Nau Hnawi Fawh le Kan Kuak Fawh

Nau Hnawi Fawh le Kan Kuak Fawh

The Sai (Tuallawt)

Leng U le An Dinhmun

Leng U le An Dinhmun

Mai Zilthli Lal Nei Thluai

Minu pawl cu mipa pawl aiin kan thitha, kan ruahnak khal a malsawn ih taksa lam khalah kan tar a ol sawn. Leng U ti cu a thei lo kan um lemlo ding. A mahlawngte kumziat tluk an ti in “leng U” ti’n kan ko timi cu pakhat le pakhat kan ruahdan a dangdang aw cio tla a si menthei. “Leng U” timi hi “tawng lo, fala tar” tivek ih kawh aicun “fala upa” ti sawn sehla a ngaitui’ hrangah a hahdam in ngai a nuamsawn ih t’ongfang mawisawn tla a si menthei ti’n ka ruat. Leng U pawl hi ziang ruangah leng U an cang sipei?

1. Duhdawtnak ah an van a sia

Tlangval duh zetmi pakhat tla an neiding. Asina’n thuhla a phunphun ruangah an kawpaw thei nawnlo. Vanduainak ruangah a tlangvalpa in a thihsan, fala dang a neihsan, nupi a neihsan tivek ruangah an thin a na tuk ih tlangval nei paih nawnlo in pasal neih paihnak/duhnak thinlung an nei nawnlo tla a si menthei.

2. An duh a khung tuk

Tlangval le duhtu khal nei hnenhen na’n pasal tawnglo ti hi a um thei. Thil cangtheimi taktak khal a si. An tawnmi, an mah duhtu pawl parah lungkim tawk lo in cu aiih t’ha deuh, mawi deuh, tawk deuh, nei deuh an zuan vivo ih neitabik ahcun kawpding taktak nei nawn lo in an tan lualli ruangah tla a si menthei

3. Nulepai’ dinhmun an theihthiam pi tuk (farah ruangah)

Mi hrekkhat cu duhtu khal nei keukeu, pasal neih duhzet na’n nei ngam lo thlurthlo rori khal an um thei. Nulepa nunhar te an si tikah “kei pasal ka neihcun ka unau pawl ziang ti’n an nung ding” ti’n innsang lubik dinhmun ih an din tikah pasal an nei ngamlo rori tla a si menthei.

Khatlam ah cu duhtu tawnglo rori khal a um thei ko. Asina’n cu pawl khalcun an thinlung thup te in duhmi te cu an nei ve ko ding. Cui’ an ruah thupmi te in an rak ruah ve lo tiakah “an duhmi an co lo” ti’n khal kan ti thei. Mirang pawl cun “kum 20 na kim ih mi duhhna na thiam hrihlo a si ahcun harhdamnak lamah mi tlasam na si” an ti. Cuvek thotho in mi pakhat kan va duh timi cu ningzah ding a si lo. Mi kan bang, kan damcak tinak sawn a si.

Mihrek cun fala upa pawl in tleirawl tete an biak kan hmuh tikah kan zohdan tla kan rak dangter t’heu. Cumi tlunah an thuanthu te ruahsak in an dinhmun te kan theihthiamsak thiam ding hi thil thupi zet a si.

MOTHER’S DAY

MOTHER’S DAY

BY Salai Tin Lian

Mother’s Day hi hlanlai ah cun Greek pawl in an pathian NU sunlawihmak ah an rak hmang. Roman Catholic pawl in Jesus nu Mary sumlawihnak ah an rak hmang. Kan dunglam kum 150 ihsin khan Mother’s Day hi Kohhran ah  hmang a si.  Christiannak ih Mother’s day hramthawknak cu Anna Jarvis in society sung ih mi hrisel lo le rethei pawl ih dinhmun theihthiam a tulzia le society in an tuarnak a theihthiampi ding hi NU pawl ih mawhphurh a si ti ih a au ni cu Mother’s work day tiin a rak ko. Anna Jarvis a thih hnu ah, a fanu Young Anna in a NU damlai ih thiltha a tuah mi pawl sunlawih upatnak le theihnghilh lonak pangpar cu West Virginia Biak Inn ah hlannak a nei.

Hi ni hi leitlun in sunlawih upat tlak NU pawl ih NI (mother’s day) ah a run pawm ih tusan zumtupawl in May Cawlhni vawihnihnak ah kan run hmang. Mi hmaisapawl cun  hi ni ah an NU le sunlawih upatnak ah  Biak Inn ah an feh, an nu le cu  ca in si maw, card, present le pangpar an pe theu.

Kan nih Laimi zumtupawl in Mother’s day kan run hmeltheihnak khal a reihrih lo ih, a hman dan khal kan theithiam tawk hrih lo a bang. Mother’s day hi Nu pawl sunlawih upat peknak lawng ih hman ding a si lo ih, NU pawl in an dinhmun le sinak tawk te ih Innsang, Kohran le Society ih an pekawknak theihpi le pawmpinak thawn hman ding a si. Mother’s day hin leitlun hrang ah thu (message) ken tel mi a nei ih, Nauhakpawl hnen ah NU an thupitzia le tihzah ih sunlawih upat tlak an sinak a zirhtir ih, Pa pawl hnen ah Nu ih dinhmun le sinak leitlun tlun in a tulzia a theihtir. Cuhlei ah Nui thupitnak thei hrih lo tu  NU pawl hnen ah an mawhphurhnak a theih tir fawn. Nunau palbetnak ruang ih kan society hma a sawn thei lo nak khal in zirhtir.

Rel duh mi cu Nu fim le thiam (fit) taktak kan nei nan pasal an neih ve ten Kohran le society ah hmantheih lo in an hol ral. A san cu retheihnak ruang ah kan ti men thei, a ngingai ahcun society in NU a sinak tul lo tuk vek ih a retawk ruang ah a si sawn. Nauhakpawl in NU le sunlawih upatnak ih pangpar pek le, sunlawih tlak NU an sinak theihthiampi ih sunlawih upatnak cakuat, card, present le pangpar pek cu Mother’s Day ih hramthawknak thuanthu (historical background) a si ih, Christian nun mawi khal a si.

Nu ih mawhphurhnak le sinak hi Inn sang lawng in a mamawh loih, Kohran le society khal in a manawh. Nu tel lo in  leitlun hi a famkim thei lo. Nu hi leitlun ih mawinak, nawmnak, daihnak le hnangamnak nan si. Curuang ah mi zo khal  Pathian in NU vek ih in duhdawtnak le in lainatnak hi NU pawl ih nun ah um ding le lang suak ding a si. Nu nan sinak ih par le rah cu mizokhal thleidannak um lo in tlan theih ding a si. Mi hmuah hmuah ih nu nan si ih, cui nan sinak ih rahsuak duhdawtnak le lainatnak cu Innsang tin, Kohrantin le Society tin in an tul. NU pawl ih nan zirhnak cu a kangral theilo mi RO sunglawi a si. NU tha na sinak le Nu pawinawh na sinak Mother’s Day in a lo nemnghet zo. Nunau nan si ih ruangah thinnau lo in, nunau nan sinak  ruangih leitlun in sunlawihnak a lo pek ruangah lungawi uh. DaihNak le Remnak leitlun ih hring suak tu NU s ihram aw.  Happy Mother’s Day

“HNANGAMTEN I UMTER AW”

“HNANGAMTEN I UMTER AW”

Mai Dai Dim

“Kiring…..kiring….kiring….” ‘Pa Buai’ ih phone cu a ring rero. Phone lak a tum rero nan a hnattuanmi ruangah a la theilo. ‘Nu Lak’ cu a thinheng tukah a phone lehlam sutkuai a tum zuakzo. “Buai Cin Thang’ ti hmin rori khal na keng tho!” tin amahte a phun thektho. “Hey… Na boyfriend cu phone a kailo lala maw?”  a rualnu ‘Rina’ ih “aw” a theih in a her ih, “Hmmm…..” tin thawpi saunawn thaw in a let. “Pa Buai’ cu an cawlhcaan a kim in a phone a zoh ih misscall veithum rori a rak um. Zamrang zetin a von ko salih, phone ring awn ahcun, “Take me to your heart, Take me to your soul. Give me your hand and hold me….” ti a ra. Phone ring hla awn cu amahten a pit sal. A ko sal. Hla a ra sal lala. A phone cu a von zoh ih, “Call is waiting….” tin a ra ngan aw. “Hmm!!!! ‘Nu Lak’ ti rori khal na si tho. Lak thei ko hi aw…..” tin a phun hmukhmo.

Suncaw ei dingin a suncaw bawm cu a von ong. A kiang ah le kala (Indian) pawl lawnglawng an si fawn. Rawl ei huamnak thinlung khal a nei nawnlo. ‘Pa Buai’ cu ‘Singapore Changi Airport’ ih hnattuan mi a si. Ingineering lam a si ih, an Companny ih Assistant Manager a si fawn tikah man caan timi hrimhrim a nei dahlo. Changi Airport ih ‘Cet’ lam ttuanvo hmuahhmuah cu a liang parah a um thluh ti theih rori a si. A pu (Boss) in le a rinsan tuk tikah a ziangkim hi a kutah a re top.

‘Nu Lak’ cu buai hiamhiam in a phone lawngcaan ti umlo rori in mi a biak. “Okay, okay, a tthabik in ka rak zuam ding,” tin ti phahin a phone a vun thlak cu……. ‘Pa Buai’ ih misscall a rak si lala. “Hmm!!!!!” ti lawngin a thawpi a suah sal lala. ‘Nu Lak’ cu ‘Maid Agency’ ttuan in ‘Bukit Timah Shopping Centre” ih um mi a si. Anih a hnattuan cu phone biak rero hi a si. Kawlram phone a ko thul, Singapore Employer(Inntek) pawl a biak thul, mi inn umpawl in an lungkim lonak thu an sawisiat can tin…. A hna khal set thluh zik thlang. A kaa khal kham theituk. Cutin nikhat sungah biakaw thei loih can an hman can hi siarcawk a si nawn lo.

‘Pa Buai’ cu Church ih rinsan emem mi a si. Fala hmuahhmuah ih zoh mi a si fawn. Fala hrekkhat tla cu ‘Pa Buai’ ih khawm a hruai ding hngakhlap zettu khal bolo! Cu lakah ‘Nu Lak’ cu thlahnih ah veikhat tivek lawng ‘FCFS’ ah a khawm thei. A san cu, a Boss-pawl in zarhpi ni sun 12pm tiang lawng off an pek ruangah a si. Ttongdang hmannak ah a khawm ttheu. Cutin duhdawtnak thinlung nei veve si in thin hnangam ti um thiam loin ‘Pa Buai’ le ‘Nu Lak’ cu can an hmang ringring. ‘Pa Buai’ in, “Keimah lawngin ka lo duh ih ka lo ngaithiam ringring ruangah luar na kai!” a ti ih ‘Nu Lak’ ve cun, “keimah minu sawn ih kawh hmaisa le simfiang lawng na hngak ringring!” a rak ti ve.

Nikhat cu ‘leitlun duhdawtnak ni’ an timi ‘VALENTINE’S  DAY’ a si ih an pahnih cu rawl ei tlang dingin an tawngaw. Manawl can timi hi an neilo tuk veve. ‘Nu Lak’ cu zanah ‘France’ ttong a zir tikah man can a neilo. ‘Pa Buai’ khal le nauhakpawl Chin/laica a zirh ih a man velo. Cutin can maltakte an tawnawk sunah hitin biazai an seh aw……

Valpa ih biazai:

Ka tum i ruh ih saruh tong ti bang,
Ka ton ngahmi a ruh ah hnangam tawk hlah ee;
Leng hmuah lakih iang nei hleihluan ka hrang lengdawh.
Zingpit cerlian ninu hongsuak khaw;
Ka hrang khawruah tamtertu ah.
Zan thlapa te suak salin, a phurhcihmi ka mitthli,
Merem thiamhlah ‘Tintling’ cung zal zawn;
Ham ve keng ee… Uico saruh ham bang ti ing-khaw,
Theisal ee maw, Uico tal ka rak si ta-heklo cu!
Ka thla a ttem Valdang anka na leh can,
Ka thla a vai mikip hahio mi ‘Hlingpar’ na si ka fiang can;
Ttawt ngahtu si thei ve ing maw ti ruatin nittungrau maw!
Thin hnangam ti um lo’n ka kil tlaitluan mi ‘Hlingpar’;
An sim ‘Ak’ rawl tlan mi hluan in ee…
Ka thitha hmuah fep in ka ruh thlik tiang zoitu na an nem,
Thei sal ningla ka hrang hnangamnak tling i tur maw!
Ngam thei hlah ee.. anka nem lawng cun,
Lo ngen ko ning! ‘Hnangam ten i um ter aw’ tin;
Ka hrang hnangamnak a tlin ding ni,
Run inn hlumtu ka ‘Thainu’ na si tik can;
Hi thu na theihcun hnangam ten i umter ding ruahsannak thawn,
Ka lo ngen ee,,, “Hnangam ten i umter aw’ ka duat boihte laklak!….” tin, ‘Pa Buai’ cun biazai a seh.

‘Nu Lak’ khal cu um thei lo’n  lungsung anka nem cu a hon sam ve.
Lengnu ih biazai:

A kung um loin ‘par’ um thei hlah ee…
‘Par-kung’ hmuahhmuah lakih hling nei ‘par-kung’ maw ka rak tawn ngah.
Lengdawh mitza tawn-awknak a cuih hling nei ‘par-kung’!
Khiak theitu si zuam in nittung ka rau ve maw!
I pawm velo thing-sang par le khamhrap lakah,
Zawng fano in tlak phangin a nu a pawm hngetmi hluan in,
Thlaphang zet cingten ka pawm hngetmi kan duhdawtnak;
Zan khua tlai ah ‘Tintling’ cung zal merem thiam lo’n,
Ka ruat tawn ee…Van ih Si-Ar rual tla siar tlangin,
Zau ka nuam ee… na ttangneem sung bei lai ni.
Lo ngen ve ning! “Hnangam ten i umter aw” tin,
Hlan pipupawl an sim tawnmi hluan in;
Ttaangdang sungah nuam hna zau ih um ai-in,
Ka hril sawn ee… na ei siambawltu si ding ka duh ‘Huval’;
Arpi fano rual thla in a hupmi bang,
Na thla in i zawn hram law na ttang nem sungah,
Hnangamten zal thlang ko ning ka Uu Buabuai aw.

Tin a hon seh ve. Cutin…… Cutin……. Zo hman “Hnangam ten ka lo um ter ding” ti tu um loin “HNANGAM TEN I UM TER AW” ti in an can an cemter ta an ti panlo maw…..

Malaysia LCF Biakinn Ah Hlunghlai Zetin Calai Seminar Nei

Lai mi in Linguistic lam ih zirsang Master tiang kan neihsun Rev. Khar Thuan cu GCCF conference nei ding in kan dung Tlawngkai nithum ah khan zarh khat sung cam ding in Malaysia a thleng.

Caan tawite sung Malaysia ih can a hman sungah kan Lai mipawl zawnruat in Calai Seminar cu 29/04/2012 Cawlhnisun tlailam khawm tiak hnuah neih a si.

Hi Calai Seminar hi zanlam 2:30pm ihsin pastor T. Sui San Lal in hram thawknak thlacam nak a neih hnuah hi Seminar hi thawk a si. Rev. Khar Thuan cun a hnuai ih tarlang mi pawl simfiangnak a nei.

Study of Language
Phonetic (awsuah)
Phonology (tawng pianthlai)
Grammar
Semantics
Discourse

Translation, pawl simfiangnak a neih hnuah mipi lam ihsin thusutnak can an awng. Calai lam ih thaw um khawm an sivekin thusuhnak le sanletnak hrang caan tamzet a feh tiah a hmun ih fehtu CT palai cun a sim.

Simfiangnak a neih mi pawl lak ih thupizet pawl  cu, “A description of Falam Phonology” theihfeng ah cun buai ding hi a rak um lo a ti”. Tawnghram pawl le Awsuak pawl simfiangnak a neih hnuah “Triphthong le Diphthong, Morphology pawl tla simfiangnak a nei. Zanlam 5:30pm a kim tiang caan hman a si.

Ka Nunnak Na Si

Ka Nunnak Na Si

“Mawite, tu tiangah veikhatte rori hman “ka lo duh” in ti ve dahlo. Keicun “ka lo duh” ka lo ti hi siarcawk khal a si nawnding ka zumlo. “ka lo duh” i ti duh lonak hi ziangruang bikah a si ding ti hi ka theifiang duh. Tlang zetin in sim lawlaw mai awla! Na duhzawng mipa ka si lo ruangah maw? Lole, duhmi dang na neihzo ruangah maw? Maw, ka lo duhdan hi na lungkim tawklo. Na hrangah ka tling tawklo ruangah si? I duhlo khalle “ka lo duhlo” in ti lawlaw mai awla. Asina’n kei cun ka lo duh tuk timi hi keimah le keimah ka theihawk vek in na theih ve ka ring” Mawite cu Thang Kuk ih mitmu ah a zoh keukeu ih a mitthli a hal t’iamt’iam. Netabik ah sup aw thei lo’n a mitthli cu a biang note parah an luang kuahko. Minute malte sung be awlo riai cun hmatawn in an ding ziarziar. Mawite cun a kut in a mitthli a hon hnuthul ih a hnap hnuk hnuphno phah cun… Famkim Siarbet

Keimah Nupi (Part 6) Mai Sokhlei Par

KEIMAI NUPI

(Part 6)

Mai Sokhlei Par

Mi in anmai nupi thu an run rel celcel haiih, kei tla keimai nupi thu hi sim lo le rel loin ka um thei nawn lo. Ka thinlung sungih ka rak pai hlenhlinak a rei tuk thlangih, ka awm ah a hnawhkhataw thetthet thlang.

Kan nu thawn kan neihawknak hi kum hra lai a rei ve thlang. Nikum tiangah cun buainak pipa tla kan rak nei dah lo. Innsang nuam le lungrual zet kan rak si. Hmansehla tu cun kan innsangah tawhawknak le hngirhngoawknak thimkhawzing a tlungih kan nupa in thenawk kan man tiatia thlang.

Cutlukih a rak hlawhtling zo mi innsang si si, ziangruangahsaw cuti menih nan run can thluh? tiah nan mang a bang men thei. Cumi tak cu famteh lo sim ka duh mi cu!

Kanni’nupa thuhla cu a danglam hleice ngaingai. Kan run buai thoknak cu kan nu a run pianthar ihsin a si.

Kei cu tlangval lai ihsin Jesuh Krih cu rundamtu ah cohlang in, kumkhaw nunnak hrangah hnangamnak a rak nei zo mi, piangthar felfai pakhat ka si. A mak zet mi cu, kei ka rak pianthardan le kan nui’pianthardan hi OT dan le NT dan a danawk tlukin a dangaw verver. Cumi cu si kan nupa kan buai thluhnak hrampi cu. Famkim Siarbet

Cathiam Ka Ti Bikmi

Cathiam Ka Ti Bikmi

Mai Zilthli Lal Nei Thluai

Ka Nauhak te lai ih ka Pa in in rak sim dahmi thu tutiang ka mang ringring lai. Kan khawpa pakhat (a hmin cu ka cing nawn ngelcello, kan khua cu Thlancing a si) cu phunra a phi ih kumkhatnak ah a ong cih vurvo. Asina’n B in a ong. (cumi san lai ahcun phunhra hi A ih on le B ih on ti a rak um si hmang). A thin di a riamlo tuk. A ih on tengteng dinghi  duhthusam cu a si.

A hmaikum ah phunhra cu a phi lala. Asina’n B thotho in a ong. A mah hi cathiam zetmi a si. A kainak tlawng tinkim khalah saya pawl in an rinsan thei ngaingai. Thinnau, beidawnglo te’n a kumthumnak phunhra cu a phi leh lala. Cukhal cu B thotho in  ong. A mah hi cathiam ngaingai a si ruangah phunhra an phit lai ih a kiangkap ih to, cathaim lemlo pawl hmanin A in an on phah thluh. A mai’  zarah mi tampi A in a ong rero na’n a mah bikbik cu B lawnglawng a ong ti cu mangbangza ngaingai a si. Famkim Siarbet

Thal Fang Bang I Pai Tu

Thal Fang Bang I Pai Tu

Thal cu ral an do nak ih, an hman theu mi hriamhrei a si. Sapelnak khal ih hman mi a si. A zik a zum ih teh a nei. Taksa sung a lut hnu hmanah phawi lohli a theih lo. Cu vek ih mi that thei a si. Naupai khal in nau a hrin dingah a thihpi ding maw, thaten a nei ding ti theih a si ve lo ruangah thinhar mangbang in an um theu. Thal fang pai le naupai tahthimnak ih sullam cu thih le nun kar lak ih um a si. Hlan ka PuPa  pawl khal in “Nau Pai le Thal Fang Pai” ti in tongthimnak an rak nei ….

Khua hlan ahcun sii le vai lam tuamhlawmawknak a that lo ruagah nau le nu khal tam pi an thih phah. Sii thatha ti vek khal a um lem lo, sizung tla a um lo, Sibawi thiam leh zirsang khal an tam lo! Khua khatah nau sar thiam pahnih khat an um ti fang lawng a rak si theu. Nau tuamhlawm thiam khal an um lo ih, naute tampi le nu tiang in thlanmual an liam phah. Cu vek si cing khal in Pathian zangfahnak thawn kan rak pitling ve cio.

Hmanseh a tui kan san ahcun san ti luan khal a thlengaw vivo thlang ih fimthiamnak lam khal ah a sang vivo. Sii thatha leh si bawi thiam, mifim, mi thiam khal kan tam vivo thlang ruangah nu le nau thi ti mi cu um nawn lo tluk in, an mal vivo. Famkim Siarbet

Airport Ih Asian Fala Pahnih

Airport ih Asian fala pahnih

Mike Zuung Ceu

26 March2012, Tlawngkai nikhat, Indianapolis Airport in ka training kainak New Haven, CT lam pan in vanzam ka to. Zinglam 5:10 am vanzam to ding ka si ruangah zing 3:30am ah ka tho. Rev. Ci Kap cu 4:00am ah Airport ih I hei thlah dingah an mileng khan ah timcia in a to. Ka thawh veten ti ka kholh ih ka timtuah aw ve. Zing 4:00am ah inn tlunta khan in ka rung tum. Rev. Ci Kap thawn a motor in Airport lam kan pan mai. Cuti tluk ih zingpit ah ka pawh a tulnak khal cu zanlam 1:00pm ah ka training thok ding a siih, cumi caan khelh dingin Rev. Ci Kap in vanzam I leisaknak  a si. Hivek zingtuk ih ka zam tul caan a um phah theu ih I thlahtu pawl le ka riahnak inntek pawl cu an zon a zaizet theu. Lungawiten ziangkim in ngaihtuah sak hai ko na’n keimah lam cun ihhmu khop lo ih ka tuah hai mi parah ka hmai an song zet theu. Pathian in thluasuah hai hramseh ti  thla camsak lawng hi keimah lam ih ka ti theisun a si. Tarining kai phah ih kawhhran vehvai ka si ruangah hiti ti locun hril ding dang ka nei ve lo. Asinan hiti te in kawhhran vehvai thei ih ka um thei khal hi Pathian ih remruah le kawhhran pawl ih hmarngainak ruangah a si ih Pathian ka thangthat zet a si. Famkim Siarbet

Zuu Ka Hua

Zuu Ka Hua

Mai Zilthli Lal Nei Thluai

Ka zumawk vek cekci in tuisun phunhra result ah cu ka hmin “Zilthli Lal Nei Thluai” ti mi cu a tel lo ngai ngai. “ca a zuam lo tuk si, ca a zoh dah lo mi cu a sung pei cu” tin in diriam thup tu tla nan um men thei. Cuti ih nan ti khal le “thuphan a si” ti’n ka lo el cuang lo ding. Thu dik a si ko. A sinan ziang ruang ah ca ka zoh thei dah lo? Ti hi in suttu an um dah lo mi te hi a na ka ti zet. In sut tu nan um lo nan minung cu kan thinlung sungih ummi lungawinak, riahsiatnak pawl hi mi pakhat hnen ah ka phuan suak le kan tuardan a nuam deuh theu, kei khal ka awm sungih thuthup ka tuarnak pawl nan hnenah ka run irhsuak law law mei ding. Mihrek in cu zohniamnak ah tla in hmang men thei. Keimah vek ih tuartu nan um ve pang le in theithiampi ve ko ding ka zum. Kapa tla cu nan theizet ka ring. Kan dung baite ah zuu ruang ih mual in liamsan tu kha. Kan sungkua kimtei kan umkhawm lai ah cun ka nulepa hi cozah hna an tuan veve. Ka Nu’i hnatuannak zarah cozah inn (U-ing)ah kan um. Kan umnak cu cozah hnatuan pawl lawng um theih a si. Kan venghnen / inn hnen pawl khal cozah hnatuan lawnglawng an si thluh. Kan inn kiangkap ah cun kan laimi hmuh ding an um lo tluk a si. Kawlmi lawng lawng an si ih kawl biaknak betu (zumlo tu) lawng an si. Kan inn sangka tlun ah cun Ka Pai’ hmin, kohhran hmin le Christian timi te cu thingtlep fate parah cangan thiampawl in kutngan mawi emem in an ngan mi cu kan tar lengli. Zokhal in kan innhmai zin a zawhtu pohpoh in christian kan si cu an thei thei mai. Kan inhnen pawl cu kawlmi hlir an si tikah kawl rualpi tampi ka nei. Famkim Siarbet

Thlawsuah

THLAWSUAH

Mai Chin Nun Mawi

Tlangvalpa te cu lo feh dingin hramlak lam a pan. A lo a thlen in lohna cu sunvu te’n a t’uan. Sunni le a sa tuk, a bangzet thlang, a thlanhri an put, a ril a rawng, a ti hal. Tidai in ding cun a lo kiang ih tikhur lam cu a pan.

Tikhur lam a hei zoh cu a ke kal a cawl dukdi! A mang a bang! Lamzin kap ah a relh ih tikhur ih daibual rerotu fala pathum cu a rak zohthup. An ruangrai le a t’ha, an hmuihmel le sawisel ding a umlo. A zoh tuknak ah a mit t’hep ding hman a hngilh. A lo hnat’uan bangnak, a tihal le rilrawn khal a mang nawnlo. A thinlung le a ruahnak ahcun cui’ fala pathum lawnglawng an um thlang. An mawinak, an iang neihnak pawl cun thlangvalpai’ thinlung a mawl terthluh. Tlangvalpai’ khawvel sungah cun cui’ fala pathum lawnglawng an um thlang. Thildang zianghman a tuah, a ruat thiam nawnlo.

Fala pathum cu daibual an t’heh in an mah le thla ciar an bun ih Mupi men bangin an zuar hlosal. Tlangvalpa cu a zaan a itthat theilo. Thu a ruat. “khatluk fala mawi hi ka nupi ah cang thei sehla!” a mahte thu a ruat. Fala pathum lak ihsin a mawi a ti bikmi kha a nunpi ah cangter thei cun sunmang a nei. A cui’ a sunmang cu a damsan a si vek in thihpi tiang khalin a tiam aw. Famkim Siarbet

Next Page »