Camkhat Lai ih Mero

CAMKHAT LAI IH MERO


Na zaam nawn lonak ih um ka zuam lo

Tlangsang tlun ih na lenlai ka ngai

Mero pawl thlir in ka lo  duhnak pawl ka rak thuptheh

Ka lo ngaituk thla-engte

Tonsalnak ding caan a fiang nawn lo

A raumi kan hmailam khi thlir hnik aw

Tontheihlo le biaktheihlo in nang

Kan karlak ih in hlattertu ziang a si?

KEIMAHTEN KA THA A RAK NAU CUTEH!

NA HRANGAH KA TLING LO KA RAK TI CUTEH!

Leitlun ih Neihsiah le sumsaw pawl ka rak thlirsual ruangah maw

Na hnen lo pan ngam ngai lo in

Kumkhua taangcuum  in ka lo hraam…

A thianghlimmi ka lungsung ih Duhdawtnak pawl

A tuteh manneizet in na ruat lai maw?

Thleidannak mit a meng lomi na duhdawtnak pawl ka ngai

Ka ngai tuk!

Khui ah na um? Tongawk sal thei sisehla veikhat te khopten lo zohta ka duh

Lungthin sung ih thuthup pawl iik thluahthlo in lo simta ningla ka duh

Ka lungthin thuukbik ih HMUN a khuartu Thlapa te

Ka lo ngaituk

Ka lo ngai tihman simtheinak neilo in ka ni le caan pawl an liam

Diriamten lo simta man lo in kan then aw

“In rak leng theu aw…ka feh hlan sungcu”

Lungkuaiza na aw note, A forzikmi na mithlipawl kumkhua in ka fingkhawi ding

Hnangamten feh hrih ko aw

Na thu le hla pawl ka rak zingzoi theu ding

Ka lo duhnak pawl ka phau theu ding

Zohman ih theihthiam lo ding in

Na kaidahmi Thawphat kung le Na fingkhawi dahmi rose par te tla

Vuai hninghniangten an umlai sokhaw

Nan cang parih pangpar zaam tla Sipin pawl in an thlo faithluh zo sokhaw

Pangpar hnah til ro tete cu ka diary sungah, ka lo hmuh leh ding

Nan dawr ih I pekdahmi Niciasih mu (15) lai tuni tiang Plastic in ka retlai

A sauzetmi na kutzung ziarzi pawl ka ngai

A mawitukmi na mit le na hmur, na hnar na aw note

Tluang rihriahten a neemzetmi na sam

Ka lo duhdaan cu….

Na thu le hla ruat lo in nikhat hman caan ka liamter sianglo

Lo co ding tengteng ka tum dah lo

Riahsia le lungawi cing in ka lo zoh, ka lo hraam, ka lo sunsak

Na muithlam lawnglawng ka hmu

Muithlam ih pianhmang maw Pianhmang ih muithlam sawn si?

Falam Biazai ngantu pawl Ka rak sut hngai sal ding

Nangmah taktak teh khui ah na zaam

A sangzetmi tlang tlun ah hung zaam sal aw

A hninghno mi thingram pawl tlun ah hung zaam sal aw

CAMKHAT LAI IH MERO

Hretaai

Comments

comments

Tags:

Comments

%d bloggers like this: