RUHRO TUALRAWN – Biazai

Phun Hram Awi

Remdaihnak hawlin a tawi vak rero tu fala thianghlim note pakhat, a
saduhthah cu rem le dai ih um ding. A kaingkap cu hring dildel hman
sehla uar ding tlak pakhat hman a um lo. A beisei mi duhdawtnak in
hnangamnak a pe cuang fawn si lo. Maw remdaihnak…. tin a hruum  a rak.
Kan leilungpi hi ral in a khat. Ral tampi cu remdaihnak duh ruangah a
cangmi pawl an um. Remnak hawlin thisen a luangmi tualrawn khi zoh
hnik aw, zo an mawh ti ih sim ding a har. Maih tuahmi simtha le rel
thiam hlir an si fawn. Remdaihnak a um theinak dingah ngaidamnak khui
ah so an ret?…?…?

Famkim Siarbet

Aw Laimi

Aw Laimi

A mawibik mi aw lairam
Laimi kan semnak ram
Hnam phunkim ttong phunkim thawn
Tlangtin ah nuamzai rel in khua kan sak

Laimi kan rethei hmanseh
Pathian theitu kan si
Kan lenak tlang le mual dang hmanseh
Laimi unau kan si

Pathian cawisannak ruangah
Leitlun ramkip ah kan tlanlennak lairam tan in
A tu cu ramnuam ah maw?
Kan thlennak hmunkip ah laimi sinak hngilh lo in
Lungrualten leng uhsi

Leitlun kan nun sungah
Laimi kan sinak thei in
Lai miphun tthansonak hrang
Laimi lungrual te in
Kutza kai in hmai nawr sin uhsi

Salai Lal Biak Luai @ Luaite

Biazai : Dawt Mi CT

Dawt Mi CT

Hausum Fanu

Dawtmi CT ropi ngai ee;
Na tanlaknak ka hrang thatnak
Na zuamnak cu kei hlawknak  an cang
Na pekawknakah hnangamnak ka co
Theihhmuah suah in mi hrang tuan in
Na lainatnak a maksak tuk ee
Dawt mi CT dam rei seh law!

Theihkohnak ding thutha in sim
Harhdamnak hrang zirnak in pe
Ka thlarau hrang tiang dam ter duhah
Thuthangtha thawn lamzin in hmuh
Leitlun thuah sanman ding in
Thu maksak pawl in thei ter fawn
Na ngaihsaknak a sunglawi ngai ee

Dawt tu ka nu’i ankaa nem bang
Ka hrang fim ding beisei in
Thufim zirh in kei in duhsak
Zaihla mawi in ka lung in hnem
Biazai rii in ka lung in thlim
Na ankaa nem in hlan mi
Ka lungthin sung thlum duahdo ee

Miphun hrangah na tuan na zuam
Chin mi hrangah taimak suah in
Harsat ,buainak tawng phah hmanseh
Beidong siang lawn na zuam tento
Miphun hrangah na duhdawtnak cu
Thuhla hmang in na lang ter sin
Dawt mi CT cak sin seh law

Rinum vapual bang i hruai sin aw
Zalennak ram cu i hmufiang ter sin aw
Na ankaa cu ka ngai ring ring ding
Na tuh mi thingrah a ei ngah tu in
Na duhsaknak hmufiang hramseh
CT na ram kau sinseh
CT na hmelmawi cuang sin seh
Kei CT dawt tu in
Lungtak suah ih duhsaknak ankaa lo hlan ve ning
Dawt mi CT na hrangah ti in!!

Biazai By Mupi : Duh Hnuhnu Ah

Duh Hnuhnu Cun

Salai Mupi

Duh hnuhnu ah, huat tum sal hlah,
Duh hnuhnu ah, tthen tum sal hlah,
Duh hnuhnu ah, ruat buai sal  hlah,
Duh hnuhnu ah,phun nawi sal hlah.
Duh hnuhnu ah, hro thap sal hlah

Duh hnuhnu ah, huatnak hawl hlah.
Duh hnuhnu ah, iainak hawl hlah,
Duh hnuhnu ah, sualnak hawl hlah,
Duh hnuhnu ah,samnak hawl hlah
Duh hnuhnu ah,puhmawh hawl hlah
Duh hnuhnu ah, sumpai zoh hlah

Duh hnuhnu ah, lennak zoh hlah
Duh hnuhnu ah, fim/thiam zoh hlah.
Duh hnuhnu ah, mawinak zoh  hlah
Duh hnuhnu ah, siatnak zoh hlah

Duh hnuhnu ah, mitkem nawn hlah
Duh hnuhnu ah, tuahse nawn hlah
Duh hnuhnu ah, hua sal nawn hlah
Duh hnuhnu ah, relse nawn hlah,
Duh hnuhnu ah, siraw nawn hlah

Duh hnuhnu ah, thinsau zir aw
Duh hnuhnu ah, duat thiam zir aw
Duh hnuhnu ah, ngaithiam zir aw
Duh hnuhnu ah,kumkhua duh aw
Duh hnuhnu ah, thihcilh tawp aw.

Biazai : Manglam Talah Maw

MANGLAM TALAH MAW

Hausum Fanu

Ka lo ngai ee maw ka dawt mi te
Lengnu dang thawn nunnuam zet ih
Caan nan hmantlan ka hmuh tikah
Lo kawh lehsal ka tum nawn lo
Na tangsung ih i pomsal ding in ka lo ngen lo
Nang lo ngainak demdeuh dingah
Zangmang talah rak leng ve aw

I tan tu nang cungkhua nu in mal lo sawm seh
Mawh ka lo thluk siang lo
I phatsan hnu hmanah ka lo hua siang lo
Siang lo cing in, ui duahdo cing in
Siang zet bang in ka lo feh ter nan
Nang lo ngainak a demdeuh dingah
Sunmang talah rak leng aw maw

Ka lo duh kumkhua ding na ti
Ka lo tan nawn lo ding in ti
Ka lo hngak ding tin in tiam nan
Na hrangah ti ih ka rat tikah cun
I rak hngahnak hmunah cun
Mitthli lawng maw ka hrang tang
Ka sir her in ka lo hawlnan
A kim nawn lo mi thuthiam leh
Lungkuai Biazai lawng maw in tan ta

I hlan salaw na dawtnak thu
I tiamsal aw rinumnak thu
Lungfim ih ka men caanah
A thlum mi na ankaa tawng lo hman ning
Ka ihthah sungtalah tawng thei ding in
Rakleng hramaw manglam talah

Nang lo ngainak demdeuh ding in
Manglam talah i pomsal aw
Ka lo ngen,ka lo dil
Manglam talah! Manglam talah!!!!

Biazai : Ka Tuar Caanah

KA TUAR CAANAH

Mai. Tuesday Dawt

Ka riahsiat caanah,
In hnam theu aw!
Ka mitthli a tlak caanah,
In pom theu aw!
Ka um har caanah,
Ka kiangah in um pi aw!
Ka ning hang caanah,
In hnem aw!
Ka dam lo caanah,
Ka lo duh in ti aw!
A kumtluan in,
Ka kiang naih ah,
In um pi ringring aw!!
++++++++++++++++++++++++++++
LUNGKUAI

L- Liam ko law
U- Ui cing te in
N- Na parmawite
G-Green rose par bang
K- Ka lunngthin ah
U- Uai ni um lo
A – A kuai mi lung
I – I zangfah hram!!!

+++++++++++++++++++++++++++++
DUHDAWTNAK

D-Duhdawtnak cu
U-Uai dah lo ding
H- Hngilh ni um lo’n
D-Dawtnak bia thu
A-Aankaa thlum te
W-“Wine” ih tongkam men si lo
T-Thit umnak thawn
N-Nang le kei
A-A kumkhua in
K-Kan lengtlang ding…

Biazai : Din Sal Uh Si

Dinsal Uh Si

Mai Zilthli Lal Nei Thluai

Pumkhat kan sinak Salai le Mai hmin hmang in
Lungrual uhsi Lai hrinhniang tla
Kan fimnak cu hrang ter uhsi zilthlinem bang
Kan neihnak cu parter uhsi huaisen zetmi Sokhleipar bang
Thinlung hmunkhat neitlang uhsi Rihlipi bang

T’henzai tu cu sial sin uhsi Lungrualnak Ralnam thawn
Hmainawr sin uhsi sanliluan in kan Chinram a fen tellonak dingah
T’awng phunkhat hmangin kan ko kir ding Runva phunkim
Kutkaiaw in kan cingsal ding Parmawi phunkim
Hmuitinmi pakhat nei in dinsal uhsi kan ram nuamte
Uaini neilo rin umnak thawn duhdawt uhsi kan ram kan khua

P.S : The Chin Time Le Banglore (Monthlynews) ih suah zomi bezai a si

Rual Duh Ruat Hnik Law!

RUALDUH RUATHNIK LAW!

Liamcia caan ih kan tuah kan tuan
kan cangvaihnak,
Kan mi kan zia langfiang tertu;
Tesinfa ih an rel dingmi,
Kan thuanthu…

A ralai ding kan hmailam caan,
Khui zin zawh in ziang dinhmun ah
ziang kan cang ding;
Theih cia um lo,
Thuthup hlir…

Kan hrang thabik tu’ih kan nunnak,
Duhbang hman theih;
Sunglawi caan tha,
Zangfahnak laksawng kan dong cio.

Rualduh ruat hnik law,
Cuih caan tawite;
Na hman daan ziangvek a si?

Kum Hlun Mangtha

Kum Hlun Mangtha

 

Cung Pathian zaangfahnak le

A lam hruainak thawng in

Kum hlun cu liam in

Kum thar kan thleng zo

 

Duhnung lo nundan hmuah le

Sualnak ka rak tuah mi

Kumhlun in liampi sehlaw

Mual dang ah

 

Kumhlun zamual liam hnu

Khir tumin ai hram hman ning

Kawhkir sal a thei nawn si lo

Siang lo cingten’ thlahliam ko ning 2011

 

Kumhlun maw mangtha

Nunhlun mangtha

Ka ngai nawn lo ding kum hlun

Duhnung kumthar ah

Nun thar,ruahnak thar thawn

Ka nung thlang ding

Kum hlun mangtha

 

Salai Lal Biak Luai @ Luaite

Manpek T’ul Sehla

Manpek T’ul Sehla

Mai Zilthli Lal Nei Thluai

Nitin ka thawtmi ka thaw hi
Manpek t’ul sehla
Kei ka thihnak a reizo ding

Nitin ka hawpmi thlithiangte tla hi
Manpek tu’l sehla
Kei tuisunni tiang ka dam lamlam lo ding

Nitin ka thil tuah/t’uannak ih ka hmanmi ka kut tlahi
Manpek t’ul sehla
Kei kut ka neihnawnlonak a reizet zo ding

Nitin ka hmanmi ka ke tla hi
Manpek t’ul sehla
Feh/Vak theilo ih ka ke a bulnak a reizo ding

Khua ka hmuh theinak ka mit tla hi
Manpek t’ul sehla
Kei ka mit a cawtnak a reizo ding

Thu ka theih theinak ka hna tla hi
Manpek t’ul sehla
Kei ka hna a setnak a reizo ding

Ka ei/in/t’awng theinak ka ka/lei tla hi
Manpek t’ul sehla
Kei tuisunniah ka in/ei/t’awng thei nawn lamlam loding

Thawsuah pakhat hnu pakhat siar aw
Bawipai’ pekmi in a lo mangbangter ding

Biazai : Phatsan Tu’i Annka

PHATSAN TU’I ANNKA

Hausum Fanu

Thennak biathu in hlan zan kha
Lungvai ruairawn ka lungaa theh
Ka zohmi thilhman hmufiang thei lawn
Ka ruahnak hman ee theifiang thei lo
Ka tap ruairo maw a cu’i zanah
Kan rak hmantlan mi caan duhnung pawl
Kan rak rem mi runinn mawite
Kan rak hlanawk mi dawtnak thu pawl
Thuanthu hlun ih cang men ding cu
Ka siang hrim lo ,duh ka khop hrih lo

Ziang tin so maw ka ti ding?
Ziang ka tuah le ka hnen na um thei ding?
Mah lawng ih ka thaisun caan hman ding
Ka ngam hrim lo,ka hreh duahdo
Ka lungthlitum na hnenah hlan in
Ka ruahsan mi nang na si kha
A lo tul bik tu kei leng nu hi
Ruat ve lawn maw in um san ding!!

Zangfah zoh tal in in zoh ta hnik
Ka mitthli ih ka lo sim hi run ngai ta hnik
Mangbang anhai ih a tap mi ka mitthmai run hmu ta hnik
Ziang thu ruangah kei i tan ta ding?
Bumawknak lawng in maw lai na rel
Phatsan awknak in na dung in tun
Na duhdawt mi in nikhat ni ah
Duhdah zet ih a lo tan leh tikah
Kei tuarnak hi theithiam leh in
Dawt tu’i lungthin bum hram nawn hlah

Tongkam khaa zet in fah zanah
Dunglet hoi ih na liam hnu cu
Kei hrang kumkhua thinnatnak ding
In thlen ter tu an rung cang ti hi
Veikhat te tal ruat ve kei maw
Nang phatsan tu in!!

Biazai : Nang Hrangah Ti In

NANG HRANGAH TI IN

Hausum Fanu

An relhai maw thianrual pawl in
“Na valpa cu par tin a lawr ee” ti in
Thei cing in maw ka valpa cu
Hua siang lo ten ka dawt tho tho
Duh in kham hai sungkua pawl in
“A nuncanzia a mawi lo ee
ruat duh hram hlah cu bang val cu” an ti
Hmu cing in maw a that lo nak pawl
Hua siang lo ten ka dawt tho tho

Ka thik ding zawng ih um nuam na ti
I hniksaknak sunzan ka tuar
Har ti cing in ka valpa cu
Hua siang lo ten ka dawt tho tho
Ka bang lo ding nang ka lo duhnak
I hniksak hrih ko poi ka ti lo
Ka tuar hrih ko ding nangmah hrangah
Hrang hrih ko seh hi thlisia cu
Zilthli nem in khua a leh ding tin zumnak ka nei
A sinak ruangah ka dawt si lo
Amah si ruangah ka dawt mi si fawn

A caan kim tikah na theithiam leh ding
Na parih ka ret mi ka lungput hmuah in
Na tul caanah na hrang ka um ding
Duhdawtnak lawng na hrang ka nei
Sualnak hmu ding cun ka duhnak mit a caw
Ngaidamnak cun that lo nak a neh fawn

Harhrih hmanseh ka tuar ko ding
Hla aw hrih hmanseh ka hngak lai ding
Val nang hrangah ka parmawi nak uai seh law
Nang lo duh banzai ka rel thei si lo
Nang hrangah ti in
Ka lo pe ee hi ka nunnak caan hmuah in !!

Next Page »