Burma Ti In Maw Myanmar Tiin So Kan Ti Ding?

Burma Ram Feh Dan Ding Part XVII

Dr. Run Bik Taithio

Himi cahram pawl ka ngan pek Part I ah khan kei cun Burma ti hi ka run hmang ding tiin ka ti zo. Kawl tong ih ka tong ahcun Myanmar tiin ka hmang ko ding. Asinan English ih ka tong ah maw Lai tong ih ka tong lai ah maw cun Myanmar ti hmang lovin Burma ti ka hmang ding.
Burma ti hman tengteng ka duh ruangah tui acozah pawl an ngeh lai ahcun harsatnak ka tong ding ti khal ka thei. Thutthimnak ah, tu ah NGO fate zet Burma Charity Fund ti ka nei. Tufang ah Rangoon ahcun tlung seh la, Burma ti hmin hmang cun ka NGO registration ka tuah thei lo ding ti ka thei ko.

Leitlun ah dan zawh kim thei ti hi kan um lo ding. Pi Suu Kyi khal tuitum ih Europe a tlawn nak ah 2008 danpi a pahbal theunak a um ta riai. Cucu English ih a tong nak ah Myanmar ti hmang duh lo vin Burma ti a hman theu mi hi a si. Kei cu ka lung a awi lawlaw fam teh. 2008 danpi ahcun English i an ngan nak khal ah The name of our country is Myanmar an ti ding. Cucu Suu Kyi cun a pom ta ria lo. Pi Suu Kyi vek in kan nih pawl khal in ka pom lo. Pi Suu Kyi si lo, MP dang pawl cu sisehla cun an ban rori ding. 2008 ih thlipi Nagris a hran ruang ih Burma mi thawng sawm tel an thih tum ah Burma sung ih Burma bomnak ramdang hotupawl thawi an tawlrel nakah British palai in Burma ti a hmang ih cucu Kawl hotu pa in a don ih British pa cun Burma ram sung nanana ah cun Myanmar tiin a thleng leh.

1989 hrawng ah khan a si ih tui ralkap  cozah in Mirang tong i kan tong khal ah Burma ti kan hmang nawn lo ding, Myanmar ti kan hmang ding an ti i, Rangoon kan ti nawn lo ding ih Yangon kan ti ding an ti. Himi thu ah Pi Suu Kyi cun kan ram democracy a si ngai ngai tik ah mipi aiawh pawl thawn tha ten kan rel tlang ding i, ziangtin kan hmang ding ti cu kan ngaihtuah leh ding a ti.Ka lun a kim nasa. Tui tum i MP a si hlan khal ah, Rangoon i um cing in Mirang pawl i interview an tuahnak ah Burma ti hi a hmang ringring. USA, British a cozah pawl khal in Myanmar ti hi an hmang duh lovi, Burma ti hi an hmang thotho. Ralbawi pawl ih duhzawng an thlun duh ce lo. Cu vek tho tho in Britain ram i newspapers pawl, USA iTime, Newsweek ti vek pawl, BBC radio ti vek pawl khal in Burma ti hi an hmang sawn rero a si. Kei khal hi ka theih tawp in Burma ti hman lam ah ka tang ring ring ding.

Ram hmin hi a thupi tuk. Russia ram kha 1917 i Communist ram an run din tikah khan Russia si lo miphun an ram sung i um pawl lung kim nak ah tiin Russia ti tel lo lawlaw Union of the Soviet Socialist Republic (USSR) tiin an ram hmin kha an run phuah a si. Soviet Union a keh siat hnu lawng ah Russia ti hi an run hmang sal men. 1966 ah khan a si i,Rangoon ah phun 10 ka zir. Cumi kum ah Burma cun football ah Asian champion an ngah. Footballer Rangoon i ra tlung pawl cu Kamayut Hletan i sin kan rak hmuak. A tir ah cun lungkim zet in ka rak hmuak ve i, a si nan Kawl pawl i doh Bamar kuah, an ti tam tuk tikah kei mah le kei mah Bama ah tel lovin ka hmu aw. Cumi tum i sin kan ram a that ngai ngai nak ding ah cun ram hmin khal thleng a tul a si hi ka ti thlang.

A si le ziang tin saw kan thleng ding.Kei cun tu hlan kum 45 lai i sin hmin ka duh mi cu Pyithongsuh ti seh la ti hi a si. Himi hi Kawl tong cu a si ko. Cule dictionary ah Pyitongsuh ti hin meaning 2 a nei ding.Pakhatah cun this is the name of a country formally known as Burma (Myanmar) an ti ding. A dang leh ah cun Pyitongsuh means the joining together of states or provinces within a country an ti ding.

Kan ram hmin  thleng duh hi kan Laimi hotu pawl ah cun ka thei ciamco lem lo. A si nan, Karen pawl cing cing, 2005 i seminar pakhat i Chiangmai, Thailand ka feh nak ah KNU hotu ralbawi tum pipi pawl, kei hnak i kum 2 /3 i upa pawl, Rangoon university that lai i LLB tivek rak ngah man pawl in an nih khal in Myanmar ti le Burma ti khal an rak duh cuang lovi, Shwe Ngiangngan (golden land)tiin maw culo le Irrawaddy ti khal in maw ti seh la kan rak ti ve tiin in sim. Ka thinlung te cun Karen pawl cing cing nan tawk a si hi ka ti.

Tu rori ah cun Kawl tong i ka tong ah cun Myanmar tihi ka pom i, Lai tong le Mirang tong i ka tong ah cun Burma tihi ka pom bik mi a si e.

(Visited 75 times, 1 visits today)

Comments

comments

2 Comments

  1. Burma le Myanmar ih definition in sim thei ah cun lungawi um zet ding.

    • Myanmar ti leh burma ih thleng thu ah, kan chin ram in kawl kut ih sin zalennak ngai ngai kan ngah tik len ka lo sim leh ding.myanmar ti leh burma ti ah ka caan leh ka ruah nak ka pe duh hrih lo kan lairam hi zing tin kan thang so ding, zing tin luat nak kawl kut in kan ngah thei ding,fim nak lam leh calai hi zing tin hmai ah kan theh darh dan ding ti hi tu lai kei mah influan tu bik a si. kawl kut hnuai ih kan um sungah cun kan rel rero khal len tidai sungih ci thu vek asi.

Comments

%d bloggers like this: