Bush an dennak Kedam kha

Surbung Tlang Thuthang

December 17, 2008

Palestinian President Mahmud Abbas cun Middle East ih rualrem nak hngetkhoh a um vivo thei nak dingah US rawlh aw dingih sawm tumin Washington a panzo, President Abbas hin tuikar tlawngkai ninga Fri ah khin President Bush a tawngding, Palestinian President Abbas hin zamrang zetih US a pannak sanhi kumthar January ih Israel ram hrilawk nak neihding miah Miral thazet leh mi kawlhsen zet Benjamin Netanyahu cu Prime Minister asi sal zumnak a um ruangah asi.

Palestinian President Abbas hin Bush ihhnenah Israel in cozahthar a neih tikah Middle East ih rualremnak an raktuah tlangzo micu pahbalsal lo dingih hma lakpi dingah a sawmtum tiah Palestinian palai Saeb Erakat cun a sim. Israel leh Palestinian rualrem awknak thuthlung kum 7 sung raktawp zomicu nikum 2007 ahkhan US Maryland ih Annapolis ah US ih hoha nakin rualrem nak thuthlung hi raktuahsal asi. Israel le Palestinian ramhnih rualrem nak tuahmi hin lamzin tluang a zawh vivo dingih zumnak sangzet a um laiah Israel ram hrilawk nakih Benjamin Netanyahu Prime Minister ih a tlingsal pang asiah cun rualrem nak thuthlung an tuahcia mi pawlhi a siatbal sal thluhding tihi President Abbas in a phan bikmi asi. Benjamin Netanyhu hi Palestinian thawi rualrem awknak tuah duhlo zettu Likud Party hruaitu asiih Cu ruangah palestinian pawlin Israel PM asi dingcu an ttihzet..

UN Secretary General Ban Ki-Moon cun UN Secretary council ih thu a simnakah Zimbabwe President Robert Mugabe in UN rawlh awk a sianlo ruangah Zimbabwe ram buainak ah UN in thilti theimi a neimalzet tiah asim, Pu Ban Ki-Moon cun Zimbabwe ramih tihri natnak lengrero cu Zimbabwe ram tlaksiat zia leh cozah tthatlo ruangah ti langsar zetih langtertu asi ati, mipi hrang ah i-in ding ti le rawl, sumpai,fimthiam nak, harhdamnak, mipi diknak canvo, HIV/ AIDS leh thildang tamzet ah Zimbabwe cozah cu a hlawhsam a tibet, UN ih a zohnakah Zimbabwe ramih tihri natnak ih mithi cu 978 an kimzoih tui kandung naite ih cozah ih a puandan thawi tahtthimin zaa ah 25% in mithi hi an pungtam man asi. UN co-ordination of Humanitarian Affairs cun hi natnak hi Zimbabwe khawpi Harare ah a lengtambik tin asim. Himi laiah Zimbabwe ramih a cozah kailaitu Zanu-PF leh Opposition party Movement for Democratic Change pawlcun zozah nak tuahtlang dingih rualrem tei canvo zemaw dingih biakawk nak a rak neihmi cu titawp hrih asi.

US President George Walker Bush kedamih vawihnih dengtu Iraq TV Journalist Muntadar al-Zaidi kum 28 micu mizan sunah court ah hruai asiih Zaidi in President Bush cu ka kedam in a deng rori asi tiah court ah a sim tiah Iraq high Court judicial Council thu puangtu cun asim.
White House thu puangtu Dana Perino cun President Bush cun Kedam ih den a tuarruangah thin natnak zianghman a neilo tiah a puangih Bush cun a mah dengtu ih thuhla ngaihtuah dingah Iraq Court cu a rinsan tawk thu khal asim. Cumi laiah Muntadar al- Zaidi ih Unau pawlin Zaidi cu Iraq police pawlin an hremnakah a kut leh a hnakruh a kiakih a pumin thisen a suak an timi cu thildiklo asi tiah police thupuangtu cun a simve.

Iraq High Hudicial Council thu puangtu Abdul Satar Birgadr cun Muntadar al-Zaidi cu Bush thah tumih puh asiih Court in thiamlo a coter asiah cun kum 15 tiang thawng thlak theihih paisa tampi kuanter theih asi tiah asim. Himi laiah Iraq Journalist pawlcun Zaidi cu hremnak natuk pelo dingin court cu an dilve. Muslim ramih minung tamzetin hi Bush dengtu TV Journalist Muntadar al- Zaidi hi an ngaisang zetih President Bush a dennak a kedam hi Dollar Million 10 ih leiduhtu tamzet an umzo tiah ansim..

South Korea flim star hminthang leh larzet Ok So-ri cu a uire ruangah court in thlariat 8 thawngthla dingin hremnak ape, Ok So-ri hin a pasal Park Chul cu a thlim ttheuih Pop singer larzet pakhat thawn mipa leh nunau sinak an hman theuthu court ah a phuangih cu ruangah court cun hremnak hi ape asi. South Korea danah Uire nakhi thilsual Criminal Affence asi timi danhi kum 50 lai hngetzet in an rakhman zomi asiih Uire court in thiamlo aco termi cu kum 2 thawngthlak theih ansiih asinan Ok So-ri cu thlariat ah timalsak asi..

Pakistan President Asif Ali Zardari cun India thawi an ram boruak se vivo thuhla relkhawm dingah Cozah hotu pawl a kokhawmih Prime Minister Yousuf Raza Gilani leh Cabinet Minister pawl an telkim, hi an meeting ah hin India thawi anram buainak sosang vivo thuleh US Secretary of State Conddleezza Rice leh British Prime Minister Gordon Brown in Pakistan ramsungih misual pawl dawisuak dingih nasa zetih an nawrnak thu tampi pawl an reldingah zum asi..

(Visited 64 times, 1 visits today)

Comments

comments

Comments

%d bloggers like this: