Ca-ik Thupi Pathum

13336024_1107340429323240_4813279416933918084_nRam pakhat ih cozah zungpi pakhat uktu bawi in a hnattuan a suahsan ruangah, a aiawh ah uktu bawi thar pakhat an ret. Bawi hlun in bawi thar hnenih hnattuan ding pawl a hlan mi lakah, ca-ik thupi zet pathum khal an tel. Ca-ik pawl cu zaran dinhmun ahcun zoh lo in, buainak sungih a tartahak taktak can lawng ah zoh ding ah a cah ta fawn.

A hmaisa kum hrek sung cu an zung ih hnattuan pawl a tluang thawkhat. Asinan thla ruk a cem tikah anmah thawn a pehpar mi zung dang pawl le mipi pawl hnen ihsin lungkimlonak pawl, heknak ca pawl a hung thleng ciamco.

Cutikah pawhdawh sungih a ret mi bawi hlun ih ca-ik pathum kha a vun mangsuak ih, ca-ik pakhatnak cu a phorh. A sung ahcun, “Na hlan ih rak ttuantu kha mawhpuh mai aw, thil a feh tluang mai ding,” timi a ngan aw. Curuangah bawi thar cun zung ih hnattuantu hmuahhmuah ko in cakkhai lairelnak a tuah ih, tu ih an ton mi hlawhsamnak pawl hmuahhmuah hi bawi hlun ih depdetnak pawl le santlaihlonak pawl ruangah a si thu, fuh zetzet in a simfiang hai. Cumi a tuah hnu cun an zung ih hnattuan pawl cu an remcang sal vekah a cang.

Asinan a lehhnu kum khat hrawng a rei tikah, an zung ih hnattuan pawl cu an baibah cuapco lala. Asinan a thin a har lo. Bawi hlun ih pek mi ca-ik pahnihnak cu rinsan zet in a phorh mai. Ca-ik pahnihnak ahcun, “Nan zung kha a cang theitawk in remtthatsalnak tuah aw, thil a feh tluang mai ding,” timi a ngan aw. Bawi thar cun ca sungih fial mi vekin, an zung sungah dinhmun kaisanternak, dinhmun thleng danglamnak, zung ukawk dan remsalnak le thlengawknak dangdang a tuah. Vantthat thlak zet in a lehhnu thla ruk sung cu buainak dang zianghman an tong nawn lo.

Thla ruk a liam tikah a hmaisalam hnakih luarkai sawn harsatnak pawl an tong lala. Asinan bawi thar ih hrangah pawk ding mi ruahsannak hridai pakhat te cu a um lai. Curuangah rinsan zet in pawhdawh sungih ca-ik pathumnak cu a vun phorh. Ca-ik pathumnak ahcun, “Ca-ik dang pathum timtuah mai aw, thil a feh tluang mai ding,” timi a rak ngan aw pan lo maw!

Hminsin: David Vallantte ih “Three Envelopes” leh-her mi a si.

Sianglianuk Kianghrol

(Visited 80 times, 1 visits today)

Comments

comments

Comments

%d bloggers like this: