CAM Pu No Than Kap Khuiah A Um?

1238004_530599717006587_335528546_n

Tu hrawng cu Meifar zungah “Pu No Than Kap Naypidaw ah thawng a tla an ti mi hi thungai ngai mawsi?” ti mi thusuhnak nitin kan dawng.

Hi thu a ra suahnak hrampi cu July ni 17 zan, palik bo khat Ceupi (CAM kiltu in um theu) cu rittheinak a kaih mi sungin amai hrangah lak thup mi a um a si ti mi thu ah a inn an check. An check tikah pistol pakhat le cerek 30 an kai ngah. Cumi meithal cu CAM Pu No Than Kapih ta a si ih, keimah i retter mi a si tin, Ceupi in a rel ruangah ‘Pu Than an kai ih, thawng a tla’ ti mi thuhla a ra suahnak san a si hmang.

Hi thil cang mi ruangah CAM thuhla ah thulengvak tampi a suah phahih, mipi khal zum ding maw zum lo ding ti khal thleidang thei loin thinlung anhai in an um phah thluh. Curuangah Meifar Media cun thuhla cinfeldan le thufiang cu mipi hrang ruat in a run pholang a si.

Thulengvak pakhat khat a ra suah tikah, cui thuhla cu zum mai ding a si le si lo kan thliatdang thiam ding hi a thupi ngaingai. Tnk, CAM thawn pehparin tuihlan khalah thu phunphun a rak suak dah ti kha ruah a tul.

1. CAM si dingin 2010 hrilawknak ih a cuh tum laiah, NTK cu Tapung hotu hlun a si ruangah hrilawknak ah a tel thei loih a hmin khal Cozah in an hlonsak, tiin a rak thang dah.

2. 2010 hrilawknak ngahtupawl hmin cazin a suah tikah, Sagain ramthen sungin Pu NTK hmin cu a rak suak thei lawk lo. A san cu amah me petu hi Naga ram ih Nanzun peng tiangin a si tikah an me pawl kha lamzin harsat ruangah hmunpi thleng thei lohli loin a um. Cutin a hmin lang thei loin a um tikah, Pu NTK cu Cozah lamin a hmin an phiat zo; a tling thei nawn lo tiin a rung thang lala.

3. Rampi sungih Pu NTK vek vuanci 29 hmin puansuah a si tikah, Cozah zung lam hnatuan fel tawk lo ruangah Pu NTK le Shan Vuanci (Sagaing) cu an hmin tel ve loin  a um lala. Cucun, Pu NTK cu Vuanci ah a tling lo tiin thulengvak a rak suak ciamco dah.

Mangbangza a si mi cu Pu NTK in Vuanci kum hnih a tuan tiang Lai khawte hrekkhatah Pu NTK cu Vuanci ihsin a tlak zo, Vuanci a sinawn lo, ti mi thu hi a zumtu mipi an rak um lai hi a si!

Tuitum thu ah vun lutsal sehla, Pu NTK in meithal cu a retter mi amai ta taktak si cingin ka ta a si lo a ti hrim ahcun Ceupi a phatsan tinak a si. Asinan a ret mi si lo, amai ta taktak khal a si lo ahcun Pu NTK in khai meithal kha ka ta a si ti hmansehla, Ceupi kut sungah kaih ngah a si tikah Ceupi cu daan vekin fehpi thotho ding a si ding. Tnk., rukru ih ruk mi thilri cu ruk mi a si ti thei loin a rak leitu an um asile rukruk thawn a leitu thawn an tuar veve vek khi a si ding.

Mipi kan fim a tul. Mai theihfiang lo mi thu ah kan hruaitu lepawl hi kan zumhmangin duhduh kan puh mai ding a si lo. Thu rak umdanpawl vun thlirkir in thil cang mi hi a hmuhdan le pawmdan cintawk kan thiam a cu thlang.

Netabikah, mipi buainak sutkiangsak dingin Meifar Media cun CAM Pu No Than Kap cu phone in a vun bia: “Naypyidaw ah thawng tla vekin an lo rel hiamhiam ih, tufang khuiah na um? Ziang na tuah? tipawl hi in sim theikem?” tin a sut. Anih cun, “Tu in biak laifang hi Monywa Hlutdaw ah Kalaymyo ih Pu Khin Maung Than te thawn kan totlang rero,” tin in sawn. A cu ngaingai in!!!

Comments

comments

Comments

%d bloggers like this: