Bush Dennak Kedam Tuahtu Si Cuh Aw!

Surbung Tlang Thuthang
December 23, 2008.
By-Pasum
 
India leh Pakistan Karlak thu sosang    US in a ralbawi Pakistan ah thlah
India Prime Minister Monmahan Singh cun mizanah New Delhi ah India ramdang palai 120 hmaiah thusinmin Pakistan leilung ihsin misual pawlin India an rung tibuai ringring ruangah India in a sanlet ve a ttul ati. Mumbai ih buainak nasazet a thlenhnu in India leh Pakistan karlak thuhi nikhat hnu nikhat a sosang vivo ih. India ralkap bawibik General Deepak Kapoor cu Pakistan ramri Siachen vurram leh Jammu & Kashmir leh hmundangih ralkap pawl timtuah awkdan zohfel dingah fehter asizo. General Deepak Kapoor hin ramri tluanih ralbawi dangpawl khal a hmu vivo dingih  a ttulmi thilah hmainawr vivo dingih forhfial nak aneiding tiah zum asi.
 
Himi laiah Pakistan khalin a ralkap raldo nak vanzam pawlcu khawpi dangdang ah a zuangkual ter ciamcove ih India ramri ah ralkap a kuatbet ciamco ve.India khalin Pakistan ramri ah Air force leh ralkap tamzet a ret rero ve.  India ralkap pawlhi Jaisalmer, Barmer, leh Bhuj ah retbet rero ansi. Punjub khalah BSF pawl ralringzetin umter ansi.  Pakistan Prime Minister Yousuf Raza Gilani cun an ramcu humhim tengteng a tumthu a simih  India ramri buainak hmaitawn dingah Pakistan cu a ralring asi ati. Pakisten Prime Minister cun an ramcu a himtawk ti khal simin  an ralkap pawlcu an caktawkih Pakistan ram humhim dingah a ralkap pawlcu an ringtawk asi ati. Mipi leh ralkap pawlcu Pakistan ram humhim nakdingah an lungrual tikhal asimbet. Hiti vak dinhmun asi ruangah  America khalin a ralkap hotu lu Joint Chief of Staff Admiral Mike Mullen cu zamrang zetin pakistan ah a thlahih  Pakistan cozah mipawi mawh pawl a kawmcih ding.  America ralbawi Mullen hin Pakistan President Asif Ali Zardari leh ralkap uktu General Ashfaq Parvez Kayani khal a kawm dingih  Pakistan National Security Advisor Mehmood Ali Durrani cu mizan ah a kawmzo. America hin Mumbai buainak ruangah Pakistan cu misualpawl parah khohkhah zetih thilti dingin a nawr ringring…
 
Bush dennak kedam tuahtu si cuh aw
 
 US President Bush dennak kedam tuahtu Turkey ram Company cun hivek kedam hi a leiduh an tamtuk ruangah a tuahtu hlawhfa minung 100 lenglo a ruaibet tiah ansim. Istanbul ih Baydan Shoes cun  hi kedam hi kantuah asi tiih an puanhnuah leitlun ram dangdang ihsin a leiduh tuhi an tamzet tiah ansim.  Hi kedam hi model 271 anti ttheu ih  tu ah cun Bush shoes ti’n a hmin an thlengzo.  Bush dengtu Muntader al- zaidi ih nau  Zeidi cun hi kedam hi Turkey tuahmi silo in Iraq tuahmi asi a zumthu asimve. a naupa cun sumdawng pawlin hlawknak dingih an rakhmangtum cu pawi atithu khal asim. Bush dennak kedam hi Syria khalin an mai tuahmi in anrak relve ih cun Egypt Company khalin an mai tuahmi in anrak relve. US Company pakhat cun himi vek kedam hi bun 18,000 an order ih Iraq ah bun 15,000 kuat an tum. ..
 
Himi laiah Bush dengtu Muntader al- zaidi cun tikcu remcang umsehla Bush cu densal acak thu a simsal. A naupa Aday al- zeidi cun a upa cu thawngin ah nasazet in  an hremih a duhlo cingin  ngaidam dilnak ca an nganter asi ati. President Bush a den ruangah a thubuai cu tuithla 31 ah Iraq Higher Judicial Court ah relsak asi dingih. a mah hi tuithla 14 ih ankaih hnuah kuakvam in an dep ciamco ttheu  tin an sim. Iraq ralkap pawlin an hremnakah a ha khal an thawngbalsak thluhih Thawngin sungah hin a bawngbite khal an hlihsakih   Zialpi laifangah an ih terih mi pakhat patumpi in tidai a tawih ciamcoih hrihrual in a vuak ciamco betih a hmaikhal a dup thluhih  a hnarkhal tthit ttulkhawpin a a tlek a ban leh a ke a thlingthluh tin an sim..
 
Franch Engineer pawlin Cable hricat peh
 
Leitlun ram dangdangih Internet leh Telephone thatheilo   Mediterranean Tipi thuanthum hnuaiih Cable hri tumpi siatcu Franch Engineer pawlin an tuah ttha rero lai. Robot Submarine hmangin tipi thuanthum hnuaiih Cable zamcat cu  a zim leh a zim hawlsuakin an laksuah hnuah Engineer pawlin an pehsal ding. Hi Cable tumzet hi kandung tlawngkai ninga ah khan  Sicily leh Tunisia karlak ih cat asi tiah theih asiih  Egypt cun cable hripi dang sihin Internet leh Telephnoe an ti tthathei thlang tiah ansim. Asinan Middle East ih ram tampi ah hi hripi cat ruangah  internet leh Telephone ah nasazetin  buainak an tawng. Franch mithim pawlhin  Tipi thuanthum sunglut lawng Robot hmangih mawnmi, Hector hmangin Cable cathi an hawlsuakin nihnih thum sungah cunan tuah thatsal thei zum asi. hi Cabla cat hi Tipi thuanthum sunglut lawng hnuailam ih caicehpi in a hrutcat asi dingtiah zum asiih. Hi vek Cable tumpi lawngin ziangtin a hrutcat thei ding tihi khawruah harza asi tiah mitampi in an ruat…
(Visited 66 times, 1 visits today)

Comments

comments

Comments

%d bloggers like this: