Canganmi hrangih Cangan Ding

Canganmi hrangih Cangan Ding

JC Kip Ling

Calai lamih leitlun mi ropi Samuel Johnson cun, “Bezai ngantui’ hrangah hmantlaklo thil a um lo,” a rak ti. Bezai lawng ah a si lo, calai hngettek dang le nganca pohpoh sualsuak dingah hi thu hi theih ringring tlak a si. Canganmipawl khi zoh sehla tlawng phunsang kai le zirthiam hleice an si thluh loih, mi hmukhmak khal cu an si cuang fawn lo. Khaw khat, ram khat ih tlangleng tlang ciocio, hmuh le theihmi bangaw ciocio, canganmi le mi lo an um hi ziang ruangah a si pei? An danglamawknak ziang bik ha si ke?

Khawconnak ihsi rung tlung a rualnu cu Helen Keller in thu a rak sut. “Ziang thil ha na va hmuh?” tiah. A rualnu cun ziang cuca hman rel ding a thei lo. Helen cun mangbangthlak a ti nasa. A mit hung vang in Pathian kutsuak thingkung hrampi le khuaram tipawl, ni suak eng le nitlasur mawi zia, amah rak zirhtu le duhdawttu pawl, leitlun hmun hminthangpawl tla voikhatte tal vun hmuh thei a cak tuk. Mitcaw le hnaset ih a khawvel a pit bepbep cing hmanin, cabu ttha zetzet a ngan thotho. Mit le hna ttha zet Pathianin in pe cing hin ca kan ngan thei lo hi ziang kan cang? Thu paimi kan nei lo a rak si tlangpi. A nei khalin ngansuah ngaingai ti um siloih rel kengkeng lawngih kan riaral ter ruangah a si ttheu. Tlang mualmo – ei, in, it, vak tihi minung umdan dingih Pathian duhthusam a si lo ding.

Nikhat cu ka rualpa thawn kan leng tlang. Lamzin tthing repri te kan feh laiah nunau nauhak pakhat hi nau paw in kan tong. A mithmai a dur khiamkhi ih, leisin bih te’n a feh. Kan lanaw ih a fehliam. Kan hmu tlang veve ko nan, inn kan tlun hnuah ka rual cun bezai ttha tak fing khat a ngan phah. Kai le ka zohliam men ah a cang. Ka rual ka tluk lo nak kha ka ruat rero ih ka thei zo. Lungput ah si ka rak tluk lo. Annih cun khai nauhakte ih mithmai durnak san kha a ruat peh vivo ih, a tuarpi, a dinhmun ah a va ding hnik rero tinak a rak si.  Kei kha cun mihran(miipi) zohin ka rak zoh ih, a lengmi pakhat dinhmun in ka rak cuan menmen fang kha a rak si. Ka zang cu a fak ve ko nan, a dinhmun ah ka va dinpi ngaingai ban lo. Thuthang hawltu pakhat vek fangin ka rak retaw ih, kha nute ih thinharnak kha leitlun ih thilthleng (incident) pakhat tiah ka rak cuan liam ti ka kaiaw.

Mai Sokhlei par ih rak ttong dahmi hi ka duh zet. “Milai thuhla (mi pakhat khat si loin) hi ka helhkam. An dinhmun cio ihsi an tuarnak le hmuhdan ding khi ttawmpi thei ka zuam. Cuti’ va ttawmpi thei ding cun thinlung ngaingai ih anmah ka va duhdawt hmaisat a ttul,” a ti.

Mi tampi cun milai thu si loin mi pakhat thu sawn kha kan helhkam. Kan helhkamnak san hi vun ciik ngaingai sehla doksan le thuduh danghlan thilthu men a rak si. Cui’ rahsuah cu mirel le thu thei si duh nak fang hi a rak si . Cipciar sin ih kan sim a si le, keimah timi tlangmual ihsin milai le leitlun kan cuan a rak si ziar.

Cuti cu, cangantu si ding cun cafang ngan le cafang kom thiam, cafung thawi’ cahnah parih vun ngan, ttongkauseh vun hman kual cu a si mai lo kan ti thei.

(Visited 49 times, 1 visits today)

Comments

comments

One Comment

  1. Na ti tha nasa hi ca hin ka lung i fim ter ve asi. Ka lung awi.

Comments

%d bloggers like this: