C3 Hlaphuah Zuamawmnak In Chin Mino Le Lairawn Mipi A Co

10744694_810441022353278_101724023_n

Van Bawi Lian
October 24, 2014

Tahan: A hmaisabiknak hrang Chin mi hla phuah zuamawknak a si mi Chin Composing Contest (C3) cun Lairawn ih um Chin mino a co zet ih tel dingin mi 60 lenglo in an hla phuah mi an ap zo ti in thu kan dong.

Hi hlaphuahthiam zuamawknak hi Chin Literature Forum pawl ih saithawtnak in le a sungtel bulpak tlawmngaipawl thawhkhawm mi ih tuah ding mi a si. Tuah suak a sitheinak dingah kyat ting 60 lenglo khal sumkhiah ruahmannak an nei.

Mipi hmaiih zuamawknak ahcunmi 13 vial phosuah an si ding ruangah a hlankhanin thletfimnak(Audition) voi hnih tuah ta a si ding. A veikhatnak thlitfimnak ahcun hollow guitar lole Keyboard asilole sound track(minus one) vialih sak ding a si peiih YES or NO in hril an si ding. First Audition zuamtu zate sungin thiam cuangmuar mi 20 pawl hriltlin an si hnuah cui mi 20 pawl cu judges hmaiah Music Band thawn Second Audition an nei peh sal ding. Second Audition ahcun Marking Scheme hmangih mark pek an si thlang ding.

Second Audition ihsin mark sangbik mi 13 a ngahtu hrilsuah sal an si peiih cupawl vial mipi hmaiah EFCM hall ih show ding an si tiin thu kan dong. Tui ttum C3 zuamawknak dingih awnmawi tumtu ding Band hi 3Amen Band an siih hla test khal anmai studio ah a si cih ding thu theih a si.

‘Beisei vekte ih a um thei a sile thletfimnak ihsin mi 20 thursuak in Second audition tuah sehla ti kan beisei First Audition cu hollow guitar lole Keyboard lole sound track thawn vialin IPCM Bethany GA meeting hall ah YES or NO vialin hril an si ding’ tiin C3 ih zohfeltu pawl hotu Jesse cun a sim.

Judge ah hin hlom hnih in an um ih Music lam le Text lam zohdiktu tiin an then aw. ‘Judges lamin mah le zohdik mi line cio ah comment le thusuhnak kan tuah tum. Duhsan cu neta hlaphuahtu in ziang zawnah an sam ziang zawnah an cuangmuar timi an theih kan beisei ih Ziangruangah ziang zawnah mark cuzat khazat na ngah/ngah lo ti kha tawi famkim ih comment kan tum.’ ti tla in Jesse cun a simtel.

Hi hla phuah zuamawknak an tuahsan bik cu Chin mi hlaphuah thiam pawl cawimawi an si theinak dingah le an thiamzung pawl upat an si theinak ding ruahsan in a si. Laimi Khawvel ih Composition zuamawknak hmaisabik a si.

‘Lai hla ih zuunngaih/ lengzel/ ram awih/ cottian/ cohram/ khawtlang lunglen hla ttha fing ziangmawzat suak bet ding cu CLF pawl ih an beiseinak pakhat a si.’ tiah a simbet.

Jesse cun ‘Kan beisei mi cu Puanzar phenih hlaphuahtu pawl phosuah(icon) hi kan tumtah mi a si ih an thiamzung(art thiamnak) sunsak le cawisan an hlawh thei khal kan ruahsan zet. Hlasaktu cu kan sunlawih cio nan a phuahtu hi credit pek an hlawh tak hrih lo’ ti tla in CT palai thawn an biakawknak ah a sim.

Tuittum C3 ih 1st, 2nd , 3rd ngahtu cu sunlawihnak Trohpy le capi hleiah sumfaiin laksawng ttha zet pek an si ding. Pakhatnak – Trophy, Capi le Ks.500000 pek a si ding ih Top 13 tiang tling zate khal an hla cu Live Show ih zukmi zuknung le interview thawn VCD ih suahsak ding an si. A zuamawtu zaten an ra fehnak lam a hlat le nai ih zirin an lamcaw man khal pek thei an beisei thu theih a si.#

(Visited 371 times, 1 visits today)

Comments

comments

One Comment

  1. Nan ti ttha tuk, a ralai ding caan khal ah tuah vivo thei uh, cun tui ttum khal ah zuamawknak video, online ih zoh theih in tuah tengteng uh, hivek thu theihnak in miphun a ti harh ih zuknung ih zuamawk lai zoh ding a um sinsin cun in tthangphawk zet zo tinak a si.

Comments

%d bloggers like this: