Cancer Nat Ziangtin Na Thei Thei` Ding

Cancer Nat Ziangtin Na Thei Thei` Ding

Diverse Hands Holding The Word Cancer

Salai V Bawi Lian

Leilungtlun ih nat tihnungbik tin an ret mi lakih kan theih lar zet mi pakhat, CANCER nat hi ziangtin na nei le nei lo na thei thei` pei? Ziantin na ralring thei ding? UK ram ih an zingzoinak ihsin an hmuhsuah mi mallai thawn rakrinnak le theihfimnak nei dingin a tawinak in tarlang kan tum hnik pei!!

Cancer hi UK ram mipi pawl an thih ti phangtertubik a si. Tui din hmun ah million 2.5 lenglo in hinat an nei rero lai tiah hminsin a si.

A damnak ngaingai an hmuhsuak thei hrih lo mi, hi nat doneh thei dingin Cancer nat zohkhentu pawl in mipi zirhnak le thuhla theh zainak nasaten an tuah. A liamcia kum dang hnak cun nasa ngaiten a deem ih Cancer ruang ih mithi khal ruah lo piin zatek 10 lai an rak tlaniam tiin BBC cun tuikum ah a rak report hngehnge.

Hi nat ttihnungza hi kiangkap ruangih ngah theih mi a siih, cithlahtu thisen ihsi um peh vivo mi khal a um thei. Asinan ziangvek cancer khal zatek 30% tluk cu kham theih a si tiin zingzoitu, World Healh Organisation pawl an sim.

Ziang tivek in Cancer hi na thei thei` ding?

image

CUAP Cancer (LUNG Cancer)

Cuap Cancer ruangah kum tinten UK ramah mi 35000 lenlgo an thi ih natnak neitu hi kumtin mi 44500 an um. Hi nat nei ngah hnuhnu ih nungdamnak ding lam cu zatek 5% tluk fang a si. Asinan zatek 89% tluk in, Cancer ih a can ngaingai hlanah kham theih mi a si.

Cuap Caner hi taksa sung ih a ei siat hlan ah ci hnih in an then. Zatek 80% tluk hi Small-cell le oat-cell tiin an ko. Adang pakhat sawn tu non Small-cell timi hi cu a tam tuk lemlo. Asinan Small-cell hnakin a mi eiral a na ih damnak ding hrang ruahsannak um lo rori khawpi tihnung a si. Small-Cell sawn hi Cuap ihsin peeng dangdang ih fehsuaknak lamah hna a tuan ih cutin taksa a ei thok theu. Kuak fawhnak ihsin mi tamsawn in an ngah tiin UK ram ih Cancer zingzoitu, Cancer Research UK pawl cun an ti.

Natnak bik pawl cu; an thawthawt a har, cun thaw thawt ding nei mal vekin an um. A caan caan ah thisen an khuh suak theu. Culawng siloin khawsik le taksa tthawp vekin an um phahphah theu.

Cutin vei le khat ah taksa ttumtawlin, mahten an baang ciamco.

Mipi harhdamnak hrang ngaihventu pawl in ralrinnak ding ih an thehlarbik mi cu, cawl lo ih khuh tikah lole khuhkhuh danglam ih a um tikah sibawi ton lohli ding le khuhnak san felfai te ih theih ding hi a si.

Natnak thuukzet a khuar hlanah zatek 89% in Cuap Cancer hi kham theih a rak si.

Behttheh Cancer – Prostate Cancer

Himi cu mipa pawl ih neih mi a si. Ziangah tile mipa zahmawh le phuu karlak ih ummi ihsin suak mi a si. Kumtin te hinat hi mi 47000 lenglo in an nei ih mi 11000 tluk cun an thih phah. Zatek 84% in nungdam theinak lam cu a sum tiin Cancer Research UK pawl cun an ti.

Hi nat hi theihcih mai theih mi nat a silo. Nuamte ten a ra tthang mi a si. A natnak ih taksa a ei thok ti theihtheinak pakhat cu zun thawh har, lole zin feemte lawng ih thawh tivek in theih a theih.

Cutin nuam tete in ke le tasak natnak dangdang a suah piih ke hit, phuu le rilpi lam tiang in a ti na.

Zin thawh dan danglam leh harsatnak a um veten sibawi hnen ih zohfel awkter lohli in tuanten a kham thei mi a si.

TAW Cancer – Bowel

Hi mi cancer hi, tol’ lole tawkua ih natnak a siih UK ahcun mi 20 ah pakhat tluk in an nei tiah hminsin a si. Kumkhat ah mi 41000 in nat an nei ding tiah zum a siih, mi 16000 in an thih phah tiah hminsin a si. Nungdam theinak hi zatek 57% tluk a siih, zatek 54% tluk ih kham theih mi a si.

Hivek nat hi kum upa lam ah a luar zet. Ziangruangah tile an eiin mi pumpiin a rial nehlo, sa ei tamnak ihsin an taksa ih thisen ih a pek suak, feh dan punghmanlo tivek ruangah a si tlangpi. Taksa rittuk ruang khalah hi nat hi a ngah theih thotho. Zu le kuak ruang khalah a ngah theiih, sungkua cithlah thisen ruang ih cithlahnat cikhat khal a si thei mi a si. Rawl ei caan neilo, duh poh ih eiin einak pawl khalin a cang thei mi a si.

Hi nat an neih tikah an ek thawh a har, ek ah thisen a tel ih rei pipi ek inn ah an to. Sung dok le ek thawh har in an um cingcing. Cun taw um dan ihsin a phunphun theihthei zet mi langdamnak pawl a suak.

Vei le khat ah taksa a ttumttawl thei. Thazaang hrang ei le in miin zianghman cahnak lole a hnatuannak a bawmlo tiih theih awk veten, sibawi pan in ngaihven awk lohli ding a si.

Pawhte Cancer – Breast

Leitlun ih Cancer tambik hi CUAP cancer a si tiah hminsin a siih a sangtu hi Pawhte a si. Pawhte cancer hi kum upa lam in an nei tlangpi. Asinan kum note lai khalih neih thei mi a siih mipa le nunau ah a um thei veve mi a si.

UK ram ih an zingzoihnak ah kumkhat ah mi 53000 in nat an neiih 11000 in an thih pi. Nungdam theinak hi zatek 78% a siih, zatek 27% hi kham theih a si.

A nat dan hi mitampi cun Pawhte ih khal le bawk ummi lawng tiin rak ruat an tum theu. Asinan,Breast Cancer Care timi, pawhte cancer lam ngaihventu pawl cun, hivek menmen lawng a silo tiin an ti.

A tuum le tet a thlengawk dan hmanlo, a pianphung danglam deuh, a rong thleng awknak, zakkiang ihsin thling deuh lole malte na deuh ringring vek khalin a thok thei mi a si.

Pawhte hmur ihsin khalin a nat hi a thok thei thotho ih malte teh a um dan an dang deuh vivo lole sen deuh vivo nak tivek in a lang hmaisabik theu.

Pawhte ih danglam deuh, theihthiam lo mi; a um dahlo mi a um veten sibawi hnen ih zohter hi a fuh bik a si.#

Ref:
– Cancer Research UK
– Time
– World Health Organisation

Comments

comments

Comments

%d bloggers like this: