Kathmandu ihsi Km 200 hrawngih hla Jomsom vanzam ttumhmun ih ttum a tum laiah  tlang a ttaih ih a tla. Hi Vanzam tla ah minung 15 an thiih midang paruk cun hriamhma nazet an tuar.

Hi Vanzam tla ih mithi pawlhi India  rammi 13 leh vanzam mawngtu Pilot 2 an siih, hriamhma tuartu minung 6 pawlhi  vanzam hnatuantu minung 1 India rammi 3 Denmark rammi 2 an siih Helicopter hmangin  Pokhara sizungah phurh an si.  hi Vanzam tla sungih to minung tamsawncu India rammi an siih, Jomsom khawpi kiangih  Muktinath temple zoh dingih feh an si. Nepal ramah hin  kum 2010 August thla ah khan nikhaw sezet lakah  Vanzam a tlazo ih minung 14 an rak thizo ih, nikum  September thla khalah Mount Everest zohtum ih feh  pawl tonak Vanzam a tla ih minung 19 an rak thizo.

CPP le CNP Komaw Ding

Mizzima

2010 ih hril awknak ah a zuam awk bik mi party CPP le CNP cu Chinmi ai awh dingin party pakhat ah kom aw ding an tum thu an thah. Party pa 2 kan kom awk tikah thazang tam deuh kan nei ding tiah Pu Zozam in a sim.

Himi party pahnih kom awk theinak dingah vei thum rori reltlangnak an nei zo. Khawte lam le hmuntin ih party sizung ih feh tikah “ziangruangah nan kom awk lo” ti ah thusuhnak tampi upapawl in an rak tawng theu a si.

Curaungah central lam ahcun kom aw dingin rel a si ih myone le khawte lam tiang in thuhla thanh dingah relcatnak neih a si zo. Hotu hril tikah democracy danten zalenzet in hril ding a si. 2010 hril awknak ah CPP in mi 12 in nehnak an co ih, CNP ihsin mi 9 in nehnak an co.

Pi Suu Kyi Tawng Ding Ah South Korea President Ramsung Thleng

South Korean President Lee Myung-bak cu Suu Kyi tawng dingah le sumpaileilawnnak lam thu pawl a phunphun rel dingah Kawlram khawpibik Nay Pyi Taw a thleng zo.

Mani ah Lee le Kawlram president Thein Sein cu hmaitawn in Nay Pyi Taw ah biakawknak an nei zo.

Lee cun tuini ah Pi Suu Kyi Yangoon a tawn ding thu a sim. 1983 ahkhan president hlun Chun Doo-hwan cu Kawlram ah a ra tlawng ih cumi ttum ah North Korean pawlin doawknak an thlen ih Yangoon ah nasazet in kahawknak a thleng ih president rak thluntu pawl le Kawlram mi 4 pawl tiang in an nunnak an hloh phah.

Cutivekih an rak kahawknak cu tuitum ah ralkap le palikpawl in an kil thepthep tiah ramsung thuthang cun a tarlang. Kawlram hin North Korea thawn sumdawnnak lam ih pehtlaihawknak an rak neih mi cu 1983 ahkhan an rak cawlh san asinan 2007 ihsin lungkimnak an tuah sal.

Russia Ram Vanzam Indonesia Ram Ah A Tla

Russia ram Vanzam Sukhoi Superjet-100 an timi khualtlawng minung 45 phurtucu tihni zan ah khan Indonesia ram khawpi Jakarta ihsin a zuangsuakih minute 12 hnuah biakpop theih nawnlo in a hlo ih mizan zingah khan Indonesia ramah a tla tiah hmuhsuak a si. hi Vanzam hi biakpop theihnawnlo ih a hloh ihsin Helicopter 2 hmangin hawlcih a siih, Vanzam lam thu neitu pawlin an sim nakah hi Vanzam  Pilot leh Co- Pilot in an zuansuak ihsi minute 21 ah an zuannak vansang feet 10.000 ihsin  feet 6.000 ih zuanniam an dilih cumi hnu ihsin biakpop theih an si nawnlo tiah an sim vethung.

HimVanzam hi  a hloh ihsin hawl rerocih a sinan nikhua a siattuk ruangah hmuh theih asilo ih, mizan ziang ah khan  tipi thuanthum ihsi feet 7,200 hrawngih saang tlangkhaam khokrokzet karlakah  vanzam tla kekkuai themcu  Helicopter ihsi hmuhsuak a si. Indonesia ram President, Susilo Bambang Yuhoyono cun hi vanzam hi ziangruangah a tla timi zinzawi fiang a ttulih a sinan cumi hnakin Vanzam sungih minung pawl nungdam an ummaw timi theihfiang zamrang a ttul a si a ti. Asinan nungdam an umlo tiah theih a si. Hi Vanzam hi tlangsang kham khokrok zet lakih tla a si ruangah  mithi ruang pawlhi laksuah an harzetdingih Helicopter hmangin an tlun ihsin hridai vawkthlakih mithi ruang pawlcu surpuan ih vungtuamih khaiso an tum.

Hi Vanzam hi Russia ram raldo nak Vanzam tuahtu Sukhoi Company in khualtlawng phurh nak dingih an tuah hmaisa bikmi vanzam a siih, tuah hin Russia in Indonesia ram hnenah Vanzam 45 zuar a tum rero laimi a siih, Russia hin ram dangdang khalah zuarsuak nak hawlin lamzin a hawl rero laifiang mi a siih, Vanzam 170 hrawng zuarsuak nak cu a hmu zo ih himi Vanzam manhi dollar Million 35 hrawng a siih a man a malzet.

Next Page »