Capoh Hnihsuak

download (8)

Khawlkhawmtu – Thawng Thawng Ray

Neta ahcun

Ka rualpa cu nunau pakhat thawn an nei-aw. Cu nu cu innsang rak nei dah zo le fa pahnih neimi a si. Cui ṭhit-umnak ahcun, a fa le pahnih kum 3 mi le kum 5 mi nauhak cu a Pi thawn an ra ve. Khawm an thok hlan deuh te ah a Pi cun cui nauhak pahnih hnenah dim te’n thu a cah, “Huat suak hlah uh maw, ṭha te’n nan um lo asile, neta ahcun ka lo hruai nawn lo ding” ti-in.

Thik dingin

Nikhat cu innsangnu pakhat in an hnenum fala nute cu a ko ih, “Mary, kan Pa hi a hnaṭuannak ih an Sungṭuannu thawn an uar-aw deuh a bang ka ti,” ti-ah a sim. Cule an hnenum nute cun, “Ka zum lo; ka Pi hi thik seh ti in duh ruangih in simmi men na si ko cuh!” ti-ah a sawn.

Ka Pa cun

Lothlo tlangval pakhat, Cawleng tlu kiangih ding rero cu, khaw sungih lothlo pacang pakhat in a hmu-ih, cui tlangval cu a ko, “Billy, ra aw. Na leng cun kha ti’n ret hrih men awla rawl ei dingin kan inn ah in ra thlun aw. Cule Khaw sungih um pawl kan va ko dingih na leng cu kan tung sal ding” ti-ah a ti.

“Ka lungawi, asinan cu ti-ih ka tuah le, ka Pa cun a lung a kim ka zum lo.”
“Aw… Zianghman ruat duh hlah, ra men aw, cuvek men a thupi lo” ti-ah a sawm thotho.
“Si ee, asile  ka lo thlun men pei cu! Asinan ka Pa cun hi ti-ih ka lo tlun cu a lung a kim ka zum lo lawlaw,” a ti sal.

Thaw zetih rawl a ei hnu-ah, inntek pawl hnenah cun Billy cun lungawithu a sim, “Ka lung a awi tuk, asinan ka thei cia, ka Pa cu a thin a heng zo nasa ding.”
“ Um hrih! Ziangsaw thu mumal lo cu na rel rero i… Na Pa cu khui tawkah saw a um rengreng?”

“A tlumi leng hnuai ah”

Cuvek thotho in

Amah hnakih a nauhak zetmi fala pakhat a tthi-tu kum 93 ih upa putar pakhat cun Siibawi pai’ hnenah a va fehih, naute an neih zik thu lungawi takin a va sim.

Cule Siibawipa cun hi ti’n a sawn, “Thuanthu pakhat ka lo sim ding. Voikhat ah, mi molce zet pakhat hi Sa kap dingin ram ah a feh. Meithal ken ding ai-ah nithawng(umbrella) pakhat a ken pang. Ram tawih tumnak hmun a thlen hlanah rin lo pi’n Pawpi thawn an tong-aw thut-thi ih a kenmi thawng cun a vun kap. Cule cui’ Pawpi cu zaangpathal in dunglam ah letin a ril ciamco ih a thi ta riai.”
“Aaaaa… Cuvek thilcang thei a si lo. Mi pakhat khat in an rak kah a si ko ding cuh.”
“Tu khal cuvek cekci a si ko.”

Tuah nawn hlah

Dam lo pakhat khal Siibawi pai’ hnenah fehin a natnak a va zoh ter. Cule Siibawipa in a natnak pawl a zohfel thluh hnu-ah hiti’n ruahnak a pek.

“Na dam vivo nak dingah thil pakhat khat cu na tuah a ṭul ding”
“Ziang si ka tuah ding, Siibawipa?”
“Hi ti’n si. Zing tinte’n lamlak na vak ringring ding, asilole zamrangte’n na tlan ṭheu ding”
“Aiii ha! Zing tin te’n peng khat lole peng hnih cu ka tlan ringring a si si”
“Cu ti asile tlan nawn lo-in cawl mai aw”

Pa thum nan si cun

Kum upa tuk hrih lemlo, Catholic Father pahnih khal Bike(Mawṭaw Cycle) cak nawn in an mawng kha Mawṭaw PK in a hmuh tikah, a rak khamih, “Nan mawng cak tuk ti nan thei lo maw?”
“Na thla phang duh hlah: Kan hnenah Pathian a um si”
“A si ahcun cawh nan kuan a ṭul ding; Bike pakhat ah mi pathum phur-awk hi kan daan in a duh lo”

Bus driver le Pator pa

Bus driver le Pator pa cu nikhat sungah an thi tlang. Bus driver pa cu Vanram ah a kai-ih Pastor pa cu Hell ah a tla. Cu tikah Pator pa in lungkim lo zetin Pathian hnenah ziangah hiti’n in tuahnaksan ti a sut tikah,

“Nang cu Pathian thu na sim tikah mi hmuahhmuah an itthat thluh. Asinan, hi mawṭaw mawngpa cu mawṭaw a mawn tin te’n a mawṭaw totu pawl in Pathian an biak ringring ruangah” ti-in Pathian cun a let.

Mifim cu

Tuluk mifim pakhat cu Khaw dangdang ah tlawngin Calai thu zirhnak a nei ringring. Cuti’n a feh tinte’n tlangleng a to ringring ih, tlangleng parih a hmuhmi pawl cu Sumdawng pawl lawnglawng an si tikah Peisa thu le an sumdawnnak thu lawnglawng an rel ringring ih zohman biak ding a nei ve dah lo.

Cuti’n nikhat cu tlangleng parah Tuluk mifim pai’ kiangah cun mi pakhat a to. Shakespeare ih Biazai cauk tumpi a siar rero cu a hmuh tikah Tuluk mifim pa cu a lung a awi tukih cu pa cu a biak ciamco. Asinan, cupa cun a ca lawnglawng kha a siar san men.

A netnak ah, Rail Station an thlenih thin hnangam le thawsuak takin cupa cun Tuluk mifim pa ih hnenah hi ti’n  a ti, “Kei hi Sumdawngmi pakhat ka si. Curuangah tui ṭum ka tlawnnak ahhin sui le ngun, peisa tampi ka keng. Hi vekih ca ka siar ciamco-naksan cu ka sui, ngun le peisa pawl hi mi in, in ruksak ka phan ruangah a si. Mi hmuahhmuah ih ruahdan a si ko lo maw; Mifim cu peisa an nei tuk dah lo ti hi.”

Milian fapa

Milian maktara ti-ih hminthang zet, Bank tampi uktu milian pakhat cu Taxi a sangih Amai’ Bank ahcun a feh. Cule a sanmi Taxi mawngtupa hnenah a tonak manih hlei-ah peisa malte lawng a pek bet. Cule driver pa cun, cui milian pai’ hnenah lungkim lo zetin, “Mizaan ih na fapa in ka mawṭaw in san lai ahcun tui’ in pekmi ih a let hra lai a hleifuanmi peisa in pek” a ti.

Cule Milianpa cun, “Si ee, anih cun a lo pek thei pei cu. Milian maktara pa a nei si maw… Kei cun ka nei ve lo pi,” ti-ah a sawn.

Tin Moe Shwe ih “Eh-Khan Ha-Tah-Mya” timi sungih ta a remcan danih lehmi an si.

Letkhawmtu => Salai Van Thawng Thang (Chinland Today Media)

 

 

Comments

comments

Comments

%d bloggers like this: