Cangantupawl ih hrangah “Cafang Pi Hmandan”

Cangantupawl ih hrangah
“Cafang Pi Hmandan”

– Sianglianuk Kianghrol

1. Catluan thoknak ttongfang ih cafang hmaisabik. (Tthimnak ah – #Ka rualpi tthabik cu ka uico hi a si.)

2. Ttongfang pawl ih cafang hmaisabik lakkhawm mi kaihtawi (abbreviation) le acronym pawl. (Tthimnak ah – USA, IBM, AIDS, UN)

3. Pathian hmin pawl ih cafang hmaisabik. (Tthimnak ah – Pathian, Khrih, Allah, Shiva, Budhha)

4. Minung hmin le an sinak (title) cafang hmaisabik. (Tthimnak ah – Salai Mang Lian, Sungttuan Lal Lian)

Asinan hmin tel lo in sinak (title) lawng ih ngan mi cu cafang pi thawn ngan thok lo ding. (Tthimnak ah – kan kawhhran #sungttuan a si. Mino #hotu a rak ttuan dah.)

#Hminsin: cangantu tthenkhat cun president le prime minister tivek cu minung pakhat lawng an kawhhmuhter can ah cafang pi thawn an thokter. (Tthimnak ah – Kan president/President in tuizan ah thucah a sim ding.)

5. A hlawmkawm ih um mi minung pawl ih hmin; miphun, hrinhnam tivek ih cafang hmaisabik. (Tthimnak ah – Asian, Chin, American, Arab.)

6. Ttong le sakhua (biaknak) hmin pawl ih cafang hmaisabik. (Tthimnak ah – Islam, Hinduism, Burmese, Japanese, English.)

7. Leiram zuk(map) ah a hranpa ih hmin pek mi hmun hmin ih cafang hmaisabik. (Tthimnak ah – New York Khawlipi, Indian Tifinriat, Zinghmuh Tlang, Surbung.)

8. Leilung parih hmunram hranpa hmin pawl ih cafang hmaisabik. (Tthimnak ah – Europe Nisuahlam, Thlanglam Laitlang, Nisuah Laili/Middle East.)

Asinan nisuah, nitlak, sak le thlang relnak ahcun cafang pi hman lo ding. (Tthimnak ah – Hitawk ihsin saklam ah so awla, peng hra na feh hnu in nitlaklam ah pial aw.)

9. Ni, thla le ni hleice hmin pawl ih cafang hmaisabik. (Nilai, Cawlhni, Meisen, January, Christmas, Zalennak Ni.)

Asinan camher (season) hmin pawl ahcun cafang pi hman lo ding. (Tthimnak ah – tthal, fur, thlatang.)

10. A hranpa a si mi inn tumpi, lilawn, tikhuah, rolung tivek ih hmin cafang hmaisabik. (Tthimnak ah – Yayzagyo Tikhuah, Var Lilawn, Pyramid Ropi, Innpi Var, Taj Mahal.)

11. A hrante’n a um mi pawlkom hmin pawl ih cafang hmaisabik. Himi ahhin cozah agency, hnattuannak pawlpi, tlawnginn, club, team tivek hmin pawl an tel. (Tthimnak ah – Kanbawza Bank, Manchester United, Harvard Phunsangtlawng, Red Cross, Fimthiamnak Tlangbawizung.)

12. Course number tel ih ngan mi tlawng subject hmin ih cafang hmaisabik. (Business Administration 312, Chemistry 201, Academic Writing 623.)

Asinan number a tel lo ahcun cafang pi hman lo ding. (Tthimnak ah – chemistry, geography, biology.)

13. Cabu, mekazin, thuthangca, thuanthucawn (play), zuknung, thuanthu, hla, suaizuk (painting), TV program tivek ih ttongfang hmaisabik, netabik le ttongfang thupi hmuahhmuah ih cafang hmaisabik. (Tthimnak ah – Chindwin Today, Vapual Luaithli, Zawltling le Nganbawm, Vankau Arsi, Pathian Cungnung Bik Seh.)

Academic Writing ahcun cabu, mekazin, thuthangca, thuanthucawn le zuknung thulu pawl hi italicize (cafang tlu deuh ih tuah) lole a hnuai rin (underline) an si ttheu.

Sirhsan: Oshima, Alice & Hogue, Ann, Introduction to Academic Writing, Third Edition, Pearson Education Inc. 2007. ISBN 0-13-193395-7

Comments

comments

Comments

%d bloggers like this: